Oilyo ipe yOlutuwiliki

ONGULA yEtitatu, mo 24 Auguste 2005, oukwaneumbo waBetel womOilongo yaHangana yaAmerika nosho yo womuKanada owa li wa uda eshiivifo litunhula. Okwa li kwa shiivifwa kutya ovamwatate vavali, Geoffrey W. Jackson naAnthony Morris, ova li tava ka hovela okulonga ve li oilyo ipe yOlutuwiliki lEendombwedi daJehova okudja mu 1 Septemba 2005.

Omumwatate Jackson okwa li a hovela oukokolindjila muFebruali 1971, muTasmania, okanhunu kaAustralia. MuJuni 1974, okwa hombola Jeanette (Jenny). Okafimbo kanini konima yaasho, vo naJenny ova li va nangekwa po ve li ovakokolindjila ve likalekelwa. Okudja mo 1979 fiyo 2003, ova li tava longo ve li ovatumwa muTuvalu, Samoa nomuFiji — ounhunu ovo ve li kolukadi lEfuta la Mwena. Ofimbo omumwatate nomumwameme Jackson va li tava longo kounhunu ovo, ova li yo hava yambidida oilonga yokutoloka oileshomwa yopaMbibeli. Okudja mo 1992, omumwatate Jackson okwa li ta longo e li oshilyo shOkomitiye yOshitaimbelewa shaSamoa, opo nee okudja mo 1996 okwa ka longa e li oshilyo shOkomitiye yOshitaimbelewa shaFiji. MuAprili 2003, omumwatate nomumwameme Jackson ova ya va ka longe ve li oilyo youkwaneumbo waBetel kOilongo yaHangana yaAmerika, oko va hovela okulonga mOshikondo shOilonga yOkutoloka. Okafimbo kanini konima yaasho, omumwatate Jackson okwa li a pewa oufembanghenda wokulonga e li omukwafeli wOkomitiye yOkuhonga yOlutuwiliki.

Omumwatate Morris okwa hovela oukokolindjila mo 1971 mOilongo yaHangana yaAmerika. MuDesemba womudo oo tuu oo, okwa hombola Susan, nova twikila oule womido nhee lwaapo nokukokola ondjila, fiyo osheshi omonamati wavo woshiveli, Jesse, a dalwa. Lwopokati opo, ova ka dala vali omumati wedina Paul. Omumwatate Morris okwa ka shuna mo moukokolindjila mo 1979. Omukainhu waye naye okwa ka shuna mo moukokolindjila konima eshi ovanamati vavo va hovela ofikola. Oukwaneumbo wavo owa li wa ya u ka longe oko ku na omhumbwe inene, kOkanhunu kaRhode nosho yo kuCarolina shokOlundume, mOilongo yaHangana yaAmerika. MuCarolina shokOlundume, omumwatate Morris okwa li ha yakula mo omupashukilishikandjo. Ofimbo ve li oko, ovanamati vavo ova hovela oukokolindjila wondjikilile. Jesse naPaul ova li va shivwa va ka longe koshitaimbelewa shomOilongo yaHangana yaAmerika, konima eshi va wanifa omido 19. Lwopokati opo, omumwatate Morris okwa hovela okulonga e li omupashukilishikandjo. Opo nee mo 2002 vo nomumwameme Susan ova li va shivwa va ka longe kuBetel, oko va hovela okulonga mu 1 Auguste omudo oo tuu oo. Omumwatate Morris okwa hovela okulonga mOshikondo shOilonga muPatterson, opo nee konima yefimbo okwa ka pewa oufembanghenda wokulonga e li omukwafeli wOkomitiye yOilonga yOlutuwiliki.

Kakele koilyo oyo ivali ipe, oilyo ikwao yOlutuwiliki oyo: C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; nosho yo D. Sydlik. Oilyo aishe yOlutuwiliki oi li Ovakriste ovavaekwa.