Ontopolwa ontiyali
Simaneka Jehova e li Kalunga awike kashili
1. Kalunga awike kashili oye lye?
OMBIMBELI otayi ti kutya nonando oku kale oyendji mboka ya talika ko oyo ookalunga, “otse tu na Kalunga kamwe, oTate.” (1 Aakorinto 8:5, 6) “Kalunga kamwe” ngoka oye Jehova, Omushiti gwiinima ayihe. (Deuteronomium 6:4, NW; Ehololo 4:11) Jesus okwe mu popi e li ‘Kalunga kandje naKalunga keni.’ (Johannes 20:17) Okwa tsu kumwe naMoses, ngoka nale a tile: “[Jehova, NW] oye Kalunga, nokaku na okalunga okakwawo, oye awike.” (Deuteronomium 4:35) Jehova oku vule kokule oshinima kehe hashi galikanwa, ngaashi iiyelekelakalunga, aantu mboka ya ningwa ookalunga nenge omutondi gwe Satana Ondiaboli, ‘kalunga kuuyuni mbuka.’ (2 Aakorinto 4:3, 4) Mekondjithathano niinima ayihe mbyono, Jehova, ngaashi Jesus e mu ithana, oye ‘Kalunga awike gwashili.’—Johannes 17:3.
2. Sho tatu ilongo kombinga yaKalunga, onkalamwenyo yetu oyi na okukala ya gumwa ngiini?
2 Aantu ye na olupandu mboka tayi ilongo kombinga yomaukwatya gaKalunga taga nyanyudha omutima, nosho wo shoka e tu ningila naashoka te ke tu ningila natango, oye uvite taya hililwa kuye. Sho ohole yawo yokuhola Jehova tayi koko, otayi yi inyengitha oku mu simaneka. Ngiini? Omukalo gumwe ogwo mokulombwela yalwe kombinga ye. Aaroma 10:10 otaya ti: ‘Okuhempulula kwokana otaku hupitha.’ Omukalo gulwe natango ogwo moku mu holela moohapu nomiilonga. Aaefeso 5:1 otaya ti: “Ningeni ano aaholeli yaKalunga ongoyana aaholike.” Opo tu shi ninge lelalela, otwa pumbwa okutseya Jehova ngaashi naanaa e li shili.
3. Omaukwatya gaKalunga ga simanenena ogeni?
3 MOmbimbeli ayihe, omu na omautumbulilo ogendji ngoka tagu ulike omaukwatya gaKalunga ga tongomana. Omaukwatya ge gane ga simanenena ogo uunongo, uuyuuki, oonkondo nohole. ‘Puye opu na uunongo.’ (Job 12:13) ‘Oondjila dhe adhihe dhu uka.’ (Deuteronomium 32:4) ‘Okoonkondo dhe odhindji.’ (Jesaja 40:26) ‘Kalunga oye ohole.’ (1 Johannes 4:8) Ihe momaukwatya gaKalunga gane ga simanenena, ouni mbela wa dhenga mbanda, mboka tau holola unene kutya oye Kalunga a tya ngiini?
“Kalunga oye ohole”
4. Kalunga okwi inyengithwa kuukwatya we uni a shite ewangandjo nosho wo iinima ayihe yi na omwenyo?
4 Dhiladhila shoka shi inyengitha Jehova a shite ewangandjo niishitwa iinandunge yopambepo nosho wo aantu. Osha li mbela uunongo we nenge oonkondo dhe? Hasho, molwashoka nonando Kalunga okwe yi longitha, hayo ya li oonkondo ndhoka dhe mu inyengitha. Nomolwuuyuuki we ka li a tegelelwa a pe aantu omagano gomwenyo. Pehala lyaashono, ohole ye onene oyo ye mu inyengitha opo a pe wo yalwe enyanyu lyokukala po ye li aantu aanandunge. Ohole oye mu inyengitha a kale nelalakano opo aantu aavuliki ya kale nomwenyo sigo aluhe mOparadisa. (Genesis 1:28; 2:15) Ohole oye mu inyengitha a ninge omalongekidho okukutha po epangulo ndyoka aantu ya pangulilwa omolwokuyona kwaAdam.
5. PaMbimbeli, Jehova oye uukwatya uni, nomolwashike?
5 Onkee ano ohole yaKalunga oyo ya dhenga mbanda momaukwatya ge agehe. Oyo naanaa uukwatya we wolela. Nonando uunongo we, uuyuuki we noonkondo dhe oya simana, Ombimbeli itayi ti nando kutya Jehova oye shimwe shomuyo. Ihe otayi ti kutya oye ohole. Dhoshili, Jehova oye mwene ohole. Ohole ndjoka itayi wilikwa komaiyuvo, ihe okomakotampango. Ohole yaKalunga ohayi wilikwa komakotampango goshili nogopauyuuki. Oyo ohole yoludhi lwa dhenga mbanda, ngaashi yu ulikwa kuJehova Kalunga. Ohole ya tya ngaaka oyi li euliko lya gwanenena lyokwaaihola mwene nohayi endele aluhe pamwe neuliko lyiilonga mbyoka tayi ulike ohole ndjoka.
