Ontopolwa yotango

Okulongela Kalunga muukumwe methimbo lyetu otaku ti shike?

1, 2. (a) Ehumokomeho linyanyudha lini tali ningwa methimbo lyetu? (b) Aantu mboka ye na omitima dhu uka oye na etegameno ekumithi lini?

MUUYUNI auhe omu na ehumokomeho linyanyudha li na ko nasha nokulongela Kalunga muukumwe. Aantu omamiliyona yomiigwana ayihe, yomomihoko adhihe noyomomalaka agehe otaya hanganithwa. Omvula kehe opu na aantu oyendji taya gongelwa. Aantu mbaka oya popiwa mOmbimbeli ye li “oonzapo” dhaJehova notayi ithanwa “ongundu onene.” Otaya ‘longele Kalunga omutenya nuusiku.’ (Jesaja 43:10-12, KB; Ehololo 7:9-15, yelekanitha NW.) Omolwashike mbela taye shi ningile? Omolwashoka oya tseya kutya Jehova oye awike Kalunga kashili. Shika ohashi yi inyengitha opo ya tsithe kumwe onkalamwenyo yawo nomithikampango dhe dhi li pauyuuki. Niishewe, oyi ilonga kutya otu li ‘momasiku gahugunina’ guuyuni mbuka wongashingeyi wa kolokosha nonokutya Kalunga masiku ote ke u hanagula po e te u pingena po nuuyuni we uupe woparadisa.—2 Timoteus 3:1-5, 13; 2 Petrus 3:10-13.

² Oohapu dhaKalunga otadhi uvaneke tadhi ti: “Oku na okathimbo kowala, omukeenakonashanakalunga nokee po we . . . Ihe aaneifupipiko otaa ka thigulula [evi, OB-1986] e taa kala nokunyanyukilwa ombili oyindji.” (Epsalmi 37:10, 11) “Aayuuki otaa ka thigulula evi e taa kala mo aluhe.” (Epsalmi 37:29, OB-1986) “[Kalunga] nota theta po omahodhi momeho gawo, neso kali kala we nenge oluhodhi nenge elilagano, nenge uuwehame kau kala mo we, oshoka shiyaka shotango osha hulu po.”—Ehololo 21:4.

3. Okulongela Kalunga muukumwe washili otaku ya po ngiini?

³ Mboka taya hanganithwa ngashingeyi melongelokalunga lyashili otaya ningi aakalimo yotango yomuuyuni mboka uupe. Oyi ilonga kutya ehalo lyaKalunga olini notaye li gwanitha ngaashi taya vulu. Okuulika kutya shika osha simana, Jesus okwa ti: “Nomwenyo gwaaluhe ogwo tuu nguka, oyo ye ku tseye, ongoye Kalunga awike gwashili, naanguka we mu tuma, Jesus Kristus.” (Johannes 17:3) Omuyapostoli Johannes okwa nyola ta ti: “Uuyuni notau hulu po pamwe nokahalu kawo; ihe oongoka ta gwanitha ehalo lyaKalunga, oye ha kala aluhe.”—1 Johannes 2:17.

Shoka taku ti naanaa

4. (a) Sho aantu oyendji noonkondo taya gongelwa okulongela Kalunga muukumwe methimbo lyetu osha hala naanaa okutya shike? (b) Ombimbeli otayi hokolola ngiini egongelo ndyoka?

⁴ Sho aantu oyendji noonkondo taya gongelwa ya longele Kalunga muukumwe methimbo lyetu osha hala naanaa okutya shike? Shoka oshi li euliko lya yela kutya otu li shili popepi nehulilo lyuuyuni mbuka wa kolokosha, nuuyuni uupe waKalunga otau ka tameka nziya konima yaashoka. Otu li aamoni nomeho yomagwanitho gomahunganeko gOmbimbeli ngoka ga hunganeke egongelo ndyoka lya simanenena. Limwe lyomomahunganeko ngoka otali ti: “Pomahulilo gomasiku [omasiku ngaka gahugunina] ondungu yotempeli yOmuwa [elongelokalunga lye lyashili li vule agehe] tayi thikama ya kolelela kombanda yondungu yondundu [kombanda yelongelokalunga lyoludhi kehe], . . . niigwana oko tayi matukile ko. [Naantu yayo otaa ka tya, OB-1986]: Ileni, tse tu londe kondundu yOmuwa, okotempeli yaKalunga kaJakob oye e tu longe oondjila dhe, tse tu ende nomapola ge.”—Mika 4:1, 2; Epsalmi 37:34.

