Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
© 2024 Watch Tower Bible and Tract Society of Pennsylvania
6-12 JANUALI
OMALIKO OKUZA MOOHAPU DHAKALUNGA EPISALOMI 127-134
Aavali, tsikileni okusila oshimpwiyu aanona yeni mboka ye li omagano ga dhengambanda
Kala wa lenga okukala wu li oshilyo shuukwanegumbo waJehova
9 Jehova okwa shita aantu haya vulu okumona aanona, nokwe ya pa wo oshinakugwanithwa shoku ya longa ya kale ye mu hole noye mu longele. Ngele ngoye omuvali, mbela owa pandula ngaa omagano ngaka gi ikalekelwa? Nonando aayengeli ohaya vulu okuninga iinima oyindji iikumithi, Jehova ine ya shita haya vulu okumona aanona. Onkee ano, ngele owu li omuvali, pandula Jehova omolwuuthembahenda wokumona aanona. Aavali oya pewa oshinakugwanithwa sha simana ‘shokuputudha aanona noku ya kumagidha paukriste.’ (Ef. 6:4; Deut. 6:5-7; Eps. 127:3) Opo ehangano lyaJehova li kwathele aavali, olya nyanyangidha po iilongitho oyindji ya kankamena kombiimbeli mbyoka tayi vulu oku ya kwathela, ngaashi iileshomwa, uuvidio, omusika nosho wo iitopolwa yokepandja lyetu lyokointaneta. Osha yela kutya Tate yetu gwomegulu nosho wo Omwana oye hole aanona yetu. (Luk. 18:15-17) Jehova oha kala e shi hokwa uuna aavali ye mu inekela nohaya ningi ngaashi taya vulu ya sile oshimpwiyu oyana. Kungawo otaya ka kwathela wo oyana ya kale ye na etegameno lyokukala oshitopolwa shuukwanegumbo waJehova sigo aluhe.
Aavali, dheuleni aanona yeni ya kale ye hole Jehova
20 Kala wu shi okuyoolola. MEpisalomi 127, aanona oya yelekanithwa niikuti. (Lesha Episalomi 127:4.) Ngaashi owala iikuti hayi hongwa miiti ya yoolokathana nohayi vulu okukala yi vulathane muunene, naanona inaya faathana. Onkee ano, aavali oya pumbwa okutokola nkene ye na okudheula okanona kawo kehe. Aaihokani yamwe yokuIsraeli shokunena mboka ya pondola mokuputudha oyana ya longele Jehova, oya popi shoka ya mona hashi kwathele, ya ti: “Kehe gumwe otwa konakona naye oye awike.” Odhoshili kutya omutse gwuukwanegumbo otagu ka tokola ngele okukonakona momukalo moka okwa pumbiwa notaku wapa.
Omaliko gomOmbiimbeli
Nyanyukilwa shoka to vulu okulonga miilonga yaJehova
6 Oshiilongomwa sha simanenena aavali taya vulu okwiilonga, otashi adhika mEpisalomi 131:1, 2. (Lesha.) Omukwaniilwa David okwa li a ti kutya ini “itula mumbyoka iinene” nenge mbyoka tayi mu nyenge. Eifupipiko lye nokukala kwe e na ondjele okwe mu kwathele a ‘loteke omwenyo gwe noku gu ngungumaneke.’ Oshike shoka aavali taya vulu okwiilonga koohapu ndhoka dhaDavid? Aavali kaye na owala okukala aaifupipiki noye na ondjele mwaashoka haya ningi, ihe nomwaashoka wo haya kala ya tegelela oyana ya ninge. Aavali otaya vulu okukwathela oyana ya kale yu uvite ye na oshilonga, mokukala ye shi iinima mbyoka ye shi nawa naambyoka itaaya vulu okuninga, e taye ya kwathele yi itulile po omalalakano ngoka taya vulu okwaadha. Omumwameme gwedhina Marina okwa ti: “Meme ka li ha yelekanitha ndje naamwayina yandje nenge naanona yalwe. Okwa li a longo ndje kutya kehe gumwe oku na omagano ga yooloka ko kugayalwe nosho wo kutya kehe gumwe gwomutse oku na ondilo momeho gaJehova. Shoka osha kwathela ndje kaandi kale handi iyelekanitha nayalwe.”
13-19 JANUALI
OMALIKO OKUZA MOOHAPU DHAKALUNGA EPISALOMI 135-137
“Omuwa gwetu oye omunene e vule iikalunga ayihe”
‘Kristus oye oonkondo dhaKalunga.’
15 Otu shi shi kutya Jehova, Kalunga Omunankondoadhihe, oha pangele eshito, oshoka oonkondo ndhoka Kristus a li e na odha zi kuYe. Pashiholelwa, manga Jehova inee etitha Eyelu, okwa ti: “Ngele pwa piti omasiku gaheyali, otandi ka lokitha omvula tayi ka tilahi omeya omasiku omilongo ne omutenya nuusiku.” (Genesis 7:4) Eksodus 14:21 otayi ti wo kutya: “Omuwa nokwa tondokitha po efuta lya shunithwa kombepo ondhigu yokuuzilo.” Jona 1:4 ota ti wo kutya: “Omuwa okwa tumu ombepo ondhigu mefuta, nomwa tukuluka oshikungulu oshinene sha hala okuteya po osikepa.” Otwa nyanyukwa okukala tu shi kutya muuyuni uupe, Jehova ota ka pangela eshito alihe thiluthilu.
