Oyi igandja nehalo ewanawa ya ka longe kuEcuador
OMUMWATATE omugundjuka, gwedhina Bruno gwokuItalia okwa li a taalela eshongo enene. Aakwanezimo naalongi ye oya li taye mu ladhipikile elongo lyopombanda sho a mana osikola, molwaashoka okwa li a pita niitsa yopombanda e vule aalongwa ayehe mongundu yawo. Ihe okwa adhika opo owala i iyapulila Jehova omimvo dhontumba dha ka pita nokwe mu uvanekela kutya ota ka pititha komeho Uukwaniilwa we monkalamwenyo. Mbela okwa li a hogolola po shike? Okwa ti: ‘Onda lombwele Jehova megalikano kutya otandi ka gwanitha po euvaneko lyandje noku mu pititha komeho. Onda li nda popi wo paushili megalikano kutya onda hala onkalamwenyo yihokitha noyi na omaipyakidhilo gi ili nogi ili.’
Sho pwa piti oomvula dhontumba, omumwatate Bruno okwa yi kuEcuador, shi li muAmerika lyokUumbugantu. Okwa ti: “Jehova okwa yamukula egalikano lyandje momukalo ngoka nda li inaandi tegelela.” Okwa li a kumwa, molwaashoka sho a thiki kuEcuador, okwa adha ko aagundjuka yalwe oyendji mboka nayo ye ya okulongela Jehova ethimbo lyu udha koshilongo hoka.
AAGUNDJUKA MBOKA YI INEKELA JEHOVA
Bruno okwa taamba wo ehiyo lyaJehova ngaashi aagundjuka yalwe omayovi muuyuni auhe, ndyoka tali ti: ‘Yelekii ndje, ndi mu egululile oombende dhokegulu, ndi mú lokithile eloolo lyomaliko guuyamba owindji.’ (Mal. 3:10) Omolwohole yokuhola Kalunga aagundjuka oyendji oya tokola ‘okuyeleka Jehova’ mokulongitha ethimbo lyawo, oonkondo niiniwe yawo oku ka longa kiilongo hoka ku na ompumbwe onene yaauvithi yUukwaniilwa.
Ngele aauvithi mboka ye na ehalo ewanawa lyokwiiyamba ya thiki kiitopolwa iipe hoka taya ka longa, ohaya mono lela kutya “iilya oyi li po oyindji, ihe aalongi oyo aashona.” (Mat. 9:37) Pashiholelwa, omumwameme Jaqueline, a za koNdowishi, okwa li a nyolele koshitayimbelewa shokuEcuador a ti: “MuEcuador onda kala mo owala oomvula mbali ngashingeyi, ihe ondi na nale aakonakonimbiimbeli 13, yane yomuyo ohaye ya kokugongala pandjigilile. Shika kashinyanyudha tuu!” Omumwameme Chantal, a za kuKanada, ota ti: “Mo 2008 onda li nda tembukile koshitopolwa shokomunkulofuta gwaEcuador hoka kwa li owala egongalo limwe alike. Ngashingeyi oku na omagongalo gatatu naakokolindjila ye vulithe po 30. Osha li shinyanyudha okumona aantu aape oyendji taya ningi ehumokomeho.” Okwa gwedha ko a ti: “Opo owala nda tembukile koshilando shi li oometa 2 743, koshitopolwa shoondundu dhaAndes. Moshilando moka omu na aakalimo ye vulithe 75 000, ihe omu na owala egongalo limwe. Aantu yamo ohaya pulakene nawa. Ohandi nyanyukilwa lela uukalele.”
OMASHONGO NGOKA HAGA KALA PO
Oshi li eshongo okulonga moshilongo kaashi shi sheni. Odhoshili kutya aagundjuka yamwe ohaya tsakaneke omashongo manga inaaya ya. Omumwameme Kayla, a za kIilongo ya Hangana, okwa ti: “Aamwatate yamwe moshilongo shetu mboka ya li ya fa ye lile ndje po oya li taya sitha ndje uunye. Kaya li yu uvite ko kutya omolwashike ndi na oku ka kokola ondjila koshilongo shilwe. Omathimbo gamwe osha li sha ningitha ndje ndi ipule te ti: ‘Ano onda ninga ngaa etokolo li li mondjila?’” Ihe nonando ongaaka, Kayla okwa li a yi. Okwa ti: “Shoka sha kwathele ndje ndi mone kutya Jehova oha laleke nuuyamba mboka ye na ehalo lyoku mu longela, egalikano nokupopya ethimbo ele naamwatate naamwameme mboka ya pyokoka.”
