Mbela ito vulu okukwathela miilonga yokuninga aantu aalongwa?

1. Oshike shoka Jehova e ku ningila?

OSHE ende ngiini, opo wu ninge Onzapo yaJehova? Tango, owu uvu “elaka etoye,” tashi vulika we li uvu kaavali yoye, komuniilonga pamwe nangoye, komunasikola omukweni nenge okupitila miilonga yokuuvitha egumbo negumbo. (Mark. 13:10) Opo ihe gumwe okwi iyamba a longithe ethimbo lye olindji nokuninga oonkambadhala a kale ha konakona nangoye. Ekonakono ndyoka olye ku kwathele wu kale wu hole Jehova nowi ilongo kutya naye oku ku hole. Jehova okwe ku hilile kuye, naasho ngashingeyi wu li omulongwa gwaJesus Kristus, owu na etegameno lyokukala nomwenyo sigo aluhe. (Joh. 6:44) Kapu na omalimbililo kutya owa pandula Jehova sho i inyengitha gumwe e ku longe oshili naasho E ku taamba ko wu li gumwe gwomaapiya ye.

2. Oshike tatu ka kundathana moshitopolwa shika?

² Ngashingeyi sho tu shi oshili, otu na uuthembahenda wokukwathela yalwe ye tu wayimine mondjila ndjoka tayi fala komwenyo gwaaluhe. Otashi vulika hatu shi mono oshipu okuuvitha egumbo negumbo, ihe ohatu shi mono oshidhigu okupula omuntu tu konakone naye Ombiimbeli. Mbela nangoye osho ho kala wu uvite ngawo? Ngele osho, otashi vulika gamwe gomomaetopo ngoka ge li moshitopolwa shika ge ku kwathele. Otatu ka kundathana wo shoka hashi tu inyengitha tu kwathele aantu ya ninge aalongwa nosho wo nkene tatu vulu okusinda omashongo ngoka tashi vulika hage tu ningitha tu kakadhale okukonakona naantu. Ihe tango natu ka taleni kutya omolwashike tu na okukala aauvithi nosho wo aalongi yonkundana ombwanawa.

JESUS OKWE TU PA ELOMBWELO TU UVITHE NOTU LONGE AANTU

3. Omolwashike hatu uvitha?

³ Sho Jesus a li kombanda yevi, okwa lombwele aalanduli ye ya longe iilonga mbyoka ya li ya kwatela mo iinima iyali. Shotango, okwe ya lombwele yu uvithe onkundana ombwanawa yUukwaniilwa nokwe yu ulukile nkene ye na oku shi ninga. (Mat. 10:7; Luk. 8:1) Pashiholelwa, Jesus okwa li a lombwele aalongwa ye shoka ye na okuninga uuna aantu taya pulakene nuuna inaaya hala okupulakena ketumwalaka lyUukwaniilwa. (Luk. 9:2-5) Okwa li wo a hunganeke kutya aalanduli ye otaye ku uvithila aantu oyendji nosho wo komahala ogendji, ano kutya okuuvitha kwawo otaku ka ‘ningila iigwana ayihe onzapo.’ (Mat. 24:14; Iil. 1:8) Kutya nduno aantu oya li taye ki inyenga ngiini, aalongwa oya li ye na okulombwela aantu kombinga yUukwaniilwa waKalunga nosho wo shoka tawu ka gwanitha po.

4. Shi ikolelela kuMateus 28:18-20, oshike ishewe tu na okuninga kakele kokuuvitha kombinga yUukwaniilwa waKalunga?

⁴ Oshinima oshitiyali shoka Jesus a lombwela aalanduli ye ya ninge oshini? Okwe ya lombwele ya longe aantu ya vulike kwaashoka e ya lombwela. Ihe mbela elombwelo lyaJesus lyokuninga aantu aalongwa noku ya longa olya li owala tali longo kAakriste yomethelemumvo lyotango? Aawe, Jesus okwa ti kutya iilonga mbika ya simana otayi ka tsikila okulongwa nokuli sigo opethimbo lyetu, ano sigo “ehulilo lyuuyuni.” (Lesha Mateus 28:18-20.) Jesus otashi vulika a gandja elombwelo lye ndyoka sho i ihololele aalongwa ye ye vulithe 500. (1 Kor. 15:6) Nomehololo ndyoka Johannes a li a mono, Jesus okwa li a yelitha kutya aalongwa ye ayehe oya tegelelwa ya kale haya kwathele aantu yi ilonge kombinga yaJehova.​—Eh. 22:17.

