Uukumwe ohawu ndhindhilikitha mo elongelokalunga lyashili
“Otandi ke mú gongela ngaashi oonzi tadhi ya koshigunda.”—MIKA 2:12.
1. Eshito otali ulike ngiini uunongo waKalunga?
OMUPISALOMI okwi igidha a ti: “OMUWA, owa shiti iinima oyindji! Tala, nkene wa shiti ayihe noondunge! Evi olyu udha iishitwa yoye.” (Eps. 104:24) Uunongo waKalunga owi iwetikile miinima omamiliyona ya yoolokathana ngaashi iimeno, uupuka, iinamwenyo nosho wo oombakiteli dhomevi ndhoka hadhi kaleke iimeno yi na omwenyo. Molutu lwoye omwa shitilwa wo iilyo yi ili noyi ili omayuvi, okuza koosele oonene sigo okwaandhoka oonshona nohayi longele kumwe oku ku kaleka wu na uukolele.
2. Ngaashi shu ulikwa pepandja 13, omolwashike uukumwe wAakriste wa fa oshikumithalonga?
2 Jehova okwa shita aantu ya kale haya kwathelathana. Aantu oye na omalupe, omaukwatya nuunkulungu wa yoolokathana. Kalunga okwa shiti aantu yotango ye na uukwatya wa fa we, mboka ando wa li wu na oku ya kwathela ya kale haya longele kumwe nohaya kwathelathana. (Gen. 1:27; 2:18) Ihe nonando ongaaka, aantu ayehe oyi iteka Kalunga noitaya vulu nando okulonga ya hangana. (1 Joh. 5:19) Onkee ano, uukumwe mboka wa li megongalo lyopaKriste lyomethelemumvo lyotango moka mwa li aantu ya yoolokathana owa li wa fa oshikumithalonga molwaashoka omwa li aantu yi ili noyi ili, ngaashi aapika Aaefeso, aakiintu Aagreka ya tumbala, aalumentu aalongwantu Aajuda nosho wo aantu mboka ya li haya longele iikalunga.—Iil. 13:1; 17:4; 1 Tes. 1:9; 1 Tim. 6:1.
3. Ombiimbeli otayi hokolola ngiini uukumwe wAakriste, notatu ka konakona shike moshitopolwa shika?
3 Elongelokalunga lyashili ohali kwathele aantu ya kale taya longele kumwe ngaashi iilyo yolutu. (Lesha 1 Aakorinto 12:12, 13.) Moshitopolwa shika otatu ka konakona nkene elongelokalunga lyashili hali hanganitha aantu. Omolwashike Jehova oye owala ta vulu okuhanganitha aantu omamiliyona yomiigwana ayihe? Ohe tu kwathele ngiini tu taaguluke omandangalati ngoka hage tu imbi tu kale twa hangana? Uukumwe wAakriste yashili owa yooloka ko ngiini kwaamboka wUukwakriste?
Elongelokalunga lyashili ohali hanganitha aantu ngiini?
4. Elongelokalunga lyashili ohali hanganitha aantu ngiini?
4 Aantu mboka ye li melongelokalunga lyashili oye shi kutya Jehova oye a shita iinima ayihe noye e na uuthemba okukala Omupangeli gweshito alihe. (Eh. 4:11) Nonando Aakriste yashili oya za miigwana yi ili noyi ili nomiitopolwa ya yoolokathana, ohaya vulika koompango dhaKalunga nokomakotampango gOmbiimbeli ga faathana. Aalongelikalunga ayehe yashili ohayi ithana Jehova “Tate.” (Jes. 64:8; Mat. 6:9) Kungawo, ayehe oye li aamwayinathana pambepo nohaya nyanyukilwa uukumwe uuwanawa mboka wa hokololwa komupisalomi sho a ti: “Osho opala sho opalelela aantu ayehe ngele taa kala ye holathane ngaashi aamwayinathana.”—Eps. 133:1.
5. Omaukwatya geni taga kwathele aalongelikalunga yashili ya kale ya hangana?
5 Nonando Aakriste yashili inaya gwanenena, ohaya longele kumwe ya hangana molwaashoka oyi ilonga okukala ye holathane. Jehova okwe ya longa okukala ye holathane. (Lesha 1 Johannes 4:7, 8.) Oohapu dhe otadhi ti: “Kaleni mu na olukeno, ohenda, eifupipiko, ombili neidhidhimiko. Kwathathaneni, dhiminathanii po oondjo naanaa, ngashika Omuwa e mú dhimine po. Kumbika ayihe gwedhii ko ohole, oshoka ohole oyo epaya tali mangele kumwe.” (Kol. 3:12-14) Ohole ndjoka yi li epaya lyokuhanganitha, oyo uukwatya mboka tawu ndhindhilikitha mo Aakriste yashili. Mbela owa mona ngaa kutya uukumwe owo hawu ndhindhilikitha mo elongelokalunga lyashili?—Joh. 13:35.
