Omapulo ga za kaaleshi

Mbela moshikethahangano omwa li mu na owala omayambi gaali gomamanya, nenge omwa li mu na wo iinima yilwe?

Pethimbo lyokulala kwotempeli ndjoka ya tungwa kuSalomo mo 1026 K.E.N., “moshikethahangano kamwa li sha, kakele komayambi gaali giipango ga tulilwe mo kuMoses kondundu Sinai, OMUWA sho a hangana nAaisraeli mokuza kwawo kuEgipiti.” (2 Ondjalulo 5:10) Ihe aluhe hasho sha li hashi kala ngawo.

‘Momwedhi omutitatu sho Aaisraeli ya tembuka muEgipiti,’ oya li ye ya mombuga yaSinai. (Eksodus 19:1, 2) Konima yaashono, Moses okwa li a londo kondundu yaSinai nokwa li a pewa omayambi gaali gomamanya gOmpango. Ota hokolola ta ti: “[Onda] galuka nda londoloka kondundu. Onde yi pungula moshiketha shoka nda pangele, naanaa ngaashi [Jehova] a ti, nomo yi li ngashingeyi.” (Deuteronomium 10:5) Shika osha li oshiketha nenge oshikwatelwa shopokathimbo shoka Jehova a li a lombwele Moses a pangele opo mu pungulwe omayambi gOmpango. (Deuteronomium 10:1) Oshikethahangano kasha li sha pwa sigo okehulilo lyo 1513 K.E.N. lwaampono opo shi vule okulongithwa.

Konima owala yokumangululwa muEgipiti, Aaisraeli oya li ya tameke okungungutula shi na ko nasha niikulya. Onkee ano Jehova okwa li e ya pe omanna. (Eksodus 12:17, 18; 16:1-5) Pethimbo ndyono, Moses okwa li a lombwele Aaron a ti: “Kutha okayo e to tula mo ogomer yu dha omanna. Ka tula koshipala shOMUWA, opo omanna yi pungulilwe omaluvalo getu.” Ehokololo otali ti: “Aaron okwe yi tula komeho goshikethahangano [ehala lyokupungula oodokumende ndhoka dha simana], yi pungulwe, ngaashi OMUWA a lombwele Moses.” (Eksodus 16:33, 34) Nonando Aaron okwa li a gongele omanna kee na omalimbililo mokayo ethimbo ndyoka, opo e ka tule komeho goshikethahangano, okwa li e na okutegelela sigo Moses ta pangele oshikethahangano e ta tula mo omayambi musho.

Ngaashi twa mona nale, oshikethahangano osha li sha pangelwa pehulilo lyo 1513 K.E.N. Ondhimbo yaAaron oya li ya tulwa moshikethahangano konima sho pwa pita ethimbo ele, konima yoshipotha shaKorak nayalwe. Omuyapostoli Paulus okwa li a popi ‘oshiketha shehangano mwa li mu na oshuma shoshingoli shi na omanna, nondhimbo yaAaron ya li ya tutuma oonyapi oontalala, niipelende yomamanya gompango.’—Aahebeli 9:4.

Omanna oga li esiloshimpwiyu ndyoka lya li lya ningwa kuKalunga pethimbo lyoomvula 40 dholweendo lwAaisraeli mombuga. Kaga li we haga gandjwa sho ya li “ya tameke okulya iikulya yomuKaanana,” evi lyeuvaneko. (Josua 5:11, 12) Ondhimbo yaAaron oya li ya tulwa moshikethahangano yi kale endhindhiliko nenge euliko kepipi ndyoka lya li lya tukulutha oshipotha. Shoka osha li tashi ti kutya ondhimbo oya li ya kala moka nokuli uule wethimbo lyolweendo lwawo mombuga. Ano oshi li pandunge okuthika pehulithodhiladhilo kutya konima yethimbo sho Aaisraeli ya li ya thiki mevi lyeuvaneko nomanga otempeli ndyoka ya li ya tungwa kuSalomo inaayi lala, ondhimbo yaAaron noshuma shoshingoli shi na omanna oya li ya kuthwa mo moshikethahangano.