Okugongala hoka okundhindhilikwedhi mondjokonona

STEPHEN LETT, oshilyo shOlutuwiliki lwOonzapo dhaJehova okwa ti: “Pehulilo lyokugongala huka kehe gumwe ota ka tya, ‘Taa! huka okwa li shili okugongala kwopauteokratika okundhindhilikwedhi mondjokonona!’” Oohapu ndhoka odha li dha ningitha engathithi lyaamwatate li kale lya halelela okuuva shoka tashi ka popiwa. Oya li pokugongala kokwomvula okuti-126 kwo-Watch Tower Bible and Tract Society of Pennsylvania, hoka kwa li ko mo 2 Kotoba 2010, mOshinyanga shIigongi shOonzapo dhaJehova moshilando Jersey, New Jersey, U.S.A. Iitsa yimwe yini ya li ya tsuwa omuthindo pokugongala huka kwopandjokonona?

Oshipopiwa shotango osha li sha gandjwa komumwatate Lett, okwa li e shi gandja nehwamo nokwa li ta popi kombinga yetemba lyaJehova lyomegulu ndyoka li li membo lyaHesekiel. Osheenditho shika oshinene nohashi adhima otashi thaneke ehangano lyaJehova Kalunga ndyoka oye mwene te li wilike. Omumwatate Lett okwa ti kutya oshitopolwa shalyo shomegulu osha thikama po miishitwa yopambepo, ohashi endelele ngaashi olwaadhi, nongaashi omadhiladhilo gaJehova. Oshitopolwa shalyo shokombanda yevi nasho otashi pula komeho. Omumwatate Lett okwa popi omahumokomeho gontumba ngoka opo ga ningwa oomvula dha zi ko moshitopolwa shi wetike shehangano lyaKalunga.

Pashiholelwa, iitayimbelewa yimwe oya hengumukila mumwe nosha ningitha aakalele oyendji mboka ya li momagumbo gaBetel miilongo mbyoka ya gandje eitulomo kiilonga yokuuvitha. Omumwatate Lett okwa ladhipike aapulakeni ya kale nokugalikana opo Olutuwiliki, ndoka lu li le po ongundu yomupiya lu tsikile okulonga nuudhiginini nosho wo noondunge.—Mat 24:45-47.

Oolopota tadhi tsu omukumo nosho wo omapulapulo taga nyanyudha

Omumwatate Tab Honsberger, ngoka e li oshilyo shOkomitiye yOshitayimbelewa shaHaiti okwa li a gandja olopota tayi gumu omutima kombinga yekakamo lyevi ndyoka lya li lya ningwa mo 12 Januali 2010 moHaiti ndyoka lya faalele oomwenyo dhaantu 300 000 lwaampono. Okwa ti kutya aasita oya li taya lombwele aantu kutya Kalunga okwa geele mboka ya gumwa koshiponga shoka molwaashoka kaya li ye na eitaalo e ta gamene mboka aawanawa. Shoka hasho molwaashoka naalongi yomuyonena omayuvi mboka ya li mondholongo oya zi mo sho omakuma gondholongo ga teka po. Aahaiti oyendji mboka ye na omitima omiwanawa otaya mono ehekeleko sho tayi ilongo oshili kutya omolwashike omathimbo ngoka tu li mugo omadhigu noonkondo. Omumwatate Honsberger okwe endulula oohapu ndhoka dha li dha popiwa komumwatate omudhiginini Omuhaiti ngoka omukulukadhi gwe a sila moshiponga a ti: “Sigo okunena, ohandi lili. Kandi shi shi kutya oluhodhi nduka otalu hulile peni, ihe onda nyanyukwa omolwohole ndjoka handi ulukilwa kehangano lyaJehova. Ondi na etegameno, nonda tokola toko okukwathela yalwe ya kale wo ye na etegameno.”

