Oshileshwa 14

Nkene Oonzapo DhaJehova Dhu Unganekwa

Uunake Oonzapo dhaJehova dha tameke pethimbo lyongashingeyi? (1)

Okugongala kwOonzapo dhaJehova ohaku ningwa ngiini? (2)

Iinima ohayi futwa ngiini? (3)

Oolye haya kwatele komeho megongalo kehe? (4)

Okugongala okunene kuni haku ningwa omumvo kehe? (5)

Iilonga yini hayi longwa poombelewa dhadho oonene nopiitayimbelewa yadho? (6)

1. Oonzapo dhaJehova pethimbo lyongashingeyi odha tameke momumvo 1870 nasha. Tango, okwa li hadhi ithanwa Aakonakoni yOmbimbeli. Ihe mo 1931 odha taamba edhina lyopamanyolo Oonzapo dhaJehova. (Jesaja 43:10, NW) Ehangano olya koko okuza petameko eshona sigo opOonzapo omamiliyona, ndhoka dhi li dhi ipyakidhila nokuuvitha miilongo yi vulithe 230.

2. Ogendji gomomagongalo gOonzapo dhaJehova ohaga kala ge na okugongala lutatu oshiwike kehe. Oto hiywa u kale po pukehe kumwe kwomuko. (Aaheberi 10:24, 25, OB-1986) Ombimbeli oyo ekankameno lyaashoka hashi longwa po. Okugongala ohaku tamekwa nohaku hulithwa negalikano. ‘Oondjimbo dhopambepo’ tadhi zi komutima ohadhi imbwa wo pokugongala okundji. (Aafeso 5:18, 19) Omweelo ogwa patuluka oshali, noihapu umbwa oongalo.—Mateus 10:8.

3. Ogendji gomomagongalo ohaga gongalele mIinyanga yUukwaniilwa. Mbika olundji oyo omatungo ganathangwa ga tungwa kOonzapo aalongi yehalo ewanawa. Ito ka mona iimenka yasha, omishigakano, nenge iinima yilwe ya fa mbika pOshinyanga shUukwaniilwa. Iinima ohayi futwa nomayambidhidho gehalo ewanawa. Kwaamboka ya hala okugandja eyambidhidho, opu na okaketha komayambidhidho.—2 Aakorinto 9:7.

4. Megongalo kehe, omu na aakuluntugongalo, nenge aatonateli. Yo ohaya kwatele komeho okulonga megongalo. (1 Timoteus 3:1-7, yelekanitha NW; 5:17.) Ohaya kwathelwa kaayakuligongalo. (1 Timoteus 3:8-10, 12, 13) Aalumentu mbaka inaya tumbala ye vule oshihupe shegongalo. (2 Aakorinto 1:24) Ihaya pewa omadhinasimaneko gi ikalekelwa. (Mateus 23:8-10) Ihaya zala pamuhingo gulwe gwi ili. Noihaya futilwa iilonga yawo. Aakuluntugongalo ohaya tonatele nehalo ewanawa oompumbwe dhopambepo dhegongalo. Otaya vulu okugandja ehekeleko nomayele pethimbo lyuudhigu.—Jakob 5:14-16; 1 Petrus 5:2, 3.

5. Oonzapo dhaJehova ohadhi ningi wo iigongi iinene omumvo kehe. Pomathimbo ngaka omagongalo ogendji ohaga gongala pamwe omolwoprograma yi ikalekelwa yelongo lyOmbimbeli. Eninginitho lyaalongwa aape olyo oshitopolwa shaaluhe shoprograma kehe yoshigongi.—Mateus 3:13-17, NW; 28:19, 20, NW.

6. Oombelewa oonene dhOonzapo dhaJehova odhi li koNew York. Oko ku na Olutuwiliki, ongundumutima yaakuluntugongalo aanawino mboka haya tonatele ehangano muuyuni auhe. Muuyuni auhe omu na wo iitayimbelewa yi vulithe 100. Pomatungo ngaka, aalongi yehalo ewanawa ohaya kwathele okunyanyangidha nokutuma iinyolomwa yOmbimbeli. Ewiliko ohali gandjwa wo mokuunganeka oshilongauvitho. Omolwashike itoo ningi elongekidho lyokutalela po oshitayimbelewa shoka shi li popepi nangoye?