Ohole yaJehova ihaayi hulu po otayi ti shike kungoye?
16 Uuna twa tala ko Jehova e li epopilongulu lyetu, ohatu kala tu uvite twa gamenwa. Nonando ongawo, omathimbo gamwe otashi vulika tu iyadhe twa gwililwa po notwa teka omukumo. Oshike mbela Jehova te ke tu ningila, uuna twi iyadha monkalo ndjoka? (Lesha Episalomi 136:23.) Ote ke tu ukata nomaako ge, noku tu kwathela kaatu kale we twa teka omukumo. (Eps. 28:9; 94:18) Nkene hatu mono mo uuwanawa: Okutseya kutya Kalunga okwi ilongekidha aluhe oku tu kwathela, ohaku tu kwathele tu dhimbulukwe iinima iyali ya simanenena. Shotango, kutya nduno otu li peni, otu na einekelo kutya Jehova ote ke tu gamena. Oshitiyali, Tate yetu gwomegulu oku na ko nasha natse noonkondo.
Omaliko gomOmbiimbeli
Ohole yaJehova ihaayi hulu po otayi ti shike kungoye?
10 Ohole yaKalunga ihaayi hulu po otayi kala sigo aluhe. Shoka osha popiwa mEpisalomi 136 iikando 26. Ovelise yotango yEpisalomi ndyoka otayi ti: “Hambeleleni Omuwa, oshoka oye omwaanawa, nesilohenda lye [nenge tu tye ohole ye ihaayi hulu po] otayi kala aluhe.” (Eps. 136:1) Movelise 2 sigo 26, otatu lesha mo uutumbulilo “esilohenda lye [nenge tu tye ohole ye ihaayi hulu po] otayi kala aluhe.” Uuna tatu lesha oovelise adhihe ndhoka dha hupa ko, ohatu kala twa kuminwa omikalo adhihe ndhoka Jehova he tu ulukile ohole ye ihaayi hulu po. Uutumbulilo “[ohole ye ihaayi hulu po] otayi kala aluhe,” otawu tu shilipaleke kutya ohole yaKalunga yokuhola aalongeli ye kayi na siku yi hule po. Otashi tu tsu lela omukumo okutseya kutya Jehova ihe etha mbala okukala e hole aalongeli ye. Pehala lyaashono, oha kala aluhe popepi nayo, unene tuu uuna ye li muupyakadhi wontumba. Nkene hatu mono mo uuwanawa: Okutseya kutya Jehova oha kala aluhe popepi natse, ohaku tu nyanyudha nohaku tu nkondopaleke tu vule okutaalela omaupyakadhi gonkalamwenyo notu tsikile okweenda mondjila ndjoka tayi fala komwenyo. — Lesha Episalomi 31:7.
20-26 JANUALI
OMALIKO OKUZA MOOHAPU DHAKALUNGA EPISALOMI 138–139
Ino etha uumbanda wu ku imbe okukutha ombinga pokugongala
Tanga Jehova megongalo
10 Mbela oho kala to dhekweta kehe ethimbo wa hala okugandja etyokosha? Ngele osho, hangoye awike. Uushili owo kutya oyendji yomutse ohatu kala twa tila, uuna tatu gandja omatyokosha. Opo wu kondjithe uumbanda mboka, tango owa pumbwa okumona kutya oshike hashi wu etitha. Mbela oho kala wa tila wu dhimbwe shoka wa hala okupopya nenge wu gandje etyokosha lya puka? Mbela oho kala to ipula unene kutya etyokosha lyoye kali shi ewanawa oku li yelekanitha nogayalwe? Odhoshili kutya uumbanda mboka otawu vulu okukala endhindhiliko ewanawa. Ohawu ulike kutya ngoye omwiifupipiki nowa tala ko yalwe ye ku vule. Uukwatya mboka Jehova oku wu hole. (Eps. 138:6; Fil. 2:3) Ihe Jehova okwa hala wo wu kale to mu tanga nokutsa omukumo aamwatate naamwameme pokugongala. (1 Tes. 5:11) Jehova oku ku hole note ke ku pa omukumo ngoka wa pumbwa.
Tsaathaneni omukumo pokugongala kwegongalo
7 Otashi vulika shi ku kwathele, ngele owe endulula omaetopo gamwe ngoka ga nyanyangidhwa mOoshungolangelo dha pita. Pashiholelwa, ilongekidha nawa. (Omayel. 21:5) Ngele owa kala wu shi nawa uuyelele mboka tawu kundathanwa, otashi ka kala oshipu kungoye okwiiyamba wu gandje omatyokosha. Shimwe ishewe, omatyokosha goye ga ninga omafupi. (Omayel. 15:23; 17:27) Otashi vulika kuu kale wa tila, ngele to gandja eyamukulo efupi. Etyokosha efupi ndyoka tashi vulika lya thikama po metumbulo limwe nenge gaali, otali vulu nokuli okuuviwa ko nuupu kaamwatate naamwameme, li vulithe etyokosha ele tali gandja uuyelele owundji. Ngele owa ningi etyokosha efupi niitya yoye mwene, oto ku ulika kutya owi ilongekidha nawa nowu uvite ko nawa shoka tashi kundathanwa.
