Ontopolwa ontitano
Emanguluko ndyoka tali nyanyukilwa kaalongeli yaJehova
1, 2. (a) Emanguluko lyoludhi luni Kalunga a li a pa aaihokani yotango? (b) Tumbula dhimwe dhomoompango ndhoka dha li dha pangele iilonga yaAdam naEva.
SHO Jehova a shiti omulumentu nomukiintu gwotango, oya li ya nyanyukilwa emanguluko enene li vule emanguluko kehe ndyoka aantu ye na nena. Egumbo lyawo olya li Oparadisa, Oshikunino shaEden oshiwanawa. Kapwa li pu na omikithi okuyona po okunyanyukilwa kwawo onkalamwenyo, oshoka oya li ye na omadhiladhilo nomalutu ga gwanenena. Kaya li ye na okusa ngaashi hashi ningilwa kehe gumwe nena okuza kethimbo ndyono. Niishewe, kaya li omashinamuntu ihe oya li ye na omagano gemanguluko ekumithi okuninga omatokolo gawo yene. Ihe opo ya tsikile okunyanyukilwa emanguluko ekumithi lya tya ngaaka, oya li ye na okusimaneka oompango dhaKalunga.
2 Pashiholelwa, dhiladhila koompango dhopaunshitwe ndhoka Kalunga a toto po. Dhoshili, oompango ndhoka kadha li dha popiwa kondandalunde, ihe Adam naEva oya li ya shitwa komukalo ngoka tagu ya ningitha ya vulike lela kudho. Ngele ya sa ondjala oya li ye na okulya; ngele ya sa enota oya li ye na okunwa; etango ngele lya ningine oya li ye na oku ka kotha. Jehova okwa li wo e ya pe iilonga. Muushili wo wene, iilonga mbyoka oya li ompango molwashoka oya li tayi ka pangela oonkatu dhawo. Oya li ye na okumona aanona, okupangela iinamwenyo yomaludhi agehe kombanda yevi nokutamununa mo oongamba dhOparadisa sigo tayi mana ko evi alihe. (Genesis 1:28; 2:15) Ompango ndjoka kaya li tuu yombili nombwanawa! Oya li ye ya pe iilonga mbyoka tayi ya mbilipaleke lela notayi ya vulitha okulongitha oshitalenti shawo thiluthilu momikalo dhi na oshilonga. Oya li wo ye na emanguluko olindji okuninga omatokolo ge na ko nasha nankene ye na okulonga iilonga yawo. Mbela opwa li sha shoka ya li ya pumbwa natango?
3. Adam naEva oya li ya vulu ngiini okwiilonga okulongitha noondunge emanguluko lyawo okuninga omatokolo?
3 Dhoshili, sho Adam naEva ya li ya pewa uuthembahenda wokuninga omatokolo, shoka kasha li tashi ti kutya etokolo kehe ya li taya ningi otali ke eta iizemo iiwanawa. Emanguluko lyawo okuninga omatokolo oya li ye na oku li longitha meni lyomangambeko goompango nomakotampango gaKalunga. Mbela mbika ongiini ya li taya vulu oku yi ilonga? Omokupulakena kOmushiti gwawo nomokukonakona iilonga ye. Kalunga okwa pe Adam naEva oondunge ndhoka dha li dha pumbiwa okutula miilonga shoka yi ilongo. Molwashoka oya li ya shitwa ya gwanenena, egamo lyawo lyopaunshitwe olya li tali ku ulika omaukwatya ga fa gaKalunga uuna taya ningi omatokolo. Dhoshili, oya li ye na oku shi ninga ngele oya pandula shili shoka Kalunga e ya ningile noya hala oku mu nyanyudha.—Genesis 1:26, 27; Johannes 8:29.
4. (a) Elombwelo ndyono lya li lya pewa Adam naEva kaaya lye oshiyimati shokomuti gumwe olya li mbela lye yi imbi okukala ya manguluka? (b) Omolwashike shika sha li oshitegelelwa she eleka?