6. Ongiini epepelelo ndyoka tali ke etwa kUukwaniilwa waKalunga tali tu kwathele tu kale muukumwe?
6 Aalongelikalunga yashili oya hangana wo molwaashoka oye shi kutya Uukwaniilwa waKalunga owo owala tawu ke etela aantu epepelelo. Oye shi kutya masiku otawu ka pingena po omapangelo gopantu notawu ke etela aantu aavuliki ombili yashili notayi kalelele. (Jes. 11:4-9; Dan. 2:44) Kungawo, Aakriste ohaya pulakene kwaashoka Jesus a popya kombinga yaalanduli ye a ti: “Ngashika ngame ndaa shi gwomuuyuni, osho wo nayo kaye shi yomuuyuni.” (Joh. 17:16) Aakriste yashili ihaya kutha ombinga momaipumo mumwe guuyuni, onkee ano, ohaya nyanyukilwa uukumwe nonando mboka ye ya dhingoloka otaya kondjo.
Onzo yimwe yelongo lyopambepo
7, 8. Omomukalo guni elongo lyOmbiimbeli hali tu kwathele tu kale twa hangana?
7 Aakriste yomethelemumvo lyotango oya li ya hangana molwaashoka ayehe oya li ya mono etsomukumo okuza konzo yimwe. Oya li ya tseya kutya Jesus ota longo nota wilike omagongalo okupitila molutuwiliki, lwa thikama po maayapostoli nomaakuluntugongalo muJerusalem. Aalumentu mbaka yi igandja oya li haya ningi omatokolo ga kankamena kOohapu dhaKalunga nomalombwelo gawo oga li haga taandelithwa kaatonateli aaendi mboka haya talele po omagongalo miilando oyindji. Ombiimbeli otayi popi aatonateli yamwe mboka, tayi ti: “Mokweenda kwawo miilando ayihe oya tseyithile ooitaali omautho ngoka ga ningwa kaayapostoli nokaakuluntu muJerusalem.”—Iil. 15:6, 19-22; 16:4.
8 Osha faathana nokunena, Olutuwiliki ndoka lwa thikama po mAakriste aagwayekwa ohalu kwathele mokuhanganitha omagongalo muuyuni auhe. Ohalu nyanyangidha iileshomwa yoku ga ladhipika pambepo momalaka ogendji. Iikulya mbika yopambepo oya kankamena kOohapu dhaKalunga. Onkee ano, elongo lyalwo inali za kaantu, ihe okuKalunga.—Jes. 54:13.
9. Ongiini iilonga mbyoka Kalunga e tu pa tayi tu kwathele tu kale twa hangana?
9 Aakuluntugongalo nayo ohaya humitha komeho uukumwe mokukwatela komeho iilonga yokuuvitha. Ekwatathano lyopothingo ndyoka li niwe kwaamboka haya longo pamwe miilonga yaKalunga oli na oonkondo li vule lyayalwe muuyuni mboka haya nyanyukilwa owala pamwe miinima yowala. Egongalo lyopaKriste kalya li lya totwa omolwomainyanyudho, ihe okusimanekitha Jehova nokulonga iilonga yokuuvitha onkundana ombwanawa, okuninga aantu aalongwa noku li tunga pambepo. (Rom. 1:11, 12; 1 Tes. 5:11; Heb. 10:24, 25) Omuyapostoli Paulus okwa li a lombwele Aakriste a ti: ‘Kaleni mwa thikama omuthika mu na elalakano limwe alike, nokutya okukondjela eitaalo lyomevaangeli pamwe nangame.’—Fil. 1:27.
10. Tu li oshigwana oshigwana shaJehova otwa hangana momikalo dhini?
10 Tu li oshigwana shaJehova, otwa hangana molwaashoka otwa taamba ko uunamapangelo we, otu hole aamwatate, otu na etegameno mUukwaniilwa we notwa simaneka mboka haye tu kwatele komeho. Jehova ohe tu kwathele tu sinde iikala yontumba mbyoka tayi vulu okuyona po uukumwe wetu molwaashoka inatu gwanenena.—Rom. 12:2.
