Mbela oto vulu ‘okutaagulukila kuMakedonia’?
1. Oshike sha li sha ningitha Paulus nooyakwawo ya ye kuMakedonia?
1 Mo 49 E.N. lwaampono, omuyapostoli Paulus okwa li a zi muAntiokia shomuSiria a ye molweendo lwe olutiyali lwuutumwa. Elalakano lye olya li oku ka talela po Efeso nosho wo iilando yilwe yomuAsia Eshona. Ihe okwa li a mono emoniko okupitila mombepo ondjapuki tali mu hiya a ‘taagulukile kuMakedonia.’ Okwa li a taamba ko ehiyo ndyoka nenyanyu pamwe nooyakwawo noya li ya mono uuthembahenda wokutota egongalo lyotango moshitopolwa shoka. (Iil. 16:9, 10; 17:1, 2, 4) Kunena muuyuni omu na iitopolwa yimwe ya pumbwa aalongi oyendji. (Mat. 9:37, 38) Mbela oto vulu oku ka kwathela?
2. Omolwashike aauvithi yamwe ya tila okutembukila koshilongo shilwe?
2 Otashi vulika wa hala okuninga omutumwa ngaashi Paulus, ihe ku na naanaa edhiladhilo lyokutembukila koshilongo shilwe. Pashiholelwa, otashi vulika itoo vulu oku ka dheulwa kosikola yaGilead omolwomimvo dhoye nenge molwaashoka wu li omumwameme inaa hokanwa nenge molwaashoka wu na aanona aashona. Otashi vulika inoo dhiladhila okutembukila koshilongo shilwe, molwaashoka wu wete kutya ito vulu okwiilonga elaka lilwe. Nenge otashi vulika wu li ngashingeyi moshilongo moka wa tembukila omolwuuhupilo, nomolwaashono otashi vulika to dhiladhila kutya ito vulu we okutembukila koshilongo shilwe. Ihe konima yokudhiladhila nawa pamwe negalikano otashi vulika to ka mona kutya inashi pumbiwa oonkalo ndhoka dhi ku imbe okutembukila koshilongo shilwe hoka ku na ompumbwe yaauvithi.
3. Omolwashike okudheulilwa uutumwa kaaku li oshitegelelwa opo omuntu a vule oku ka uvitha koshilongo shilwe?
3 Mbela okudheulilwa uutumwa oku li oshitegelelwa? Oshike sha li sha kwathele Paulus nooyakwawo ye shi pondole? Oya li yi inekela ombepo ondjapuki yaJehova. (2 Kor. 3:1-5) Onkee ano, nokuli ngele oonkalo dhoye itadhi ku pitika wu mone edheulo lyi ikalekelwa, oto vulu natango oku shi pondola moku ka uvitha koshilongo shilwe. Dhimbulukwa wo kutya oho dheulwa okupitila mOsikola yUukalele woPauteokratika nosho wo pOkugongala kwoPailonga. Ngele owu na elalakano lyokuya koGilead nenge kosikola ya fa ndjono, okutembukila koshilongo shilwe otashi ke ku kwathela wu mone nkene iilonga yuutumwa ya tya, oshinima shoka tashi ke ku kwathela konima yethimbo ngele owa ka mona edheulo lya gwedhwa po.
4. Omolwashike aakokele kaaye na okudhiladhila kutya itaya vulu okutembukila koshilongo shilwe ye ku uvithe hoka?
4 Aakokele: Mboka ya pyokoka pambepo noye na uukolele otaya vulu okukala ekwatho enene miilongo moka mu na ompumbwe. Mbela owa penzelwa? Nonando yamwe ohaya mono uumaliwa uushona wopenzela otaya vulu okutembukila koshilongo shilwe hoka uuhupilo wu li hwepo okuyelekanitha naamboka womoshilongo moka taya zi, molwaashoka oondando dhomahala gokukala nosho wo dhuunamiti ohadhi kala dhi li pevi.
5. Hokolola oshimoniwa shimwe shomumwatate a penzelwa ngoka a li a tembukile koshilongo shilwe.
5 Omumwatate gumwe omukuluntugongalo nomukokolindjila ngoka a penzelwa moshilongo shimwe moka hamu popiwa Oshiingilisa, okwa tembukile kehala limwe li holike kaatalelipo li li kUuzilombugantu waAsia opo a ka kwathele ongundu yaauvithi omugoyi aapopi yOshiingilisa. Ongundu ndjoka oya li yu uvithile aakwiilongo 30 000 mboka haya kala moshitopolwa moka. Muule woomimvo mbali aantu 50 oya li haya kala pokugongala. Omumwatate okwa nyola a ti: “Okutembukila huka okwe etela ndje omalaleko nuuyamba ogendji noonkondo ngoka inaandi mona nando onale. Itandi mana nokuli oku ga popya.”