6. Oshike tashi shi ningi tashi wapa opo tu holele Kalunga, nokuli nonando oku tu vule kokule?
6 Uukwatya mbuka uukumithi wohole owo hau tu vulitha tu holele Kalunga a tya ngaaka. Molwashoka otu li aantu yowala, inaatu gwanenena nohatu ningi omapuko nuupu, otashi vulika tu dhiladhile kutya itatu vulu nando oku shi pondola. Ihe mpaka opu na oshiholelwa shilwe shohole onene yaJehova: Oku shi omaunkundi getu noina tegelela tu kale twa gwanenena. Oku shi kutya ngashingeyi otu li kokule nokukala twa gwanenena. (Epsalmi 51:7) Osho molwashono Epsalmi 130:3, 4 tali ti: “Omuwa, ongoye ngele to kala nokudhimbulukwa oondjo, Omuwa, olye ta vulu okukala po? Ihe opungoye pu na edhiminopo.” Dhoshili, Jehova oku li “Kalunga omunamutimahenda nomunambili, omutalanteni gwokugeya, e na ohole.” (Eksodus 34:6) “Omuwa, ongoye omwaanawa nowa hala okudhima po oondjo.” (Epsalmi 86:5) Kashi hekeleka tuu! Kashi talaleka tuu okulongela Kalunga nguka omukumithi nokunyanyukilwa esiloshimpwiyu lye lyopahole nolyopahenda!
7. Ongiini ohole yaJehova tayi vulu okumonika miilonga ye yeshito?
7 Ohole yaJehova otayi vulu wo okumonika miilonga ye yeshito. Dhiladhila iinima oyindji iiwanawa mbyoka Jehova a shiti opo tu yi nyanyukilwe, ngaashi oondundu oombwanawa, iiheke, omatale nomanenefuta. Okwe tu pe iikulya yomaludhi gi ili nogi ili omakumithi opo tu nyanyukilwe omulyo gwayo noyi tu kaleke nomwenyo. Jehova okwa shiti wo oongala hadhi monika nawa nohadhi nika nawa dhomaludhi gi ili nogi ili nosho wo eshito ekumithi lyiinamwenyo. Okwa shiti iinima mbyoka opo yi nyanyudhe aantu, nokuli nonando kasha li sha pumbiwa e shi ninge. Dhoshili, itatu vulu okunyanyukilwa thiluthilu eshito lye, omanga tu li monkalo yetu yongashingeyi yokwaagwanenena muuyuni mbuka wa kolokosha. (Aaroma 8:22) Ihe dhiladhila owala kwaashoka Jehova te ke tu ningila mOparadisa! Omupsalmi ote tu shilipaleke ta ti: “To matula oshikaha shoye, to kutitha iinamwenyo ayihe kesilohenda.”—Epsalmi 145:16.
8. Oshiholelwa sha dhenga mbanda shohole yaJehova yoku tu hola oshini?
8 Oshiholelwa sha dhenga mbanda shohole yaJehova yokuhola aantu oshini? Ombimbeli otayi yelitha tayi ti: “Osho Kalunga kwa li e hole uuyuni, oye a gandja Epona lye, opo shaa ngoka e mu itaale, kaa kane, ihe a mone omwenyo gwaaluhe.” (Johannes 3:16) Mbela Jehova okwe shi ningi molwashoka aantu ye li nawa? Aaroma 5:8 otaya yamukula taya ti: “Kalunga okwe tu hololele ohole ye oku tu hola, Kristus sho kwa si peha lyetu, manga twa li aalunde.” Dhoshili, Kalunga okwa tumu Omwana a gwanenena kombanda yevi a gandje omwenyo gwe gu li iikulila oku tu kulila mokupangulilwa uulunde neso. (Mateus 20:28) Shoka oshe egululile aantu mboka ye hole Kalunga ondjila ya mone omwenyo gwaaluhe. Lagwenene, ohole yaKalunga ohayi ulikilwa ayehe mboka ya hala okulonga ehalo lye, molwashoka Ombimbeli otayi tu lombwele tayi ti: “Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, [nando] na kale ogwomoshigwana sha tya ngiini.”—Iilonga 10:34, 35, OB-1986.