4 Onkee ano osha li shu uka sho Kalunga a tokola okumakela eigandjo lyawo kuye e li Omugandji gwomwenyo gwawo nosho wo ehalo lyawo okukala meni lyomangambeko ngoka e yu uthila. Jehova okwa pe Adam elombwelo ndika tali ti: “Lya komiti adhihe dhoParadisa, ngashika wa hala; omuti ngwiyaka agwike gwokudhimbulula uuwanawa nuuwinayi ino gu lya, oshoka shimpa to gu li, u na okusa.” (Genesis 2:16, 17) Konima sho Eva a shitwa, naye wo okwa li a lombwelwa ompango ndjoka. (Genesis 3:2, 3) Mbela okukala ya ngambekwa huka okwa li kwe yi imbi ya kale ya manguluka? Hasho nandonando. Oya li ye na iikulya oyindji iitoye yomaludhi agehe yokulya nopwaahe na okulya oshiyimati shokomuti ngoka gwi indikwa. (Genesis 2:8, 9) Osha li ano she eleka sho ya li ye na okuzimina kutya evi olyaKalunga, molwashoka oye e li shiti. Onkee ano, Kalunga oku na uuthemba okuninga oompango ndhoka tadhi tsu kumwe nelalakano lye naandhoka tadhi etele aantu uuwanawa.—Epsalmi 24:1, 10.
5. (a) Adam naEva oya kanitha ngiini emanguluko lyawo lya dhenga mbanda ndyoka ya li ye na? (b) Oshike sha pingena po emanguluko ndyoka Adam naEva ya li ye na, nongiini twa gumwa kusho?
5 Ihe mbela oshike sha ningwa po? Mokwiinyengithwa kelalakano lyokwiihola mwene, omuyengeli gumwe okwa longitha nayi emanguluko lye lyokuninga omatokolo nokwa ningi Satana, ndyoka tali ti “Omupataneki.” Okwa pukitha Eva moku mu shilipalekela sha shoka tashi kondjithathana nehalo lyaKalunga. (Genesis 3:4, 5) Adam okwa yono wo ompango yaKalunga ngaashi Eva. Molwashoka oya kutha sha shoka kaashi shi shawo, oya kanitha emanguluko lyawo lya dhenga mbanda. Uulunde owe ya pangele, nongaashi Kalunga e ya londodha, lwahugunina eso olya landula ko. Uuthiga mboka ya pe aanona yawo owa li uulunde—mboka tau ulikwa kegamo ndyoka ya valwa nalyo lyokuninga omapuko. Uulunde owe eta wo uunkundi mboka hau etitha omikithi, uukulupe neso. Egamo lyokuninga omapuko ndyoka lya nayipikwa kenwethomo lyaSatana, olye eta po uulipamwe waantu u na ondjokonona yuutondwe, omuyonena, ethininiko niita mbyoka ya dhipaga aantu omamiliyona ogendji. Itashi kondjithathana tuu nemanguluko ndyoka Kalunga a li a pe aantu petameko!—Deuteronomium 32:4, 5; Job 14:1, 2; Aaroma 5:12; Ehololo 12:9.
Mpoka emanguluko tali vulu okwaadhika
6. (a) Openi tapu vulu okwaadhika emanguluko lyashili? (b) Jesus okwa popi kombinga yemanguluko lyoludhi luni?
6 Mokutala koonkalo oombwinayi ndhoka dhi li shaampono nena, itashi kumitha nando sho aantu ya hala emanguluko olindji. Ihe emanguluko lyashili openi tali vulu okwaadhika? Jesus okwa ti: “Ngele tamu kala moohapu dhandje, one aalongwa yandje shili; notamu ka tseya ihe oshili, noshili otayi mú mangulula.” (Johannes 8:31, 32) Emanguluko ndyoka kali shi lyoludhi ndoka aantu haya kala ya hala ngele taye ekelehi omupangeli gumwe nenge oludhi lumwe lwepangelo molwashoka ya hokwa lilwe. Pehala lyaashono, ndyoka olyo emanguluko ndyoka tali ungaunga naashoka hashi eta lelalela omaupyakadhi gaantu. Shoka Jesus a li ta kundathana osha li emanguluko okumangululwa moomango dhuulunde. (Johannes 8:24, 34-36) Onkee ano ngele omuntu ta ningi omulongwa gwashili gwaJesus Kristus, oha mono elunduluko endhindhilikwedhi monkalamwenyo ye, sha hala okutya, emanguluko!
