Natu etheni tu longwe emanguluko lyashili kuJehova
‘Italela mompango ya gwanenena yokumangulula.’—JAK. 1:25.
OTO VULU OKUYELITHA?
Ompango yini tayi tu fala memanguluko lyashili, noolye taya mono uuwanawa muyo?
Otu na okuninga shike ngele otwa hala okukala twa manguluka shili?
Ayehe mboka ye li mondjila ndjoka tayi fala komwenyo oya tegelela emanguluko lini?
1, 2. (a) Oshike sha ningwa po shi na ko nasha nemanguluko lyaantu muuyuni, nomolwashike? (b) Aapiya yaJehova oya tegelela emanguluko lini?
OLWIHO, okwaanompango nosho wo elongithonkondo otayi ende tayi indjipala pethimbo lyetu. (2 Tim. 3:1-5) Shoka osha ningitha omapangelo ga tote po oompango dha gwedhwa po nokukuta aapolisi oyendji nosho wo okutula po omathano gokutala shoka aantu taya ningi. Aantu miilongo yimwe, momagumbo gawo oya tula mo ooalarma, omakumba ga gwedhwa po noondhalate dholusheno, opo aniwa ya kale megameno. Aantu oyendji kunena ihaye ende we kwa wiwila nenge ye ethe oyana ya ka dhane oyo ayeke kutya nduno omutenya nenge uusiku. Oshoshili kutya aantu oyendji inaya manguluka, nonkalo otayi ende yu uka kuuwinayi.
2 Satana okwa li a fundju moshikunino shaEden sho a ti kutya aantu otaya ka kala owala nombili ngele tayi iwilike yo yene. Shoka iifundja yo yeneyene. Oshigwana ashihe otashi mono iihuna, molwaashoka aantu oye ekelehi iipango mbyoka ya tulwa po kuKalunga notaya ningi shoka ya hala. Oshinima shoka oshiwinayi oshe tu guma wo tu li aapiya yaKalunga. Kakele kaashono, otu na etegameno kutya eshito alihe otali ka mangululwa muupika wuulunde noweyonuuko, naantu otaya ka nyanyukilwa ‘emanguluko neadhimo lyaana yaKalunga’ ndyoka tali popiwa mOmbiimbeli. (Rom. 8:21) Jehova ota longekidhile nokuli nale aapiya ye emanguluko ndyoka. Ngiini mbela?
3. Ompango yini Jehova a pa aalanduli yaKristus, nepulo lini tatu ka kundathaneni?
3 Jakob okwa nyola nkene Jehova ta longekidhile aapiya ye emanguluko sho e ya pe ‘ompango ya gwanenena yoku ya mangulula.’ (Lesha Jakob 1:25.) Uutumbulilo mboka mo-The New English Bible owa tolokwa “ompango ndjoka hayi tu mangulula,” mo-The New American Bible owa tolokwa “ompango ya gwanenena yemanguluko.” Aantu yamwe ohaya ti kutya ompango ohayi ya ngambeke, pehala lyoku ya mangulula. Ano ‘ompango ya gwanenena yoku tu mangulula’ oshike? Ohayi tu mangulula ngiini?
OMPANGO NDJOKA HAYI TU MANGULULA
4. ‘Ompango ya gwanenena yokumangulula’ oshike, noolye haya mono uuwanawa muyo?
4 ‘Ompango ya gwanenena yokumangulula’ kayi shi Ompango ndjoka ya li ya pewa Moses, molwaashoka yo oya li owala yu ulukile aantu kutya uulunde oshike noya li ya gwanithilwa muKristus. (Mat. 5:17; Gal. 3:19) Ano Jakob okwa li ta popi ompango yini? Okwa li ta popi “ompango yaKristus” ndjoka hayi ithanwa wo ‘ompango yeitaalo’ nosho wo ‘ompango ndjoka tayi mangulula.’ (Gal. 6:2; Rom. 3:27; Jak. 2:12) Onkee ano, ‘ompango ya gwanenena’ oya kwatela mo oshinima kehe shoka Jehova a tegelela kutse. Aakriste aagwayekwa nosho wo ‘oonzi dhilwe’ ohaya mono uuwanawa mompango ndjoka.—Joh. 10:16.