Eshongo limwe hali kala po olyo okwiilonga elaka lilwe. Omumwameme Siobhan, a za koIrlanda, okwa ti: “Osha li oshidhigu kungame sho itaandi vulu okupopya nda manguluka. Onda li nda pumbwa eidhidhimiko, okwiilonga elaka ndyoka nda mana mo nonda li handi iyolo mwene ngele nda popi epuko.” Omumwameme Anna, a za kuEstonia, okwa ti wo: “Nonando moshilongo moka omwa li mu na uupyu wamemememe nontsi oyindji, mo kamu na lela ooshawa dhomeya omapyu, shoka sha li unene oshidhigu kungame okwiilonga Oshispania. Olundji onda li handi kala nda hala okweetha okwiilonga elaka ndyoka. Onda li ndi ilongo okutala mpoka tandi shi enditha nawa, ihe hakukonenena omapuko gandje.”
Eshongo limwe ishewe ondjuulukwe. Omumwatate Jonathan, a za kIilongo ya Hangana, okwa ti: “Konima owala sho nda thiki moshilongo moka nde ya okulongela onda li nda teka omukumo sho ndi li kokule nookuume kandje nosho wo noyaandjetu. Ihe okukonakona Ombiimbeli paumwene nosho wo uukalele oya li ya kwathele ndje ndi sinde eshongo ndyoka. Konima yokathimbo iimoniwa yituntula mbyoka hayi zile ndje muukalele nosho wo ookuume kandje aape megongalo oya li ya kwathele ndje ndi kale nda nyanyukwa.”
Eshongo ekwawo olyo onkalo miilongo yimwe. Olundji ihayi kala naanaa ya fa ndjoka wi igilila. Omumwatate Beau, a za koKanada, okwa ti: “Uuna wu li moshilongo sheni, omuntu oho kala wa dhina omayakulo giinima ngaashi olusheno nomeya gokopomba. Ihe miilongo yimwe iinima mbyoka ohayi monika komuthipa gweho.” Aantu yamwe miilongo mbyoka opo tayi putuka oye li moluhepo lu lulila, momahala gamwe iiyenditho yokututa aantu iikwakwa, yo yamwe kaye shi okulesha. Omumwameme Ines, a za koAustria, okwa li i idhidhimikile oonkalo ndhoka, molwaashoka okwa li owala ha gandja eitulomo komaukwatya omawanawa gaantu moshitopolwa. Okwa ti: “Aantu ohaya yakula nawa aayenda, aanambili, ohaya kwathele naaifupipiki. Kakele kaashono, oye na ohokwe onene yokwiilonga oshindji kombinga yaKalunga.”
‘OTANDI MÚ LOKITHILE ELOOLO LYOMALIKO GUUYAMBA OWINDJI’
Aagundjuka ayehe mboka yi iyamba oku ka longa kuEcuador oye shi mona kutya Jehova okwe ya pa ‘oshindji shi vulithe pushoka’ ya li ya tegelela kuye. (Ef. 3:20) Oya pandula lela sho ya ‘lokithilwa eloolo lyomaliko guuyamba owindji.’ (Mal. 3:10) Natu tale nkene ya popya enyanyu ndyoka lye ya zila muukalele.
Bruno okwa ti: “Onda tameke okulonga moEcuador moshitopolwa shoka shuunshitwe uuwanawa. Konima yethimbo onda li wo nda kwathele sho oshitayimbelewa moshilongo shoka sha li tashi gwedhelwa. Ngashingeyi ondi li moBetel. Sho nda li muItalia onda li nda tokola ndi pitithe Jehova komeho. Okwa gwanitha po shili ehalo lyandje sho a longitha ndje miilonga yi ili noyi ili.”
