Uukwanegumbo Tau Tembukile kuEgipiti

JOSEF ita vulu we okupangela omaiyuvo ge olule. Ye ota lombwele aapiya ye ayehe ya ze mo mondunda. Sho e li mo oye awike pamwe naamwahe, Josef ota tameke okulila. Otatu vulu okudhiladhila nkene aamwahe ya li ya kumwa, molwashoka yo itaaya tseya molwashike ye ta lilile. Lwahugunina ye ota ti: ‘Ongame Josef. Tate oku na omwenyo natango?’

Aamwahe oya kumwa ngaaka itaaya vulu okupopya. Yo oya tila. Ihe Josef ota ti: ‘Hedheni popepi alikana.’ Sho yo taye shi ningi, ye ota ti: ‘Ongame omumwaho Josef, ngoka mwa landithile po muEgipiti.’

Josef ota tsikile okupopya nombili: ‘Inamu ipa uusama ne yene molwashoka mwa landitha ndje po mpaka. Muushili wo wene osha li oKalunga ngoka a tumu ndje kuEgipiti okuhupitha oomwenyo dhaantu. Farao okwa ningi ndje omupangeli gwoshilongo ashihe. Ano ngashingeyi endeleleni mu shune kutate nomu mu hokololele shika. Nomu mu lombwele e ye noku kale mpaka.’

Opo nduno Josef ota papatele aamwahe nomaako ge, note ya idhingile note ya thipi komilungu ayehe. Sho Farao tu uvu kutya aamwahe yaJosef oye ya po, ye ota lombwele Josef: ‘Naya kuthe omatemba noya ka tale ko he nomaukwanegumbo gawo ye ye huka. Ngame otandi ke ya pa oshitopolwa oshiwanawa mevi lyaEgipiti alihe.’

Shika osho ya ningi. Mpaka ngoye oto vulu okumona nkene Josef ta tsakaneke he sho e ya kuEgipiti pamwe nuukwanegumbo we auhe.

Uukwanegumbo waJakob owi indjipala noonkondo. Ayehe kumwe oya li 70 sho ya tembukile kuEgipiti, ngele tatu yalula Jakob naanona ye naatekulu. Ihe opwa li wo aakiintu, tashi vulika naapiya oyendjiyendji. Yo ayehe oya ka kala muEgipiti. Yo oyi ithanwa Aaisrael, oshoka Kalunga okwa lundululile edhina lyaJakob muIsrael. Aaisrael oya ningi aantu yi ili noonkondo kuKalunga, ngaashi tatu ke shi mona nale.