5. Omolwashike ompango ya gwanenena kaayi li omutenge?
5 ‘Ompango ya gwanenena’ oya yooloka ko koompango dhomiilongo oyindji. Inayi kitakana nokayi shi omutenge kaantu. Oya thikama po miipango iipu nomomakotampango ga yela nawa. (1 Joh. 5:3) Jesus okwa ti: “Ondjoko yandje ombwanawa, nomutenge gwandje omupu.” (Mat. 11:29, 30) Shimwe ishewe, ‘ompango ya gwanenena’ kayi na omusholondondo omule gwoondjindikila nenge gwomageelo. Oya kankamena kohole noya nyolelwa momadhiladhilo nomomitima dhaantu, ihe hakomamanya.—Lesha Aahebeli 8:6, 10.
NKENE ‘OMPANGO YA GWANENENA’ HAYI TU MANGULULA
6, 7. Oshike tatu vulu okutya shi na ko nasha nomithikampango dhaJehova, nompango yemanguluko ohayi tu kwathele tu ninge shike?
6 Jehova okwa tulila po aantu iipango omolwuuwanawa negameno lyawo. Pashiholelwa, dhiladhila owala koompango dhopaunshitwe ndhoka hadhi tu wilike. Aantu ihaya kala ya yemata nenge ye wete taya thiminikwa kudho. Pehala lyaashono, ohayi iyutha kudho noye shi kutya odhi li po omolwuuwanawa wawo. Sha faathana, iipango yaKalunga mbyoka tayi adhika ‘mompango ya gwanenena’ yaKristus oyi li po omolwuuwanawa wetu.
7 Shimwe ishewe, ompango yemanguluko ohayi tu kwathele tu gwanithe po omahalo getu gu uka nopwaa na okwiiyehameka nenge tu yone po uuthemba wayalwe nemanguluko lyawo. Onkee ano, ngele otwa hala okukala twa manguluka shili, otu na okukokeka iikala iiwanawa mbyoka yi li metsokumwe nomaukwatya gaJehova nosho wo nomithikampango dhe, ihe hakuninga shoka twa hala. Niitya yimwe, otu na okukala tu hole shoka Jehova e hole nokutonda shoka e tonde. Ompango yemanguluko ohayi tu kwathele tu shi ninge.—Amos 5:15.
8, 9. Mboka haya vulika kompango yemanguluko ohaya mono uuwanawa wuni? Gandja oshiholelwa.
8 Molwaashoka inatu gwanenena, oshidhigu okukondjitha omahalo getu ga puka. Ihe ngele tatu vulika kompango yemanguluko nuudhiginini, otatu vulu okukala twa manguluka nokuli ngashingeyi. Pashiholelwa, omulumentu gwedhina Jay sho a tameke okukonakona Ombiimbeli okwa adhika a pikwa nale komakaya. Sho i ilongo kutya Jehova ina hokwa okuhila omakaya, okwa li a tokola okuninga po sha. Mbela ota ka tsikila nokuvulika kokahalu ke nenge okuJehova? Okwa li a ningi etokolo lyopandunge a longele Jehova, nonando okwa li a pikwa noonkondo. Mbela okwa li u uvite ngiini sho e ge etha? Okwa ti: “Onda li ndu uvite nda manguluka nonda nyanyukwa noonkondo.”