6. Hokolola oshimonima shomumwameme gumwe inaa hokanwa ngoka a li a tembukile koshilongo shimwe hoka ku na ompumbwe onene.
6 Aamwameme inaaya hokanwa: Jehova oha longitha aamwameme momukalo omukumithi ya taandelithe onkundana ombwanawa miilongo moka mu na ompumbwe onene. (Eps. 68:11) Omumwameme gumwe omugundjuka inaa hokanwa okwa li e na elalakano oku ka tamununa mo uukalele we koshilongo shilwe, ihe aavali ye oya li tayi ipula unene shi na ko nasha negameno lye. Okwa li a hogolola okuya koshilongo hoka onkalo yopapolotika noyopamahupilo yi li hwepo, nokwa li a nyolele koshitayimbelewa, nokwa li a pewa uuyelele tawu mu kwathele wokondandalunde. Okwa li a mono omalaleko nuuyamba ogendji uule woomvula hamano ndhoka a li a kala moshilongo moka. Okwa ti: “Koshilongo shetu osha pumba lela okumona aakonakonimbiimbeli. Ihe mokulonga moshilongo moka mu na ompumbwe onene onda li nda mono aakonakonombiimbeli oyendji, naashoka osha li sha kwathele ndje ndi hwepopaleke omukalo gwandje gwokulonga aantu.”
7. Hokolola oshimoniwa shuukwanegumbo mboka wa li wa tembukile koshilongo shilwe.
7 Omaukwanegumbo: Ngele owu na aanona, mbela shoka otashi ku imbi wu tembukile koshilongo shilwe opo wu ku uvithe onkundana ombwanawa? Omusamane nomukulukadhi gwe noyana yaali, gumwe oku na oomvula hetatu nomukwawo oku na omulongo, oya li ye shi ningi. Omukulukadhi okwa nyola oshimoniwa shawo a ti: “Otwa nyanyukwa sho twa putudhile oyana yetu moshilongo shika, molwaashoka oya li haye endathana naakokolindjila yi ikalekelwa nosho wo naatumwa. Onkalamwenyo yetu oya li ya yambekwa molwaashoka otwa li tatu longo mpoka pu na ompumbwe onene.”
8. Mbela otashi vulika ngaa wu ka uvithile koshilongo shilwe nopwaahe na okwiilonga elaka lilwe? Shi yelitha.
8 Okupopya elaka li ili: Mbela okwiilonga elaka ekwiilongo otaku ku imbi okutembukila koshilongo shilwe? Elaka lyoye otashi vulika hali popiwa kiilongo yilwe hoka ku na ompumbwe onene yaauvithi yUukwaniilwa. Aaihokani yamwe aapopi yOshiingilisa oya li ya tembukile koshilongo shimwe haku popiwa Oshispania hoka ku na aatembukilimo oyendji haya popi Oshiingilisa. Konima sho ya mono uuyelele womagongalo gOshiingilisa ngoka ge na ompumbwe okuza koshitayimbelewa, oya li ya hogolola mo limwe noye li talele po iikando iyali. Sho ya shuna koshilongo shawo, oya pata oo-account dhawo dhimwe ndhoka ya li haya futu omwedhi kehe e taya gongele iimaliwa muule womvula yimwe. Sho ethimbo lyawo lyokuya lya thiki, aamwatate moshilongo shoka oya li ye ya kwathele ya mone ehala lyokukala li na ombiliha.
9, 10. Mboka ya tembukila miilongo yilwe otaya vulu okwiipula kombinga yashike, nomolwashike?
9 Aaniilongo: Mbela owa tembukila koshilongo shilwe omanga inoo ilonga oshili? Otashi vulika koshilongo sheni ku na ompumbwe onene yaauvithi yonkundana ombwanawa. Mbela oto vulu okushuna ko wu ka kwathele? Otashi vulika oshipu kungoye okumona iilonga nosho wo ehala lyokukala shi vulithe gumwe ngoka a za koshilongo shilwe. Otashi vulika ho popi nale elaka lyontumba lyomoshilongo sheni. Kakele kaashono, aantu otashi vulika ya ka kale nehalo okupulakena ketumwalaka lyUukwaniilwa ndyoka to ya uvithile, shi vulithe okupulakena kuyalwe mboka ye li aakwiilongo.
