Ontopolwa 5

“Nguka Omumwandje”

UUNA aanona ya ningi sha oshiwanawa, aantu mboka haye ya sile oshimpwiyu ohaya kala ya nyanyukwa. Uuna omusamane omuvali okamwanakadhona nenge okamwanamati ka ningi sha oshiwanawa oha kala a nyanyukwa okulombwela yalwe ta ti: “Nguka omumwandjekadhona nenge omumwandjemati.”

Jesus okwa kala aluhe ha ningi shoka tashi nyanyudha he. Onkee ano, He okwa kala e mu uvitile uuntsa. Mbela oto dhimbulukwa shoka He yaJesus a li a ningi esiku limwe sho Jesus a li naalanduli ye yatatu?— Eeno, Kalunga okwa li a popi okuza megulu te ya lombwele ta ti: “Nguka omumwandje omuholike nde mu hokwa.”—Mateus 17:5.

Jesus oha kala aluhe a nyanyukwa okulonga shoka tashi nyanyudha He. Mbela owu shi kutya omolwashike? Omolwaashoka oku hole lela He. Ngele omuntu oha ningi iinima molwaashoka owala e na oku yi ninga ohashi vulika shi kale oshidhigu oku yi ninga. Ihe ngele oku na ehalo oku shi ninga ohashi kala oshipu kuye. Mbela owu shi kutya osha hala okutya shike okukala wu na ehalo?— Osha hala okutya owu na lela ehalo oku shi ninga.

Nokuli nomanga Jesus inee ya kombanda yevi, okwa kala e na ehalo okuninga kehe shoka He e mu pula a ninge. Okwe shi ningi molwaashoka oku hole He, Jehova Kalunga. Jesus okwa li a kala mehala ewanawa megulu pamwe naHe. Ihe Kalunga okwa li e mu nine iilonga yi ikalekelwa. Opo Jesus a longe iilonga mbyoka, okwa li e na okuza mo megulu. Okwa li e na okuvalwa e li okahanona kombanda yevi. Jesus okwa li e na ehalo oku yi longa molwaashoka Jehova okwa li a hala e yi longe.

Opo a valwe e li okahanona kombanda yevi, Jesus okwa li e na okukala e na yina. Mbela owu shi kutya yina okwa li lye?— Edhina lye oMaria. Jehova okwa li a tumu omuyengeli gwe Gabriel okuza megulu a ka popye naMaria. Gabriel okwa li a lombwele Maria kutya ota ka vala okanona okamati. Okanona oka li taka ka lukwa Jesus. He yako okwa li ta ka kala lye?— Omuyengeli okwa ti kutya He yokanona ota ka kala Jehova Kalunga. Osho molwaashono Jesus a li e na okwiithanwa Omwana gwaKalunga.

Mbela oto dhiladhila kutya Maria okwa li e shi uvitile ngiini?— Mbela okwa li a ti: “Inandi hala okukala yina yaJesus”? Aawe, Maria okwa li e na ehalo okulonga shoka Kalunga a li a hala a longe. Ihe mbela ongiini Omwana gwaKalunga ngoka a li megulu a li ta ka valwa e li okahanona kombanda yevi? Okuvalwa kwaJesus okwa li kwa yooloka ko ngiini kokuvalwa kwuunona uukwawo? Mbela owu shi kutya okwa li kwa yooloka ko ngiini?—

Kalunga okwa shiti aavali yetu yotango, Adam naEva, opo ya vule okumona aanona pamukalo gwi ikalekelwa. Okanona ohaka tameke okukoka moshivalelo shayina. Aantu ohaya ti kutya shika oshi li oshikumithalonga! Mbela oto shi zimine?—

Kalunga okwa li a longo nokuli oshikumithalonga oshinene shi vule shoka. Okwa li a kutha omwenyo gwOmwana megulu e te gu tula moshivalelo shaMaria. Kalunga ina ninga nando onale oshinima sha tya ngaaka noite ke shi ninga we. Kungawo, Jesus okwa tameke okukoka moshivalelo shaMaria ngaashi naanaa aanona yalwe haya kokele miivalelo yooyina. Konima yaashono, Maria okwa hokanwa kuJosef.

Sho ethimbo lyokuvalwa kwaJesus lya thiki, Maria naJosef oya li taya talele po muBetlehem. Ihe omwa li mu udha aantu. Kamwa li mu na nokuli ondunda yokulala Maria naJosef, onkee ano, oya li ye na okukala moshigunda shiimuna. Maria okwa valele moka, naJesus okwa li a tulwa metemba lyokulila iimuna ngaashi wu shi wete mpaka sho ta langekwa mo. Etemba lyokulila iimuna omo moka hamu tulwa iikulya yoongombe nosho wo yiinamwenyo yilwe.