9. Uushili kutya Jehova okwa gandja Omwana e li iikulila molwetu ou na oku tu nwetha mo ngiini?
9 Uushili kutya Jehova okwa gandja Omwana e li iikulila molwetu, nokungawo okwe tu egululile ondjila opo tu vule okumona omwenyo gwaaluhe, ou na okunwetha mo ngiini omukalo moka hatu longitha onkalamwenyo yetu pethimbo lyongashingeyi? Ou na okwiindjipaleka ohole yetu yokuhola Kalunga kashili, Jehova. Pethimbo opo tuu mpoka, ou na okupendutha mutse ehalo okukala twa hala okupulakena kuJesus, ngoka e lile po Kalunga. “[Jesus] okwa si peha lyaayehe, opo mboka ye na omwenyo, yaa ikalele we yo yene, aawe, oonguka tuu e ya sile.” (2 Aakorinto 5:15) Kashi nyanyudha tuu okulandula oshinkoti shaJesus, molwashoka ye okwa holele ohole nolukeno lwaJehova pamukalo gu shi okuholelwa! Shoka otashi imonikila mwaashoka Jesus a lombwele aaneifupipiko ta ti: “Ileni kungame amuhe hamu longo nomwa lolokithwa, ongame notandi mú pe evululuko. Itsikeni ondjoko yandje, ne mu ilonge ndje, oshoka ongame omunambili nomomutima ondi ishonopeka; notamu imonene oomwenyo dheni evululuko. Oshoka ondjoko yandje ombwanawa, nomutenge gwandje omupu.”—Mateus 11:28-30.
Ulikila yalwe ohole
10. Omomikalo dhimwe dhini tatu vulu okuulikila Aakriste ooyakwetu ohole?
10 Ongiini tatu vulu okuulika kutya otu hole Aakriste ooyakwetu nohole yoludhi ndoka Jehova naJesus ye tu hole nayo? Ndhindhilika omikalo odhindji moka tatu vulu oku shi ninga: “Ohole yi na ontalanteni, ohole yi na olukeno, ohole ihayi si efupa, ihayi itanga, ihayi tuwalala, ihayi holoka nayi, ihayi kongo shayo yene, ihayi lulu, ihayi dhimbulukwa ealulo lyuuwinayi, ihayi [nyanyukilwa] uugoyoki, aawe, ohayi nyanyukilwa pamwe noshili; ohayi siikile ayihe, oyi itaale ayihe, ohayi tegamene ayihe, ohayi idhidhimikile ayihe. Ohole kayi hulu po nando.”—1 Aakorinto 13:4-8; 1 Johannes 3:14-18; 4:7-12.
11. Oolye ishewe tu na okuulikila ohole nongiini?
11 Okoolye ishewe tu na okuulika ohole nongiini? Jesus okwa ti: “Indeni ano, ka ningeni aantu ayehe aalongwa yandje noku ya [ninginithila, NW] medhina lyaTate nolyOmwana nolyOmbepo Ondjapuki, noku ya longa okudhiginina ayihe nde yi mú lombwele.” (Mateus 28:19, 20) Shoka otashi ti kutya otu na okutseyithila mboka kaaye shi natango Aakriste ooyakwetu onkundana ombwanawa kombinga yuuyuni uupe waKalunga u li oparadisa mboka tau ya. Jesus oku ulike sha yela kutya ohole yetu kayi na okukala owala yi hole mboka yomeitaalo lyetu, oshoka okwa ti: “Ngele mu hole [owala] mboka, ye mú hole, omu na oku ka pewa ondjambi yashike? Naateloni ihaye shi ningi wo? Ngele hamu popitha aakweni ayeke, mu shi, ohamu ningi oshinima oshinene? Naapagani ihaye shi ningi wo?”—Mateus 5:46, 47; 24:14; Aagalati 6:10.
‘Kala nokweenda medhina lyaJehova’
12. Omolwashike Kalunga edhina lye oye owala lye eleka?
12 Omukalo gulwe natango gwa simana moka Kalunga kashili ta vulu okusimanekwa ogwo okutseya edhina lye lyi ikalekelwa, Jehova, noku li longitha, noku li longa yalwe. Omukwaniilwa David okwa popi ehalo ndika tali zi komutima ta ti: “Hambeleleni Jehova! Ithaneni pombanda edhina lye! Iilonga ye yi hokololeni naantu!” (1 Ondjalulahokololo 16:8) Edhina Jehova otali ti “Oha ningitha.” Ye Omunamalalakano Omunene, ha gwanitha aluhe omalalakano ge nomupondo. Kalunga kashili oye awike ta vulu okukala e na edhina ndyoka, molwashoka aantu itaya vulu nando okukala nuushili kutya oonkambadhala dhawo otadhi ke shi pondola. (Jakob 4:13, 14) Jehova oye awike ta vulu okupopya kutya oohapu dhe ‘otadhi gwanitha’ shoka e dhi shi tuminine. (Jesaja 55:11) Aantu oyendji ohaya kala ya nyanyukwa uuna taya mono oshikando shotango edhina lyaKalunga mOombimbeli dhawo nokwiilonga shoka tali ti. (Eksodus 15:3) Ihe otaya ka mona owala uuwanawa montseyo ndjoka ngele oya “kala nokweenda omedhina [lyaJehova, NW] aluhe.”—Mika 4:5.