5, 6. (a) Omolwashike taku vulu okutiwa kutya iigwana otayi ya kuJehova? (b) Omapulo geni tu na okwiipula?

⁵ Nonando haigwana ayihe tayi ya kegumbo lyaJehova lyopambepo yi mu longele, oohandimwe omamiliyona okuza miigwana ayihe osho taya ningi. Sho tayi ilongo kombinga yomalalakano gopahole noyuukwatya uuwanawa waJehova Kalunga, otashi ya gumu lela komitima dhawo. Otaya kambadhala neifupipiko okumona shoka Kalunga ta pula kuyo. Otaya galikana ngaashi omupsalmi ngoka a ti: “Longa ndje okugwanitha ehalo lyoye, oshoka ongoye Kalunga kandje!”—Epsalmi 143:10.

⁶ Mbela owi iwete mwene mongundu onene yaantu mboka taya gongelwa ngashingeyi kuJehova oku mu longela muukumwe? Einyengo lyoye kelongo ndyoka wa mona mOohapu dhe mbela otali ulike ngaa kutya owu uvite ko shili kutya olya za kuJehova? Oto ke enda lelalela ‘momapola ge’?

Nkene uukumwe mboka tau ya po

7. (a) Lwahugunina oolye taya ka longela Kalunga muukumwe? (b) Omolwashike shi li she endelela okukala omulongeli gwaJehova ngashingeyi, nongiini tatu vulu okukwathela yalwe ye shi ninge?

⁷ Elalakano lyaJehova olyo kutya iishitwa ayihe yi na oondunge yi kale ya hangana melongelokalunga lyashili. Inatu halelela tuu esiku ndyoka li thike moka ayehe mboka ye na omwenyo taya ka longela Kalunga awike kashili! (Epsalmi 103:19-22) Ihe manga shika inaashi vula okuningwa, Jehova oku na okuhanagula po ayehe mboka haya tindi okulonga ehalo lye li li pauyuuki. Pasilohenda lye, oha tseyithile aantu manga kuyele shoka ta ka ninga, opo aantu shaampono ya vule okumona ompito yokulundulula omikalo dhawo. (Jesaja 55:6, 7) Onkee ano methimbo lyetu ‘iilongo ayihe niigwana ayihe nomalaka agehe nomazimo agehe’ taga tseyithilwa elombwelo ndika lye endelela taku ti: “Tileni Kalunga, ne mu mu simaneke; oshoka ethimbo lyepangulo lye olye ya; galikaneni omushiti gwegulu nogwevi nogwefuta nogwoothithiya dhomeya.” (Ehololo 14:6, 7) Mbela elombwelo ndyoka owe li taamba ko? Ngele osho, oshi li uuthembahenda woye okulombwela natango yalwe ya tseye Kalunga kashili noye mu longele.

8. Konima sho twi ilonga omalongo gopetameko gOmbimbeli, ehumokomeho lini twa pumbwa natango okulalakanena twa mana mo?

⁸ Kali shi elalakano lyaJehova okukala ta longelwa kaantu mboka taya ti kutya oye mu itaala ihe otaya tsikile okulalakanena iinima yawo yene. Kalunga okwa hala aantu ya ‘tseye ehalo lye’ noku shi ulika monkalamwenyo yawo. (Aakolossa 1:9, 10) Onkee ano aantu ye na olupandu mboka tayi ilongo omalongo gopetameko gOmbimbeli oya hala okulalakanena uukuluntu wopaKriste. Oya hala okutseya Jehova nawanawa, okutamununa mo euvoko lyawo li kale lyomuule okuuva ko Oohapu dhe noku dhi tula miilonga thiluthilu monkalamwenyo yawo. Otaya kambadhala okuulika omaukwatya gaTate yetu gwomegulu nokutala ko iinima ngaashi ye he yi tala ko. Shoka ohashi yi inyengitha ya konge omikalo dhokukutha ombinga miilonga tayi hupitha omwenyo mbyoka u unganeka yi longwe kombanda yevi methimbo lyetu. Mbela nangoye osho wa hala okuninga?—Markus 13:10; Aaheberi 5:12–6:3, OB-1986.