Sinda uuntsa nondumbo
11. Omolwashike uuntsa hawu topola aantu, nongiini Jehova he tu kwathele tu wu sinde?
11 Uuntsa ohawu topola aantu. Omunuuntsa ohi itala ko e vule yalwe nolundji okwi ihole nohi itanga shoka olundji hashi imbi aantu ya kale ya hangana. Mboka taya pulakene sho ti itanga otashi vulika ye mu tsile ondumbo. Omulongwa Jakob ote tu lombwele sha yela ta ti: “Eitango lya tya ngeyi olya puka.” (Jak. 4:16) Kashi li pahole okutala ko yalwe u ya vule. Oshindhindhilikwedhi osho kutya Jehova oye oshiholelwa sheifupipiko mokuungaunga naantu inaaya gwanenena ngaashi tse. David okwa nyola a ti: “[Eifupipiko lyaKalunga, NW] olya nenepekitha ndje.” (2 Sam. 22:36) Oohapu dhaKalunga otadhi tu kwathele tu sinde uuntsa moku tu longa okutompathana momukalo gu uka. Paulus okwa li a nwethwa mo a pule ta ti: “Olye e ku ningi, u vule yakweni? Oshike shono u na inoo shi pewa kuKalunga? Onkee oto vulu ngiini okwiitanga wa fa iinima ayihe inoo yi pewa omagano?”—1 Kor. 4:7.
12, 13. (a) Omolwashike shi li oshipu okutsila yalwe ondumbo? (b) Ngele tatu tala ko yalwe ngaashi Jehova he ya tala ko, otashi ulike shike?
12 Ondumbo oyo oshinima shaapuhe hashi imbi aantu ya kale ya hangana. Molwaashoka otwa thigulula okwaahagwanenena, atuheni otu na ombepo ‘yuukodhi,’ nokuli nopethimbo lyonale omathimbo gamwe Aakriste oya li haya tsile ondumbo oondondo dhayalwe, iiniwe yayalwe, uuthembahenda nenge okuvula kwayalwe. (Jak. 4:5) Pashiholelwa, omumwatate ngoka e na aanona otashi vulika a kale a tsila ondumbo uuthembahenda mboka omukalele gwethimbo lyu udha e na, noitaa dhiladhila kutya omukalele gwethimbo lyu udha otashi vulika naye a kale e mu tsila ondumbo kashona. Ongiini tatu vulu okukeelela ondumbo kaayi teye po uukumwe wetu?
13 Ombiimbeli otayi yelekanitha iilyo yegongalo lyopaKriste iigwayekwa niilyo yolutu lwomuntu yi tu kwathele tu yande ondumbo. (Lesha 1 Aakorinto 12:14-18.) Pashiholelwa, nonando omeho goye otashi vulika ga simana ge vule omutima, mbela iilyo mbyoka iyali inayi simana kungoye? Sha faathana, Jehova okwa lenga iilyo ayihe yegongalo nonando yimwe otashi vulika ya simana yi vule iikwawo. Onkee ano, natu tale ko aamwatate, ngaashi Jehova he ya tala ko. Inatu kala twa tsila yalwe ondumbo, ihe natu kale tu na nayo notu ya hole. Ngele tatu shi ningi, otatu ulike kutya opu na eyooloko pokati kAakriste yashili naamboka ye li moongeleka dhUukwakriste.
MUukwakriste omu na etopoko
14, 15. Oshe ende ngiini opo Uukwakriste uushunimonima wu topoke?
14 Aakriste yashili oya hangana, omanga moongeleka dhUukwakriste mu na etopoko. Methelemumvo etine, uushunimonima owa li wa taandela apuhe, nomupangeli Omuroma omupagani okwa li e wu humitha komeho. Konima yaashoka omahangano ogendji oga tameke okutopoka ko kuRoma nokutota po oongeleka dhago miilongo yawo.
15 Omahangano ogendji gomugo oga kala nokukondjithathana uule womathelemimvo. Methelemimvo eti-17 neti-18, aantu muBritania, Fulaanisa nomIilongo yaHangana oya humitha komeho etopoko miilongo yawo, shoka sha ningitha uukwashigwana wu kale wa talika ko wa fa elongelokalunga. Methelemimvo eti-19 neti-20 uukwashigwana owa tameke okunwetha mo omadhiladhilo gaantu oyendji. Lwahugunina, oongeleka dhUukwakriste odha topoka miimpaga oyindji, noyindji yomuyo oya li tayi humitha komeho uukwashigwana. Iilyo yoongeleka oya li ya kondjitha nokuli iilyo yoongeleka dhayo yokiilongo yilwe. Kunena, Uukwakriste owa topoka miimpaga nomuukwashigwana.
