Ongiini yalwe taya vulu oku ku kwathela?

“NGELE opu na sha tandi vulu okuninga, tseyithila ndje owala.” Shika osho oyendji yomutse hatu lombwele ookuume nenge aakwanezimo yetu mboka opo ya silwa. Naashika ohatu shi ningi nedhiladhilo li li nawa. Otatu ka ninga kehe shimwe oku ya kwathela. Ihe mbela ngoka a silwa ohe tu dhengele ngaa lela ongodhi ta ti: “Ondi na sha shoka to vulu okukwathela ndje oku shi ninga”? Osha pumba. Osha yela kutya otu na okukatuka onkatu kutse yene opo tu kwathele nakusilwa noku mu hekeleka.

Eyeletumbulo lyOmbiimbeli otali ti: “Oohapu tadhi popiwa pethimbo lyo opala, odho iiyapula yoshingoli moshiyaha shoshisiliveli.” (Omayeletumbulo 15:23; 25:11) Otashi pula oondunge opo omuntu wu tseye shoka wu na okupopya naashoka kuu na okupopya, shoka wu na okuninga naashoka kuu na okuninga. Mpaka opu na omaetopo gamwe gopamanyolo ngoka ga kwathela yamwe mboka ya silwa.

Shoka wu na okuninga . . .

Pulakena: Jakob 1:19 ota ti: ‘Kala ho pulakene mbala.’ Oshinima shimwe hashi kwathele noonkondo shoka to vulu okuninga osho okukala wu uvite oluhodhi pamwe naangoka a silwa mokupulakena kuye. Aantu yamwe mboka ya silwa otashi vulika ya pumbwa okupopya kombinga yomuholike gwawo ngoka a sa, kombinga yoshiponga nenge yomukithi ngoka gwe mu lya nenge kombinga yankene ye uvite okuza sho a sa. Onkee ano pula nakusilwa to ti: “Mbela owa hala tu popyeni kombinga yoshinima shika?” Etha oye a ninge etokolo. Omulumentu gumwe omugundjuka okwa li a popi kombinga yeso lyahe a ti: “Osha li sha kwathele ndje lela sho aantu ya li taya pula ndje shoka sha ningwa po nopo nduno oya li ya pulakene yi itula mo lela.” Ano pulakena neidhidhimiko nosho wo nolukeno, ino dhiladhila kutya owa pumbwa okugandja omayamukulo nenge okukandula po uupyakadhi mboka. Etha ya popye shaa shoka ya hala okupopya.

Ya shilipaleka: Ya shilipaleka kutya oya ninga ashihe shoka ya li taya vulu okuninga (nenge wu popye kehe tuu shoka wu shi kutya oshoshili noshu uka okupopiwa). Ya shilipaleka wo kutya aantu oyendji nayo ohaya kala ya yemata, ya geya, tayi ipe uusama noye na wo omaiyuvo gamwe ga fa gawo. Ya lombwela kombinga yayalwe mboka wu shi nayo ya silwa noye shi pondola okuhupula. Omayeletumbulo 16:24 otaga ti: ‘Oohapu oontalala otadhi ndjangeke omasipa.’—1 Aatessalonika 5:11, 14.

Gandja ekwatho: Kala to gandja ekwatho, hamomasiku owala gopetameko uuna ookuume naakwanezimo oyendji opo ye li, ihe shi ninga nokuli nomoomwedhi tadhi landula ko uuna yalwe ya shuna komagumbo gawo. Komukalo nguka oto ulike kutya owu li ‘kuume ngoka e na ohole aluhe,’ ngoka ha yambidhidha kuume ke momathimbo ‘goluhepo’ nenge guudhigu. (Omayeletumbulo 17:17) Teresea ngoka a silwa okanona ke moshiponga shohauto ota yelitha ta ti: “Ookuume ketu oya li haya si oshimpwiyu tu kale tu na shoka tatu ningi pamwe nayo koongulohi opo twaaha kale ethimbo olindji otse atuke pegumbo. Shika osha li she tu kwathele okwiidhidhimikila eyeme lyetu.” Omasiku ngaashi esiku lyohango yanakusa nenge esiku moka a sa ohaga vulu okukala uule woomvula ge li ethimbo lyokuuva nayi komutima koonakuthigwapo. Omolwashike itoo ndhindhilike omasiku ngoka pokalindeli koye opo uuna taga thiki, wu vule oku ya ulukila olukeno moku ya yambidhidha ngele sha pumbiwa?