Omaliko gomOmbiimbeli
Mbela owa pandula ngaa omagano ngoka Kalunga e ku pa?
12 Miishitwa ayihe yokombanda yevi, aantu oyo owala haya vulu okwiilonga nkene ye na okwiihumbata, mokudhimbulukwa shoka ya ningilwa monakuziwa. Oshizemo, ohatu vulu okwiilonga omithikampango omiwanawa, e tatu lundulula okudhiladhila kwetu neihumbato lyetu. (1 Kor. 6:9-11; Kol. 3:9, 10) Odhoshili kutya otatu vulu okudheula eiyuvo lyetu, tu kale hatu vulu okudhimbulula mo shoka shi li mondjila naashoka sha puka. (Heb. 5:14) Otatu vulu okwiilonga nkene tu na okuulukila yalwe ohole, olukeno nohenda. Otatu vulu wo okwiilonga nkene tu na okuholela uuyuuki waJehova.
27 JANUALI–2 FEBULUALI
OMALIKO OKUZA MOOHAPU DHAKALUNGA EPISALOMI 140–143
Kala metsokumwe nomagalikano goye
‘Pulakena koohapu dhaanawino’
13 Kala ho tala ko omayele ge li euliko kutya Kalunga oku ku hole. Jehova oha kala aluhe e tu halela uuwanawa. (Omayel. 4:20-22) Uuna te tu pe omayele okupitila mOohapu dhe, moshileshomwa sha kankamena kOmbiimbeli nenge okupitila momwiitaali ngoka a pyokoka, kungawo ote tu ulukile kutya oku tu hole. Aahebeli 12:9, 10 otaya ti kutya ‘ohe shi ningi omoluuwanawa wetu yene.’
14 Kala ho gandja eitulomo komayele, ihe hakomukalo moka we ga pewa. Omathimbo gamwe otashi vulika tu kale tu uvite kutya ngoka e tu pe omayele ine shi ninga momukalo omwaanawa. Odhoshili kutya ngoka ta gandja omayele oku na oku ga gandja momukalo ngoka tagu ningitha ngoka te ga pewa e ga taambe ko nuupu. (Gal. 6:1) Ihe ngele otse tatu pewa omayele, otwa pumbwa okukala hatu gandja eitulomo kwaashoka tage tu longo nonando otu uvite kutya otwa li tu na oku ga pewa momukalo omwaanawa. Otatu vulu okwiipula tatu ti: ‘Nonando inandi panda omukalo moka nda pewa omayele ngaka, mbela oshike tandi vulu okwiilonga mugo? Pehala lyokugandja eitulomo kokwaagwanenena kwaangoka e ga pe ndje, omolwashike owala itaandi gandja eitulomo kwaashoka taga longo ndje?’ Otashi ka kala pandunge, ngele otwa kala hatu kongo omikalo moka tatu vulu okumona mo uuwanawa momayele ngoka hatu pewa. — Omayel. 15:31.
w10-E 3/15 ep. 32, okat. 4
Kaleka po “uuyogoki womutima” momathimbo ngaka omadhigu
Omathiminiko oku za kaapataneki, uuhupilo tawu shongola, nosho wo uuwehame wa kwata miiti, owa gwilila po yamwe yomaapiya yaKalunga. Omathimbo gamwe, ohashi gumu wo nayi omitima dhawo. Nokuli nOmukwaniilwa David okwa pita monkalo ya faathana sho a ti: “Onda kanitha omukumo; onda tyololoka.” (Eps 143:4) Oshike she mu kwathele a sinde oonkalo ndhoka? David okwa li a dhimbulukwa nkene Kalunga ha ungaunga naapiya ye nosho wo nkene a li e mu kwathele. Okwa li a tedhatedha kwaashoka Jehova a li a ninga, omolwedhina Lye lya simana. David okwa kala a ipyakidhila niilonga yaKalunga. (Eps 143:5) Momukalo gwa faathana, ngele otwa kala hatu tedhatedha kOmushiti gwetu, kwaashihe shoka e tu ningila nokwaashoka ta tsikile oku tu ningila, otashi ke tu kwathela uuna tu li meshongo lyontumba.
Ondjokana ‘yopakriste’ oshinima ngaa shi li pandunge natango?
