Ontopolwa 32
Oshike sha pitikwa mEsabati?
MESABATI ekwawo Jesus ota yi kosinagoga yi li popepi nEfuta lyaGalilea. Opwa li pu na omulumentu e na oshikaha shokolulyo sha lemana. Aanongoraamata nAafarisayi otaya tala nuutaledhi ya tale ngele Jesus ote ke mu aludha. Lwahugunina otaya pula: “Osha pitikwa tuu okwaaludha mEsabati?”—OB-1986.
Aawiliki yelongelokalunga lyOshijuda oyi itaala kutya okwaaludha mEsabati okwa pitikwa owala ngele omwenyo gu li moshiponga. Pashiholelwa, yo ohaya longo kutya inashi pitikwa okuutha esipa lya teka nenge oku li manga mEsabati. Onkee ano aanongoraamata nAafarisayi taya pula Jesus epulo ndika nonkambadhala yoku mu tamaneka.
Ihe Jesus oku shi omadhiladhilo gawo. Pethimbo opo tuu mpono, ota mono kutya oye na etaloko lyaa li pandjele nolyaa shi lyopamanyolo kombinga yaashoka sha kwatelwa mokuyona ompango yEsabati niilonga yi indikwa. Onkee ano Jesus ote ya kongo momadhiladhilo mokulombwela omulumentu ngoka e na oshikaha sha lemana ta ti: “Thikama, u hedhe ko!”
Ngashingeyi Jesus ota taalele kaanongoraamata nokAafarisayi, ta ti: “Olye ngoka mokati keni e na onzi yimwe ayike, e tayi gwile moshilambo etango lyEsabati, ite yi kwata note yi hili mo andola?” Molwashoka onzi oyi li po ongetanuthopungulo lyopaimaliwa, itaye ke yi etha yi kale moshilambo sigo esiku tali landula, moka tashi vulika yi kwatelwe mo komukithi e tayi si. Kakele kaashono, Omanyolo otaga ti: “Omuyuuki oha sile iimuna ye oshimpwiyu.”
Jesus ota ningi efaathanitho, ta tsikile ta ti: “Ano omuntu ke shi e vule onzi olwindjilwindji! Onkee ano okulonga uuwanawa etango lyEsabati okwo opala.” Aawiliki yelongelokalunga itaya vulu okupataneka etompathano lyopandunge lyohenda lya tya ngaaka, noya kala ya mwena.
Jesus a geya nokwa yematela okuthengalala kwawo kwuugoya, ota lengalenga. Opo nduno ota lombwele omulumentu ta ti: “Utha oshikaha shoye!” Oye nokwe shi utha, noshikaha osha aluka.
Pehala lyokukala ya nyanyukwa sho oshikaha shomulumentu sha aluka, Aafarisayi otaya piti mo notaya pangele nziyanziya ompangela pamwe naalanduli yaHerodes ya dhipage Jesus. Osha yela kutya ongundu ndjika yopapolotika oya kwatela mo iilyo yopalongelokalunga yAasadukayi. Pandjigilile, ongundu ndjika yopapolotika nosho wo Aafarisayi ohayi kondjithathana montaneho, ihe oya hangana ya kola mokupataneka kwayo Jesus. Mateus 12:9-14; Markus 3:1-6; Lukas 6:6-11; Omayeletumbulo 12:10, OB-1986; Eksodus 20:8-10.
▪ Oshike she etitha oontamanana dha kwata miiti pokati kaJesus naawiliki yelongelokalunga lyOshijuda?
▪ Aawiliki yelongelokalunga mbaka lyOshijuda oyi itaala shike kombinga yokwaaludha mEsabati?
▪ Eudhi lini Jesus ta longitha okuulika kutya omataloko gawo oga puka?