Katuka onkatu wu ninge sha: Mbela opu na iilonga yontumba ya pumbwa okulongwa? Mbela opwa pumbiwa omuntu gwokutonatela aanona? Mbela ookuume naakwanezimo mboka ye ya okutalela po oya pumbwa ehala lyokukala? Mboka opo ya silwa, olundji ohaya kala ya ngwangwana kaaye shi nokuli kutya oye na okuninga shike. Onkee ano itaya vulu okulombwela aantu yalwe shoka ye na okuninga opo ye ya kwathele. Nomolwaashoka ngele owu wete kutya opu na sha shili sha pumbwa okuningwa, ino tegelela wu pulwe, katuka onkatu wu ninge po sha. (1 Aakorinto 10:24; yelekanitha 1 Johannes 3:17, 18.) Omuselekadhi gumwe okwa ti: “Aantu oyendji oya li ya lombwele ndje kutya ngele opu na sha nda hala ye shi ningile ndje, nandi ya tseyithile. Ihe kuume kandje gumwe ka li a ti ngawo. Okwa li a yi mondunda yetu yokulala e ta kutha ko iiyalomwa kombete e ta yogo omalakana ngoka omusamane gwandje a li a kakeka sho ta si. Kuume gumwe okwa li a kutha eyemele, omeya nothewa e ta yogo okamate hoka a li a kungila. Konima yiiwike yontumba omukuluntugongalo gumwe okwa li e ya a zala oonguwo dhe dhiilonga noku na iilongitho ye e ta ti: ‘Ondi inekela kutya opu na sha shoka sha pumbwa okupangelwa. Oshike mbela?’ Omumwatate ngoka ka li tuu nde mu pandula noonkondo sho a pangelele ndje omweelo gwandje ngoka gwa li gwe endekela kombinga yimwe nosho wo okalamba kolusheno!”—Yelekanitha Jakob 1:27.

Kala wu na ombepo yokuyakula aayenda: Ombiimbeli otayi tu dhimbulukitha tayi ti: “Inamu dhimbwa okutaamba aayenda.” (Aahebeli 13:2) Otu na unene tuu okudhimbulukwa okuyakula aayenda mboka ya nika oluhodhi. Pehala lyokutya owala: “Ila kehe ethimbo wa hala okuya,” tula po esiku nethimbo lyokondandalunde. Ngele oya tindi, ino teka omukumo nziya oku ya hiya ishewe. Otashi vulika wa pumbwa oku ya ladhipika komukalo gwombili. Tashi vulika ya tinda okuya molwaashoka oya tila kutya pamwe otaya ka kala taya lili mokati kaantu. Nenge tashi vulika ye wete kaashi li nawa okunyanyukilwa iikulya neendathano pethimbo ndyoka. Dhimbulukwa okuyakula aayenda kwomukiintu Lidia ngoka a popiwa mOmbiimbeli. Sho Lukas nayalwe ya li ya hiywa kegumbo lyaLidia, okwa ti: ‘Lidia okwe tu thiminike tu ye naye.’—Iilonga 16:15.