5. Shi ikolelela kAakorinto yotango 3:6-9, Paulus okwa yelekanitha ngiini iilonga yokuuvitha noyokuninga aantu aalongwa niilonga yokukuna?

⁵ Omuyapostoli Paulus okwa faathanitha iilonga yokuninga aantu aalongwa niilonga yokukuna, noku ulike kutya otu na okuninga oshindji kaashi shi owala okukuna oombuto. Okwa li a dhimbulukitha Aakorinto, a ti: “Ngame onda kunu, Apollos e ta tekele. . . .  Nane omu li po epya lyaKalunga.” (Lesha 1 Aakorinto 3:6-9.) Tu li aalongi ‘yepya lyaKalunga,’ ihatu kunu owala oombuto, ihe ohatu dhi tekele wo nokukala tatu dhi tala aluhe ngele otadhi koko. (Joh. 4:35) Pethimbo opo tuu mpoka, otu shi kutya Kalunga oye ha kokitha oombuto ndhoka.

6. Tu li aalongi, iilonga yetu oya kwatela mo shike?

⁶ Otatu kongo aantu mboka “ya halelela oku ka mona omwenyo gwaaluhe.” (NW) (Iil. 13:48) Opo tu kwathele aantu mboka ya ninge aalongwa, otu na oku ya kwathela (1) yu uve ko Oohapu dhaKalunga, (2) ye dhi taambe ko nosho wo (3) ye dhi tule miilonga. (Joh. 17:3; Kol. 2:6, 7; 1 Tes. 2:13) Ayehe megongalo otaya vulu okukwathela aakonakoni moku ya ulukila ohole noku ya ningitha ya kale yu uvite ye li oshitopolwa shegongalo sho ye li pokugongala. (Joh. 13:35) Ngoka ha konakona nomukonakoni otashi vulika a kale a pumbwa a longe nuudhiginini e mu kwathele a lundulule “omadhiladhilo,” omaitaalo nosho wo omikalondjigilile dha puka. (2 Kor. 10:4, 5) Okukwathela omuntu a ninge omalunduluko ngoka monkalamwenyo ye otashi vulika shi pule oomwedhi odhindji, opo nawa a adhe elalakano lye lyokuninginithwa. Nonando otashi vulika kaashi kale oshipu, ngele okwa ningi omalunduluko ngoka otashi ke mu etela omauwanawa ogendji.

OHOLE OYO HAYI TU INYENGITHA TU NINGE AANTU AALONGWA

7. Oshike hashi tu inyengitha tu kuthe ombinga miilonga yokuuvitha noyokuninga aantu aalongwa?

⁷ Mbela omolwashike hatu kutha ombinga miilonga yokuuvitha noyokuninga aantu aalongwa? Etompelo lyotango, omolwaashoka otu hole Jehova. Uuna ho ningi ngaashi to vulu wu vulike kelombwelo lyokuuvitha nokuninga aantu aalongwa, kungawo oto ulike kutya owu hole Kalunga. (1 Joh. 5:3) Dhiladhila kwaashika: Ohole yoye yokuhola Jehova oye ku inyengitha nale wu kale ho uvitha egumbo negumbo. Mbela petameko osha li oshipu kungoye? Otashi vulika hasho. Sho wu uvitha egumbo negumbo oshikando shotango, mbela owa li wa tila? Kapu na omalimbililo kutya owa li wa tila! Ihe owa li wu shi kutya iilonga mbyoka oyo Jesus a hala wu longe, nowa vulika kelombwelo lye, notashi vulika mokweendela ko kwethimbo sha ka kala oshipu kungoye okukutha ombinga miilonga yokuuvitha. Ihe ongiini kombinga yokukonakona naantu Ombiimbeli? Mbela oho kala nokuli wa tila uuna to dhiladhila kombinga yasho. Otashi vulika osho ho kala wu uvite ngawo. Ihe ngele owa pula Jehova e ku kwathele wu sinde uumbanda mboka nowu kale wu na uulaadhi wu konakone naantu Ombiimbeli, ota vulu oku ku kwathela wu koleke ehalo lyoye lyokuninga aantu aalongwa.

