Oondaadhi omulongo nambali

Aaisraeli oya zi po pondundu Sinai. Oya taaguluka ombuga yaParan yu uka kehala hali ithanwa Kadesh. Jehova okwa li a lombwele Moses hoka a ti: ‘Tuma aalumentu omulongo nayaali, mezimo kehe namu ze gumwe, opo ya ka ndaadhe evi lyaKaanan, ndyoka tandi ka pa Aaisraeli.’ Onkee ano, Moses okwa hogolola aalumentu 12 nokwe ya lombwele a ti: ‘Indeni kuKaanan mu ka tale evi ngele ewanawa ngaa nokumena iikulya. Taleni ngele aantu yamo oye na oonkondo nenge kaye na. Taleni ngele oya kala momatsali nenge omiilando.’ Oondaadhi 12, mwa kwatelwa Josua naKaleb, oya yi kuKaanan.

Konima yomasiku 40, oondaadhi odha galuka, odhe etelele oonkwiyu, oondunga dhomugranati nomandjembele. Odha gandja ehokololo tali ti: ‘Evi ewanawa, ihe aantu yamo oye na oonkondo niilando yawo oyi na omakuma omaleeleka.’ Kaleb okwa ti: ‘Otatu vulu oku ya matukila noku ya sinda. Natu yeni ngashingeyi.’ Mbela owu shi kutya omolwashike Kaleb a tile ngawo? Omolwaashoka ye naJosua oya li yi inekela muJehova. Ihe oondaadhi dhilwe omulongo odha ti: ‘Aawe. Aantu yamo aaleeleka, ya fa aalefule. Tse kuyo aashuushuka twa fa oombahu.’

Aaisraeli oya li ya teka omukumo. Oya tameke okunyenyeta e taya lombwelathana taya ti: ‘Natu hogololeni omuwiliki gulwe, tse tu shune kuEgipiti. Omolwashike tu na okuya kehala ndika tu ka dhipagwe?’ Josua naKaleb oya ti: ‘Inamu tsa ondumbo naJehova, ne inamu tila. Jehova ote ke tu gamena.’ Aaisraeli inaya pupa ko. Oya li nokuli ya hala okudhipaga Josua naKaleb.

Mbela Jehova okwa li a ningi po shike? Okwa lombwele Moses a ti: ‘Aaisraeli onde ya ningile iinima oyindji, ihe natango itaya vulika kungame. Ano otaya ka kala mombuga omimvo 40, nomo taya sile. Aana yawo nosho wo Josua naKaleb otandi ke ya pa oshilongo shoka nde yu uvanekela.’