Okutoloka nokupilinda embo ndyoka dhingi komambo agehe

Omulumentu gumwe ngoka Onzapo yaJehova okwa ti: ‘Onda kala nda tegelela Ombiimbeli ndjika uule womimvo 19.’ Ombiimbeli yini mbela? O-New World Translation of the Christian Greek Scriptures mOshibengali, elaka ndyoka a yama. Aantu oyendji ohaya popi oohapu dha fa ndhoka, shampa Ombiimbeli ndjoka ya piti melaka lyawo. Mbela owu shi ngaa ashihe shoka hashi kala sha kwatelwa mo, opo Ombiimbeli yo-New World Translation of the Christian Greek Scriptures yi tolokwe noyi etwe po?

Oshinima shotango, osipana yokutoloka kehe ohayi pewa epitikilo kOkomitiye yOkunyola yOlutuwiliki. Ohashi pula ethimbo li thike peni, opo osipana yi mane okutoloka Ombiimbeli ndjono? Omumwatate Nicholas Ahladis, ngoka e li mOshikondo shIilonga yOkutoloka, moWarwick, moNew York, ota ti: ‘Opu na iinima oyindji ya kwatelwa mo. Shimwe shomuyo, omwaalu gwaatoloki mboka ye li po, elaka ndyoka tali tolokwa olya kitakana shi thike peni, aaleshi yelaka ndono oye na ontseyo yOmbiimbeli yi thike peni nosho wo kutya elaka ndyono ohali popiwa miitopolwa yi thike peni. Oosipana dhimwe ohadhi mana okutoloka embo lyaMateus sigo Ehololo muule womumvo gumwe, dho dhimwe ohadhi yi sigo opomimvo ndatu. Opo osipana yi mane okutoloka Ombiimbeli ayihe, okuza puGenesis sigo okEhololo, olundji ohashi pula omimvo ne nenge dhi vulithe po. Oosipana dhomalaka gokuudhika ohadhi kutha ethimbo li vulithe mpoka nokuli.’

Kakele owala kaatoloki, opu na ishewe okukala mboka taya leshulula Ombiimbeli. Ohaya kala aalumentu naakiintu mboka ya putukila miitopolwa yi ili noyi ili. Ngele Ombiimbeli otayi tolokwa melaka ndyoka hali popiwa miilongo ya yoolokathana, nena aaleshululi oye na okuza miilongo ayihe moka hali popiwa. Aaleshululi mboka ihaya pula nando osenda yasha. Omaetopo gawo ohaga kwathele, opo Ombiimbeli ndjoka tayi tolokwa yi kale yi li paushili, ya yela nompu okuuviwa ko. Omulumentu gumwe ngoka ha dheula aatoloki yOmbiimbeli moSouth Afrika okwa ti: “Aatoloki ohaya kala yu uvite kutya oye na oshinakugwanithwa oshinene kuJehova nosho wo kaaleshi yOohapu dhe.”

Ngele Ombiimbeli ya pu okutolokwa, ohayi nyanyangidhwa nokutuminwa aaleshi. Opo yi nyanyangidhwe, opu na okukala iinima tayi landula: Oombapila, ohinga, iipeko, oonka dhi ili nodhi ili, iilapi hayi tulwa komambo, olwaala lwoshisiliveli, oongodhi dhuulenga, iilapi yokukwatela kumwe omambo, uupeko uukukutu wokohi yOmbiimbeli nosho wo oongodhi ndhoka hadhi kwatele kumwe Ombiimbeli ayihe. Otwa li twa longitha oshimaliwa sha konda po N$ 293 200 000.00, miilonga yokunyanyangidha Oombiimbeli, mo 2019. Omumvo gwa zi ko, mboka haya longo moshinyanyangidho shetu oya li ya longo oowili dha konda po 300 000 taya pilinda nokutuma Oombiimbeli.

Omolwashike twa longitha oshimaliwa oshindji nethimbo olindji ngawo miilonga mbyono? Omumwatate Joel Blue ngoka ha longo moshikondo International Printing, okwa ti: “Ombiimbeli oyo embo lya simanenena ndyoka hatu nyanyangidha. Onkee ano, otwa hala eholokopo lyayo li kale tali simanekitha Kalunga nosho wo etumwalaka ndyoka hatu uvitha.”

Ohatu nyanyangidha wo Oombiimbeli dho-New World Translation, ndhoka hadhi longithwa kaantu yomaulema gi ili nogi ili. Pashiholelwa, o-New World Translation yoondanda dhoshiposi, oya nyanyangidhwa momalaka omulongo. Opo wu ete po Ombiimbeli yimwe yoondanda dhoshiposi, ohashi pula oowili hetatu, yo ohayi kala ya thikama po momambo omanene ogendji, ngoka taga pumbwa ehala li thike poometa 2.3, ga gwane po agehe nawa. Ohatu nyanyangidha wo Oombimbeli dhi ikalekelwa dhaanandholongo, oshoka ohaya pitikwa owala ya leshe omambo ngoka ge na iipeko yoombapila.

Ombiimbeli yo-New World Translation ohayi kwathele aaleshi monkalamwenyo yawo. Pashiholelwa, mOrepablika yaKongo, omu na omukunda Tombe, moka hamu popiwa elaka lyOshikiluba. Okuza moKinshasa to yi koTombe, opu na oshinano shookilometa dha konda pe 1 700. Oonzapo dhaJehova moTombe odha li dhi na owala Ombiimbeli yimwe mOshikiluba, ndjoka yi na iitya mbyoka ihaayi popiwa we naanaa. Ombiimbeli ndjono yimwe oyo ya li hayi itaambathanwa kaamwatate, uuna tayi ilongekidhile iitopolwa yawo yokugongala. Okuza muAuguste 2018, kehe gumwe megongalo okwa li e na Ombiimbeli ye mwene mOshikiluba yo-New World Translation, yi ihwa po noya tolokwa melaka ndyoka kehe gumwe u uvite ko nawa.

Omumwameme gumwe, omupopi gwOshindowishi, okwa popi shi na ko nasha no-New World Translation ndjoka ya pepalekwa melaka lye, a ti: ‘Nale Ombiimbeli onda li handi yi lesha, molwaashoka ndi na oku shi ninga. Ihe ngashingeyi ohandi kala nda sa enota nonda halelela oku yi lesha.’ Omunandholongo gumwe okwa nyola a ti: “Onda li nda pewa Ombiimbeli yo-New World Translation, noya kwathela ndje ndi ninge omalunduluko monkalamwenyo yandje. Oya kwathela ndje wo ndi uve ko Oohapu dhaKalunga nawanawa. Onda hala okutseya oshindji kombinga yOonzapo dhaJehova naashoka ndi na okuninga, opo nangaye ndi kale Onzapo.”

Ayehe mboka haya lesha o-New World Translation ohaya pandula omaambidhidho ngoka haga ningwa, opo yi vule okutolokwa nokunyanyangidhwa. Omayambidhidho giilonga yomuuyuni awuhe ohaga ga gandjwa okupitila mepandja lyetu lyokointaneta, ko-donate.jw.org. Tangi unene komayambidhidho goye.