9. Omomikalo dhini uukumwe washili tau wapa ngashingeyi?

⁹ Ombimbeli otayi ulike kutya mboka taya longele Jehova oye na okukala oshigwana sha hangana. (Aaefeso 4:1-3) Uukumwe mboka ou na okukala po ngashingeyi, nokuli nonando otu li muuyuni wa topoka notatu kondjo natango nokwaagwanenena kwetu. Jesus okwa galikana a mana mo opo aalongwa ye ayehe ya kale yamwe, taya nyanyukilwa uukumwe washili. Shoka osha li tashi ka tya shike? Shotango, otashi ti kutya oya li taya ka kala ye na ekwatathano ewanawa naJehova nosho wo nOmwana. Oshitiyali, otashi ti kutya oya li taya ka kala ya hangana. (Johannes 17:20, 21) Opo shi ningwe, egongalo lyopaKriste otali longo li li ehangano moka Jehova ha pitile okulonga oshigwana she.

Iinima yini tayi eta uukumwe?

10. (a) Oshike tatu kala tu na ngele tatu longitha Ombimbeli paumwene okumona omayamukulo gomapulo ngoka ge tu guma? (b) Konakona iinima mbyoka tayi etitha uukumwe wopaKriste mokuyamukula omapulo ngoka ge li mokatendo muka.

¹⁰ Iinima iheyali ya simana mbyoka tayi etitha okulongela Kalunga muukumwe oya tumbulwa pevi. Sho to yamukula omapulo ngono tage endele pamwe nayo, dhiladhila nkene oshitsa kehe tashi gumu ekwatathano lyoye naJehova nosho wo nAakriste ooyakweni. Okudhiladhila kombinga yiitsa mbyoka nokutala omanyolo ngoka ga gandjwa ihe inaga tothwa mo otashi ke ku kwathela u kale u na uunongo wopakalunga, uukeka wokudhiladhila noondunge dhokuyoolola—omaukwatya ngoka atuheni twa pumbwa. (Omayeletumbulo 5:1, 2; Aafilippi 1:9-11) Tala iinima mbyoka kooshimwe.

(1) Otwa zimina uuthemba waJehova wokutula po omuthikampango gwaashoka oshiwanawa naashoka oshiwinayi. “Inekela Omuwa noku mu inekelitha omwenyo gwoye, ngoye ino inekela oondunge dhoye mwene. Moondjila dhoye adhihe mu dhimbulukwa, oye note ku yelekanithile omapola goye.”—Omayeletumbulo 3:5, 6.

Omolwashike tu na okukonga omayele newiliko kuJehova uuna tatu ningi omatokolo? (Epsalmi 146:3-5; Jesaja 48:17)

(2) Otu na Oohapu dhaKalunga oku tu wilika. “Oohapu mwe dhi uvu kutse, omwe dhi taamba, hangoohapu dhaantu, aawe, ongoohapu dhaKalunga, ngaashi odhoelela shili, oondhoka hadhi longo wo mune mboka mwi itaale.”—1 Aatessalonika 2:13.

Oshiponga shini shi li po ngele tatu ningi owala shoka tatu “dhiladhila” kutya oshi li mondjila? (Omayeletumbulo 14:12; Jeremia 10:23, 24; 17:9)

Mbela otu na okuninga shike ngele katu shi kutya Ombimbeli otayi gandja omayele geni kombinga yoshinima shontumba? (Omayeletumbulo 2:3-5; 2 Timoteus 3:16, 17)

(3) Atuheni ohatu mono uuwanawa moprograma ya faathana yokupaluthwa pambepo. “Aamwoye aamati oyo ayehe aalongwa yOmuwa.” (Jesaja 54:13) “Tu tonatelathaneni, tu kumidhathaneni okuhola nokulonga iilonga iiwanawa, [inatu etha po okugongala pamwe, ngaashi yamwe haa ningi, OB-1986], aawe, tu kumagidhathaneni, nuunene sho tamu mono esiku ndyoka [lyehanagulo] tali hedha ko.”—Aaheberi 10:24, 25.