Omathimbo gamwe otashi vulika wu kale wu uvite ngaashi David a li u uvite sho a ti: “Omuwa, yamukula ndje mbala; onda vulwa okutegelela. Ino holeka ndje oshipala shoye.” (Eps. 143:5-7, 10) Ino sa uunye. Tegelela Jehova e ku ulukile shoka a hala wu ninge. Pulakena kuJehova mokulesha Ombiimbeli nokutedhatedha muule kwaashoka wa lesha. Shika otashi ke ku kwathela wu mone kutya Jehova okwa hala wu ninge shike. Oto ka mona wo nkene a li ha kwathele aapiya ye yonale. Ngele owa kala ho pulakene kuye oto ka kala wu na oonkondo dhokuvulika kuye.
Omaliko gomOmbiimbeli
Okulongela Kalunga momukalo ngoka a hokwa, ohaku eta enyanyu olindji
7 Okugalikana oku li omukalo gwokulongela Jehova. Omanyolo oga faathanitha omagalikano getu nomatsinino ga longekidhwa nawa ngoka ga li haga gandjwa metsalihangano, nolwanima oga li haga gandjwa motempeli. (Eps. 141:2) Iitsinino mbyoka oya li hayi zi ezimba lya nika nawa, ndyoka lya li hali nyanyudha Kalunga. Sha faathana, Jehova oha kala a “hokwa” omagalikano getu taga zi komutima, nonando otwa popya owala iinima yi li paufupi. (Omayel. 15:8; Deut. 33:10) Onkee ano, otu na etompelo ewanawa lyokukala twi itaala kutya Jehova oha kala a nyanyukwa sho e tu uvite tamu mu lombwele megalikano kutya otu mu hole notwe mu pandula. Okwa hala wu mu lombwele kombinga yaashoka to ipula nasho nosho wo oompumbwe dhoye. Manga inoo galikana, dhiladhila muule kombinga yaashoka to ka popya. Ngele owa kala ho ningi ngawo, oto ka pa Ho gwomegulu ‘etsinino’ lya dhenga mbanda.
3-9 FEBULUALI
OMALIKO OKUZA MOOHAPU DHAKALUNGA EPISALOMI 144–146
“Oshigwana shi na Omuwa, oye Kalunga kasho, oshi na elago.”
Omapulo ga za kaaleshi
2. Uutumbulilo mboka wa longithwa mOmbiimbeli ndjoka ya pupalekwa, otawu endele pamwe nepisalomi alihe. Uutumbulilo “opo ihe” mboka wa longithwa movelise 12, otawu ti kutya omayambeko ngoka ga popiwa movelise 12 sigo 14, ogu ukithwa kaayuuki, mboka ya pula ya ‘hupithwe nokukanyatululwa’ miikaha yaakolokoshi (ovelise 11). Elunduluko ndika olya hololwa wo movelise 15, moka mwa longithwa oshitya “aanyanyukwi” lwaali notawu tsu kumwe. Shoka oshu ulike kutya enyanyu ndyoka olyu ukithwa kaantu yoludhi lumwe, ano mboka “Kalunga kawo Jehova!” Kaleka momadhiladhilo wo kutya omanyolo gopetameko gOshihebeli kaga li ge na iileshitho ngaashi iiyoololinkwanu. Onkee ano, aatoloki oye na okutala keityo lyomondjila, komunyolelo gwopaiteyo gwiitya yOshihebeli, koshikundathanwa nosho wo koovelise dhOmbiimbeli.
3. Uutumbulilo mboka wa longithwa mOmbiimbeli ndjoka ya pupalekwa, otawu tsu kumwe noovelise dhilwe ndhoka dhu uvaneka omayambeko ngoka Kalunga ta ka pa aantu ye aadhiginini. Omalunduluko ngoka ga ningwa ge na ko nasha noshitya asher, oga ningitha episalomi li ulike kutya David okwa li e na etegameno kutya konima ngele Kalunga a mangulula oshigwana shaIsraeli kaatondi yasho, ote ke ya yambeka moku ya kaleka ya nyanyukwa noya hepuluka. (Lev. 26:9, 10; Deut. 7:13; Eps. 128:1-6) Pashiholelwa, Deuteronomium 28:4 otayi ti: “Omuwa ote ku yambekele oluvalo lwoye, eloolo lyiimeno yoye niimuna yoye oongombe noonzi.” Odhoshili kutya pethimbo lyomwanamati gwaDavid, Salomo, sho a li ta pangele, oshigwana osha kala shi na ombili inaayi monika nale nosha hepuluka. Ethimbo Salomo a li ta pangele, otali tu ulukile nkene tashi ka kala, ngele Mesiasa a tameke okupangela kombanda yevi. — 1 Aak. 4:20, 21; Eps. 72:1-20.
Kaleka eitaalo lyoye lyopaKriste lya kola
16 Etegameno lyetu lyomwenyo gwaaluhe omagano ge na ongushu ga za kuKalunga. Otwa tegelela nondjuulukwe onakuyiwa ombwanawa, ndjoka tu na uushili kutya otayi ke ya. Etegameno lyetu olya fa ohangela, oshoka ohali tu kwathele tu kale twa ngungumana sho tatu idhidhimikile omashongo, omahepeko, nokuli naasho twa taalela eso. Etegameno lyetu olya fa wo egala lyosheela, oshoka ohali gamene omadhiladhilo getu, opo tu yande shoka sha puka nokuninga shoka shi li mondjila. Etegameno lyetu lya kankamena kOmbiimbeli ohali tu hedhitha popepi naKalunga nohali holola kutya otu mu hole shi thike peni. Ohatu mono lela uuwanawa sho hatu kaleke etegameno lyetu lya kola.