Omumwatate Mark Sanderson, ngoka e li ngashingeyi oshilyo shuukwanegumbo waBetel moBrooklyn, okwa gandja olopota yi na ko nasha naFilipine. Omumwatate ngoka a li nale oshilyo shOkomitiye yOshitayimbelewa shaFilipine, okwa li a popi nenyanyu kombinga yiitsa yopombanda 32 yomwaalu gwaauvithi yUukwaaniilwa ngoka tagu ende tagu indjipala nosho wo nkene omwaalu gwaakonakonimbiimbeli ngoka tagu londo pombanda gu vulithe gwaauvithi kokulekule. Okwa hokolola kombinga yomumwatate Miguel ngoka okatekulu ke ka dhipagwa. Miguel okwa li a ningi ngaashi ta vulu opo nakudhipaga ngoka a pangulwe ye a tulwe mondholongo. Esiku limwe sho Miguel tu uvitha mondholongo okwa li a tsakanene nomulumentu ngoka. Nonando Miguel okwa li a tila okwa popi naye nombili nonohenda. Konima yaashono, okwa tameke okukonakona nomulumentu ngoka, okwi inyenge nawa e ta kala e hole Jehova. Ngashingeyi omulumentu ngoka okwa ninginithwa. Miguel oku li kuume ke kopothingo nota ningi oonkambadha opo omumwahe nguka omupe a ze mo mondholongo nziya.a

Omumwatate Mark Noumair ngoka e li omulongi moshikondo shokudheula mOsikola yoPauteokratika okwa landula ko noshitopolwa shomapulapulo. Okwa li a pulapula aaihokani ye li yatatu: Alex naSarah Reinmueller, David naKrista Schafer nosho wo Robert naKetra Ciranko. Omumwatate Alex Reinmueller ngoka ha kwathele mOkomitiye yOkunyanyangidha okwa hokolola kutya okwa li a ningi oshili ye mwene sho e na omimvo 15, sho a tameke okukokolondjila muKanada nolundji okwa li ha longo oye awike. Sho a pulwa kutya oolye ya kala ekwatho kuye moBetel, okwa tumbula aalumentu yatatu aadhiginini, ta popi nkene kehe gumwe e mu kwathele a koke pambepo. Omukulukadhi gwe Sarah okwa popi kombinga yuukuume mboka ya li ye na nomumwameme gumwe ngoka a li a kala omimvo omilongo mondholongo yaChina omolweitaalo lye. Sarah okwa popi kutya okwi ilonga okukala i inekela muJehova okupitila mokugalikana paumwene.

Omumwatate David Schafer ngoka ha kwathele mOkomitiye yOkulonga okwa pandula yina omolweitaalo lye lya kola nokwa popi wo aamwatate mboka ya li haya longo iilonga yokuteta omiti nkene ye mu kwathele a kale ha kutha uukwathelikokolindjila omanga e li omugundjuka. Omukulukadhi gwe Krista, okwa popi nkene a nwethwa mo kaakokele moBetel mboka yu ulika kutya ‘aainekelwa miinima iishona,’ ngaashi Jesus a ladhipika tu ninge.—Luk. 16:10.

Omumwatate Robert Ciranko ngoka ha kwathele mOkomitiye yOkunyola okwa hokolola kombinga yooyinakulu yaali noohekulu yaali mboka ya za koHungaria noya li aagwayekwa. Mo 1950 nasha sho e li okamatyona okwa li a kala poshigongi oshinene shoshitopolwa, nokwa li a kumwa sho a mono kutya ehangano lyaJehova oli na aantu oyendji ye vulithe mboka ye li megongalo lyawo. Omukulukadhi gwe Ketra okwa hokolola nkene i ilongo okukala omudhiginini sho a kala omukokolindjila megongalo moka mwa li mu na aashunimonima nosho wo omaupyakadhi ogendji. Okwa li i idhidhimike nokonima okwa li a tuminwa kegongalo limwe e li omukokolindjila i ikalekelwa, nokwa li a kumwa kuukuumwe nombili ndjoka yi li mo.

Omumwatate Manfred Tonak okwa gandja olopota kombinga yaEtiopia. Oshilongo shika osha kala po nale okuza pethimbo lyOmbiimbeli, nosha yambekwa naauvithi yonkundana ombwaanawa ye li 9 000. Oyendji yomuyo ohaya kala moshilandopangelo, Addis Ababa nenge popepi nasho. Onkee ano, iitopolwa yokomikandi oya pumbwa ekwatho olindji. Opo shi ningwe, Oonzapo dhomuEtiopia ndhoka dhi li kiilongo yilwe odha li dha pulwa opo dhi ye dhi uvithile kiitopolwa yokomikandi moshilongo shawo. Oyendji mboka ye ya oya ladhipike Oonzapo ndhoka dhi li moshilongo noya li wo ya mono mboka ye na ohokwe yokupulakena.

