Omufuthi muIsrael

TALA shoka omulumentu nguka ta fumvike metsali lye! Onguwo ombwanawa, elaka lyoshingoli niimaliwa iisiliveli yontumba. Ye okwe yi kutha moshilando shaJeriko. Ihe oshike sha li shi na okuningwa niinima yomuJeriko? Oto dhimbulukwa mbela?

Yo oya li yi na okuhanagulwa po, noshingoli noshisiliveli osha li shi na okufalwa koshiketha sheliko shetsali lyaJehova. Ano aantu mbano inaaya vulika kuKalunga. Yo oya yaka shoka shaKalunga. Omulumentu edhina lye oAkan, noku li pamwe niilyo yuukwanegumbo we. Natu tale shoka tashi ningwa po.

Konima sho Akan a yaka iinima mbino, Josua ota tumu aalumentu oyendji ya kondjithe oshilando shaAi. Ihe oya dhengwa. Yamwe oya dhipagwa, noshihupe otashi fadhuka po. Josua okwa yemata noonkondo. Ye ota lala noshipala she sha tsa pevi nota galikana kuJehova: ‘Omolwashike wa pitika tu shi ningilwe?’

Jehova ota yamukula: ‘Thikama! Israel okwa yono. Yo oya kutha iinima yimwe mbyoka yi na okuhanagulwa po nenge yi na okweetwa ketsalihangano lyandje. Oya yaka onguwo ombwanawa noya kala nayo meholeko. Ngame itandi ke mu laleka nuuyamba omanga yo nosho wo omufuthi inaamu ya hanagula po.’ Jehova ota ti kutya ye ote ku ulukila Josua olye ngoka omulumentu omwiinayi.

Josua oti ithana oshigwana shi gongale, Jehova notu ulike omulumentu omwiinayi Akan. Akan ota ti: ‘Ngame onda yono. Onda mono onguwo ombwanawa, elaka lyoshingoli niimaliwa iisiliveli. Onda li nde yi halelela ngaaka kutya ndi yi kuthe po. Onde yi fumvika metsali lyandje.’

Sho tuu iinima mbino ya monika noye etwa kuJosua, ye ota ti kuAkan: ‘Omolwashike we tu undulile omupya? Ngashingeyi Jehova ote ke ku undulila omupya!’ Opo tuu mpoka oshigwana otashi dhipaga Akan nuukwanegumbo we nomamanya. Otashi holola kutya tse katu na nando okukwata iinima mbyoka kaayi shi yetu, hasho mbela?

Konima Aaisrael otaa yi ishewe ya ka kondjithe Ai. Oshikando shika Jehova ota kwatha oshigwana she, notashi sindana.