“Indeni ano, ka ningeni aantu . . . aalongwa”

1-2. (a) Shi ikolelela kelombwelo lyaJesus ndyoka li li muMateus 28:18-20, egongalo lyopaKriste oli na oshilonga shini sha simanenena? (b) Omapulo geni tatu ka kundathana moshitopolwa shika?

KONIMA yeyumuko lye, Jesus okwa li a lombwele aayapostoli ye ya tsakanene naye pondundu. Otashi vulika ya li taya hunga kenyanyu, sho ya ka gongala pehala mpoka. (Mat. 28:16) Pompito ndjoka opo tashi vulika a li i ‘ihololele aalanduli ye ye vulithe pomathele gatano polumwe.’ (1 Kor. 15:6) Omolwashike Jesus a li a lombwele aalanduli ye ya tsakanene naye hoka? Opo e ya pe oshinakugwanithwa tashi nyanyudha, tashi ti: “Indeni ano, ka ningeni aantu ayehe aalongwa.” — Lesha Mateus 28:18-20.

² Aalongwa yaJesus mboka ya uvu oohapu dhe ndhoka, oya ningi oshitopolwa shegongalo lyopaKriste lyomethelemimvo lyotango. Egongalo ndyoka, oshilonga shalyo sha simanenena osha li okuninga aantu oyendji aalongwa yaKristus.b Kunena oku na omagongalo omayovi gAakriste yashili muuyuni awuhe, noshilonga shoka osho wo sha simanenena kuyo. Moshitopolwa shika, otatu ka kundathana omapulo ngaka gane: Omolwashike okuninga aantu aalongwa kwa simanenena? Okwa kwatela mo shike? Mbela Aakriste ayehe oye na okukutha ombinga moshilonga shoka? Omolwashike twa pumbwa eidhidhimiko, opo tu vule okugwanitha po oshilonga shika?

OMOLWASHIKE OKUNINGA AANTU AALONGWA KWA SIMANENENA?

3. Shi ikolelela kuJohannes 14:6 no 17:3, omolwashike iilonga yokuninga aantu aalongwa ya simanenena?

³ Omolwashike iilonga yokuninga aantu aalongwa ya simanenena? Omolwaashono aalongwa yaKristus oyo owala taya vulu okukala ookuume kaKalunga. Oshikwawo, aalanduli yaKristus oye na onkalamwenyo ombwanawa ngashingeyi nosho wo etegameno lyoku ka kala nomwenyo sigo aluhe monakuyiwa. (Lesha Johannes 14:6; 17:3.) Odhoshili kutya Jesus okwe tu inekelela oshinakugwanithwa sha simana, ihe ihatu shi longo otse atuke. Omuyapostoli Paulus okwa nyola kombinga ye mwene noyookuume ke yamwe yopothingo, a ti: “Otse aalongi pamwe naKalunga.” (1 Kor. 3:9) Jehova naKristus inaya pa tuu aantu inaaya gwanenena uuthembahenda uunene!

4. Otatu ilongo mo shike moshimoniwa shomumwatate Ivan nomukadhi Matilde?

⁴ Iilonga yokuninga aantu aalongwa, otayi vulu oku tu etela enyanyu enene. Natu taleni koshiholelwa shomumwatate Ivan nomukadhi Matilde, yokoKolombia. Oya li ya uvithile omulumentu omugundjuka Davier, ngoka a li e ya lombwele a ti: “Onda hala okuninga omalunduluko monkalamwenyo yandje, ihe itandi vulu.” Davier okwa li omudhengi gwoongonyo ngoka a li ha longitha iingangamithi, ha nu sha pitilila nokwa li a oteka omukiintu gwedhina Erika. Omumwatate Ivan ota hokolola ta ti: “Otwa tameke okukala hatu mu talele po, nonando okwa li ha zi komukunda gwokokule, notwa li hatu yi ko noombasikela, oshoka opwa li uupadhi noondjila odha li dhi na omanono. Lwanima sho Erika a mono kutya eihumbato niikala yaDavier oya lunduluka, naye okwa tameke okukonakona.” Mokweendela ko kwethimbo, Davier okwa etha po okulongitha iingangamithi, okunwa sha pitilila nokudhenga oongonyo. Okwa hokana po wo Erika. Omumwameme Matilde ota ti: “Sho Davier naErika ya ninginithwa mo 2016, otwa dhimbulukwa sho Davier a li ha ti: ‘Onda hala okuninga omalunduluko, ihe itandi vulu.’ Otwa li twa nyanyukwa noonkondo, nosha li she tu zitha nomahodhi.” Osha yela kutya ohashi tu etele enyanyu enene, uuna tatu kwathele aantu ya ninge aalongwa yaKristus.

