Ehangano lyadho lyomuuyuni auhe niilonga yadho
OPU na omakwatakanitho gi ili nogi ili haga longithwa okuunganeka iilonga yokugandja uunzapo miilongo yi vulithe 230 moka tayi longwa. Ewiliko lyo lyenelyene ohali zi kOlutuwiliki kombelewa onene muuyuni auhe moBrooklyn, New York. Olutuwiliki ohali tumu aakalelipo omvula kehe kiitopolwa yi ili noyi ili muuyuni auhe oku ka kundathana naakalelipo yoshitayimbelewa miitopolwa moka. Miitayimbelewa omu na Ookomitiye dhOshitayimbelewa dhi na konyala iilyo itatu sigo iheyali okutonatela iilonga miilongo mbyoka yi li kohi yetonatelo lyayo. Yimwe yomiitayimbelewa oyi na omatungo gokunyanyangidhila, nomuyimwe omu na omashina haga tanauka neendelelo gokunyanyangidha. Oshilongo nenge iilongo mbyoka hayi tonatelwa koshitayimbelewa kehe oya topolwa miitopolwa, niitopolwa oya topolwa wo miikandjo. Oshikandjo kehe oshi na omagongalo 20 lwaampono. Omutonateli gwoshitopolwa oha talele po iikandjo moshitopolwa she medhingolokondjenda. Oshikandjo kehe ohashi ningi iigongi iyali omumvo kehe. Opu na wo omutonateli gwoshikandjo, ngoka pandjigilile ha talele po egongalo kehe moshikandjo lwaali momvula, nopetalelopo lye oha kwathele Oonzapo okuunganeka iilonga yokuuvitha moshitopolwa shegongalo ndyoka.
Egongalo lyopune nOshinyanga shUukwaniilwa shalyo olyo ondingandinga yeuvitho lyonkundana ombwanawa momudhingoloko gweni. Iitopolwa mbyoka yi li metonatelo lyegongalo kehe ohayi topolwa muutopolwa uushona. Ohau pewa Oonzapo oohandimwe ndhoka hadhi kambadhala okutalela po aantu moshitopolwa moka nokupopya nayo megumbo kehe li li mo. Egongalo kehe lya thikama mOonzapo oonshona sigo 200 lwaampono, oli na aakuluntugongalo mboka haya tonatele iilonga yi ili noyi ili. Omuuvithi pauhandimwe gwonkundana ombwanawa oku li ngoka a simana mehangano lyOonzapo dhaJehova. Kehe gumwe gwomOonzapo, kutya nduno oha longo kombelewa onene muuyuni auhe, okoshitayimbelewa nenge omegongalo, oha longo iilonga mbika yokuya momapya a ka lombwele paumwene yalwe kombinga yUukwaniilwa waKalunga.
Oolapota dhiilonga mbika hugunina ohadhi tumwa kombelewa onene muuyuni auhe, nohapu nyolwa oYearbook omvula kehe e tayi nyanyangidhwa. MOshungonangelo ye 1 Januali ohamu nyanyangidhwa ehokololoningomwa lyokomumvo omvula kehe. Iileshomwa mbika iyali ohayi gandja oolapota ndhoka dhi na uuyelele kwaashoka sha longwa po omvula kehe mokugandja uunzapo u na ko nasha naJehova nUukwaniilwa we moshikaha shaKristus Jesus. Moomvula opo dha piti, Oonzapo 14 000 000 lwaampono naantu mboka ye na ohokwe oya li ya kala pEdhimbuluko lyokomumvo lyeso lyaJesus. Oonzapo dhaJehova ohadhi longitha oowili dhi vulithe 1 000 000 000 momvula okuuvitha onkundana ombwanawa, naape ye vulithe 300 000 ohaya ninginithwa. Ohapu gandjwa iileshomwa omamiliyona omathele.