Omauwanawa geni haga monika kwaamboka haya longitha thiluthilu omalongekidho gaJehova goku tu palutha pambepo? (Jesaja 65:13, 14)

(4) Jesus Kristus oye Omuwiliki gwetu, ihe hamuntu. “Inamu zimina, mu ithanwe rabbi, oshoka omuhongi gweni ogumwe ihe one amuhe aantu naamwayina. Noinamu ithana nando olye gwokombanda yevi ho, oshoka one omu na Ho gumwe awike, oonguka gwomegulu. Inamu pitika, mu ithanwe omuwiliki, oshoka omuwiliki gweni gumwe awike, oKristus.”—Mateus 23:8-10.

Mbela otu na okwiitala kutya otu vule yalwe? (Aaroma 3:23, 24; 12:3)

(5) Tse otwa tala ko epangelo lyUukwaniilwa waKalunga kutya olyo awike etegameno lyaantu. “Ano mu na okugalikana ngeyi: Tate yetu megulu. Edhina lyoye nali yapulwe; [uukwaniilwa woye nau ye, KB]; ehalo lyoye nali gwanithwe nokombanda yevi wo ngashika megulu. Otango ano kongeni [uukwaniilwa waKalunga, KB] nuuyuuki we.”—Mateus 6:9, 10, 33.

Ongiini mbela ‘okukonga tango uukwaniilwa’ taku tu kwathele tu gamene uukumwe wetu? (Mika 4:3; 1 Johannes 3:10-12)

(6) Ombepo ondjapuki ohayi imike maalongeli yaJehova omaukwatya ngoka ga simanenena okukaleka po uukumwe wopaKriste. “Iiyimati yOmbepo oombika: ohole, enyanyu, ombili, ontalanteni, uukuume, uuwanawa, uudhiginini, engungumano, eidhidhimiko.”—Aagalati 5:22.

Oshike tu na okuninga opo ombepo yaKalunga yi imike iiyimati yayo mutse? (Iilonga 5:32)

Okukala tu na ombepo yaKalunga ohaku nwetha mo ngiini ekwatathano lyetu nAakriste ooyakwetu? (Johannes 13:35; 1 Johannes 4:8, 20, 21)

(7) Aalongelikalunga ayehe yashili ohaya kutha ombinga mokuuvitha onkundana ombwanawa yUukwaniilwa we. “Nevaangeli ndika [lyuukwaniilwa, KB] otali ku uvithilwa nuuyuni auhe, li ningile iigwana ayihe ehokololo; notaku ya ihe ehulilo.”—Mateus 24:14.

Oshike shi na oku tu inyengitha tu kale twa hala okukutha ombinga onene miilonga mbyoka yokuuvitha? (Mateus 22:37-39; Aaroma 10:10)

11. Ngele tatu tula miilonga ooshili dhOmbimbeli monkalamwenyo yetu, oshizemo otashi kala shike?

¹¹ Okulongela Jehova muukumwe otaku tu hedhitha popepi lela naye notaku tu kwathele tu vule okunyanyukilwa ekwatathano nooitaali ooyakwetu tali mbilipaleke. Epsalmi 133:1 otali ti: “Tala, nkene sho opala, sho opalelela, aantu naamwayina nge taa kala kumwe ye na ombili.” Itashi uvitha tuu ombili okuza muuyuni mu udha okwiihola, oluhondelo nelongithonkondo e tatu kala hatu gongala pamwe naamboka ye hole shili Jehova nohaya vulika kiipango ye!