Iinima yituntula oya li ya ningwa muusiku mboka Jesus a valwa. Popepi naBetlehem, omuyengeli okwa li a holokele aasita yamwe yiimuna. Okwe ya lombwele kutya Jesus omuntu a simana. Omuyengeli okwa ti: ‘Otandi mu uvithile elaka lyenyanyu ndyoka tali ka nyanyudha aantu. Nena tuu ndjika mwa valelwa ngoka ta ka hupitha aantu.’—Lukas 2:10,11.

Omuyengeli okwa li a lombwele aasita yiimuna kutya otaya ka adha Jesus muBetlehem a lala metemba lyokulila iimuna. Ohaluka, aayengeli yalwe okuza megulu oye ya pomuyengeli ngoka gwotango e taya tameke okutanga Kalunga tayi imbi taya ti: ‘Esimano olyaKalunga, gwokombandambanda nombili maantu e ya hokwa.’—Lukas 2:12-14.

Sho aayengeli ya yi, aasita oya yi kuBethlehem hoka ya adha Jesus. Oya lombwele Josef naMaria iinima ayihe iiwanawa mbyoka ya li yu uvu. Maria ka li tuu a nyanyukwa sho a li a zimine okukala yina yaJesus!

Konima yaashono, Josef naMaria oya li ya fala Jesus kuNasareti hoka a kokele. Sho a koko, okwa tameke iilonga ye ya simana yokulonga aantu. Shika osha li oshitopolwa shiilonga mbyoka Jehova Kalunga a li a hala Omwana a longe kombanda yevi. Jesus okwa li e na ehalo okulonga iilonga mbyoka molwaashoka okwa kala e hole noonkondo He gwomegulu.

Manga Jesus inaa tameka iilonga ye e li Omulongi Omunene, okwa li a ninginithwa momulonga gwaJordan kuJohannes Omuninginithi. Opo nduno oshinima oshikumithi osha li sha ningwa po! Manga Jesus a li ta zi momeya, Jehovah okwa popi okuza megulu a ti: “Nguka oye Omumwandje omuholike nde mu hokwa.” (Mateus 3:17) Mbela iho kala wa nyanyukwa uuna aavali yoye taye ku lombwele kutya oye ku hole?— Otatu vulu okukala nuushili kutya Jesus naye osho a li u uvite ngaaka.

Jesus okwa kala aluhe ha longo shoka shi li mondjila. Ka li i ihalele ponkatu mpoka kaa li. Ka li a lombwele aantu kutya oye Kalunga. Omuyengeli Gabriel okwa li a lombwela nale Maria kutya Jesus ote ki ithanwa Omwana gwaKalunga. Jesus ye mwene okwa li a ti kutya ye Omwana gwaKalunga. Ka li a lombwele aantu kutya oku shi oshindji e vule He. Okwa ti: “Tate oye omunene e vule ndje.”—Johannes 14:28.

Nokuli sho Jesus a li megulu, okwa li ha longo shoka He he mu lombwele a longe. Ka li ha ti kutya ote ke shi ninga e ta ka longa shilwe shi ili. Okwa li e hole He, nomolwaashono okwa li ha pulakene kwaashoka He te mu lombwelele a ninge. Sho Jesus e ke ya kombanda yevi, okwa li a longo shoka He gwomegulu a li e mu tuma a longe. Ka li a longitha ethimbo lye mokulonga iinima yilwe. Onkee ano, itashi kumitha sho Jehova a hokwa Omwana.

Tse otwa hala wo okunyanyudha Jehova, hasho mbela?— Ngele osho, otu na okuulika lela kutya ohatu pulakene kuJehova, ngaashi naanaa Jesus a li a ningi. Kalunga oha popi natse okupitila mOmbiimbeli. Mbela otashi ka kala ngaa shu uka okwiiningitha tu kale twa fa tatu pulakene kuKalunga, ihe shoka twi itaala naashoka hatu ningi otashi kondjithathana nOmbiimbeli?— Dhimbulukwa kutya otatu ka kala twa hala okunyanyudha Jehova ngele otu mu hole lela.

Ngashingeyi lesha omanyolo galwe ngoka tagu ulike shoka twa pumbwa okutseya nokwiitaala kombinga yaJesus: Mateus 7:21-23; Johannes 4:25, 26 nosho wo 1 Timoteus 2:5,6.

[Ethano pepandja 33]

Omuyengeli Gabriel okwa li a lombwele Maria shike?

[Ethano pepandja 34]

Omolwashike Jesus ta langekwa metemba lyokokulila iimuna?

[Ethano pepandja 35]

Onkundana ombwanawa yini gumwe gwomaayengeli mbaka a li a lombwele aasita yiimuna?