Oludhi Olupe lwIikulya

OTO vulu mbela okuhokolola kutya aantu otaa toola shike pevi? Otashi monika sha fa omume. Osho oshitokele, noshishuushuu nuudhulumutu. Ihe kashi shi omume; osho sha shokuliwa.

Konyala omwedhi owala gwa piti po okuza sho Aaisrael ya thigi po Egipiti. Yo oye li mombuga. Muka ohamu mene iikulya iishona, nomolwashono aantu taa nyenyeta taa ti: ‘Tse otwa halele Jehova e tu dhipage muEgipiti. Hoka tse otwa li tu na iikulya oyindjiyindji sha pitilila.’

Ano Jehova ota ti: ‘Ngame otandi ka lokitha iikulya okuza megulu.’ Naashika osho Jehova ta ningi. Ongula ya landula, sho Aaisrael ya mono iinima mbika iitokele mbyoka ya gu, yo otaa pulathana: ‘Oshike shika?’

Moses ota ti: ‘Shika osho iikulya mbyoka Jehova e mu pe okulya.’ Aantu otaye yi luku OMANNA. Oyi na omulyo gwa fa gwoshikuki shomagadhi goonyushi sha pepuka.

‘Omu na okutoola ye eleka kehe gumwe ngaashi to vulu okulya,’ Moses osho ta lombwele oshigwana. Ano shika osho yo haa ningi ongula kehe. Sho etango tali pupyala, omanna ngoka ga hupu po pevi otaga hengumuka.

Moses ota ti ishewe: ‘Hagumwe ta pungulile esiku tali landula omanna.’ Ihe yamwe yomaantu itaya pulakene. Owa tseya kutya oshike tashi ningwa po? Ongula ya landula omanna ngoka yo ya pungula oga li gu udha omazinyo, notaga tameke okunika!

Ihe opu na esiku limwe koshiwike, moka oshigwana hashi toola omanna ogendji lwaali, palombwelo lyaJehova. Olyo esiku etihamano. Jehova nota ti kutya yo oye na okwiipungulila gamwe gomugo sigo esiku tali landula, oshoka ye ita ka gwitha sha mesiku etiheyali. Sho yo taa pungula omanna sigo esiku etiheyali, itaga ningi omazinyo noitaga nika! Shika oshikumithalonga natango!

Oomvula adhihe ndhoka Aaisrael ye li mombuga, Jehova ote ya palutha nomanna.