Ontopolwa 10
Omalweendo gokuya kuJerusalem
NGASHINGEYI olyo ethimbo lyoshitemamvula. Nolyo ethimbo uukwanegumbo waJosef pamwe nookuume kawo nosho wo aakwanezimo, ya ye molweendo lwawo lwokomvula kehe lwoposhitemamvula okuya kuJerusalem oku ka dhana Opaasa. Ngaashi shito, oya tuntukwa noonkondo sho taya yi molweendo nduka lwookilometa 100 lwaampono. Ngashingeyi Jesus oku na oomvula 12, nokwa tegelela nohokwe yi ikalekelwa oshituthi.
KuJesus nuukwanegumbo waandjawo, Opaasa kayi shi owala oshinima shesiku limwe alike. Otaya kala po wo omolwOshituthi shIikwiila Inaayi Fulikwa shomasiku gaheyali tashi landula, shoka ya tala ko shi li oshitopolwa shethimbo lyOpaasa. Oshilanduliko, olweendo aluhe okuza kaandjawo kuNasaret, mwa kwatelwa okukala muJerusalem, otalu kutha konyala iiwike iyali. Ihe omvula ndjino, omolwoshinima shimwe moka Jesus a kwatelwa, otalu kutha ethimbo ele shi vulithe shito.
Molweendo lwokugaluka kuJerusalem opwa holoka uupyakadhi. Josef naMaria otaya dhiladhila kutya Jesus oku li mokati kaakwanezimo nosho wo mookuume mboka taye ende pamwe nayo. Sho ya lala pokati, ka li e wetike natango. Oye ke mu konga mokati kaayendi ooyakwawo, ihe inaye mu mona mo. Onkee ano Josef naMaria otaya shuna kokule kuJerusalem ye ke mu konge.
Otaye mu kongo esiku alihe, ihe inaye shi pondola. Esiku etiyali kaya li ye mu mona natango. Hugunina, mesiku etitatu, otaya yi kotempeli. Hoka, muyimwe yomiinyanga yayo, oye wete Jesus a kuutumba mokati kaalongihapu Aajuda, te ya pulakene noku ya pula omapulo.
“Omumwandje, oshike we tu ningile ngeyi?” Maria ta pula. “Tala, otse naho twe ku kongo nokunika uuthigwa.”
Jesus okwa li a kumwa sho kaaye shi mpoka ye na oku mu adha. “Oshike mwa kongele ndje?” osho ta pula. “Kamu shi shi nani kutya ngame ondi na okukala megumbo lyaTate?”—NW.
Jesus ke uvite ko kutya omolwashike aakuluntu ye kaaye shi shi. Opo tuu mpono, Jesus ota shuna pamwe naakuluntu ye kegumbo nota tsikile okukala ha vulika kuyo. Ota koko moondunge nopalutu nosho wo mokuhokiwa kuKalunga nokaantu. Eeno, Jesus okwa tula po oshiholelwa oshiwanawa okuza kuunona we, hamokulalakanena owala iinima yopambepo, ihe omokusimaneka wo aakuluntu ye. Lukas 2:40-52; 22:7.
▪ Omolweendo luni Jesus nuukwanegumbo waandjawo haya yi aluhe poshitemamvula, nohalu endwa uule wethimbo li thike peni?
▪ Oshike tashi ningwa po pethimbo lyolweendo sho Jesus e na oomvula 12?
▪ Oshiholelwa shini Jesus ta tulile po aanona yonena?