9 Jay okwe shi mona kutya aantu oya pikwa kemanguluko lyuuyuni ndyoka hali ya ningitha ya ‘dhiladhile ngaashi ya hala. Ihe Jehova oha gandja emanguluko ndyoka li li ‘ewiliko lyombepo’ notali tu etele “omwenyo nombili.” (Rom. 8:5, 6) Olye a kwathele Jay a manguluke muupika wokuhila omakaya? OJehova Kalunga. Jay okwa ti: “Onda kala handi konakona Ombiimbeli aluhe nokupula ombepo ondjapuki megalikano. Uuna tandi pewa ekwatho lyopahole okupitila megongalo lyopaKriste, onda kala handi li taamba.” Iinima mbyoka natse otayi vulu oku tu kwathela atuhe tu mone emanguluko lya shili. Natu tale nkene tatu vulu oku shi ninga.
ITALELA MOOHAPU DHAKALUNGA
10. ‘Okwiitalela’ mompango yaKalunga otashi ti shike?
10 Jakob 1:25 ota ti: ‘Ngoka ti italele mompango ya gwanenena yemangululo note yi pulakene oye ota yambekwa moku shi ninga.’ Oshitya shOshigreka shoka sha tolokwa ‘italela’ otashi ti “okunyongama wu tale nawa moshinima shontumba.” Shoka otashi pula wu ninge oonkambadhala. Ngele otwa hala ompango yemanguluko yi nwethe mo omadhiladhilo nomitima dhetu, otu na okukonakona Ombiimbeli twa mana mo nokutedhatedha pamwe negalikano kwaashoka tatu lesha.—1 Tim. 4:15.
11, 12. (a) Jesus okwa popi shike shoka tashi ulike kutya otwa pumbwa okuninga oshili yetu yene? (b) Aagundjuka oye na okuyanda oshiponga shini?
11 Otu na ‘okupulakena,’ nokutula miilonga Oohapu dhaKalunga. Kungawo, otatu ningi oshili yetu yene. Jesus okwa li a popi oohapu dha fa ndhoka sho a lombwele mboka ye mu itaala a ti: ‘Ngele tamu vulika koohapu dhandje, nena kapu na omalimbililo, one aalongwa yandje. One otamu ka tseya oshili, noshili otayi ke mú mangulula.’ (Joh. 8:31, 32) Embo limwe otali ti kutya oshitya “tseya” otashi ti wo okukala wu na olupandu, molwaashoka “oshinima shoka wa ‘tseya’ oshi na ongushu nenge sha simana kungoye.” Onkee ano, oshili otatu yi “tseya” owala nawa ngele tatu yi ningi yetu yene. Uuna twe shi ningi otatu ka vula okupopya twa manguluka kutya “oohapu dhaKalunga” otadhi “longo” mutse notadhi tu zula tu kale twa fa Tate yetu gwomegulu.—1 Tes. 2:13.
12 Ipula to ti: ‘Oshili ondi yi shi ngaa lela? Onde yi ninga ngaa yandje mwene? Nenge onda hala natango “emanguluko” lyomuuyuni?’ Omumwameme gumwe ngoka a putudhwa kaavali Aakriste okwa popi kombinga yonkalamwenyo ye sho a li omugundjuka. Okwa nyola a ti: “Ngele owa kokele moshili Jehova oha kala aluhe e li pamwe nangoye. Ihe ngame inandi kala nando ndi mu shi lela. Inandi kala nando ndi tonde iinima mbyoka e tonde. Kanda li ndi itaala kutya shoka tandi ningi otashi mu uvitha nayi. Kanda li nando handi pula ekwatho kuye ngele ndi li muupyakadhi. Onda li ndi inekela moondunge dhandje mwene nonde ke shi mona kutya osha li sha nika uusama nosha puka lela, molwaashoka kandi na shoka ndi shi.” Lago enene, omumwameme nguka okwa ningi omalunduluko omanene monkalamwenyo ye. Lwanima, okwa ningi nokuli omukokolindjila gwondjigilile.
