Oondaadhi 12

TALA kiiyimati mbyoka aalumentu mbaka ya humbata. Tala owala nkene ehila ndyoka lyomandjembele enene. Aalumentu yaali oye na oku li humbata koshiti. Ihe tala owala koonkwiyu noondunga dhagranati. Openi pwa zi iiyimati mbino iiwanawa? Okoshilongo shaKanaan. Oto dhimbulukwa ndishi, Kanaan olyo ehala hoka Abraham, Isaak naJakob ya kala. Ihe molwondjala ndjoka ya li ko, Jakob nuukwanegumbo we oya tembukile kuEgipiti. Ano konima yoomvula 216 lwaampono, Moses ota kwatele Aaisrael komeho okushuna kuKanaan. Oye ya pehala mombuga lyi ithanwa Kades.

Aantu aawinayi oyo ya kala moshilongo shaKanaan. Ano Moses ota tumu ko oondaadhi 12 nota ti kudho: ‘Taleni kutya aantu yangapi ya kala mo, noye na oonkondo dhi thike peni. Taleni ngele evi ewanawa niimeno. Eteleleni alikana yimwe yomiiyimati ngele tamu galuka.’

Sho oondaadhi dha galuka kuKades, otadhi ti kuMoses: ‘Paushili wo wene osho oshilongo oshiwanawa.’ Nomoku shi ulika, yo otayu ulikile Moses iiyimati. Ihe 10 yomoondaadhi otaa ti: ‘Aantu mboka ya kala hoka oyo aanene noye na oonkondo. Otaye ke tu dhipaga ngele tse otatu kambadhala okuyuga ko oshilongo.’

Aaisrael oya tila sho taye shi uvu. ‘Osha li shi li hwepo ando okusila muEgipiti nenge no-kuli mpaka mombuga,’ yo taa ti. ‘Tse otatu ka dhipagelwa miita naakiintu naanona yetu otatu ke ya yugwa. Natu hogololeni omuwiliki omupe pehala lyaMoses tse tu shuneni kuEgipiti!’

Ihe yaali yomoondaadhi oyi inekela muJehova, notaa kambadhala okumweneka oshigwana. Omadhina gawo ogo Josua naKaleb. Yo otaa ti: ‘Inamu tila. Jehova oku li pamwe natse. Tse otatu ka yuga ko oshilongo nuupu.’ Ihe oshigwana itashi pulakene. Osha hala nokuli okudhipaga Josua naKaleb.

Shika otashi geyitha Jehova noonkondo, nota ti kuMoses: ‘Hagumwe gwomaantu mboka ye na oomvula 20 nenge dhi vulithe po, ta yi moshilongo shaKanaan. Yo oya mono iikumithalonga mbyoka ngame nda longo muEgipiti nomombuga, ihe natango inayi inekela ndje. Omolwashoka yo ye na okweendaenda uule woomvula 40 mombuga sigo omuntu gwahugunina ta si. OJosua naKaleb owala taya ka ya moshilongo shaKanaan.’