8. Shi ikolelela kuMarkus 6:34, oshike ishewe tashi vulu oku tu inyengitha tu longe aantu?

⁸ Etompelo etiyali, ohole yokuhola aantu ooyakwetu ohayi tu inyengitha tu ya longe oshili. Pompito yimwe, Jesus naalongwa ye oya li ya vulwa noonkondo sho ya kala tayu uvitha esiku alihe. Sho ya li taya ka konga ehala lyi ikalela ya vululukwe po, ongundu yaantu oye ya mono. Jesus okwa li e ya uvitile olukeno nokwa tameke oku ya longa “iinima oyindji.” (Lesha Markus 6:34.) Okwa li e ya longo i itula mo, nonando okwa li a vulwa. Omolwashike mbela? Omolwaashoka okwa li e shi nkene yu uvite. Okwa li e wete nkene taya mono iihuna noonkondo nokwa li e shi kutya oya pumbwa etegameno, nokwe ya kwathele. Aantu kunena nayo oye li monkalo ya fa ndjoka. Nokunena aantu oye na omaupyakadhi noya pumbwa etegameno, nonando ohaya monika ya fa ya nyanyukwa noya gwanenwa. Oya fa oonzi dha kana kaadhi na omusita gwoku dhi litha. Omuyapostoli Paulus okwa li a popi kombinga yaantu ya fa mpoka kutya kaye shi Kalunga nokaye na etegameno. (Ef. 2:12) Aantu mboka otaye ende ‘mondjila ndjoka tayi fala mekano’! (Mat. 7:13) Uuna tatu dhiladhila kunkene aantu yomoshitopolwa shetu ya pumbwa okutseya Kalunga, ohole nolukeno ohayi tu inyengitha tu ya kwathele. Omukalo omwaanawa tatu vulu oku ya kwathela, omokukonakona nayo Ombiimbeli.

9. Shi ikolelela kAafilippi 2:13, Jehova ota vulu oku ku kwathela ngiini?

⁹ Otashi vulika ho kakadhala okutameka ekonakonombiimbeli nomuntu, molwaashoka to dhiladhila kutya ito ka kala wu na ethimbo lyoku li ninga. Ngele osho wu uvite ngawo, shi lombwela Jehova megalikano. Mu pula e ku kwathele wu mone gumwe ngoka to vulu okukonakona naye Ombiimbeli. (Lesha Aafilippi 2:13.) Omuyapostoli Johannes okwe tu shilipaleka kutya Kalunga oha yamukula omagalikano getu ngoka taga tsu kumwe nehalo Lye. (1 Joh. 5:14, 15) Ano oto vulu okukala nuushili kutya Jehova ote ke ku kwathela wu kokeke ehalo lyoye lyokuninga aantu aalongwa.

SHOKA TATU VULU OKUNINGA TU SINDE OMASHONGO GALWE

10-11. Oshike tashi vulika shi tu imbe tu konakone naantu Ombiimbeli?

¹⁰ Otwa tala ko oshilonga shetu shokulonga aantu sha simana, nonando ohatu taalele omashongo ngoka tashi vulika hage tu imbi tu longe oshindji miilonga mbyoka. Natu taleni kugamwe gomomashongo ngoka hatu taalele nankene tatu vulu oku ga sinda.

¹¹ Otashi vulika tu kale tu uvite kutya onkalo yetu itayi tu pitike tu longe oshindji. Pashiholelwa, aauvithi yamwe otashi vulika aakokele nenge kaaye na uukolele. Mbela nangoye onkalo yoye osho yi li ngawo? Ngele osho, ndhindhilika shimwe shomiilongomwa mbyoka twi ilonga pethimbo lyoshivu sho-COVID-19. Otwa mona kutya otatu vulu okuninga omakonakonombiimbeli taga ti sha okupitila miikwaelektronika! Onkee ano, oto vulu okutameka ekonakono nomuntu wu li owala maandjeni. Oshi na wo uuwanawa wulwe. Aantu yamwe ohaya kala ya hala okukonakona, ihe ihaya kala ye na ethimbo pompito mpoka aamwatate naamwameme haya mono ethimbo ya konakone nayo. Ihe aakonakoni otashi vulika ya kale ye na ethimbo pethimbo lyongula nenge kongulohi. Mbela ito vulu okuninga oonkambadhala wu konakone nayo pethimbo ndyono? Jesus okwa li u uvithile Nikodemus kongulohi, ethimbo ndyono Nikodemus a li ha kala a manguluka.​—Joh. 3:1, 2.