13. Oshike sha kwatelwa mokutseya edhina lyaJehova nokweenda medhina lye?
13 Shi na ko nasha nedhina lyaKalunga, Epsalmi 9:11 otali ti: “Naamboka ya tseya edhina lyoye, taye ku inekele.” Shoka osha kwatela mo oshindji kaashi shi owala okutseya edhina Jehova, oshoka itashi ti kutya aantu oye na oku mu inekela owala ngeya. Okutseya edhina lyaKalunga otashi ti okuuva ko kutya Jehova oye Kalunga koludhi luni, okusimaneka oonkondopangelo dhe, okuvulika kiipango ye noku mu inekela miinima ayihe. (Omayeletumbulo 3:5, 6) Sha faathana, okweenda medhina lyaJehova otashi ti okukala we mu iyapulila noku mu kalela po u li gumwe gwomaalongeli ye, mokulongitha shili onkalamwenyo yetu metsokumwe nehalo lye. (Lukas 10:27) Oho shi ningi mbela?
14. Ngele otwa hala okulongela Jehova sigo aluhe, oshike twa pumbwa kakele kokukala tu uvite kutya oshi li oshinakugwanithwa shetu?
14 Ngele otwa hala okulongela Jehova sigo aluhe, katu na okwiinyengithwa owala keiyuvo kutya oshi li oshinakugwanithwa. Omuyapostoli Paulus okwa ladhipike Timoteus, ngoka a longela Jehova uule woomvula odhindji, a ti: ‘Iputudha mokutila Kalunga.’ (1 Timoteus 4:7) ‘Etilokalunga’ otali ulike kesimaneko enene okusimaneka Jehova. Otali ulike kekwatathano naye lyopahole molwoku mu tumbaleka noonkondo adhihe nosho wo oondjila dhe. Ohali tu inyengitha tu kale twa hala kehe gumwe a simaneke edhina lye. Otu na okukala netilokalunga monkalamwenyo yetu ngele otwa hala okukala tatu ende sigo aluhe medhina lyaJehova, Kalunga awike kashili.—Epsalmi 37:4; 2 Petrus 3:11.
15. Ongiini tatu vulu okwiigandjela Kalunga oye awike?
15 Opo tu longele Kalunga komukalo gwa taambwa ko, otu na oku mu longela oye awike, oshoka ye oku li ‘Kalunga e na uulaadhi,’ sha hala okutya, ta pula okwiigandjelwa oye awike. (Eksodus 20:5) Itatu vulu okukala tu hole Kalunga nopethimbo opo tuu mpono tatu kala tu hole uuyuni mbuka wa kolokosha, mboka Satana oye kalunga kawo. (Jakob 4:4; 1 Johannes 2:15-17) Jehova oku shi thiluthilu kutya kehe gumwe gwomutse ota kambadhala okukala omuntu gwoludhi lwa tya ngiini. (Jeremia 17:10) Ngele otu hole shili uuyuuki, oku shi wete note ke tu kwathela tu idhidhimikile omamakelo getu gesiku kehe. Moku tu ambidhidha nombepo ye ondjapuki yi na oonkondo, ote tu kwathele tu sinde uukolokoshi mboka wu udha muuyuni mbuka. (2 Aakorinto 4:7) Ote ke tu kwathela wo tu dhiginine etegameno lyetu lya kola lyomwenyo gwaaluhe moparadisa kombanda yevi. Kali shi tuu etegameno ekumithi! Otu na oku li pandula unene nokulongela nehalo ewanawa Kalunga kashili, Jehova, ngoka e li ninga tali wapa.
16. Oshike u na okukala wa hala okuninga pamwe nayalwe omamiliyona?
16 Aantu omamiliyona kombanda yevi alihe oya taamba ko nenyanyu ehiyo lyomupsalmi ngoka a nyola ta ti: “Tangeni Omuwa pamwe nangame, atuheni tu simanekeni edhina lye!” (Epsalmi 34:4) Jehova ote ku hiya u kale mokati komangathithi gaantu taga nenepala miigwana ayihe ngoka tage shi ningi.
Oonkundathana dhokweendulula
• Jehova omuntu gwoludhi lwa tya ngiini? Ongiini tatu mono uuwanawa mokuuva ko nawa omaukwatya ge?
• Ongiini tatu vulu okuulikila yalwe ohole?
• Oshike sha kwatelwa mokutseya edhina lyaJehova nokweenda medhina lye?
[Omathano pepandja 14]
Jehova, molwohole ye onene, ota ka ‘matula oshikaha she, e ta kutitha iinamwenyo ayihe kesilohenda’