Iilyo iyali iipe yOlutuwiliki ya langekwa po
MOMASIKU 5 Kotoba 2024, pokugongala kwokomumvo opwa li pwa ningwa etseyitho lyi ikalekelwa: Omumwatate Jody Jedele nosho wo Jacob Rumph, oya langekwa po ye li iilyo yOlutuwiliki lwOombangi dhaJehova. Aamwatate ayehe oya kala nokulongela Jehova nuudhiginini uule womimvo.
Jody Jedele nomukulukadhi gwe, Damaris
Omumwatate Jedele okwa valelwa moMissouri, moAmerika nokwa putukila moshili. Ye nooyandjawo oya li haya zi moshitopolwa moka ihaamu uvithilwa olundji. Onkee ano okwa li a tsakanene naamwatate oyendji ya za komahala ga yoolokathana, mboka ya li haye ya okutalela po ya kwathele mokuuvitha onkundana ombwanawa. Ohole nuukumwe wawo oya li lela ya guma Jedele. Okwa li a ninginithwa sho e na omimvo omulongo nasha, mo 15 Kotoba 1983. Okwa li ha tyapula iilonga yokuuvitha, naasho a mana osikola, okwa tameke okukokola ondjila pandjigilile muSeptemba 1989.
Sho Jedele a li omugundjuka, aavali ye oya li haye mu fala pamwe nokamwayinakadhona, ya ka talele po koBetel. Omatalelopo ngono oga li gi inyengitha aanona yi itulile po elalakano lyoku ka longa koBetel, elalakano ndyoka ayehe ya li ya dha. Omumwatate Jedele okwa li a wayimine uukwanegumbo waBetel moWallkill, muSeptemba 1990. Tango okwa li ha longo kOshikondo shOkwoopaleka nolwanima Okoshikondo shUunamiti.
Lwopethimbo ndyono, omagongalo gelaka lyOshispania oga li taga ende taga koko, noga li ga pumbwa aamwatate ya kwatele komeho. Onkee ano omumwatate Jedele okwa li a wayimine limwe lyomugo, nokwa tameke okwiilonga Oshispania. Nziya konima yaashono, okwa li a tsakanene naDamaris, omumwameme ngoka naye a li ta kokola ondjila moshitopolwa moka. Mokweendela ko kwethimbo, oya hokana, naDamaris okwa wayimine Jedele koBetel.
Mo 2005, oya thigi po Obetel, ya ka sile oshimpwiyu aavali yawo mboka aadhiginini. Pethimbo ndyono, oya li taya kokola ondjila pandjigilile. Omumwatate Jedele okwa li ha kwathele mokulonga Osikola yOkudheula Aakokolindjila, nokwa li ha longo mOkomitiye yOkukwatathana nIipangelo yomoshitopolwa nosho wo mOkomitiye yOkutunga yomOshitopolwa.
Mo 2013, omumwatate nomumwameme Jedele oya li ya hiywa ya ka longe ishewe koBetel, moproyeka yokutunga koWarwick. Okuza mpono, oya ka longela wo koPatterson nokoWallkill. Omumwatate Jedele okwa li wo ha longo kOshikondo shOkuthaneka nOkutunga shomOshitopolwa nosho wo mOkomitiye yokugandja uuyelele kiipangelo. MuMaalitsa 2023, okwa li a langekwa po e li omukwatheli mOkomitiye yIilonga. Sho ta dhiladhila kombinga yiinakugwanithwa ye ayihe, ota ti: “Uuna wa pewa iinakugwanithwa iipe, omathimbo gamwe otashi vulika wu kale wu uvite wa dhigupalelwa. Ihe pompito ndjono, opo wu na okudhimbulukwa kutya owa pumbwa okwiinekela muJehova, molwaashoka oye he shi ningitha tashi wapa, opo tu gwanithe po kehe shoka te tu pula tu ninge.”
Jacob Rumph nomukulukadhi gwe, Inga
Omumwatate Rumph okwa valelwa moCalifornia, moAmerika. Sho a li omushona, yina ka li we i ipyakidhila, ihe okwa li ha ningi oonkambadhala a longe omwana oshili yOmbiimbeli. Shimwe ishewe, omumvo kehe, Rumph okwa li ha ka talela po yinakulu, ngoka e li Ombangi ondhiginini. Yinakulu okwa li e mu kwathele a kokeke ohokwe yoshili ndjoka a li e na, naasho e na omimvo 13, okwa li a pula ekonakonombiimbeli. Mo 27 Septemba 1992, sho e na omimvo omulongo nasha, okwa ninginithwa. Shi nyanyudha, yina okwa li a ningi ishewe omuuvithi i ipyakidhila, noyaandjawo ayehe oya tameke okuninga ehumokomeho nokuninginithwa.
Sho e li omugundjuka, omumwatate Rumph okwa li ha mono nkene aakokolindjila ya nyanyukwa. Onkene sho a mana osikola, okwa tameke okukola ondjila muSeptemba 1995. Mo 2000, okwa tembukile koEcuador, a ka longele hoka ku na ompumbwe onene yaauvithi. Hoka okwa tsakanene ko naInga, omumwameme omukokolindjila a za koKanada, nolwanima oya hokana. Konima sho ya hokana, oya kala nokulongela mondoolopa yi li moEcuador, moka mwa li okangundu okashona kaauvithi. Kunena, moEcuador omu na omagongalo tage shi enditha nawa lela.
Mokweendela ko kwethimbo, omumwatate nomumwameme Rumph oya langekwa po ye li aakokolindjila yi ikalekelwa, nolwanima oya ka longa miilonga yuutonatelishikandjo. Mo 2011, oya li ya hiywa kongundu onti-132 yaGilead. Konima sho ya pewa oonzapo dhawo, oya ka longela komahala gi ili nogi ili muuyuni awuhe, noya li haya tyapula iinakugwanithwa ya yoolokathana, ngaashi iilonga yaBetel, iilonga yuutumwa nosho wo iilonga yuutonatelishikandjo. Omumwatate Rumph okwa li wo a pewa uuthembahenda wokulonga Osikola yAauvithi yUukwaniilwa.
Omolwomukithi gwekomba, gwo-COVID-19, omumwatate nomumwameme Rumph oya li ya shuna koAmerika. Oya hiywa koBetel yaWallkill, hoka omumwatate Rumph a li a pewa edheulo mOshikondo shIilonga. Mokweendela ko kwethimbo, oya tuminwa ishewe koshitayimbelewa shaEcuador, hoka omumwatate Rumph a ka longa mOkomitiye yOshitayimbelewa. Mo 2023, oya tuminwa koWarwick. MuJanuali 2024, omumwatate Rumph okwa li a langekwa po e li omukwatheli mOkomitiye yIilonga. Sho ta dhiladhila kombinga yiilonga mbyoka a longa, ota ti: “Shoka hashi ningitha oshinakugwanithwa shi kale shi ikalekelwa kashi shi ehala, ihe aantu mboka ho longo nayo.”
Otwa lenga iilonga yuudhiginini yaamwatate mbaka, notatu tsikile ‘nokukala twa simaneka aalumentu mboka ye ya fa.’ — Fil. 2:29.