7. (a) Omondunge yini tatu vulu okukala twa manguluka kuulunde methimbo lyongashingeyi? (b) Opo tu kale twa manguluka ko kuulunde otu na okuninga shike?
7 Shoka itashi ti kutya Aakriste yashili yonena ihaya adhika we kiilanduliko yegamo ndyoka ya valwa nalyo lyokulonga uulunde. Molwashoka oya thigulula uulunde, oye li natango taye u kondjitha. (Aaroma 7:21-25) Ihe ngele omuntu oha kala shili metsokumwe nomalongo gaJesus, ita ka kala we omupika gwuulunde. Uulunde itau ke mu pangela we wa fa kayamukulwa ngoka he mu pe omalombwelo kutya oku na okuvulika kugo nopwaahe na okudhiladhila. Ita ka ya monkalamwenyo ndyoka kaayi na elalakano notayi mu thigi e na eiyuvo ewinayi. Ota ka kala e na eiyuvo lya yela koshipala shaKalunga molwashoka omayono ngoka a ninga nale oga dhimwa po molweitaalo lye meyambo lyaKristus. Omagamo guulunde otashi vulika ga kambadhale oku mu pangela, ihe ngele ta tindi okwiigandja kugo molwashoka omalongo ga yela gaKristus ote ga dhimbulukwa, otu ulike kutya ita pangelwa we kuulunde.—Aaroma 6:12-17.
8. (a) Omamanguluko geni elongelokalunga lyashili lyopaKriste tali tu pe? (b) Otu na okukala tu na iikala ya tya ngiini shi na ko nasha naapangeli?
8 Dhiladhila omamanguluko ngoka tu na tu li Aakriste. Otwa manguluka ko kiilanduliko yomalongo giifundja, muupika wiidhila nowuulunde. Ooshili oonkumithi kombinga yonkalo yoonakusa noyeyumuko odhe tu mangulula kuumbanda waahe li pandunge wokutila eso. Ontseyo okutseya kutya omapangelo gaantu inaaya gwanenena masiku otaga ka pingenwa po kUukwaniilwa waKalunga u li pauyuuki otayi tu mangulula kokukala twaahe na etegameno. (Daniel 2:44, KB; Mateus 6:10, KB) Ihe emanguluko ndyoka itali yukipalitha okwaahasimaneka aapangeli nosho wo oompango dhawo.—Titus 3:1, 2; 1 Petrus 2:16, 17.
9. (a) Jehova ohe tu kwathele ngiini pahole tu nyanyukilwe emanguluko enene ndyoka li li tali wapa methimbo lyongashingeyi kaantu? (b) Ongiini tatu vulu okuninga omatokolo gopandunge?
9 Jehova ihe etha tu mone omukalo ngoka gu li dhingi nokukala okupitila momapuko getu. Okwa tseya nkene twa shitwa, shoka tashi tu etele egwaneno lyashili, naashoka tashi tu etele uuwanawa tau kalelele. Okwa tseya omadhiladhilo neihumbato mbyoka tayi vulu okuyona po ekwatathano lyomuntu naYe nosho wo naantu ooyakwawo notashi vulika nokuli yi tu imbe tu ye muuyuni uupe. Jehova ohe tu longo nohole iinima ayihe mbyoka okupitila mOmbimbeli nomehangano lye li wetike. (Markus 13:10; Aagalati 5:19-23; 1 Timoteus 1:12, 13) Onkee ano, oshi li oshinakugwanithwa shetu okulongitha emanguluko lyetu ndyoka twa pewa kuKalunga okutokola nkene tatu ki inyenga. Mepingathano naashono Adam a ningi, ngele otwa pulakene shoka Ombimbeli tayi tu lombwele, otatu ka ninga omatokolo gopandunge. Otatu ku ulika kutya ekwatathano lyetu ewanawa naJehova olyo oshinima sha simana noonkondo monkalamwenyo yetu.