Iipopiwa ya pambathana mbyoka tayi popi kombinga yOonzapo dhaJehova muRusia nosho wo nkene dha kala tadhi kondjele uuthemba wadho paveta oya li ya dhenga mbanda. Omumwatate Aulis Bergdahl ngoka e li oshilyo shOkomitiye yOshitayimbelewa shaRusia oye a li a gandja ondjokonona nkene Oonzapo dhaJehova dha kala tadhi hepekwa muRusia, unene tuu muMoscow. Omumwatate Philip Brumley gwokOshikondo shIinima yUuyuuki koshitayimbelewa mIilongohangano okwa gandja olopota tayi nywitha omakutsi kombinga yaashoka Ompangu yUuthemba wOmuntu yaEuropa ya tokola oomwedhi opo dha zi ko kombinga yiipotha omugoyi mbyoka ya li ya ningilwa aamwatate. Ompangu oya li ya thiki pehulithodhiladhilo limwe kutya iipotha ayihe omugoyi kayi shi yoshili, noya li ya gandja omatompelo ge shi okuuviwa ko okuulika kutya omapopyo ngoka taga ningilwa aamwatate ogiifundja. Nonando otwa tegelela natango iizemo, omumwatate Brumley okwa popi kutya oshinima shoka otashi vulika shi ka nwethemo iipotha yopampangu miilongo yilwe.

Konima yonkundana ndjika tayi nywitha omakutsi, omumwatate Lett okwa tseyitha kutya Ompangu yUuthemba wOmuntu yaEuropa oya zimina okukonakona oshipotha shonalenale shi na ko nasha niifendela shoka sha kala ethimbo nuule pokati kepangelo lyaFulaanisa nOonzapo dhaJehova. Ompangu yaEuropa ndjoka ya simanekwa noonkondo ohayi taamba owala iipotha iishona mbyoka ye etwa kuyo. Sigo oompaka, Ompangu yaEuropa oya pulakena iipotha yi li 39 moka Oonzapo dhaJehova tadhi tamanekwa, ihe iipotha 37 ompangu oya li ya gama kudho. Omumwatate Lett okwa ladhipike opo aamwatate ya kale taya galikana Jehova Kalunga opo e tu kwathele shi na ko nasha noshipotha shoka tashi ungaungiwa nasho ngashingeyi.

Hugunina omumwatate Richard Morlan, ngoka e li omulongi gwOsikola yAakuluntugongalo okwa gandja olopota ye. Okwa popi nuuladhi kombinga yosikola nosho wo nkene aakuluntugongalo mboka ya li po ya gandja olupandu lwawo.

Iipopiwa yilwe mbyoka ya gandjwa kiilyo yOlutuwiliki

Omumwatate Guy Pierce oshilyo shOlutuwiliki okwa li a gandja oshipopiwa tashi tungu shoka sha li shu ukitha eitulomo kenyolo lyomumvo 2011, ndyoka tali ti: “Konga uuholameno medhina lyaJehova.” (Sef. 3:12, NW) Okwa popi kutya nonando otu li methimbo moka oshigwana shaJehova shi na okukala sha nyanyukwa, oli li wo ethimbo lya kwata miiti. Esiku enene lyaJehova oli li popepi, ihe aantu onkee ngaa natango taya kongo uuholameno momalongelokalunga giifundja, momahangano gopapolotika, momaliko, nokwiipwililikila iinima mbyoka tayi ningwa nomiinima yilwe ya fa mbyoka. Opo tu mone egameno lyashili otu na okwiithana edhina lyaJehova, shoka sha kwatela mo oku mu tseya, oku mu simaneka shili, nokukala twe mu inekela thiluthilu nokukala tu mu hole naashihe shoka tu na.

Omumwatate David Splane gwOlutuwiliki okwa gandja oshipopiwa tashi inyengitha omitima shi na oshipalanyolo: “Mbela owa ya ngaa mevululuko lyaKalunga?” Oku ulike kutya okuya mevuluko lyaKalunga itashi ti kutya omuntu owu na okukala itoo longo sha molwaashoka Jehova nOmwana otaya “longo aluhe” mesiku alihe lyopathaneko lyokuvulukwa opo ya gwanithe po elalakano lyaKalunga li na ko nasha niishitwa ayihe yokombanda yevi sigo elalakano alihe lya gwanithwa thiluthilu. (Joh. 5:17) Ongiini nduno tatu vulu okuya mevululuko lyaKalunga? Oshinima shimwe shoka twa pumbwa okuninga osho shoka kutya otu na okweetha po okulonga uulunde nokukala ihaatu iyukipalitha. Otwa pumbwa okukala neitaalo tali longo nokukaleka elalakano lyaKalunga momadhiladhilo, nokuninga ngaashi tatu vulu tu ambidhidhe elalakano ndyoka. Omathimbo gamwe ohashi vulika shi kale eshongo, ihe otwa pumbwa okutaamba ko omayele nokulandula omalombwelo ngoka taga zi kehangano lyaJehova. Omumwatate Splane okwi indile aapulakeni ya ninge ngaashi taya vulu opo ya ye mevululuko lyaKalunga.