Kala wu na eidhidhimiko nolukeno: Ino kala unene wa kumwa kwaashoka tashi popiwa petameko kwaamboka ya silwa. Dhimbulukwa kutya otashi vulika ya kale ye niwe kongeyo nenge tayi ipe uusama. Ngele taya popi nangoye kaaye na ombili omolweyeme, otashi pula omayele neidhidhimiko opo waahe ya yamukule nayi. Ombiimbeli otayi tu kumagidha tayi ti: “Kaleni mu na olukeno, ohenda, eifupipiko, ombili neidhidhimiko.”—Aakolossa 3:12, 13.

Nyola ontumwafo: Olundji aantu ohaya dhini ongushu yokunyola ontumwafo nenge yokakalata kehekeleko. Oshi na uuwanawa washike? Cindy ngoka yina a sa kokankela ota ti: “Kuume kandje gumwe okwa li a nyolele ndje ontumwafo ombwanawa. Oya li lela ya kwathele ndje molwaashoka onda li nda vulu oku yi lesha noku yi leshulula.” Okakalata nenge ontumwafo yetsomukumo ndjoka nando “kayi shi onde,” oohapu dhamo odhi na okukala tadhi zi komutima gwoye. (Aahebeli 13:22) Oto vulu okupopya mo kutya owu na ko nasha nayo nonokutya nangoye oto dhimbulukwa sha shi ikalekelwa kombinga yanakusa nenge okuulika nkene nangoye onkalamwenyo yoye ya gumwa komuntu ngoka a sa.

Galikana pamwe nayo: Ino dhina uuwanawa wokugalikana pamwe naamboka ya silwa nosho wo oku ya dhimbulukwa momagalikano goye. Ombiimbeli otayi ti: “Egalikano lyomuyuuki oli na oonkondo.” (Jakob 5:16) Pashiholelwa, uuna tayu uvu nkene to galikana molwawo otashi vulu oku ya kwathela yi idhidhimikile omaiyuvo omawinayi ngaashi okwiipa uusama.—Yelekanitha Jakob 5:13-15.

Shoka kuu na okuninga . . .

Ino yanda okuya kuyo molwaashoka owala kuu shi kutya popya shike nenge ninga shike: Otashi vulika tu ilombwele tatu ti: ‘Ondi inekela kutya ngashingeyi oya pumbwa okukala oyo ayeke.’ Ihe otashi vulika muushili wo wene kaatu ye kuyo molwaashoka owala twa tila okupopya sha nenge okuninga sha sha puka. Ngele ngoka a silwa ta yandwa kookuume ke, kaakwanezimo nenge kooitaali ooyakwawo otashi vulika a kale a sa ezaza unene shoka tashi mu yemateke noonkondo. Dhimbulukwa kutya inatu pumbwa okupopya oohapu odhindji nenge okuninga iinima oyindji opo tu ulukile yamwe ohenda. (Aaefeso 4:32) Okukala po kwoye oku li nale eladhipiko kuyo. (Yelekanitha Iilonga 28:15.) Teresea ota popi kombinga yesiku okamwanakadhona ka sa ta ti: “Meni lyowili yimwe owala, ehala mpoka hapu thikilwa moshipangelo olya li lyu udha ookuume ketu, mwa kwatelwa aakuluntugongalo ayehe naakulukadhi yawo. Oomeme yamwe oya li ye na uukelela momitse, yamwe oya li ya zala natango oonguwo dhiilonga. Oya li owala ye etha ayihe e taye ya. Oyendji yomuyo oya li ye tu lombwele kutya kaye shi kutya naya tye shike, ihe shoka kasha li shi na mbudhi, molwaashoka okukala po kwawo oko kwa li ku na oshilonga.”

Ino ya keelela ya lile: Otashi vulika hatu kala twa hala okutya: ‘Mwenaa, mwena nee. Ino lila wee.’ Ihe ethimbo limwe oshi li nawa okweetha ya lile. Katherine sho a li ta dhiladhila eso lyomusamane gwe okwa popi ta ti: “Ondi wete kutya osha simana okweetha mboka ya silwa yu ulike oluhodhi lwawo noku lu pititha mo.” Kondjitha egamo lyokulombwela yalwe nkene ye na okukala ye uvite. Ino dhiladhila kutya owu na okuholeka oluhodhi lwoye opo nayo kaaya lile. Pehala lyaashono, Ombiimbeli otayi ti: “Lileni pamwe naamboka taa lili.”—Aaroma 12:15.