17 Oohapu “etegameno nali mu nyanyudhe,” odha li dha tsu omukumo omuyapostoli Paulus montumwafo ndjoka a nyolele Aaroma. (Rom. 12:12) Paulus okwa li ta vulu okukala a nyanyukwa, molwaashoka okwa li e shi kutya ngele okwa kala omudhiginini, ota ka mona omwenyo gwaaluhe megulu. Natse otatu vulu wo okukala twa nyanyukwa omolwetegameno lyetu, molwaashoka otu na uushili kutya Jehova ota ka gwanitha po omauvaneko ge. Omupisalomi gumwe okwa nyola a ti: ‘Omunelago oye ngoka i inekela Omuwa, Kalunga ke. Oye omushiti gwegulu nogwevi, gwefuta noshaa shoka sha kala muyo. Omuwa ngoka omudhiginini aluheluhe.’ — Eps. 146:5, 6.
Ohole yini hayi etele omuntu enyanyu lyashili?
19 Konima yomimvo 6 000 lwaampono ndhoka aantu ya kala nokumona iihuna, uuyuni waSatana otawu ende wu uka pehulilo. Muuyuni omu udha aantu ye na iikala yokwiihola mwene, ye hole eliko noye hole omainyanyudho. Aantu ya tya ngawo ohaya dhiladhila kwaashoka ya hala noya pititha komeho omahalo gawo monkalamwenyo yawo. Aantu mboka kaye na siku ya kale ya nyanyukwa shili. Omupisalomi okwa nyola a ti: “Omunelago oye ngoka ekwatho lye tali zi kuKalunga kaJakob, oye ngoka i inekela Omuwa, Kalunga ke.” — Eps. 146:5.
20 Oshigwana shaJehova oshi mu hole noonkondo, noyendji otaye ende taye mu tseya nokukala ye mu hole. Shino otashi gandja uunzapo kutya Uukwaniilwa waKalunga otawu pangele, na masiku otawu ke etela aantu omayambeko itaaga vulu okuyelekwa nasha. Enyanyu lyashili notali kalelele, ohali zi mokulonga ehalo lyaKalunga nomokutseya kutya otatu longo shoka sha hokiwa kOmukombandambanda. Mboka ye hole Jehova, otaya ka nyanyukwa sigo aluhe. Moshitopolwa tashi landula, otatu ka konakona omaukwatya gamwe ngoka hage etithwa kombepo yokwiihola mwene nokutala nkene taga kondjithathana nomaukwatya ngoka ge niwe kaapiya yaJehova.
Omaliko gomOmbiimbeli
Enyanyu enene ndyoka hali zi mokugandja
6 Jehova ohe tu pe shoka twa pumbwa, molwaashoka oku tu hole. Natu taleni kOohapu dhaJesus ndhoka tadhi adhika muMateus 6:25, 26. (Lesha.) Jesus okwa longitha oshiholelwa shiinima yomeshito. Okwa li a popi kombinga yoondhila a ti: “Nando ihadhi kunu, dho ihadhi teya, dho ihadhi pungula miigandhi.” Ihe ndhindhilika shoka a popi sha landula ko sho a ti: “Ho yeni yomegulu ohe dhi palutha.” Opo nduno, Jesus okwa pula a ti: “Ano hane mboka mu dhi vule?” Oshitsa oshini mbela? Jehova okwa tala ko aantu ye na ondilo ye vule iinamwenyo. Ngele Jehova oha sile oshimpwiyu iinamwenyo, natse otatu vulu okukala nuushili kutya ote ke tu sila oshimpwiyu. Ngaashi owala he omuvali ha sile oshimpwiyu aanegumbo lye, Jehova naye oha sile oshimpwiyu aanegumbo lye ta inyengithwa kohole. — Eps. 145:16; Mat. 6:32.
10-16 FEBULUALI
OMALIKO OKUZA MOOHAPU DHAKALUNGA EPISALOMI 147–150
Otu na omatompelo ogendji gokuhambelela Jehova
Omolwashike tu na ‘okuhambelela Jehova’?
5 Jehova ka li owala a hekeleke Aaisraeli ye li oshigwana, ihe okwa li wo e ya hekeleke pauhandimwe. Shoka osho ha ningi nokunena. Omupisalomi okwa nyola kombinga yaKalunga a ti: “Ota aludha mboka ye ehamekwa koomwenyo, nota manga iilalo yawo.” (Eps. 147:3) Odhoshili kutya Jehova oku na ko nasha naamboka ye na uupyakadhi palutu nopamaiyuvo. Kunena, okwa halelela oku tu hekeleka nokupupaleka iilalo yetu yokomwenyo. (Eps. 34:18; Jes. 57:15) Ohe tu pe uunongo noonkondo, opo tu idhidhimikile uupyakadhi kehe tatu iyadha muwo. — Jak. 1:5.