Beau okwa ti: “Onda hedha lela popepi naJehova, molwaashoka sho nda li muEcuador ethimbo lyandje alihe onda li handi li longitha miinima yopambepo. Shimwe ishewe, onda li nda talele po omahala omawanawa, oshinima shoka nda kala nda halelela.”
Anna okwa ti: “Molwaashoka inandi hokanwa, kanda li ndi shi ngele otandi vulu okunyanyukilwa onkalamwenyo ya fa yaatumwa. Ihe ngashingeyi ondi shi kutya otashi vulika. Onda pandula omalaleko nuuyamba gaJehova. Onda nyanyukwa sho tandi ningi aantu aalongwa notandi tungu Iinyanga yUukwaniilwa. Ohandi kala wo nda nyanyukwa omolwookuume aape mboka handi mono.”
Elke okwa ti: “Moshilongo shetu muAustria onda li handi galikana olundji Jehova a kwathele ndje ndi mone ngaa nando omukonakonimbiimbeli gumwe. Ihe ngashingeyi ondi ya na 15. Ohandi kala ndi uvite nawa okumona aakonakonimbiimbeli taya humu komeho.”
Joel okwa ti: “Oshi li uuthembahenda uunene okulongela Jehova moshilongo shilwe shoka kuu shi nando onale. Oho ilongo okukala we mu inekela noonkondo, noho kala wa nyanyukwa okumona omayambeko ngoka te ku pe omolwoonkambadhala dhoye. Muule owala womumvo gumwe sho nda zi kIilongo ya Hangana ongundu moka nda li tandi yakula oyi indjipala okuza paauvithi yahamano sigo 21. Mboka ya li pEdhimbuluko 110.”
ONGIINI KOMBINGA YOYE?
Owu li omumwatate nenge omumwameme omugundjuka? Mbela ito vulu oku ka kwathela miilongo moka mu na ompumbwe onene yaauvithi yUukwaniilwa? Opo wu ninge etokolo ndyoka enene, owu na okwiilongekidha nawa. Owu na wo okukala wu hole Jehova nomutima aguhe nosho wo aantu ooyakweni. Ngele owu na ohole ndjoka noto vulu okuya koshilongo shilwe, shi tseyithila Jehova megalikano wa mana mo. Tseyithila wo aavali yoye Aakriste ehalo lyoye nosho wo aakuluntugongalo. Otashi vulika nangoye to vulu okulongela Jehova miilonga iiyapuki mbyoka yinyanyudha noyituntula.
[Oohapu dha simana pepandja 3]
“Shoka sha kwathele ndje ndi mone kutya Jehova oha laleke nuuyamba mboka ye na ehalo lyoku mu longela, osho egalikano nosho wo okupopya ethimbo nuule naamwatate naamwameme mboka ya pyokoka.”—Kayla a za kIilongo ya Hangana
[oshimpungu/Ethano pepandja 6]
Nkene wu na okwiilongekidha wu ka kwathele kiilongo yilwe
• Kala ho konakona Ombiimbeli pandjigilile
• Tala Uukalele Wetu wUukwaniilwa waAuguste 2011, epandja 4-6
• Popya nayalwe mboka ya longa miilongo kaayi shi yawo
• Ninga omakonakono kombinga yomithigululwakalo nondjokonona yoshilongo
• Ilonga omautumbulilo gamwe melaka lyomoshilongo moka wu li
[oshimpungu/Ethano pepandja 6]
Yamwe mboka taya kwathele miilongo yilwe ohayi iyambidhidha yo yene pashimaliwa mokukala haya . . .
• longo oomwedhi dhontumba momumvo kehe moshilongo shawo
• kaleke aantu momagumbo gawo, moondunda dhawo nenge moongeshefa dhawo mboka haya futu kuyo
• longo okupitila mointaneta
[Omathano pepandja 4, 5]
1 Jaqueline a za koNdowishi
2 Bruno a za koItalia
3 Beau a za koKanada
4 Siobhan a za koIrlanda
5 Joel a za kIilongo ya Hangana
6 Jonathan a za kIilongo ya Hangana
7 Anna a za koEstonia
8 Elke a za koAustria
9 Chantal a za koKanada
10 Ines a za koAustria