Ino endelela oku ya pa omayele kutya naya gandje po oonguwo nenge iinima yilwe yanakusa manga inaaye shi ilongekidhila natango: Otashi vulika tatu dhiladhila kutya otashi ka kala shi li nawa kuyo ngele ya gandja po iinima mbyoka tayi ya dhimbulukitha nakusa molwaashoka otayi ya ningitha ya kale ya nika oluhodhi ethimbo ele. Ihe epopyo tali ti kutya “omukeepo ihaya hwa” otashi vulika itaali longo mpaka. Nakusilwa okwa pumbwa ethimbo okuzimina kutya ngoka e hole okwa sa. Dhimbulukwa nkene Ombiimbeli tayi hokolola nkene tatekulululwa Jakob a li i inyenge sho u uvu kutya omwanamati Josef okwa dhipagwa koshilikama. Sho onguwo yaJosef yu udha oombinzi ya li yu ulukilwa Jakob, “okwa lili omwana ethimbo ele. Oyana aamati ayehe naakadhona oye ya oku mu hupulutha, ihe okwa tindi okutalalekwa.”—Genesis 37:31-35.

Ino tya: ‘Inga wu mona okanona kalwe’: Omuvali gumwe ngoka a silwa okanona ke ota ti: “Onda li ndi uvitile nayi aantu mboka ya li taya lombwele ndje kutya inga ndi mona okanona kalwe.” Otashi vulika taye shi popi nedhiladhilo ewanawa, ihe komuvali ngoka a silwa, oohapu kutya okanona hoka ka sa otaka vulu okupingenwa po nakalwe, otadhi vulu ‘okuulula ngegongamwele.’ (Omayeletumbulo 12:18) Okanona kamwe itaka vulu nando okupingena po okakwawo. Omolwashike mbela? Omolwaashoka kehe kamwe oki ili.

Inashi pumbiwa wu yande aluhe okupopya kombinga yanakusa: Omuvalakadhi gumwe ota ti: “Aantu oyendji oya yanda nokuli okupopya omumwandjemati Jimmy kedhina nenge kombinga ye. Shika osha li shu uvitha ndje nayi kashona.” Onkee ano inashi pumbiwa aluhe okuyona po oohapu ngele edhina lyanakusa lya tumbulwa. Pula nakusilwa ngele okwa hala okupopya kombinga yanakusa gwe omuholike. (Yelekanitha Job 1:18, 19 nosho wo 10:1.) Aantu yamwe mboka ya silwa ohaye shi pandula ngele ookuume kawo taya popi kombinga yomaukwatya omawanawa ngoka ya li ye hole kunakusa.—Yelekanitha Iilonga 9:36-39.

Ino endelela unene okupopya to ti: ‘Oshi li nawa sho a ka vululukwa po’: Haaluhe hashi ‘hekeleke oomwenyo dha polimana’ dhaamboka ya nika oluhodhi ngele omuntu to kambadhala okupopya sha shi li nawa kombinga yeso lyanakusa gwawo. (1 Aatessalonika 5:14, NW) Omukiintu gumwe omugundjuka okwa li a popi shi na ko nasha neso lyayina a ti: “Yalwe oya li ya ti: ‘Meme gwoye ita mono we iihuna,’ nenge: ‘Ota vululukwa nombili.’ Ihe kanda li nda hala oku shi uva.” Otashi vulika omapopyo ga tya ngaaka ga dhiladhilithe oonakusilwa kutya kaye na okunika oluhodhi nenge kutya shoka she ya ningilwa inashi kwata naanaa miiti. Ihe oya nika lela oluhodhi molwaashoka oya longola omuholike gwawo.