OKUNINGA AANTU AALONGWA OSHA KWATELA MO SHIKE?

5. Oshinima shotango shini twa pumbwa okuninga, tu ninge aantu aalongwa?

⁵ Oshinima shotango twa pumbwa okuninga tu ninge aantu aalongwa, ‘okukonga’ (NW) aanamitima omiwanawa. (Mat. 10:11) Ohatu shi ulike kutya tse Oonzapo dhaJehova shili, mokuuvithila ayehe mboka tatu tsakaneke. Uuna tatu vulika kelombwelo lyaKristus lyokuuvitha, ohatu ulike kutya tse Aakriste yashili.

6. Oshike tashi vulu oku tu kwathela tu pondole miilonga yokuuvitha?

⁶ Aantu yamwe oye na lela ehalo lyokwiilonga oshili yOmbiimbeli, ihe oyendji mboka hatu tsakaneke otashi vulika ya kale ya fa kaaye na ko nasha petameko. Otashi vulika tu na okukokeka ohokwe muyo, ya kale ya hala okutseya oshindji. Opo tu pondole miilonga yokuuvitha, otwa pumbwa okwiilongekidha nawa. Hogolola iikundathanwa yokondandalunde mbyoka aantu tashi vulika ya ka kale ye na ohokwe muyo. Opo ihe, tala kutya efalomo lini to ka longitha moshikundathanwa kehe.

7. Ongiini to vulu okutameka oonkundathana nomuntu, nomolwashike wu wete kutya okupulakena nokuulika esimaneko okwa simana?

⁷ Pashiholelwa, oto vulu okupula omunegumbo to ti: “Oshi li ngaa nawa ngele onde ku pula etaloko lyoye kombinga yoshinima shontumba? Omaupyakadhi ogendji ngoka hage tu adha kunena, ohaga adha wo aantu ayehe muuyuni. Mbela oto dhiladhila kutya otwa pumbwa epangelo lyontumba olyo li kandule po omaupyakadhi ngoka?” Konima yaashono, otamu vulu okukundathana Daniel 2:44. Nenge, otashi vulika wu pule omuntu to ti: “Omomukalo dhingi guni to vulu okuputudha aanona, opo ya kale ye na omikalo? Mbela oto ti ngiini?” Opo ihe, kundathaneni Deuteronomium 6:6, 7. Kutya nduno oshikundathanwa shini wa hogolola oku ka kundathana, kaleka momadhiladhilo mboka to ka uvithila. Dhiladhila kuuwanawa mboka taya ka mona, mokwiilonga shoka Ombiimbeli tayi longo. Uuna to popi nayo, osha simana wu ya pulakene neitulomo nokusimaneka etaloko lyawo. Kungawo, oto ke ya uva ko nawa notashi vulika ya ka kale ye na ehalo lyoku ku pulakena.

8. Omolwashike okuninga omaishunoko haku pula oonkambadhala dha mana mo?

⁸ Omanga omuntu inaa tokola a konakone Ombiimbeli, otashi vulika wa pumbwa okulongitha ethimbo nokuninga oonkambadhala dha mana mo, wu ninge omaishunoko. Omolwashike? Omolwaashoka omathimbo gamwe, otashi vulika sho tatu ka shuna ko kuyo, kaatu ya adhe mo. Otashi vulika wo wa pumbwa okushuna ko iikando yontumba, opo omunegumbo a kale e ku mangulukila noku taambe ko ekonakonombiimbeli. Dhimbulukwa kutya okameno ohaka vulu owala okukoka nawa, ngele ohaka tekelwa pandjigilile. Sha faathana, omuntu ota vulu owala okukokeka ohole ye yokuhola Jehova naKristus, uuna hatu kundathana naye pandjigilile Oohapu dhaKalunga.

MBELA AAKRISTE AYEHE OYE NA OKUKUTHA OMBINGA MOKUNINGA AANTU AALONGWA?

9-10. Omolwashike tatu vulu okutya, kehe Omukriste okwa kwatelwa mo mokukonga aanamitima omiwanawa?

⁹ Omukriste kehe okwa kwatelwa mo mokukonga aanamitima omiwanawa. Otatu vulu okufaathanitha iilonga mbyoka nokukonga okanona ka kana. Omomukalo guni mbela? Tala koshiholelwa sha ningwa shili kombinga yokamati komimvo ndatu, hoka ka li ka kana. Aantu 500 lwaampono, oya li ye ka kongo. Hugunina, konima yoowili 20 ndhoka okanona ka kala ka kana, omuntu gumwe okwe ki itsu mepya limwe. Omuntu ngoka okwa tindi okupandulwa, sho e ka mono. Okwa ti: “Osha pula oonkambadhala dhaantu omathele, opo ka monike.”