Oshipopiwa shahugunina osha li sha gandjwa komumwatate Anthony Morris gwOlutuwiliki, shi na oshipalanyolo: “Otwa tegelela shike?” Omumwatate Morris okwa li a dhimbulukitha aapulakeni kombinga yomahunganeko gontumba ngoka Aakriste ayehe aadhiginini ya tegelela nondjuulukwe ga gwanithwe, eshi ningi ta popi nomuthindo nonehwamo. Iinima mbika oya kwatela mo eigidho ‘lyombili negameno’ nosho wo ehanagulo lyomalongelokalunga giifundja. (1 Tes. 5:2, 3, NW; Eh. 17:15-17) Omumwatate Morris okwa li a londodha aapulakeni ngele oya mono iiningwanima ya fa mbyoka tayi ninga inaya tya “Armageddon okwa thika,” molwaashoka otashi vulika kayi li egwanitho lyomahunganeko ngoka. Okwa ti kutya naya kale ye na enyanyu, eidhidhimiko nosho wo iikala yokutegelela mbyoka ya popiwa muMika 7:7. Pethimbo opo tuu mpoka okwa ladhipike ayehe ya kale ye na ekwatathano lya kola nOlutuwiliki, ngaashi naanaa aakwiita haya kala ngele taya ka ponokela etangakwiita enankondo. Okwa ti: “Ikoleleni, ne mu kale nomukumo, amuhe mbo mu na etegameno mOMUWA.”—Eps. 31:24.

Pehulilo opwa li pwa ningwa omatseyitho omandhindhilikwedhi taga nyanyudha. Omumwatate Geoffrey Jackson gwOlutuwiliki okwa li a tseyitha kutya opwa ningwa omalongekidho opo ku ningwe omalolelo gOshungolangelo yOshiingilisa sha pupalekwa ya nuninwa mboka kaaye shi nawa Oshiingilisa. Opo nduno omumwatate Stephen Lett okwa tseyitha kutya Olutuwiliki otalu ka ninga omalongekidho opo aatonateli yiitopolwa nosho wo aakulukadhi yawo mIilongohangano ya kale haya ningilwa omatalelopo guusita. Konima yaashoka okwa popi kutya Osikola yOkudheula mUukalele ngashingeyi otayi kala hayi ithanwa Osikola yOmbiimbeli yOkudheula Aamwatate Inaaya Hokana. Okwa tseyitha kutya otapu ka totwa wo Osikola yOmbiimbeli yOkudheula Aaihokani Aakriste. Osikola ndjika otayi ka pa aaihokani edheulo lya gwedhwa po opo ya vule okulongithwa pakuudha mehangano lyaJehova. Omumwatate Lett okwa tseyitha wo kutya Osikola yAatonateli Aayendi nAakulukadhi Yawo nosho wo Osikola yIilyo yOokomitiye dhIitayimbelewa nAakulukadhi Yawo ndjoka hayi ningilwa moPatterson otayi ka tamununwa mo opo kehe omvula ku kale oongundu mbali, opo naamboka ya li ko nale ya vule okukala po oshikando oshitiyali.

Pehulilo omumwatate John E. Barr gwoomvula 97, oshilyo oshikulu shOlutuwiliki okwa li a hulitha negalikano e shi ningi neifupipiko notashi zi komutima.b Kehe gumwe okwa zi po e wete kutya okugongala hoka okwa li shili okundhindhilikwedhi mondjokonona.

[Omanyolo gopevi]

[Oohapu dha simana pepandja 19]

Oshitopolwa shomapulapulo osha li sha nyanyudha aapulakeni

[Oohapu dha simana pepandja 20]

Jehova okwa laleka nuuyamba iilonga yokuuvitha muEtiopia