Poompito dhimwe oshi li nawa kuu tye: ‘Ondi shi nkene wu uvite’: Owu shi mbela shili kutya oku uvite ngiini? Pashiholelwa, mbela otashi vulika ngaa wu kale wu shi nkene omuvali ha kala e uvite uuna a silwa okanona ke ngele ngoye ino silwa nale okanona? Nokuli ngele nangoye owa silwa nale, kala wa tseya kutya yalwe ihaya kala naanaa ye uvite ngaashi ngoye. (Yelekanitha Oontakumandjimbo 1:12.) Ihe nonando ongaaka, ngele otashi opalele okuhokololela mboka ya silwa nkene wa li wi idhidhimikile eso lyagumwe ngoka wu hole, otashi vulu oku ya kwathela. Omukiintu gumwe ngoka okamwanakadhona ke ka li ka dhipagwa okwa li a hekelekwa sho a lombwelwa komukiintu gulwe ngoka naye a silwa okamwanakadhona nkene a li e shi pondola. Okwa ti: “Yina yomukadhona ngoka a sa, ehokololo lye ine li tameka ta ti kutya ‘ondi shi nkene wu uvite.’ Okwa li owala a lombwele ndje nkene sha li she ende kombinga ye e te shi ethele momake gandje.”

Opo wu kwathele omuntu ngoka a silwa otashi pula wu kale wu na ohenda, oondunge dhokuyoolola nosho wo ohole oyindji. Ino tegelela ngoka a silwa oye e ye kungoye. Ino tya owala: “Ngele opu na sha wa hala ndi shi ku ningile, lombwela ndje.” Mona kungoye mwene kutya oshike sha pumbwa okuningwa e to shi ningi.

Opu na natango omapulo galwe: Ongiini kombinga yetegameno lyOmbiimbeli li na ko nasha neyumuko? Otali vulu okutya shike kungoye nokomuholike gwoye ngoka a sa? Ongiini tatu vulu okukala nuushili kutya oli shi okwiinekelwa?

Omapulo ngoka tu na okwiipula

Omolwashike tashi kwathele okupulakena kwaangoka a nika oluhodhi omolwokusilwa?

Iinima yimwe mbyoka tatu vulu okuninga opo tu hekeleke ngoka a silwa oyini?

Oshike tu na okuyanda okulombwela nenge okuningila ngoka a silwa?

[Oshimpungu pepandja 25]

Kwathela aanona yu uve ko kutya eso oshike

Uuna muukwanegumbo mwa siwa, aavali nosho wo aakwanezimo yalwe nookuume olundji ihaya kala ye shi shoka ye na okutya nenge shoka ye na okuninga okukwathela aanona yu uve ko shoka sha ningwa po. Ihe aanona oya pumbwa aakuluntu ye ya kwathele opo yu uve ko kutya eso oshike. Natu taleni omapulo gontumba ngoka haga pulwa kombinga yokukwathela aanona ye shi uve ko kutya olyo shike.

Oto fatululile ngiini aanona kutya eso oshike? Osha simana oku li fatulula komukalo omupu. Li fatulula paushili. Ino tila okulongitha iitya yoshili, ngaashi “okusa” na “eso.” Pashiholelwa, oto vulu okukuutumba nokanona e to ka papatele to ti: “Opwa ningwa sha shinikitha oluhodhi noonkondo. Tate okwa li te ehama unene e ta si [nenge wu ka fatululile shoka sha ningwa po noohapu oompu]. Kayi shi ondjo yagumwe sho a sa. Otatu ka kala twe mu yuulukwa noonkondo, molwaashoka otu mu hole naye okwa li e tu hole wo.” Ihe otashi ke ka kwathela ngele to ka fatululile kutya ko nenge omuvali gwako ngoka e li po itaya ka sa owala ngeya ngele ye ehama.