6 Omupisalomi okwa tala kegulu e ta ti: “Otu utha omwaalu gwoonyothi note dhi ithana komadhina.” (Eps. 147:4) Omupisalomi okwa li a tala oonyothi, ihe ka li ta vulu okumona kutya odhi li ngapi. Uule womimvo, oonyothi ndhoka hatu mono, ohadhi ende tadhi indjipala noonkondo. Aantu yamwe ohaya dhiladhila kutya momulalawili gwetu omu na oonyothi omabiliyona. Ohaya ti wo kutya otashi vulika mewangandjo mu na omilalawili omabiliyona eyovi. Aantu itaya vulu okuyalula oonyothi adhihe, ihe Omushiti ote shi vulu, na kehe yimwe ohe yi ithana kedhina. Shono otashi ulike kutya onyothi kehe oyi ikalekelwa momeho gaJehova. (1 Kor. 15:41) Ongiini kombinga yaantu ye mboka a shitila kombanda yevi? Kalunga ngoka e shi onyothi kehe, oku tu shi wo paumwene. Oku shi nawa kehe gumwe mpoka e li, nkene u uvite naashoka a pumbwa.
Omolwashike tu na ‘okuhambelela Jehova’?
7 Jehova ine ku hokwa owala sho wu li omuntu, ihe oku uvite ko wo oonkalo ndhoka to piti mudho noku na oonkondo dhoku ku kwathela muudhigu woye. (Lesha Episalomi 147:5.) Otashi vulika wu kale wu uvite kutya onkalo yoye oya kwata miiti noito vulu oku yi idhidhimikila. Kalunga oku shi omangambeko goye ‘noku shi kutya ngoye ontsi yevi.’ (Eps. 103:14) Ohatu ningi omapuko ga faathana lwiikando, molwaashono inatu gwanenena. Ohatu iyele ombedhi, omolwiinima mbyoka hatu popi, omahalo omawinayi ngoka hatu kala tu na nomolwondumbo ndjoka hatu kala tu na. Jehova iha ningi omapuko, ihe oku shi nkene hatu kala tu uvite, oshoka oku tu shi nawa. — Jes. 40:28.
Omolwashike tu na ‘okuhambelela Jehova’?
18 Omupisalomi okwa li a tseya kutya Jehova okwa li a hokwa oshigwana she shonale. Osho owala sha li sha pewa “oohapu” dhe nosho wo “iipango nomautho ge.” (Lesha Episalomi 147:19, 20.) Kunena otwa yambekwa, sho otse owala hatu ithanwa nedhina lyaKalunga. Otwa pandula sho tu mu shi, sho tu na Oohapu dhe tadhi tu wilike monkalamwenyo yetu, naasho tatu vulu okukala nekwatathano lyi ikalekelwa naye. Mbela ku na omatompelo ogendji omawanawa wi igidhe to ti: “Hambeleleni” Jehova! ngaashi omunyoli gwEpisalomi 147? Mbela ito vulu okuladhipika yalwe ya ninge sha faathana?
Omaliko gomOmbiimbeli
Ilonga oshindji kombinga yaJehova okupitila meshito lye
6 Jehova okwa tula po ethimbo lyokuninga iinima. Omumvo kehe lwopehulilo lyaFebuluali sigo omokati kaMei, Aaisraeli oya li haya mono oonkumbinkumbi tadhi tuka tadhi tembukile lwokuumbangalantu. Kalunga okwa li a lombwele Aaisraeli a ti: “Oonkumbinkumbi odhi shi ethimbo [lyadho] lyokushuna.” (Jer. 8:7) Ngaashi owala Jehova a tulila po oonkumbinkumbi ethimbo lyokutembuka, okwa tula po wo ethimbo lyokuhanagula po aakolokoshi. Kunena ngele tatu tala oondhila tadhi tembuka, ohashi tu dhimbulukitha kutya otatu vulu okwiinekela Jehova kutya oku na “ethimbo” ndyoka ta ka hanagula po uuyuni mbuka wa kolokosha. — Hab. 2:3.
17-23 FEBULUALI
OMALIKO OKUZA MOOHAPU DHAKALUNGA OMAYELETUMBULO 1
Aagundjuka, ohamu pulakene kulye?
Ino etha nando osha shi ku yuge ondjambi
16 Ongiini ngele ngoye omugundjuka gwomimvo omulongo nasha, nowu uvite kutya aavali yoye Aakriste ihaye ku uvu ko noye na oompango oondhigu? Shoka otashi vulika shi ku uvithe nayi, notashi vulika wu kale wa limbililwa ngele okulongela Jehova oku li ngaa shili omukalo dhingi monkalamwenyo. Ihe ngele owe etha okuuva nayi kwoye ku ku ningithe wu ethe po okulongela Jehova, mokweendela ko kwethimbo oto ka mona kutya kapu na gumwe e na ko nasha nangoye lela e vule aavali yoye aatilikalunga negongalo.