OMBEPO ONDJAPUKI OTAYI VULU OKU TU MANGULULA
13. Ombepo ondjapuki yaKalunga hayi tu kwathele ngiini tu kale twa manguluka?
13 Aakorinto aatiyali 3:17 otaya ti: ‘Mpoka pu na ombepo yOmuwa, opu na emanguluko.’ Ombepo ondjapuki ohayi tu kwathele ngiini tu kale twa manguluka? Ohayi tu kwathele tu kale tu na omaukwatya ga simanenena gemanguluko ngaashi: “Ohole, enyanyu, ombili, eidhidhimiko, uukuume, uuwanawa, okukala omwiinekelwa, eifupipiko, neikwato nawa.” (Gal. 5:22, 23) Ngele katu na omaukwatya ngoka unene tuu ohole, itatu kala twa manguluka shili. Oshinima shoka oshi iwetikile muuyuni kunena. Omuyapostoli Paulus sho a popi iiyimati yombepo okwa gwedha ko a ti: “Kaku na nando ompango ya tsa ondumbo niinima mbika.” Okwa li a hala okutya shike? Okwa li a hala okutya kapu na ompango ndjoka tayi vulu okwiimba iiyimati yombepo yaKalunga yi koke. (Gal. 5:18) Jehova okwa hala tu ninge shike niiyimati yombepo? Okwa hala tu kale tu na aluhe omaukwatya ga fa gaKristus noku gu ulika ethimbo alihe.
14. Ombepo yuuyuni ohayi piki ngiini aantu mboka tayi igandja kuyo?
14 Mboka ya pikwa kombepo yuuyuni nosho wo mboka haya gwanitha po uuhalu wawo wopalutu ohaya dhiladhila kutya oya manguluka. (Lesha 2 Petrus 2:18, 19.) Ihe uushili owo kutya oye li aapika yuuhalu wawo. Oya pumbwa oompango odhindjidhindji nomauthompango, opo ya vule okupangela uuhalu nomahalo gawo. Paulus okwa ti: “Oompango ihadhi ningilwa aantu mboka haa longo uuwanawa, ihe aayoni naakolokoshi.” (1 Tim. 1:9, 10) Oye li wo aapika yuulunde, notaya pangelwa ‘kiilonga yuuhalu womalutu gawo.’ (Ef. 2:1-3) Oya fa uudhidhi wu uka mokayaha komagadhi goonyushi e tawu kakatele mo. Aantu ya tya ngaka ohaya hilwa kuuhalu wawo wuulunde omolwomahalo gawo yene.—Jak. 1:14, 15.
MBOKA YE LI MEGONGALO LYOPAKRISTE OYA MANGULUKA
15, 16. Okugongala okwa simana shi thike peni, nemanguluko lini hatu kala tu na uuna tu li po?
15 Uuna wa tameke okukala pokugongala kwopaKriste, kala wu shi kutya okugongala hoka okwa simana. Jehova oye e ku eta ko. (Joh. 6:44) Oshike she mu inyengitha e shi ninge? Mbela omolwaashoka wu li omuyuuki noho mu tila? Hasho nando. Oshike nduno a mono mungoye? Okwa mono kutya owu na ehalo lyokuvulika kompango ye yemanguluko nokewiliko lye. Jehova oha palutha omutima gwoye niikulya yopambepo megongalo, okwe ku mangulula muupika womalongelokalunga giifundja, kiidhila nokwe ku longa okukala nomaukwatya ga fa gaKristus. (Lesha Aaefeso 4:22-24.) Owu na uuthembahenda wokukala gumwe gwomwaamboka ya ‘mangululwa kompango’ muuyuni auhe.—Jak. 2:12.
16 Mbela oho kala wa tila ngele wu li mokugongala pamwe naantu mboka haya tila Jehova nomutima aguhe? Oho kala mbela to lengalenga mbali lwaali? Ngele to popi nagumwe pOshinyanga shUukwaniilwa, oho kala to tala mbalilwali kiinima yoye, molwaashoka wa tila yi yakwe po? Osha pumba lela. Oho kala wu uvite wu li megameno nowa manguluka. Mbela oto ka kala ngaa wu uvite ngawo uuna wu li mongundu yaantu yomuuyuni? Hasho naanaa. Emanguluko ndyoka ho kala wu na ngele wu li naapiya yaKalunga, itali adha mwaandyoka twa tegelela monakuyiwa.