12. Oshike tashi vulu oku tu kwathela tu kale twa tompwa kutya otatu vulu okukala aalongi yOmbiimbeli haye shi enditha nawa?

¹² Otashi vulika tu kale twi idhina kutya itatu vulu okukonakona Ombiimbeli naantu. Otashi vulika tu kale tu uvite kutya otwa pumbwa natango ontseyo oyindji nenge uunkulungu wontumba, opo tu vule nawa okukonakona Ombiimbeli nomuntu. Ngele osho wu uvite ngawo, tala kiinima itatu mbyoka tayi vulu oku ku kwathela wu kale wa tompwa kutya oto vulu okulonga yalwe Ombiimbeli. Shotango, Jehova okwe ku tala ko wa gwana okulonga aantu. (2 Kor. 3:5) Oshitiyali, Jesus, ngoka e na ‘oonkondopangelo megulu nokombanda yevi,’ okwe ku pa elombwelo wu longe aantu. (Mat. 28:18) Noshititatu, yalwe otaya vulu oku ku kwathela. Jesus okwa li ha longo aantu shoka a longwa kuHe, shoka nangoye to vulu okuninga. (Joh. 8:28; 12:49) Shimwe ishewe, oto vulu okupula omutonateli gwongundu yeni yiilonga yomomapya, omukokolindjila ngoka he shi enditha nawa, nenge omuuvithi a pyokoka e ku kwathele wu mone nkene to vulu okutameka ekonakonombiimbeli nomuntu nankene wu na oku li ninga. Omukalo gumwe moka to vulu okwiilonga wu kale omulongi gwOmbiimbeli he shi enditha nawa, omokukala ho wayimine yamwe yomaauvithi mboka uuna taya konakona nomuntu.

13. Omolwashike twa pumbwa okukala tu na ehalo lyokulundulula omikalo moka hatu longo aantu?

¹³ Otashi vulika tu mone oshidhigu okulongitha omikalo omipe nosho wo iilongitho iipe. Omukalo moka ngashingeyi hatu ningi omakonakonombiimbeli ogwa lunduluka. Uuna tatu konakona naantu membo Kala nonkalamwenyo ombwanawa sigo aluhe, otwa tegelelwa tu kale hatu ilongekidhile nawa ekonakono noku li ninga momukalo gwa yooloka ko kwaangoka twi igilila. Uuna tatu konakona nomuntu, ihatu lesha we uutendo owindji nohatu ningi ekonakono pamukalo gwopankundathana. Shimwe ishewe, ngashingeyi uuna tatu longo aantu ohatu longitha unene uuvidio nosho wo iilongitho yilwe, ngaashi o-JW Library^®. Ngele ku shi okulongitha iilongitho mbyoka, popya nagumwe ngoka ta vulu oku ku longa nkene hayi longithwa. Tu li aantu, otu na egamo lyokuninga iinima momukalo ngoka twi igilila. Kashi shi oshipu kutse okuninga iinima momukalo omupe. Ihe kekwatho lyaJehova nolyayalwe, oto ke shi mona oshipu okwiigilila omukalo ngoka omupe noto ka mona enyanyu mokukonakona naantu. Ngaashi omukokolindjila gumwe e shi popi, omukalo nguka omupe ohagu kwathele “omukonakoni nosho wo ngoka ta konakona naye ya tyapule ekonakono lyawo.”

14. Otu na okudhimbulukwa shike uuna tatu longo moshitopolwa moka aantu oyendji ihaaya ulike ohokwe metumwalaka lyetu, nAakorinto yotango 3:6, 7 otaye tu ladhipike ngiini?