17 Ngele aavali yoye ihaye ku pukulula, mbela ito ka kala wa limbililwa ngele oye na ko ngaa nasha nangoye shili? (Heb. 12:8) Ihe otashi vulika omukalo moka aavali yoye haye ku pe egeeloputudho, ogwo hagu ku uvitha nayi. Pehala lyokuuva nayi, kambadhala okuuva ko kutya ngiika opu na etompelo sho taye ku pukulula momukalo ngoka. Onkene kala wa gundjila nokuninga ngaashi to vulu wu yande okwiihumbata nayi, sho to kwathelwa. Oohapu dhaKalunga otadhi ti: “Ngoka ti ikwata mokupopya, oye omunongo, naangoka ti idhidhimike momwenyo gwe, oye omunandunge.” (Omayel. 17:27) Elalakano lyoye nali kale okukala omuntu a koka moondunge, ngoka ha taamba ko omayele nokumona mo uuwanawa nokaapu na okuuvila nayi omukalo moka we ga pewa. (Omayel. 1:8) Okukala wu na aavali mboka ye hole shili Jehova, oshi li eyambeko. Otaya ka kala shili ya hala oku ku kwathela wu ka mone ondjambi yomwenyo gwaaluhe.
w05-E 2/15 ep. 19-20, okat. 11-12
Natu gamene omuthika gwetu gwopaKriste
11 Lalakanena okunyanyudha Kalunga, ihe haantu. Oshi li paunshitwe okukala twa hala tu kale twa talika ko tu li oshitopolwa shongundu yontumba. Kehe gumwe okwa pumbwa ookuume, nokukala twa taambiwa ko ohashi tu nyanyudha. Pethimbo lyuugundjuka nosho wo lyuukuluntu, omathiminiko goomakula otaga vulu okukala ge na oonkondo, naashoka ohashi etitha po ehalo enene lyokuholela yalwe nenge okuya nyanyudha. Ihe ookuume noomakula ihaya kala aluhe ye na ko nasha nuuwanawa wetu. Omathimbo gamwe ohaya kala owala ya hala yamwe ye ya wayimine mokulonga shoka sha puka. (Omayeletumbulo 1:11-19) Ngele Omukriste ta igandja komathiminiko omawinayi goomakula, olundji oha kambadhala okwaa holola omuthika gwe. (Episalomi 26:4) Omuyapostoli Paulus okwa londodha a ti: “Inamu faathana nonkalo yuuyuni mbuka.” (Aaroma 12:2) Jehova oha gandja oonkondo dhokomutima ndhoka twa pumbwa, opo tu kondjithe enwethomo lyayalwe. — Aahebeli 13:6.
12 Ngele omathiminiko ngoka taga ziilile kuyamwe ota ge tu thiminike tu yone po omuthika gwetu gwopaKriste, oshiwanawa tu dhimbulukwe kutya uudhiginini wetu kuKalunga owo wa simanenena shi vulithe etaloko lyaantu nenge iikala yoyendji. Oohapu ndhoka dhi li muEksodus 23:2 ndhoka tadhi ti: “Ino landula ongundu muuwinayi,” odhi li ekotampango tali tu gamene. Sho Aaisraeli ooyakwawo oyendji ya li ya limbililwa ngele Jehova ota ka gwanitha po ngaa omauvaneko Ge, Kaleb okwa li a tindi thiluthilu okutsa kumwe nayo. Okwa li e na uushili kutya omauvaneko gaKalunga oge shi okwiinekelwa, nokwa li a yambekwa noonkondo, omolwonkatu ye. (Numeri 13:30; Josua 14:6-11) Mbela nangoye owu na ehalo lyokukondjitha omathiminiko gomadhiladhilo goyendji, opo wu gamene ekwatathano lyoye naKalunga?
Omaliko gomOmbiimbeli
Owino otayi igidha muule
7 “Aantu yanathangwa” oomboka hayi itaale kehe shoka taya lombwelwa, nohaya pukithwa nuupu. (Omayel. 14:15) Olundji ohatu tsakaneke aantu ye li ngaaka miilonga yokuuvitha. Dhiladhila kwaashika, pashiholelwa aantu omamiliyona oya pukithwa kaawiliki yomalongelokalunga noyopolotika. Yamwe ohaya kala ya kumwa, uuna yu uvu kutya aawiliki mboka oye ya fundja. Ihe mboka ya tumbulwa mOmayeletumbulo 1:22 ohaya hogolola okukala yanathangwa nenge tu tye okukala kaaye na owino, molwaashoka osho ye hole. (Jer. 5:31) Ohaya ningi kehe shoka ya hala noinaya hala okwiilonga shoka Ombiimbeli tayi ti nenge okuvulika koompango dhayo. Oyendji oyu uvite ngaashi omukiintu gumwe a pwila omutse nothingo melongelokalunga lyontumba moQuebec, moKanada ngoka a lombwele Onzapo yimwe a ti: “Ngele omusita gwetu okwe tu pukitha, ombedhi otayi ka kala ye ihe kayi shi yetu!” Inatu hala okuholela aantu mbono hayi ipwililike owina! — Omayel. 1:32; 27:12.