Ladhipika aanona ya pule omapulo. Otashi vulika ya pule taya ti: ‘Okusa oshike?’ Oto vulu oku ya yamukula to ti: “‘Okusa’ otashi ti kutya olutu lwomuntu italu longo we noitalu vulu we okuninga iinima mbyoka lwa kala halu ningi shito, ngaashi okupopya, okumona nenge okuuva, noitalu vulu okuuva sha tashi lu gumu.” Omuvali ngoka i itaala euvaneko lyOmbiimbeli lyeyumuko ota vulu okulongitha ompito ndjika okufatulula kutya Jehova Kalunga ota dhimbulukwa ngoka a sa nota vulu oku mu yumudha a kale ishewe nomwenyo mOparadisa kombanda yevi monakuyiwa. (Lukas 23:43; Johannes 5:28, 29)—Tala oshitopolwa “Etegameno lyashili li na ko nasha noonakusa.”

Opu na mbela sha shoka kuu na okupopya? Itashi kwatha sha okutya nakusa okwa ya molweendo olule. Okanona oke na uumbanda wokuthigwa po, unene tuu ngele omuvali gwako oye a sa. Ngele okanona taka lombwelwa kutya nakusa okwa ya molweendo, otashi vulu okupwidhula ko owala eiyuvo lyako lyokuuva ka thigwa po notashi vulika taka pula taka ti: ‘Omolwashike Kuku itaa galuka nando?’ Kala wo wa kotoka waaha lombwele okanona okashona kutya nakusa okwa kotha. Olundji aanona ohayu uvu ko iinima ngaashi yi li. Ngele okanona taku uvu kutya eso olya faathana noomposi, otashi vulika ka kale ka tila oku ka lala uusiku.

Ongiini aanona taya vulu okukwathelwa yu uve ko shoka hashi ningwa pefumviko? Aavali oye na okukala ye na ko nasha nomaiyuvo gaanona yawo. Kashi li aluhe oshipu kuyo okukala pefumviko. Onkee ano oya pumbwa okukwathelwa yu uve ko nawa shoka tashi ka ningwa po. Osha kwatela mo oku ya yelithila kutya molwashike nakusa a tulwa moshiketha nomolwashike tashi tulwa mevi. Ya yelithila wo kutya otaya ka mona aantu oyendji taya lili molwaashoka ya yemata. Etha ya pule omapulo. Ya lombwela kutya ngoye opo wu li aluhe oku ya kwathela.

Aanona ohayi inyenge ngiini keso? Olundji aanona ohaya kala yu uvite ya fa oyo ye etitha eso lyagumwe ngoka ye hole. Molwaashoka otashi vulika ethimbo limwe okanona ka li ka ninga sha ngoka a sa nenge inaake mu ningila sha shontumba, taka tameke okudhiladhila kutya osho she etitha eso lye. Otashi vulika wa pumbwa oku ka hekeleka to ti: ‘Shoka wa ninga nenge inoo ninga itashi vulu okweehamitha nenge okusitha omuntu.’ Oshinima shika okanona okashona otashi vulika ka pumbwa oku shi lombwelwa lwiikando.

Oluhodhi lwoye owu na mbela oku lu holeka aanona? Okulila komeho gaanona oshi li paunshitwe nokashi shi oshinima oshiwinayi. Kakele kaashono, itashi wapa naanaa okuholeka aanona omaiyuvo goye, molwaashoka ohaya mono nuupu ngele opu na sha sha puka. Ngele to ya hololele oluhodhi lwoye oto ya tseyithile kutya inashi puka okunika oluhodhi nokuulukila yalwe nkene wu uvite.

[Ethano pepandja 21]

Ngele owu wete pu na sha sha pumbwa lela okuningwa, ino tegelela wu pulwe. Shi ninga owala

[Ethano pepandja 23]

Okuholoka kwoye koshipangelo otaku vulu okuladhipika mboka ya silwa