Aantu yamwe oya hala emanguluko lyoludhi lulwe
10. Emanguluko lyoludhi luni aantu yamwe mboka ye li Oonzapo dhaJehova ya konga?
10 Omathimbo gamwe aagundjuka yamwe mboka ye li Oonzapo dhaJehova—nayalwe mboka kaaye shi we aagundjuka—otashi vulika taya dhiladhila kutya oya hala emanguluko lyoludhi lulwe. Uuyuni otashi vulika tau monika nawa kuyo, naampoka pu thike taya dhiladhila unene kuwo, opo wo ngaa pu thike ehalo lyawo tali ningi enene okuninga iinima mbyoka kaayi shi yopaKriste mbyoka yi holike muuyuni. Aantu ya tya ngaaka otashi vulika kaaye na edhiladhilo lyokulongitha iingangamithi, okunwa sha pitilila nenge okuhondela. Ihe ohaya tameke okweendathana naantu mboka kaaye shi Aakriste yashili, ye na ehalo lyokutaambwa ko kuyo. Otashi vulika ya tameke nokuli okuholela okupopya kwawo neihumbato lyawo.—3 Johannes 11.
11. Omathimbo gamwe emakelo okuninga epuko ohali zi peni?
11 Omathimbo gamwe emakelo u kuthe ombinga meihumbato kaali shi lyopaKriste ohali zi kugumwe ngoka ta ti kutya ota longele Jehova. Shoka osha li wo sha ningilwa Aakriste yamwe yonale, notashi vulu wo okuningwa methimbo lyetu. Olundji aantu ya tya ngaaka ohaya kala ya hala okuninga iinima mbyoka taya dhiladhila kutya otayi ke ye etela enyanyu, ihe iinima mbyoka otayi kondjithathana noompango dhaKalunga. Ohaya ladhipike yalwe ya kale tayi “inyanyudha” kashona. Ohayu ‘uvaneke emanguluko, nonando oyo aapika yeyonuko.’—2 Petrus 2:19, yelekanitha OB-1986.
12. Iizemo yinikitha oluhodhi yeihumbato tayi kondjithathana noompango dhaKalunga nomakotampango ge oyini?
12 Iiyimati yaashoka haku tiwa aniwa emanguluko aluhe oyi na oshizemo oshiwinayi, molwashoka otayi pula omuntu a yone oompango dhaKalunga. Pashiholelwa, oluhondelo otalu vulu okweeta uudhigu wopamaiyuvo, omikithi, eso, omategelelo inaaga halika nokuteka po kwondjokana. (1 Aakorinto 6:18; 1 Aatessalonika 4:3-8) Okulongitha nayi iingangamithi otaku vulu okweeta okukala ho geye nziya, okupopya inaaku yela, okwaamona ko nawa, etelele, okwaafudha nawa, okuninga omahaluhalu neso. Otayi vulu okuninga omuntu a kale a pikwa kuyo, shoka tashi vulu oku mu fala mokulonga omuyonena opo a yambidhidhe omukalondjigilile ngoka. Okulongitha nayi iikolitha ohaku zi iilanduliko ya faathana. (Omayeletumbulo 23:29-35) Mboka hayi ihumbata ngawo otashi vulika taya dhiladhila kutya oya manguluka, ihe ohaye ke shi mona pwa pita ethimbo ele noonkondo kutya oya ninga aapika yuulunde. Nuulunde kau shi tuu omupangeli e na onyanya! Ngele tatu tompathana ngashingeyi shi na ko nasha noshinima shoka, otashi vulu oku tu kwathela kaatu mone oshimoniwa sha tya ngaaka.—Aagalati 6:7, 8.
Mpoka omaupyakadhi haga tameke
13. (a) Ongiini mbela ehalo ndyoka olundji hali eta uupyakadhi hali penduthwa? (b) Ngele otwa hala okuuva ko kutya “ookuume aawinayi” oyo oolye, otwa pumbwa okukala tu na etaloko lyalye? (c) Tsa omuthindo etaloko lyaJehova sho to yamukula omapulo ngono ge li mokatendo 13.
