Aanasikola yaGilead ohaya zi miilongo ya yoolokathana muuyuni

Omumvo kehe, aamwatate naamwameme mboka ye li miilonga yethimbo lyu udha, okuza koombinga noombinga dhuuyuni ohaya hiywa ya ye kOsikola yOmbiimbeli yo-Watchtower yaGilead. Osikola ndjoka ohayi ningilwa mo-Watchtower Educational Center, mo-Patterson, sha-New York, moAmerika.a Aanasikola ohaya kwathelwa ya kale taye shi enditha nawa miinakugwanithwa yawo yi ili noyi ili mbyoka ye na mehangano lyaJehova. Edheulo ndyoka haya pewa ohali koleke omagongalo niitayimbelewa muuyuni awuhe.

Oolye haya yi kOsikola yaGilead? Aantu yomihoko adhihe noyomiigwana ayihe. Pashiholelwa, mongundu onti-147 ndjoka ya li ko mo 2019 omwa li aalongwa ye li 56 ya za miilongo 29 ya yoolokathana. Mboka haya hiywa kosikola yaGilead, ohaya kala nale ye li miilonga yethimbo lyu udha. Yamwe Aabetel, aatonatelishikandjo, aatumwa nosho wo aakokolindjila yi ikalekelwa.

Omanga ootundi inaadhi tameka, iinima ohayi kala nale ya tulwa pomahala manga kuyele. Oshikondo shokulongekidha omalweendo koombelewa dhetu oonene muuyuni, ohashi landele aanasikola uutekete woondhila komeho yethimbo. Pashiholelwa, osha li sha pula N$ 16 071.25 lwaampo okufutila owala omulongwa gumwe ondhila, okuza kiilongo yopondje, okuya nokugaluka koAmerika. Aalongwa mboka ya za kOontuntu dhaSalomo oya li ya londo oondhila iikando ine, opo ya thike moAmerika nosho wo iikando itatu sho taya shuna koshilongo shawo. Olweendo lwawo aluhe kumwe olwa li ookilometa dha konda po 35 400 noya li ya futu N$ 34 385.00 momulongwa kehe. Opo tu kwate nawa okamaliwa ketu, Oshikondo shokulongekidha omalweendo koombelewa dhetu oonene osha kala nokutala kutya uunake uutekete woondhila wu na ombiliha. Konima nokuli sho uutekete wa landwa nale, oya kala natango taya tala ngele oondando otadhi shuna pevi. Oshikondo shokulongekidha omalweendo ohashi longitha wo omayambidhidho giimaliwa mbyoka hayi pewa yamwe omagano sho haye ende olundji moondhila.

Aalongwa oyendji oya li ya pumbwa oovisa, opo ya vule okuya moAmerika. Oshikondo shiikwaveta koombelewa dhetu oonene muuyuni osha li she ya kwathele ye dhi mone. Opo omulongwa kehe a mone ovisa, osha li sha pula N$ 7 624.50 lwaampo.

Mbela omauwanawa geni hatu mono medheulo ndyoka hali pewa aalongwa yosikola yaGilead? Omumwatate Hendra Gunawan, omukuluntugongalo moAsia, ngoka megongalo lyawo mu na omusamane nomukadhi ya za kosikola yaGilead, okwa ti: “Nale megongalo lyetu kamwa li mu na aakokolindjila yondjigilile. Ihe sho mwe ya aalongwa ya za kosikola yaGilead, uulaadhi nombepo yawo yeiyambo oya nwetha mo yalwe, e taya tameke uukokolindjila. Konima owala yethimbo, omumwameme gumwe megongalo lyetu naye osho a ka ya kOsikola yAauvithi yUukwaniilwa!”

Omumwatate Sergio Panjaitan ngoka ha longo pamwe naanasikola yaGilead, moBetel moAsia, okwa ti: “Edheulo ndyoka ya pewa, kali shi owala elalekonuuyamba kuyo, ihe elalekonuuyamba kutse wo. Oya mona ontseyo oyindji lela, ihe pehala lyokukala tayi inomo, ohaya topolelathana shoka ye shi nayalwe. Shono ohashi tu tsu omukumo, nohashi tu inyengitha tu ladhipike yalwe wo.”

Ehangano ohali shi ende ngiini li kalele po oofuto adhihe dhosikola yaGilead? Ohali longitha oshimaliwa shoka hashi zi mOmayambidhidho giilonga yomuuyuni awuhe, ngoka ogendji gomugo haga gandjwa okupitila kepandja lyetu lyokointaneta, ko-donate.jw.org. Otatu pandula komayambidhidho goye ngoka ho tu pe, opo osikola ndjika haku ya aalongwa okuza miilongo ya yoolokathana muuyuni yi vule okutsikila.