Omuwiliki omupe naakiintu yaali omapenda

Josua okwa si mepipi lyomimvo 110 konima yokuwilika oshigwana shaJehova, uule womimvo odhindji. Aaisraeli oya kala nokulongela Jehova sho Josua e na omwenyo. Ihe sho a si, oya tameke okulongela iikalunga, ngaashi Aakaanan. Jehova okwe etha omukwaniilwa Omukaanana Jabin a ninge onkalamwenyo yAaisraeli ondhigu, molwaashoka inaya landula oshiholelwa shaJosua. Oshigwana oshi indile Jehova ekwatho. Onkene Jehova okwe shi pe omuwiliki omupe, Barak. Barak okwa li ta ka kwathela oshigwana shi galukile kuJehova.

Barak okwa tuminwa omupolofeti omukiintu, Debora. Omupolofeti okwa li a pewa kuJehova etumwalaka e li fale kuBarak tali ti: ‘Kutha aalumentu 10 000 wu ka tsakaneke etangakwiita lyaJabin pomulonga Kishon. Oko to ka kondjitha Sisera, ondjayi yetangakwiita lyaJabin.’ Barak okwa lombwele Debora a ti: ‘Otandi yi, ihe ongele owala to yi pamwe nangame.’ Debora okwa ti: ‘Otandi yi nangoye. Ihe tseya kutya hangoye to ka dhipaga Sisera. Jehova okwa ti kutya Sisera ota ka dhipagwa komukiintu.’

Debora okwa yi pamwe naBarak netangakwiita lye kondundu Tabor, ye ki ilongekidhile olugodhi. Sho owala Sisera e shi uvu, okwa longekidha omatembakwiita ge naakwiita ye molusilu. Debora okwa lombwele Barak a ti: ‘Nena Jehova ote ku pe esindano.’ Barak okwa kuluka kondundu pamwe netanga lye lyaalumentu 10 000, ya ka tsakaneke etangakwiita lyaSisera enankondo.

Jehova okwa ningitha omulonga gwaKishon gu kunguluke omeya. Omatembakwiita gaSisera oga dhama montopo. Sisera okwa zi mo metemba lye e ta fadhuka po. Barak naakwiita ye oya sindi etangakwiita lyaSisera, ihe Sisera okwa yi ontuku. Okwa fadhuka po e ta holama motenda yomukiintu gwedhina Jael. Jael okwe mu pe omahini a nwe e te mu siikile nekumbatha. Sisera okwa kotha, molwaashoka okwa li a vulwa. Opo nduno Jael okwa nyoontoka u uka kuye nokwe mu dhipaga, sho e mu mbambalele omboha pombandu yomutse gwe.

Barak okwe ya ta kongo Sisera. Jael okwa piti mo e ke mu tsakaneke, e ta ti kuye: ‘Ila, ndi ku ulukile omulumentu ngoka to kongo.’ Barak okwa yi pamwe naJael meni, nokwa adha Sisera a kangawala a sa. Barak naDebora oya li ya tanga Jehova meimbilo, taye mu pandula sho a kwathele Aaisraeli ya sinde aatondi yawo. Omimvo 40 dha ka landula ko, Aaisraeli oya kala ye na ombili.