Yanda omanwethomo ngoka hage eta etopauko

12. Omolwashike tu na okuyanda ombepo yemanguluko?

¹² Opo kaatu yone po uukumwe wetu womuuyuni auhe u na ongushu, otu na okuyanda omanwethomo ngoka hage eta etopauko. Limwe lyomugo olyo ombepo yokumanguluka ko kuKalunga nokoompango dhe. Jehova ohe tu kwathele tu yi yande mokuholola kutya ohayi etithwa kuSatana Ondiaboli. (2 Aakorinto 4:4; Ehololo 12:9) Satana oye a nwetha mo Adam naEva ya kale kaaye na ko nasha naashoka sha popiwa kuKalunga noya ninge omatokolo taga kondjithathana nehalo lyaKalunga. Oshizemo, shoka oshe ye etele oshiponga oshinene nosho wo tse. (Genesis 3:1-6, 17-19) Uuyuni mbuka owu udha ombepo yemangulukoko kuKalunga nokoompango dhe. Onkee ano otu na okukondjitha ombepo ndjoka opo kaayi tu kwate.

13. Oshike tashi ku ulika kutya otatu ilongekidhile shili okukala muuyuni uupe waKalunga wuuyuuki?

¹³ Pashiholelwa, dhiladhila euvaneko lyaJehova linyanyudha lyokupingena po uuyuni wongashingeyi wa kolokosha nomagulu omape nosho wo nevi epe moka “tamu ka kala uuyuuki.” (2 Petrus 3:13) Mbela shoka kashi na oku tu inyengitha tu tameke okwiilongekidhila okukala po pethimbo ndyoka sho tapu ka kala pu na uuyuuki? Shoka otashi ti kutya otu na okuvulika komayele ga yela gOmbimbeli, taga ti: “Inamu kala mu hole uuyuni noshaa shoka sha kala mo. Oongoka e hole uuyuni, ohole yaHe kayi mo muye.” (1 Johannes 2:15) Onkee ano, otatu yanda ombepo yuuyuni mbuka—iikala yawo yemanguluko, okukala kwawo u na ko nasha unene nawo wene, oluhondelo nelongithonkondo lyawo. Ohatu pulakene kuJehova nokuvulika kuye tashi zi komutima, nonando onyama yetu inaayi gwanenena otayi shi kondjitha. Onkalamwenyo yetu ayihe otayi ulike kutya okudhiladhila kwetu nomainyengotompelo getu ogu ukithwa kokulonga ehalo lyaKalunga.—Epsalmi 40:9.

14. (a) Omolwashike sha simana okulongitha ompito ngashingeyi okwiilonga oondjila dhaJehova noku dhi landula monkalamwenyo yetu? (b) Omanyolo ngoka ga gandjwa mokatendo otaga ti shike kutse paumwene?

¹⁴ Sho ethimbo lyaJehova lyu uthwa tali ka thika okuhanagula po onkalelo ndjika yiinima yuukolokoshi naayehe mboka ya hokwa oondjila dhayo, ita ka ongaonga. Ita ka undulila komeho ethimbo ndyoka nenge a lundulule omithikampango dhe opo o opalele mboka taya kambadhala natango okukakatela kuuyuni omanga tayi ilongo ehalo lye noku li longa nomutima gu li etata. Ngashingeyi olyo ethimbo lyokukatuka onkatu! (Lukas 13:23, 24; 17:32; 21:34-36) Onkee ano kashi nyanyudha tuu okumona ongundu onene tayi longitha ompito ndjoka yi na ongushu notayi kongo nehalo enene elongo ndyoka Jehova ha gandja okupitila mOohapu dhe nomehangano lye notayi ende ya hangana moondjila dhe ndhoka tadhi fala muuyuni uupe! Mokwiilonga oshindji kombinga yaJehova, omo ngaa ohole yetu yoku mu hola tayi ningi yomuule e tatu kala twa hala oku mu longela.

Oonkundathana dhokweendulula

• Elalakano lyaJehova li na ko nasha nelongelokalunga olini?

• Konima sho twi ilonga omalongo gopetameko gOmbimbeli, otwa pumbwa natango okulalakanena twa mana mo ehumokomeho lini?

• Oshike tatu vulu okuninga polwetu opo tu kale twa hangana naalongeli yaJehova yalwe?

[Ethano pepandja 4]

‘Aaneifupipiko otaa ka thigulula evi e taa kala nokunyanyukilwa ombili oyindji’