Aakiintu Yaali Omapenda

SHO Aaisrael ye ya muudhigu, yo otaa pula ekwatho kuJehova. Jehova okwe ya uvu moku ya pa aawiliki omapenda oku ya kwatha. Ombimbeli otayi ithana aawiliki mbano aatokolihapu. Josua oye a li omutokolihapu gwotango, nayamwe yomaatokolihapu ya landula ko oya li Otniel, Ehud naSamgar. Ihe yaali yomaantu mboka ya kwatha Israel, oyo aakiintu yomadhina Debora naJael.

Debora oye omuhunganeki. Jehova ota gandja omayelithilo kuye kombinga yonakuyiwa nopo nduno ye ta hokololele oshigwana shoka Jehova ta ti. Debora naye wo omutokolihapu. Ye oha kuutumba aluhe kohi yomulunga gwontumba moondundu, naantu otaye ya kuye molwomapukululo kombinga yomaupyakadhi gawo.

Jabin ngashingeyi oye omukwaniilwa gwaKanaan. Ye oku na omatembalugodhi agehe kumwe 900. Etanga lye oli na oonkondo ngaaka kutya li thiminike oyendji yomAaisrael ya ninge aapiya yaJabin. Elenga lyiita lyOmukwaniilwa Jabin oSisera.

Esiku limwe Debora ota tumu kOmutokolihapu Barak nota ti kuye: ‘Jehova okwa ti: “Kutha aalumentu 10 000 nou ya fale kOndundu yaTabor. Hoka ngame otandi ku etele Sisera. Ongame notandi ke ku pa esindano u mu sinde netanga lye.”’

Barak ota ti kuDebora: ‘Ngame otandi yi ngele ngoye oto yi pamwe nangame.’ Debora ota yi pamwe, nota ti kuBarak: ‘Ngoye esimano lyesindano ito ke li mona, oshoka Jehova ota ka gandja Sisera miikaha yomukiintu.’ Nosho shoka sha ningwa.

Barak ota zi kOndundu yaTabor oku ka kondjitha aakwiita yaSisera. Ombadhilila Jehova ote eta oshikungulu, noyendji yomaakwiita aatondi otaa si omeya. Ihe Sisera ota londoloka metembalugodhi lye nota yi ontuku.

Konima yokathimbo Sisera ote ya ketsali lyaJael. Ote mu ithana meni note mu pe omahini. Otage mu thethelekitha nombalambala ota kotha a pwila mo. Opo nduno Jael ota kutha omboha yetsali nota mbambalele momutse gwomulumentu nguka omwiinayi. Konima sho Barak te ya, ote mu ulukile nakusa Sisera! Ano ngoye oto vulu okumona kutya shoka Debora a ti osha gwanithwa.

Lwahugunina Omukwaniilwa Jabin ota dhipagwa wo, nAaisrael oya kala uule wokathimbo nombili.