Aamati Yane muBabilon

OMUKWANIILWA Nebukadnesar ota fala aalongwantu ayehe Aaisrael kuBabilon. Konima omukwaniilwa ota hogolola mokati kawo aalumentu aagundjuka mboka ye na ondjelo ombwanawa noya kotoka lela. Yane yomuyo oyo aamati mboka ngoye u wete mpaka. Gumwe oDaniel, nayalwe yatatu oya lukwa kAababilon Sadrak, Meshak naAbednego.

Nebukadnesar okwa hala aalumentu aagundjuka e ya longe okulonga muuwa we. Konima yelongo lyoomvula ndatu ye ota ka hogolola mo owala mboka ya kotoka lela oku mu kwatha okukandula po omaupyakadhi ge. Omukwaniilwa okwa hala aamati ya kale ye na oonkondo nuukolele omanga yo taa longwa. Ano ye ota lombwele aapiya ye ya gandje kuyo ayehe iikulya iiwanawa nomaviinu ya faathana naambyoka ye nuu-kwanegumbo we haa pewa.

Tala komugundjuka Daniel. Owa tseya mbela shoka ye ta lombwele omukalele omukuluntu gwaNebukadnesar, Aspena? Daniel ote mu lombwele kutya ye ina hala okulya iikulya iiwanawa yokoshililo shomukwaniilwa. Ihe Aspena oti ipula nayi. ‘Omukwaniilwa ndishi oye a tokola shoka ne mu na okulya nokunwa,’ ye ta ti. ‘Nongele ne omwa kala mwaa na uukolele ngaashi aalumentu yalwe aagundjuka ye li, ye sikulimwe ota ka dhipaga ndje.’

Ano Daniel ota yi komukalele ngoka a tulwa po kuAspena okutonatela Daniel nayakwawo yatatu. ‘Alikana tu yelekela uule womasiku 10,’ ye ta ti. ‘Tu pa iikwamboga okulya nomeya gokunwa. Tu faathanitha nduno naalumentu yalwe aagundjuka mboka taa li iikulya yomukwaniilwa, nou tale kutya oolye taa monika nawa.’

Omukalele ota zimine oku shi ninga. Nokonima yomasiku 10 Daniel nookuume ke yatatu otaa monika ye na uukolele ye vulithe aalumentu ayehe yalwe aagundjuka. Ano omukalele ota pitika ya tsikile nokulya iikwamboga pehala lyaashono omukwaniilwa ta gandja.

Kehulilo lyoomvula ndatu aalumentu ayehe aagundjuka otaa falwa kuNebukadnesar. Sho ye a popi nayo ayehe, omukwaniilwa ota mono kutya Daniel nookuume ke yatatu oyo ya kotoka lela. Ano ote ya kaleke puye oku mu yakula muuwa. Nuuna omukwaniilwa ta pula Daniel, Sadrak, Meshak naAbednego omapulo nenge omaupyakadhi omadhigu, yo oye shi shi unene lwiikando 10 ye vulithe kehe gumwe gwomaasaaseri nenge aalumentu ye aanongo.