24 FEBULUALI–2 MAALITSA
OMALIKO OKUZA MOOHAPU DHAKALUNGA OMAYELETUMBULO 2
Omolwashike itoo ningi ngaashi to vulu pekonakonombiimbeli lyoye lyopaumwene?
“Kala moshili”
16 Haatuhe tu hole okulesha nokukonakona. Ihe Jehova ote tu lombwele tu tsikile ‘okukonga’ notu tsikile ‘okushilila,’ opo tu uve ko nawa oshili yomuule yOmbiimbeli. (Lesha Omayeletumbulo 2:4-6.) Ngele otwa ningi oonkambadhala ndhoka, otatu ka mona uuwanawa. Corey okwa popi kombinga yekonakono lye lyopaumwene a ti kutya oha gandja eitulomo kovelise yimwe poshikando. Okwa yelitha a ti: “Ohandi lesha enyolo kehe lyopevi, oovelise ndhoka dha pamba ovelise yontumba, nohandi ningi omapekapeko ga gwedhwa po. . . . Ohandi tseya iinima oyindji sho tandi longitha omukalo nguka!” Kutya nduno ohatu longitha omukalo ngoka nenge gulwe, ohatu ulike kutya otwa lenga oshili yOmbiimbeli, uuna hatu itulile po ethimbo nokuninga oonkambadhala tu yi konakone. — Eps. 1:1-3.
Owino otayi igidha muule
3 Owino otayi vulu okukala uukwatya wokuvula okulongitha shoka tu shi, opo tu ninge omatokolo omawanawa. Ihe owino yashili oya kwatela mo oshindji. Ombiimbeli otayi ti: “Etilokalunga olyo ekota lyowino, nokutseya Omuyapuki okwo uunongo wo wene.” (Omayel. 9:10) Onkee, uuna tu na okuninga etokolo lyontumba lya simana, otu na okulongitha ontseyo ‘yokutseya omuyapuki,’ ano omadhiladhilo gaJehova, uuna tatu ningi omatokolo ngoka. Otatu vulu oku shi ninga mokukonakona Ombiimbeli niileshomwa yetu ya kankamena kOmbiimbeli. Ngele osho twa ningi, kungawo otatu ulike owino yashili. — Omayel. 2:5-7.
4 Jehova oye owala ha vulu okugandja owino yashili. (Rom. 16:27) Omolwashike Jehova oye onzo yowino? Shotango, e li omushiti gwetu oku shi kehe shimwe kombinga yaashoka a shita. (Eps. 104:24) Oshitiyali, kehe shoka Jehova ha ningi ohashi ulike kutya oku na oondunge. (Rom. 11:33) Oshititatu, omayele gaJehova gopandunge ohaga etele aluhe uuwanawa mbono haye ga tula miilonga. (Omayel. 2:10-12) Ngele otwa hala tu kale shili tu na oondunge, otu na okutaamba ko oshili yopetameko noku yi etha yi tu wilike uuna tatu ningi omatokolo nenge tatu katuka onkatu yontumba.
Aagundjuka, kolekeni eitaalo lyeni
2 Mbela wu li omupiya gwaJehova omugundjuka nenge opo to ilongo kombinga Ye, oho kala wu uvite to thiminikwa wu itaale shoka shi itaalwa apuhe, ngaashi elongo lyoevolusi, pehala lyokwiitaala kutya oku na Omushiti? Ngele osho, opu na shoka tashi vulu oku ku kwathela wu nkondopaleke eitaalo lyoye noku li kaleka lya kola. Onkatu yotango, longitha oondunge ndhoka Kalunga e ku pa, ano ‘owino ndjoka tayi ke ku tonatela.’ Otayi ke ku gamena komalongo gopantu gomuuyuni mbuka, ngoka taga vulu okuyonagula po eitaalo lyoye. — Lesha Omayeletumbulo 2:10-12.
3 Eitaalo lyashili olya kankamena kontseyo yashili kombinga yaKalunga. (1 Tim. 2:4) Sho to lesha Oohapu dhaKalunga niileshomwa yetu yopaKriste, ino lesha mo owala to tondoka. Longitha oondunge nomadhiladhilo goye, opo wu ‘uve ko’ shoka to lesha. (Mat. 13:23) Natu tale nkene okuninga ngaaka taku vulu oku ku kwathela wu koleke eitaalo lyoye mOmbiimbeli nomuKalunga, ngoka e li Omushiti. Opu na uuyelele owundji mboka tawu ku kwathele wu kale wu na “einekelo lya kola.” — Heb. 11:1.
Omaliko gomOmbiimbeli
Kala popepi naJehova
10 Ongiini to vulu okuninga kuume kaJehova? Okukonakona Ombiimbeli okwe ku kwathela wu tseye nawa Jehova nowu pange uukuume naye. Uukuume weni naye owa fa omulilo. Ngele owa hala omulilo gu kale gwa tema, owa pumbwa okutula po iikuni. Sha faathana, owa pumbwa okutsikila okwiilonga kombinga yaJehova, opo wu koleke uukuume weni naye. — Omayeletumbulo 2:1-5.