¹⁰ Aantu oyendji muuyuni, oya fa okanona hoka ka li ka kana. Kaye na etegameno, ihe oya hala okukwathelwa. (Ef. 2:12) Tu li aauvithi ye vulithe pomamiliyona gahetatu, ohatu longele kumwe, opo tu mone aanamitima omiwanawa. Otashi vulika kuu mone omuntu ngoka a hala okukonakona Ombiimbeli nangoye. Nonando ongawo, aauvithi yalwe moshitopolwa omo tuu moka, otashi vulika ya mone mo omuntu ngoka a hala okwiilonga oshili yomOohapu dhaKalunga. Uuna omumwatate nenge omumwameme a uvithile omuntu, konima yethimbo e ta ningi omulongwa gwaKristus, kehe gumwe ngoka a kutha ombinga miilonga yokuuvitha, oku na etompelo ewanawa lyokunyanyukilwa pamwe naye.

11. Nonando ku na omukonakonimbiimbeli, omomikalo dhilwe dhini to vulu okukwathela mokuninga aantu aalongwa?

¹¹ Nonando ku na omukonakonimbiimbeli ngashingeyi, oto vulu okukwathela miilonga yokuninga aantu aalongwa momikalo dhilwe. Pashiholelwa, uuna wa mono omuntu omupe kOshinyanga shUukwaniilwa, oto vulu okupopya naye noku mu kwathela. Momukalo ngoka, oto vulu oku mu kwathela moku mu ulukila kutya ohole oyo hayi tu ndhindhilikitha mo, tu li Aakriste yashili. (Joh. 13:34, 35) Omayamukulo ngoka to gandja mokugongala nonando omafupi, otaga vulu okukwathela mboka aape ya vule okuholola eitaalo lyawo momukalo omwaanawa nogwesimaneko. Oto vulu wo okukwathela omuuvithi omupe ngele tashi ya miilonga yokuuvitha, noku mu kwathela a longithe Omanyolo, opo a vule okulonga aantu oshili ya yela. Ngele owe shi ningi, kungawo oto mu longo a holele Kristus. — Luk. 10:25-28.

12. Mbela otwa pumbwa uunongo wi ikalekelwa, opo tu ninge aantu aalongwa? Shi yelitha.

¹² Katu na okudhiladhila kutya otwa pumbwa uunongo wi ikalekelwa, opo tu longe aantu yalwe ya ninge aalongwa yaJesus. Omolwashike mbela? Natu ka taleni koshiholelwa shomumwameme Faustina, ngoka ha zi moBolivia. Sho a tameke okweendathana nOonzapo dhaJehova, ka li e shi okulesha. Ihe ngashingeyi mokulesha oha adha mo ngaa kashona. Ngashingeyi okwa ninginithwa noku hole okulonga yalwe Ombiimbeli. Moshiwike kehe, oha ningi omakonakonombiimbeli gatano. Nonando omumwameme Faustina ke shi okulesha nawa ngaashi aakonakonimbiimbeli ye, okwa kwathela aantu yahamano ya thike poshitsa shokuninginithwa. — Luk. 10:21.

13. Nonando otwi ipyakidhila noonkondo, omayambeko gamwe geni tatu vulu okumona miilonga yokuninga aantu aalongwa?

¹³ Aakriste oyendji, oyi ipyakidhila noonkondo niinakugwanithwa ya simana. Nonando ongawo, ohaya kongo ethimbo ya ninge omakonakonombiimbeli, nohashi ya etele enyanyu enene. Natu ka taleni koshiholelwa shomumwameme Melanie, gwokoAlaska. Okwa putudha omwanakadhona gwomimvo hetatu oye awike. Okwa li wo e na iilonga yokwiikongela omboloto, ha longo okuza omaandaha sigo etitano, nokwa li wo ha sile oshimpwiyu he ngoka a li ta lumbu nokankela. Omumwameme Melanie oye awike a li Onzapo mondoolopa yawo. Nonando okwa li haku kala uutalala, okwa li ha galikana aluhe Jehova opo e mu pe oonkondo a vule oku ka uvitha, molwaashono okwa li lela a hala okumona omuntu ngoka ta vulu okukonakona naye Ombiimbeli. Lwanima, okwa ka mona po Sara, ngoka a li a nyanyukwa noonkondo, sho i ilongo kutya Kalunga oku na edhina. Konima yethimbo, Sara okwa zimine a konakone Ombiimbeli. Omumwameme Melanie ota ti: “Metitano kehe kongulohi, onda li handi kala nda vulwa, ihe ngame nomumwandje otwa kala hatu mono mo uuwanawa mokuya aluhe tu ka konakone naSara. Otwa li hatu tyapula okukonga omayamukulo komapulo gaSara, notwa li twa nyanyukwa oku mu mona ta hedha popepi naJehova.” Hugunina, Sara okwa li a vulu okwiidhidhimikila omapataneko, okwa thigi po ongeleka ye e ta ninginithwa.