‘EMANGULUKO NEADHIMO LYAANA YAKALUNGA’
17. Emanguluko lyaantu olya pambathana ngiini ‘neholoko lyaana yaKalunga?’
17 Paulus okwa nyola kombinga yemanguluko ndyoka Jehova ta ka pa aapiya ye yokombanda yevi a ti: “Kehe shoka shomeshito otashi tegelele nondjuulukwe onene eholoko lyaana yaKalunga.” Okwa gwedhwa ko a ti: “Oku na esiku ndyoka, uuna eshito alihe tali ka manguluka muupika weyonuuko, li ye memanguluko nomeadhimo lyaana yaKalunga.” (Rom. 8:19-21) Oshitya “eshito” movelise ndjika otashi thaneke aantu mboka ye na etegameno lyoku ka kala nomwenyo kombanda yevi. Otaya ka mona uuwanawa ‘peholoko lyaana yaKalunga,’ sha hala okutya, aagwayekwa. Eholoko “lyaana yaKalunga” ohali tameke uuna taya yumudhilwa omwenyo gwomegulu, opo ya ka kwathele Kristus sho te ya okukomba uuwinayi auhe kombanda yevi nokuhupitha “engathithi lyaantu,” nenge ongundu onene yi ye muuyuni uupe.—Eh. 7:9, 14.
18. Aantu aavuliki otaye ke enda ngiini taya manguluka muulunde, nemanguluko lini taya ka kala ye na lwahugunina?
18 Aantu otaya ka kala ya manguluka thiluthilu kenwethomo lyaSatana nolyoompwidhuli dhe. (Eh. 20:1-3) Aantu otaya ka kala ya pepelelwa shili. Aakwaniilwa naayambi yaKristus 144 000 otaye ke enda taya mangulula aantu thiluthilu muulunde waAdam nomokwaagwanenena okupitila mekuliloyambo. (Eh. 5:9, 10) Aantu mboka ya kala nokwiidhidhimikila omamakelo otaya ka ya memanguluko “nomeadhimo lyaana yaKalunga” oshinima shoka sha kala ethimbo nuule elalakano lyaJehova. Uuna sha ningwa, itashi ka kala we oshidhigu kungoye okulonga shoka shu uka momeho gaKalunga. Iilyo yolutu lwoye ayihe otayi ka kala ya gwanenena noto ka kala nuukwatya wa fa waKalunga lela.
19. Otu na okutsikila okuninga shike kunena, opo tu kale mondjila ndjoka tayi fala memanguluko lyashili?
19 Mbela owa tegelela nondjuulukwe wu ka ye “memanguluko nomeadhino lyaana yaKalunga”? Ngele osho, omadhiladhilo goye nomutima gwoye nagu tsikile okunwethwa mo ‘kompango ya gwana yokumangulula.’ Shoka otashi ti kutya owu na okukala ho konakona Ombiimbeli nuukeka. Kala moshili noku yi ninga yoye mwene. Kala ho galikana wu pewe ombepo ondjapuki. Mona uuwanawa mokugongala kwopaKriste nomiikulya yopambepo mbyoka Jehova ha gandja. Ino pitika wu pukithwe kuSatana ngaashi Eva ngoka a li e wete iitegelelwa yaKalunga iidhigu. Kala wu shi kutya Satana oku na iineya. Ngaashi tatu ke shi mona moshitopolwa tashi landula, katu na okweetha Satana e ‘tu pangele, oshoka omakoto ge otu ga shi.’—2 Kor. 2:11.
[Omathano pepandja 9]
Mbela ohandi lalakanene natango “emanguluko” lyuuyuni?
[Omathano pepandja 9]
Mbela oshili onde yi ninga ngaa yandje mwene?