Okugandja iikwatha kwaamboka ya gumwa kiiponga yopaunshitwe

Momumvo 2020 omwa li iiponga oyindji yopaunshitwe, mwa kwatelwa omukithi gwoKorona (COVID-19) ngoka gwi ihanena uuyuni awuhe. Mbela Oonzapo dhaJehova odha li dha kwathele ngiini mboka ya gumwa kiinima mbyono?

Muule gwomukokomoko gwomumvo gwiilonga 2020,a Okomitiye yOkuunganeka yOlutuwiliki oya li ya gandja epitikilo tu longithe oshimaliwa shi thike N$ 430 080 000 mokugandja iikwatha, kaantu mboka ya dhengwa kiiponga yopaunshitwe ya konda po 200. Iiponga mbyoka ongaashi omukithi gwoKorona, iikungulu yombepo mumwe nomvula, omafundja moAfrika, ondjala moVenezuela nosho wo oshikukuta moZimbambwe. Oshimaliwa shoka osha longithwa mokulanda iikulya, omeya, omahala gokukala, iizalomwa, oopela nomiti dhokupanga, iilongitho yokwoopaleka nosho wo yokutungulula omatungo. Tala kiiholelwa yimwepo.

Omukithi gwoKorona. Aamwatate naamwameme yamwe muuyuni oya kwatwa komukithi ngoka, yo yamwe ogwe ya guma pamadhiladhilo nopu na wo yamwe mboka ya kanitha iiyemo yawo. Opo ya kwathelwe opwa totwa Ookomitiye dhOkuunganeka Omakwatho muuyuni awuhe dha konda po 800. Ookomitiye ndhoka odha kala nokutala kutya aamwatate oya pumbwa shike nokugandja nziya olopota kOkomitiye yAaunganeki, opo yi tseye nkene tayi vulu okugandja omakwatho.

Ookomitiye dhOkuunganeka Omakwatho muuyuni awuhe odha kala nokuunganeka aantu oyendji ya mone iikulya, omeya, oopela nomiti nosho wo oothewa niinima mbyoka hayi dhipaga ombuto yoKorona. Iilyo yOokomitiye ndhoka oya kala tayi longo pamwe naakuluntugongalo miitopolwa yimwe, opo yi kwathele aamwatate ya mone omakwatho okuza kepangelo lyoshilongo moka ye li.

Mboka kaaye shi Oonzapo nayo oya mona wo kutya ehangano lyetu olya gandja iikwatha. Pashiholelwa, omuwiliki gwoshikandjo Nakonde, moZambia, Field Simwinga, okwa lombwele aamwatate a ti: “Otatu mu pandula sho mwa gandja iikwatha mbyoka ya pumbiwa kaanamagumbo moshitopolwa shetu.”

Ompumbwe yiikulya moAngola. Omolwomukithi gwoKorona, osha kala oshidhigu okweeta iikulya moAngola okuza kiilongo yopondje. Oshizemo, ondando yiikulya oya londo pombanda nayi. Omolwonkalo ndjono, osha li oshidhigu noonkondo kaamwatate naamwameme okulanda iikulya.

Oshitayimbelewa shaBrazilia osha li sha pulwa shi tumine aamwatate koAngola ooshako dhiikulya. Opo oshimaliwa shi longithwe nawa, aamwatate oya kongo mpoka taya vulu okulanda iikulya oyindji poshikando kombiliha noku yi tuma pethimbo mpoka. Oshako kehe yookilograma 20 dhiikulya ngaashi olwiishi, omapoke nosho wo omagadhi gokulya oya li ya pula owala N$ 338 lwaampo oku yi landa noku yi tuma. Sho tatu popi ngeyi ooshako 33 544, ndhoka dhi thike pootona 654 dhiikulya odha tuminwa nale aamwatate koAngola. Iikulya mbyono ye etwa mo, mwa gwedhwa mbyoka yomoshilongo oya vula okupalutha aantu ya konda po 50 000.

