Ontopolwa 24

Ino kala ho yaka nando!

MBELA owa yakelwa nale sha kugumwe?— Mbela owa li wu uvite ngiini?— Ngoka e shi yaka po omufuthi nokapu na ngoka e hole omufuthi. Mbela sho to dhiladhila ohashi ende ngiini opo omuntu a ninge omufuthi? Mbela oha valwa omufuthi?—

Opo owala twi ilongo kutya aantu oya valwa nuulunde. Onkee ano, atuheni inatu gwanenena. Ihe kapu na ngoka a valwa omufuthi. Omufuthi otashi vulika a ze muukwanegumbo mboka wu na aantu ye na omikalo omiwanawa. Aavali ye, aamwayina aamati naakadhona, otashi vulika ya kale ihaaya yaka. Ihe ohole yomuntu yokuhola iinima ngaashi iimaliwa nosho wo shoka hashi landwa niimaliwa otayi vulu oku mu ningitha a ninge omufuthi.

Mbela oto dhiladhila kutya olye omufuthi gwotango?— Natu dhiladhile kombinga yaashoka. Omulongi Omunene manga a li megulu, omuntu ngoka okwa kala e mu shi nale. Omufuthi ngoka okwa li omuyengeli. Ihe molwaashoka Kalunga okwa li a shiti aayengeli ayehe ya gwanenena, ongiini omuyengeli nguka a ningi omufuthi?— Eeno, ngaashi twi ilongo mOntopolwa onti-8 yembo ndika omuyengeli nguka okwa li a hala oshinima shoka kaasha li she. Mbela oto dhimbulukwa kutya osha li shike?—

Konima sho Kalunga a shiti omulumentu nomukiintu gwotango, omuyengeli nguka okwa li a hala ye mu longele. Omuyengeli nguka ka li e na uuthemba wokulongelwa kuyo. Oya li ye na okulongela owala Kalunga. Omuyengeli okwa ningi omufuthi sho a ningitha Adam naEva ye mu longele. Okwa ningi Satana Ondiaboli.

Mbela oshike hashi ningitha omuntu omufuthi?— Okukala a hala shoka kaashi shi she. Ehalo lya tya ngaaka ohali vulu okukala li na oonkondo e tali ningitha omuntu omwaanawa a longe uuwinayi. Omathimbo gamwe, aantu mboka ya ningi aafuthi ihayi iyele nando oombedhi opo ya longe shoka oshiwanawa ishewe. Gumwe gwomuyo okwa li omuyapostoli gwaJesus gwedhina Judas Iskariot.

Judas okwa li e shi shi kutya osha puka okuyaka molwaashoka okwa li a longwa Ompango yaKalunga okuza kuunona we. Okwa li e shi shi kutya oshikando shimwe Kalunga okwa li a popi nokuli okuza megulu ta lombwele oshigwana she ta ti: “Ino yaka.” (Eksodus 20:15) Sho Judas a koko, okwa li a tsakanene nOmulongi Omunene nokwa ningi gumwe gwomaalongwa ye. Konima yethimbo, Jesus okwa hogolola Judas a ninge gumwe gwomaayapostoli ye12.

Jesus naayapostoli ye oya li haye ende pamwe. Oya li haya li pamwe. Iimaliwa ayihe mbyono ya li ye na, oya li hayi pungulwa mokaketha. Jesus okwa pe Judas okaketha hoka opo e ka sile oshimpwiyu. Osha yela kutya iimaliwa mbyoka kaya li ya Judas. Mbela owu shi kutya Judas okwa li a ningi po shike konima yethimbo?—

Judas okwa tameke okukutha iimaliwa mokaketha moka nuuna a li kee na oku shi ninga. Okwa li he yi kutha mo uuna yakwawo kaaye mu wete nokwa li nokuli ha kambadhala opo mokaketha mu ye iimaliwa oyindji. Okwa tameke okudhiladhila kombinga yiimaliwa ethimbo kehe. Natu tale kutya okahalu hano oke mu ningitha shike konima owala yomasiku gontumba manga Omulongi Omunene inaa dhipagwa.

Maria, omumwayina gwaLasarus ngoka a li kuume kaJesus okwa kutha omugwayo gwezimba ewanawa nokwe gu tile koompadhi dhaJesus. Ihe Judas okwa li ta nyenyeta. Mbela owu shi kutya omolwashike?— Okwa ti kutya omolwaashoka omugwayo ngoka ogwa li gu na okulandithwa po iimaliwa e tayi pewa oohepele. Ihe okwa li a hala iimaliwa oyindji yi ye mokaketha ye e ke yi yake mo.—Johannes 12:1-6.

Jesus okwa lombwele Judas kaa piyaganeke Maria ngoka a li e na ohenda. Judas ka li a hokwa shoka a lombwelwa kuJesus, onkee ano, okwa yi kaasaaseri aakuluntu mboka ya li ye tonde Jesus. Aasaaseri oya li ya hala okukwata po Jesus, ihe oya li ya hala oku shi ninga uusiku opo kaaya monike kaantu.

Judas okwa lombwele aasaaseri ta ti: ‘Otandi mu lombwele nkene mu na okukwata Jesus ngele omwa pendje iimaliwa. Otamu pe ndje ingapi?’