16. Iinima yini ye eta etopoko mUukwakriste?
16 Methelemumvo eti-20, yimwe yomiimpaga yUukwakriste omathele oya li ya ningi oonkambadhala okukala ya hangana. Konima yoonkambadhala ndhoka dha ningwa uule womathelemimvo, oongeleka owala oonshona dha hangana, ihe natango iilyo yadho ohayi gandja omayamukulo ga yoolokathana ngele tayi pulwa kombinga yoevolusi, okwiikutha omala, uushenge nokuyapula aakiintu ya ninge aasita. Aawiliki yoongeleka dhUukwakriste miitopolwa yimwe, oya kambadhala okuhanganitha aantu okuza miimpaga yi ili noyi ili opo ya shunithe pevi etopoko ndyoka lya li po nale momalongo gadho. Ihe ehanganitho ndyoka olya nkundipaleke owala eitaalo lyaantu, noinali hanganitha iimpaga yUukwakriste.
Melongelokalunga lyashili kamu na uukwashigwana
17. Elongelokalunga lyashili olya hunganekwa tali hanganitha aantu ngiini “momasiku tage ke ya”?
17 Nonando ngashingeyi aantu oya topoka inaashi monika nando onale, uukumwe otawu tsikile okuhanganitha aalongelikalunga yashili. Omupolofeti gwaKalunga Mika okwa hunganeke a ti: “Otandi ke mú gongela, ngaashi oonzi tadhi ya koshigunda.” (Mika 2:12) Mika okwa hunganeke kutya elongelokalunga lyashili otali ka kala li vule omalongelokalunga agehe galwe, kutya nduno ogiikalunga nenge ogiilongo. Okwa nyola a ti: “Momasiku tage ke ya ondundu hoka kwa tungilwa otempeli, otayi ka ninga ondeendeka yi vule adhihe, otayi ka lelepala kombanda yoondundu adhihe. Iigwana oyindji otayi ke ya tayi matukile kuyo. Oshigwana kehe otashi simaneke nokuvulika kuKalunga kasho shene, ihe tse otatu ka longela nokuvulika kOMUWA Kalunga ketu.”—Mika 4:1, 5.
18. Elongelokalunga lyashili olye tu kwathela tu ninge omalunduluko geni?
18 Mika okwa hokolola wo nkene elongelokalunga lyashili tali ka hanganitha mboka ya li ye tondathane a ti: ‘Aantu okuza miigwana oyindji otaye ke ya taya matukile kulyo notaa ka tya: “Natu londeni kondundu yOMUWA, tu ye kotempeli yaKalunga kaIsraeli. Oshoka ote ke tu nongeka shoka a hala tu longe; otatu ke enda momapola e ga hogolola.” Otaa ka hambula omagongamwele gawo, ga ninge omatemo nomagonga gawo iimwitho. Iigwana itayi ka ya we kiita, itaa ilongekidhile we olugodhi.’ (Mika 4:1-3) Mboka ye etha po okulongela iikalunga ya ningwa kaantu nenge yiigwana ya longele Jehova, otaya ka nyanyukilwa uukumwe muuyuni auhe. Kalunga ote ya longo oondjila dhe pahole.
19. Uukumwe waantu omamiliyona melongelokalunga lyashili otawu gandja uunzapo washike?
19 Uukumwe wAakriste yashili owi iwetikile kunena apuhe notawu gandja uunzapo wa yela kutya Jehova ota tsikile okuwilika oshigwana she okupitila mombepo ye ondjapuki. Oohandimwe okuza miigwana ayihe oya hangana inaashi monika nando onale mondjokonona yaantu. Ndika olyo egwanitho endhindhilikwedhi lyaashoka sha popiwa mEhololo 7:9, 14, notashi ulike kutya aayengeli yaKalunga masiku otaye ke etha “oombepo” ndhoka tadhi ka hanagula po uuyuni mbuka wa kolokosha. (Lesha Ehololo 7:1-4, 9, 10, 14.) Mbela kashi li uuthembahenda okukala twa hangana muumwayinathana muuyuni auhe? Ongiini kehe gumwe gwomutse ta vulu okuhumitha komeho uukumwe mboka? Shika otashi ka kundathanwa moshitopolwa tashi landula.
Oto yamukula ngiini?
• Elongelokalunga lyashili ohali hanganitha aantu ngiini?
• Ongiini tatu vulu okukeelela ondumbo kaayi yone po uukumwe wetu?
• Omolwashike aalongelikalunga yashili inaaya topolwa kuukwashigwana?
[Ethano pepandja 16]
Aakriste yomethelemumvo lyotango oya za momaputuko gi ili nogi ili
[Omathano pepandja 18]
Okukwathela kwoye miilonga mbyoka hayi longwa plinyanga yUukwaniilwa otaku humitha ngiini komeho uukumwe?