OMOLWASHIKE OKUNINGA AANTU AALONGWA HAKU PULA EIDHIDHIMIKO?

14. (a) Omomukalo guni iilonga yokuninga aantu aalongwa ya faathana nokuyula oohi? (b) Oohapu dhaPaulus ndhoka dha popiwa muTimoteus omutiyali 4:1, 2, odhe ku guma ngiini?

¹⁴ Tsikila okukonga mboka ya hala okuninga aalongwa yaJesus, nonando natango ino mona po gumwe ta ulike ohokwe. Dhimbulukwa kutya Jesus okwa faathanitha iilonga yokuninga aantu aalongwa nokuyula oohi. Omathimbo gamwe ohashi pula ethimbo olindji noonkondo, opo aayuli yoohi ya yule oohi. Olundji ohaya ka yula oohi kongulohi nenge ongula onene, nomathimbo gamwe ohaya ende iinano iile. (Luk. 5:5) Momukalo gwa faathana, aauvithi yamwe ohashi ya pula oowili odhindji neidhidhimiko, opo ya uvithile aantu pomathimbo ga yoolokathana nomomahala gi ili nogi ili. Omolwashike? Opo ya vule okuuvithila aantu oyendji. Olundji mboka haya longo nuudhiginini momukalo ngoka, ohaya mono aantu mboka taya ulike ohokwe metumwalaka lyetu. Mbela ito vulu okuuvithila mehala moka to vulu okutsakanena naantu oyendji nosho wo pethimbo tali opalele? — Lesha 2 Timoteus 4:1, 2.

15. Omolwashike okukonakona naantu Ombiimbeli, haku pula eidhidhimiko?

¹⁵ Omolwashike okukonakona naantu Ombiimbeli haku pula eidhidhimiko? Etompelo limwe olyo kutya otwa pumbwa okuninga oshindji tu ya kwathele, opo ya tseye nokukala ye hole shoka Ombiimbeli tayi longo. Otwa pumbwa oku ya kwathela ya tseye nokukala ye hole Omunyoli gwOmbiimbeli, Jehova. Kakele koku ya longa shoka Jesus a tegelela aalongwa ye ya kale ye li, otwa pumbwa wo oku ya kwathela ya tseye nkene Omukriste gwashili, e na okukala. Natu ya kwathele neidhidhimiko, sho taya kambadhala okutula miilonga omakotampango gOmbiimbeli. Yamwe ohaya ningi omalunduluko muule owala woomwedhi oonshona, omanga yalwe hashi ya pula ethimbo.

16. Oshike wi ilonga moshimoniwa shomumwatate Raúl?

¹⁶ Omutumwa gumwe moPeru, okwa li a mono iizemo iiwanawa, omolweidhidhimiko lye. Okwa ti: “Onda li nda konakona naRaúl momambo gaali, ihe natango okwa li e na omaupyakadhi ga kwata miiti. Ondjokana yawo kaya li tayi ende nawa, okwa li ha longitha iitya iilulu nosha li oshidhigu koyana ye mu simaneke, molwaashoka okwa li omuntu omudhigu. Okwa kala he ya kokugongala pandjigilile, onkee onda tsikile okukala tandi mu talale po, opo ndi mu kwathele pamwe nuukwanegumbo we. Konima yomimvo dhi vulithe pundatu, okwa ninginithwa.”

17. Oshike tatu ka kundathana moshitopolwa tashi landula?

¹⁷ Jesus okwe tu lombwela a ti: “Indeni ano, ka ningeni aantu ayehe aalongwa.” Opo tu gwanithe po oshilonga shoka, olundji otu na okupopya naantu mboka ye li momaitaalo ga yooloka ko kulyetu. Otu na wo okuuvithila mboka kaaye li melongelokalunga lyontumba nenge nokuli inaayi itaala muKalunga. Moshitopolwa tashi landula, otatu ka kundathana nkene tatu vulu okuuvithila aantu yomomaputuko gi ili nogi ili, onkundana ombwanawa.