Oshileshwa 15

Kwathela Yalwe Ya Longe Ehalo lyaKalunga

Omolwashike u na okulombwela yalwe kombinga yaashono to ilongo? (1)

Oolye to vulu okuhokololela onkundana ombwanawa? (2)

Eihumbato lyoye otali vulu okunwetha mo yalwe ngiini? (2)

Uunake to vulu okuuvitha pamwe negongalo? (3)

1. Ngashingeyi ngoye owi ilongo iinima oyindji iiwanawa mOmbimbeli. Ontseyo ndjika oyi na oku ku fala mokwiimika uukwatya wopaKriste. (Aaefeso 4:22:24) Ontseyo ya tya ngaaka oya simana opo u mone omwenyo gwaaluhe. (Johannes 17:3) Ihe yalwe oya pumbwa wo okuuva onkundana ombwanawa opo nayo ya vule okuhupithwa. Aakriste ayehe yashili oye na okugandja uunzapo kuyalwe. Olyo elombwelo lyaKalunga.—Aaroma 10:10; 1 Aakorinto 9:16; 1 Timoteus 4:16.

2. Ngoye oto vulu okutameka okulombwela mboka ye li popepi nangoye iinima iiwanawa mbyoka to ilongo. Yi lombwela aakwanezimo lyoye, ookuume koye, aanasikola ooyakweni naaniilonga ooyakweni. Kala omunahenda nomwiidhidhimiki sho to shi ningi. (2 Timoteus 2:24, 25) Dhimbulukwa kutya aantu olundji ohaya tala keihumbato lyomuntu shi vulithe okupulakena shoka ta popi. Onkee ano eihumbato lyoye ewanawa otashi vulika li hile yalwe ya pulakene etumwalaka ndyoka to ya lombwele.—Mateus 5:16; 1 Petrus 3:1, 2, 16.

3. Konima yethimbo, otashi vulika u kale wa gwana okutameka okuuvitha pamwe negongalo lyopune lyOonzapo dhaJehova. Ndjika oyo onkatu ya simana mehumokomeho lyoye. (Mateus 24:14, KB) Enyanyu otali ka kala li thike peni ngele to vulu okukwathela omuntu gulwe a ninge omupiya gwaJehova nokumona omwenyo gwaaluhe!—1 Aatessalonika 2:19, 20.