Jesus Ta Valelwa mOshigunda

OWA tseya kutya okahanona haka oko lye? Eeno, oko Jesus. Ye opo owala a valelwa moshigunda. Oshigunda omo moka hamu kala iimuna. Maria ota langeke Jesus metemba, ehala moka iipalutha yuusino niimuna yilwe hayi tulwa. Ihe omolwashike Maria naJosef ye li mpaka piinamwenyo? Kapu shi ndishi pehala lyokumonena okanona?

Aawe, kapu shi. Ihe yo oye li mpaka molwashoka omupangeli gwaRoma, Omukeesali Augustus, okwa ningi po ompango kutya kehe gumwe e na okushuna koshilando she hoka a valelwa opo edhina lye li vule okunyolelwa membo. Josef okwa valelwa mpaka muBetlehem. Ihe sho ye naMaria ya thiki mpaka, kapwa li nando oompoka pu na ondjugo yokukalwa kuyo. Ano yo oya li ye na okukala pamwe niinamwenyo. Nomesiku tuu ndyoka Maria okwa mono Jesus! Ihe ngaashi ngoye to vulu okumona, ko kake na nando uusama washa.

Ngoye oto vulu mbela okumona aasita mboka taye ya kuJesus? Yo oya li taa tonatele oonzi dhawo uusiku mokuti, nuuyelele tau adhima we ya kundukidha owe ya adhimine. Okwa li omuyengeli! Aasita oya li ya tila noonkondo. Ihe omuyengeli okwa ti: ‘Inamu kala mwa tila! Ngame ondi mu nine onkundana ombwanawa. Kristus Omuwa, okwa valelwa nena ndjika mu-Betlehem. Ye ota ka hupitha oshigwana! Ne otamu ke mu adha a dhiingilwa momalapi nokwa langekwa metemba.’ Ombadhilila opwe ya aayengeli oyendji noya tameke okuhambelela Kalunga. Ano aasita mbaka oya yi mbalambala ya ka konge Jesus, nongashingeyi oye mu mono.

Owa tseya kutya omolwashike Jesus i ili ngawo? Owa tseya kutya oye naanaa lye? Oto dhimbulukwa mbela kutya tse otwe ku hokololela mehokololo lyotango membo ndika kombinga yOmwana gwaKalunga gwotango? Omwana nguka okwa longo pamwe naJehova sho ye a shiti egulu nevi niinima ayihe yilwe. Ano nguka oye Jesus!

Eeno, Jehova okwa kutha omwenyo gwOmwana megulu nokwe gu tula mela lyaMaria. Mbalambala okanona oka tameke taka koko mela lye ngaashi naanaa aanona yalwe haa koko momala gooyina. Ihe okanona haka oka li Omwana gwaKalunga. Lwahugunina Jesus okwa valelwa mpaka moshigunda muBetlehem. Ngoye oto vulu mbela ngashingeyi okuuva ko kutya omolwashike aayengeli ya halele okulombwela aantu ngawo kutya Jesus okwa valwa?