¹⁴ Otashi vulika hatu uvithile moshitopolwa moka aantu kaaye na ohokwe metumwalaka lyetu. Aantu yamwe otashi vulika ya kale taya monika ya fa kaaye na ohokwe metumwalaka lyetu nenge nokuli ya kale ompinge nalyo. Oshike tashi vulu oku tu kwathela tu kale tu na omukumo kutya aantu yamwe yomoshitopolwa shoka otashi vulika ya pulakene ketumwalaka lyetu? Inatu dhimbwa kutya muuyuni mbuka wa kolokosha oonkalo dhaantu ohadhi vulu okulunduluka nziya, naantu mboka ya li nale kaaye na ohokwe metumwalaka lyetu, otashi vulika ya tameke oku shi ndhindhilika kutya oya pumbwa ewiliko lyaKalunga monkalamwenyo yawo. (Mat. 5:3) Yamwe mboka ya li haya tindi aluhe iileshomwa yetu, konima yethimbo oya ka zimina ya konakone Ombiimbeli. Otu shi wo kutya Jehova oye Mwene gweteyo. (Mat. 9:38) Okwa hala tu tsikile okukuna nokutekela, ihe Oye e na oshinakugwanithwa shokukokeka. (1 Kor. 3:6, 7) Otashi tsu omukumo okutseya kutya nonando ihatu konakona nomuntu ngashingeyi, Jehova oha kala a pandula oonkambadhala ndhoka hatu ningi miilonga ye, ihe iha tala kiizemo mbyoka hatu mono!b

MONA ENYANYU NDYOKA HALI ZI MOKUNINGA AANTU AALONGWA

15. Jehova oha kala u uvite ngiini uuna gumwe a taamba ko ekonakonombiimbeli, e ta tula miilonga shoka i ilonga?

¹⁵ Jehova oha kala a nyanyukwa uuna omuntu a taamba ko oshili yOmbiimbeli, e te yi tseyithile wo yalwe. (Omayel. 23:15, 16) Jehova oha kala a nyanyukwa noonkondo uuna e wete aalongeli ye kunena taya uvitha nokulonga aantu nuulaadhi! Pashiholelwa, nonando momumvo 2020 omwa holoka omukithi gwekomba muuyuni awuhe, opwa li pwa ningwa omakonakonombiimbeli 7 705 765, shoka sha kwathele aantu 241 994 yi iyapulile Jehova noya ninginithwe. Aalongwa mboka aape nayo mokweendela ko kwethimbo otaya ka konakona naantu oyendji, e taya ningi aalongwa. (Luk. 6:40) Osha yela kutya ohatu nyanyudha Jehova sho hatu kutha ombinga miilonga yokuninga aantu aalongwa.

16. Elalakano ewanawa lini tatu vulu okwiitulila po?

¹⁶ Okuninga aantu aalongwa kaku shi okupu, ihe kekwatho lyaJehova otatu vulu okukala tu na ombinga mokukwathela mboka aape ya kale ye hole Tate yetu gwomegulu. Mbela itatu vulu okwiitulila po elalakano lyokukonakona nando onomuntu owala gumwe? Otashi vulika tu kale twa kumwa uuna mboka hatu tsakanene nayo twe ya pula ya konakone Ombiimbeli natse, e taya zimine. Otatu vulu okukala nuushili kutya Jehova ota ka yambeka oonkambadhala dhetu.

17. Otatu ka kala tu uvite ngiini ngele otwa kala hatu konakona naantu Ombiimbeli?

¹⁷ Okuuvitha nokulonga aantu oshili oku li uuthembahenda uunene. Iilonga mbika ohayi tu etele enyanyu lyashili. Omuyapostoli Paulus, ngoka a kwathele aantu oyendji yomuTessalonika ya ninge aalongwa, okwa popi kombinga yaamboka a kwathele ya tseye oshili, a ti: “Hane nani etegameno lyetu, enyanyu lyetu nuulenga wesindano lyetu mboka tatu itangele koshipala shOmuwa gwetu Jesus, uuna te ya? Eeno shili, one esimano nenyanyu lyetu.” (1 Tes. 2:19, 20; Iil. 17:1-4) Oyendji kunena nayo osho yu uvite ngawo. Omumwameme gumwe gwedhina Stéphanie, ngoka pamwe nomusamane gwe ya kwathele aantu oyendji ya thike poshitsa shokuninginithwa, okwa ti: “Kapu na sha hashi nyanyudha shi vulithe okukwathela aantu yi iyapulile Jehova.”