Jesus ta aludha mesiku lyEsabati

Aafarisayi oya li ye tonde Jesus. Oya li ya hala okumona etompelo lyoku mu kwata po. Oya ti kutya ke na okwaaludha aantu mesiku lyEsabati. Jesus okwa mono omulumentu omuposi ta hehela mepandaanda, mesiku limwe lyEsabati. Okwa lombwele aalongwa ye a ti: ‘Taleni nkene oonkondo dhaKalunga tadhi ka kwathela omulumentu nguka.’ Jesus okwa pilulile omayeye ge mumwe nevi, e ta gwayeke enono ndyoka pomeho gomulumentu ngoka. Jesus okwe mu lombwele a ti: “Inda, u ki iyoge moshipala medhiya lyaSiloa.” Omulumentu osho a ningi. Shoka osha li oshikando she shotango ta mono ko monkalamwenyo ye.

Aantu oya li ya kumwa. Oya ti: ‘Omulumentu nguka haye ngoka a li ha kala a kuutumba ta hehela nenge okwe mu fa owala?’ Omulumentu okwa ti: ‘Ongame ngaa ngoka nda valwa omuposi.’ Aantu oye mu pula ya ti: “Omeho goye oga tonatithwa ngiini?” Sho e ya lombwele shoka sha ningwa po, oye mu fala kAafarisayi.

Omulumentu okwa lombwele Aafarisayi a ti: ‘Jesus okwa gwayeke enono pomeho gandje, e ta lombwele ndje ndi ki iyoge moshipala nongashingeyi ondi wete ko.’ Aafarisayi oya ti: ‘Ngele Jesus oha aludha mEsabati, oonkondo dhe inadhi za kuKalunga.’ Yalwe oya ti: ‘Ando oonkondo dhe kadha li dha za kuKalunga, ando ina vula okwaaludha.’

Aafarisayi oyi ithana aavali yomulumentu ngoka, e taye ya pula taya ti: ‘Ongiini ano omuna gweni e wete ko ngashingeyi?’ Aavali ye oya li ya tila. Omolwashike mbela? Aafarisayi oya li ya ti kutya kehe ngoka ti itaale muJesus, ota kondwa mo mosinagoga. Onkee ano, oya ti: ‘Katu shi shi. Mu puleni ne yene.’ Aafarisayi oya pula omulumentu omapulo ogendji, sigo a ti: ‘Onde mu lombwela nale ashihe shoka ndi shi. Omolwashike tamu pula ndje lwiikando?’ Aafarisayi oya geye, e taye mu umbu mo mosinagoga.

Jesus okwa yi a ka konge omulumentu ngoka, nokwe mu pula a ti: ‘Ngoye owi itaala muMesiasa?’ Omulumentu okwa ti: ‘Ando onda li ndi mu shi, ando onde mu itaala.’ Jesus okwa ti: ‘Ongame Mesiasa.’ Shoka otashi ulike kutya Jesus okwa li e na olukeno. Ina aludha owala omulumentu ngoka, ihe okwe mu kwathele wo a kale e na eitaalo.