13 Dhiladhila kutya omaupyakadhi olundji ohaga tameke peni. Ombimbeli otayi yelitha tayi ti: “Okehe tuu ta hindwa kokahalu ke mwene, oko take mu hili notake mu hongolola; nokahalu nge ka ningi okasimba, otaka vala uulunde, nuulunde nge wa koko, otau vala eso.” (Jakob 1:14, 15) Okahalu ohaka penduthwa ngiini? Ohaka penduthwa kwaashoka tashi yi momadhiladhilo. Olundji shoka ohashi zi mokuninga ekwatathano naantu mboka ihaaya tula miilonga omakotampango gOmbimbeli. Dhoshili, atuheni otu shi kutya otu na okuyanda “ookuume aawinayi.” (1 Aakorinto 15:33) Ihe mbela ookuume aawinayi oyo oolye? Mbela Jehova ohe shi tala ko ngiini? Ngele tatu tompathana shi na ko nasha nomapulo taga landula nokulesha omanyolo ngoka ga gandjwa ihe inaga tothwa mo, otashi ke tu kwathela tu thike pehulithodhiladhilo li li mondjila.
Mbela uushili kutya aantu yontumba mboka haya monika ya fa ye shi okusimanekwa otau ulike kutya yo oye li ookuume aawanawa? (Genesis 34:1, 2, 18, 19)
Mbela okupopya kwawo notashi vulika omashendjo gawo otayi ulike kutya otu na okweendathana nayo nenge hasho? (Aaefeso 5:3, 4)
Mbela Jehova ota ka kala e uvite ngiini ngele tatu ningi ekwatathano lyopothingo naantu mboka kaaye mu hole? (2 Ondjalulahokololo 19:1, 2)
Mbela omolwashike twa pumbwa okukala twa takamitha ngele ohatu longo nenge ohatu yi kosikola pamwe naantu mboka kaaye shi yeitaalo lyetu? (1 Petrus 4:3, 4)
Okutala oTV nookino, okulongitha oInternet, nokulesha omambo, iifo odho omikalo moka hatu endathana nayalwe. Iinima yini okuza moonzo ndhoka tu na okukala twa kotokela? (Omayeletumbulo 3:31; Jesaja 8:19; Aaefeso 4:17-19)
Mbela okuhogolola kwetu ookuume otaku lombwele Jehova kutya tse aantu ya tya ngiini? (Epsalmi 26:1, 4, 5; 97:10)
14. Emanguluko enene lini lya tegelelwa kwaamboka taya longitha ngashingeyi nuudhiginini omayele gomOohapu dhaKalunga?
14 Komeho yetu oku na uuyuni uupe waKalunga mboka u li pokuya. Okupitila mepangelo lyUukwaniilwa waKalunga womegulu, aantu otaya ka manguluka kenwethomo lyaSatana nokonkalelo ye ayihe yiinima yuukolokoshi. Kashona nakashona, aantu aavuliki otaya ka mangululwa kiilanduliko ayihe yuulunde, shoka tashi ke etitha egwaneneno lyopamadhiladhilo nolyopalutu opo tu vule okunyanyukilwa omwenyo gwaaluhe mOparadisa. Lwahugunina eshito alihe otali ka nyanyukilwa emanguluko ndyoka tali tsu kumwe thiluthilu ‘nOmbepo yOmuwa.’ (2 Aakorinto 3:17) Mbela oshi li ngaa pandunge okwiitula moshiponga shokukanitha ayihe mbyoka molwokudhina omayele gomOohapu dhaKalunga ngashingeyi? Atuheni natu ulikeni sha yela kutya otwa hala shili ‘emanguluko lyeadhimo lyaana yaKalunga’ mokulongitha noondunge emanguluko lyetu lyopaKriste methimbo lyongashingeyi.—Aaroma 8:21.
Oonkundathana dhokweendulula
• Emanguluko lyoludhi luni aaihokani yotango ya li ya nyanyukilwa? Shika otashi yelekanithwa ngiini naashoka aantu taya mono ngashingeyi?
• Aakriste yashili oye na emanguluko lini? Olya yooloka ko ngiini kwaashoka uuyuni wa tala ko shi li emanguluko?
• Omolwashike sha simana noonkondo okuyanda ookuume aawinayi? Mepingathano naashono Adam a ningi, omatokolo galye hatu taamba ko ge na ko nasha naashoka oshiwinayi?
[Omathano pepandja 46]
Oohapu dhaKalunga otadhi londodha tadhi ti: “Inamu puka. Ookuume aawinayi otaa yonagula omikalo omiwanawa”