Mbela aamwatate oya kala yu uvitile ngiini omakwatho ngono? Omumwatate Alexandre, ngoka ha kala kiitopolwa yokomikandi moAngola, okwa ti: “Shino osha tompa ndje ndi itaale kutya Jehova oku hole ndje nosho wo kutya kandi li ongame awike. Osha yela kutya ehangano lyaJehova olya simaneka ndje noonkondo.” Meme Mariza, ngoka ta tekula oyana oye awike, okwa ti: “Jehova okwa tondoka onkugo yandje. Otandi mu pandula nosho wo ehangano lye.”

Omakwatho goshikukuta moZimbambwe. Pethimbo lyomumvo gwiilonga 2020 gwOonzapo dhaJehova, moZimbambwe omwa li oshikukuta inaashi monika nale. Aantu omamiliyona oya li taya hepekwa nayi kondjala. Oonzapo dhaJehova odhindji moZimbambwe nadho kadha li dhi na iikulya.

Opo aamwatate ya kwathele, opwa li pwa totwa Ookomitiye dhOkuunganeka Omakwatho dhi li ntano. Aauvithi oyendji oya li ya kwathele mokupakela iikulya, okutsilika iinima mbyoka ya pumbiwa, yo yamwe oya li ya gandja oohauto dhawo dhi kwathele.b Pethimbo lyomumvo gwiilonga 2020, ehangano lyOonzapo dhaJehova odha li dha longitha N$ 9 681 854 dhi paluthe aantu ye vulithe po 22 700!

Omathimbo gamwe aamwatate ohaya adhika nale ya mana po iikulya yawo, omanga iikwatha inaayi thika. Uuna iikulya ya thiki, aamwatate ohaya pandula Jehova. Yamwe ohaya tameke nokuli okwiimba omaimbilo gUukwaniilwa.

Aamwameme yaaIi aaselekadhi yomoshitopolwa shimwe, oya li ya yi koshigongi momudhingoloko gwawo hoka kwa li taku popiwa kombinga yokupewa iikulya kehangano limwe kaali shi lyepangelo. Ihe oshigongi osha li tashi popi unene kombinga yopolotika, onkee aamwameme oya li ya tindi okuninga shoka ya li taya pulwa ya ninge, opo ya pewe iikwatha. Sho taya zi po poshigongi, aantu oya li taye ya sheke notaye ya lombwele taya ti: “Inamu ya nando mu tu indile iikulya!” Ihe konima owala yiiwike iyali, aamwatate oya li ya yi koshitopolwa hoka ya faalele aamwameme mboka iikulya, omanga nokuli iikulya yehangano ndyoka inaayi thika.

Iikwatha mbyoka ya li ya gandjwa moZimbambwe nayo oya li ya gandja uunzapo uuwanawa. Pashiholelwa, natu tale koshimoniwa shaPrisca ngoka ha zi momukunda omushona. Nonando oonkalo odha li oondhigu omolwoshikukuta, Prisca okwa li hayi a ka uvithe Etitatu kehe nEtitano, nonando osha li pethimbo lyoondima. Aantu momukunda gwawo oya li haye mu sheke taya ti: “Yaandjeni otaya ka sa naanaa kondjala, oshoka owi itula owala mokuuvitha.” Prisca okwa li he ya yamukula ta ti: “Jehova ke na esiku a ethele aapiya ye.” Inapu pita nokuli ethimbo ele, okwa li a mono iikwatha okuza kehangano. Shika osha li sha kumitha aashiinda ye yamwe, e taye mu lombwele taya ti: “Kalunga ine ku etha, otwa hala okwiilonga kombinga ye.” Ngashingeyi aashiinda ye yaheyali, ohaya pulakene kokugongala kwegongalo hoka haku ningwa okupitila moradio.

Sho ehulilo tali ende tali hedha popepi, otatu tsikile nokwaadhika kiiponga yopaunshitwe. (Mateus 24:3, 7) Otatu mu pandula omolwomayambidhidho geni ngoka hamu gandja nehalo ewanawa momikalo dha yoolokathana ko-donate.jw.org. Otaga ka longithwa nawa mokukwathela mboka taya mono iihuna nenge ye na ompumbwe.