Aasaaseri oye mu yamukula ya ti: ‘Otatu ku futu iisiliveri omilongo ndatu.’—Mateus 26:14-16.

Judas okwa taamba iimaliwa mbyoka. Osha li owala sha fa ta landitha po Omulongi Omunene kaalumentu mboka. Dhiladhila owala omuntu ta ningi oshinima oshiwinayi sha tya ngaaka!— Omuntu oha ningi iinima ya tya ngaaka ngele a ningi omufuthi noha yaka iimaliwa. Oha kala e hole iimaliwa shi vulithe aantu nenge nokuli Kalunga.

Otashi vulika wu tye: ‘Itandi ka kala nando ndi hole iinima yilwe shi vulithe Jehova Kalunga.’ Onawa sho wu uvite ngaaka. Sho Jesus a hogolola Judas a ninge omuyapostoli gwe, otashi vulika Judas naye osho a li u uvite ngaaka. Yalwe mboka ya ningi aafuthi, otashi vulika nayo osho ya li yu uvite ngaaka. Natu popye kombinga yayamwe yomuyo.

Gumwe oAkan, omupiya gwaKalunga ngoka a li ko nale manga Omulongi Omunene inaa valwa. Akan okwa li a mono ondjatha ombwanawa, uutale woshingoli noshisiliveri. Ihe iinima mbika kaya li ye. Ombiimbeli otayi ti kutya iinima mbika oyaJehova, molwaashoka oya li ya kuthwa aatondi yoshigwana she. Ihe Akan okwa li e yi hala unene nokwe yi yaka po.—Josua 6:19; 7:11, 20-22.

Opu na natango oshiholelwa shimwe. Nalenale Jehova okwa li a hogolola David a ninge omukwaniilwa gwoshigwana shaIsraeli. Esiku limwe David okwa li a tala komukiintu omwaanawa Batseba. Okwa kala nokutala kuBatseba nokudhiladhila oku mu eta kegumbo lye. Ihe Batseba okwa li omukulukadhi gwaUria. Mbela David okwa li e na okuninga shike?—

David okwa li e na okweetha po okudhiladhila kombinga yokukutha po Batseba. Ihe ine shi ninga. Onkee ano, David okwa fala Batseba kegumbo lye. Opo nduno okwa dhipagitha Uria. Omolwashike David a ningi iinima mbika iiwinayi?— Omolwaashoka okwa tsikile nokukala a hala omukiintu ngoka e na mwene.—2 Samuel 11:2-27.

Molwaashoka David okwa li i iyela ombedhi, Jehova okwe mu etha a kale nomwenyo. Ihe konima yaashoka okwa ka mona uupyakadhi owundji. Omwana Absalom okwa li a hala oye a kale omukwaniilwa pehala lye. Ngele aantu ye ya kuDavid, Absalom okwa li he ya kwata komapepe noku ya thipa komilungu. Ombiimbeli otayi ti: ‘Absalom okwa yulu oomwenyo dhAaisraeli.’ Absalom okwa ningitha aantu mboka ya kale ya hala oye a ninge omukwaniilwa pehala lyaDavid.—2 Samuel 15:1-12, OB-1954.

Mbela opu na esiku limwe wa li wa hala noonkondo oshinima shontumba, ngaashi Akan, David naAbsalom?— Ngele owa kutha po oshinima shagumwe kuu na epitikilo, nena owa yaka. Mbela oto dhimbulukwa kutya omufuthi gwotango Satana okwa li a hala shike?— Okwa li a hala aantu ye mu longele pehala lyokulongela Kalunga. Onkee ano, Satana okwa li a yaka sho a ningitha Adam naEva ya vulike kuye.

Ngele omuntu oku na oshinima shontumba, oku na uuthemba wokupopya kutya olye ta vulu oku shi longitha. Pashiholelwa, otashi vulika wu ka dhane naanona ooyakweni kegumbo lyaandjawo. Mbela otashi ka kala ngaa shi li mondjila okukutha oshinima shontumba kegumbo hoka noku shi eta kegumbo lyaayeni?— Aawe, ongele owala aavali yawo ye ku lombwele kutya oto vulu oku shi ninga. Ngele owa kutha oshinima shontumba e to shi fala kaayeni inooya pula, kungeyi owa yaka.

Omolwashike tashi vulika wu kwatwe kemakelo lyokuyaka?— Omolwaashoka owa hala oshinima shontumba shono kaashi shi shoye. Nokuli nonando kapu na ngoka e ku mona sho to shi kutha po, mbela olye e ku wete?— OJehova Kalunga. Otwa pumbwa okudhimbulukwa kutya Kalunga oku tonde uufuthi. Onkee ano, ohole yokuhola Kalunga naantu ooyakweni, otayi ke ku kwathela waa ninge nando omufuthi.

Ombiimbeli oye shi yelitha kutya osha puka okuyaka. Lesha Markus 10:17-19; Aaroma 13:9 nAaefeso 4:28.

[Ethano pepandja 129]

Omolwashike Judas a li a yaka?

[Omathano pepandja 130]

Akan naDavid otaya dhiladhila kombinga yiinima iiwinayi yini?

[Ethano pepandja 130]

Omomukalo guni Absalom a li a ningi omufuthi?