10 Omulumentu gumwe Omualbania okwa li a taukile kuItalia hoka a mono iilonga hayi futu nawa, nokwa kala ha tumine uukwanegumbo we kuAlbania iimaliwa. Konima sho a mono oshili, okwa tameke okulonga ongundu yaakokolindjila yi ikalekelwa, Aaitalia, elaka lyOshialbania, molwaashoka oya li taya tembukile koAlbanina omolwompumbwe onene yaauvithi. Omumwatate okwa nyola a ti: “Aakokolindjila mboka oya li ye na okuya koshitopolwa hoka nda za. Kaya li ye shi elaka ndyoka hali popiwa ko noya li ya nyanyukwa okuya ko. Ngame ohandi popi Oshialbania nonda putukila moshilongo moka. Okwe ya pehulithodhiladhilo kutya oku na okushuna kuAlbania?” Okwa tokola okushuna opo a ka kwathele mokuuvitha onkundana ombwanawa. Okwa ti: ‘Inandi ipa nando uusama sho nde etha po iilonga mbyoka ya li hayi futu nawa muItalia. Ngashingeyi otandi longo iilonga mbyoka tayi hupitha oomwenyo muAlbania. Onda li unene ndi na ko nasha niilonga mbyoka yi na oshilonga notayi eta enyanyu yokulongela Jehova nomutima aguhe.’
11, 12. Mboka ye na edhiladhilo oku ka uvithila koshilongo shilwe oye na okuninga shike?
11 Nkene tu na oku shi ninga: Manga Paulus nooyakwawo inaaya ya kuMakedonia, oya li ya hala okuya koshitopolwa shi li kuuninginino, ihe ‘ombepo ondjapuki oye ya keelele kaaya uvithe’ moshitopolwa moka, onkee ano, oya tanauka e ta yu uka kuumbangalantu. (Iil. 16:6) Sho ya li ye li popepi naBitinia, Jesus okwa li e ya keelele kaaye shi ninge. (Iil. 16:7) Jehova ota tsikile okuwilika iilonga yokuuvitha okupitila muJesus. (Mat. 28:20) Onkee ano, ngele oto dhiladhila okutembukila koshilongo shilwe, galikana Jehova e ku wilike. — Luk. 14:28-30; Jak. 1:5; tala oshimpungu “Ongiini to vulu okutseya kutya koshilongo hoka to dhiladhila okuya oku na ompumbwe?”
12 Pula aakuluntugongalo nAakriste mboka ya pyokoka ye ku pe omayele ngele owa hala okuya koshilongo shilwe. (Omayel. 11:14; 15:22) Lesha uuyelele wehangano kombinga yoku ka uvitha kiilongo yilwe ninga wo omakonakono kombinga yoshilongo kehe shoka to dhiladhila okuya. Mbela ito vulu oku ka talela po nando uule womasiku gontumba koshilongo hoka wa hala oku ka uvithila? Ngele owa halelela okutembukila koshilongo shilwe, oto vulu okunyolela koshitayimbelewa shomoshilongo shoka shi ku pe uuyelele wa gwedhwa po, to longitha ondjukithi ndjoka yi li mo-Yearbook yomumvo ngoka mu li. Ihe ombapila yoye ino yi tuma ngoye mwene koshitayimbelewa, yi pa aakulungugongalo yegongalo lyeni ya gandje omatyokosha gawo manga inaaye yi tuma. — Tala embo Organized to Do Jehovah’s Will, epandja 111-112.
13. Oshitayimbelewa otashi ke ku kwathela ngiini, ihe owu na oshinakugwanithwa shashike?
13 Oshitayimbelewa otashi ke ku tumina uuyelele tawu ku kwathele kombinga yoshilongo shoka opo wu ninge etokolo, ihe itashi ke ku longekidhila oondokumende dhokuya nenge dhokukala moshilongo moka nenge shi ku popile kutya ito ka pa epangelo uudhigu washa. Mbyoka iinima yopaumwene nowu na oku yi ninga manga inoo tembuka. Niishewe, ongoye mwene wu na okukwatathana nombelewa yomukalelipo gwoshilongo shoka moshilongo sheni nosho wo yomukalelipo gwoshilongo sheni koshilongo hoka wa hala okuya, wu pule uuyelele nkene to vulu okumona oondokumende dhokuya nodho ku ka longa koshilongo shoka. Mboka ye na edhiladhilo lyokutembuka oye na okukala taya vulu okwiisila oshimpwiyu paumwene nosho wo miinima yopaveta. — Gal. 6:5.
14. Uuna to talelepo nenge to tembukile koshilongo hoka iilonga yokuuvitha ya ngambekwa owu na okukala wa kotokela shike?
14 Iilongo moka iilonga yokuuvitha ya ngambekwa: Miilongo yimwe aamwatate naamwameme oye na okukala ya kotoka uuna taya uvitha. (Mat. 10:16) Aauvithi mboka taya talele po nenge ya tembukila moshilongo shoka oye na okukala ya kotoka opo omaipyakidhilo gawo kaaga tulithe aamwatete moshiponga. Ngele oto dhiladhila okutembukila koshilongo sha tya ngaaka, nyolela koshitayimbelewa shopune ombapila e to yi pe aakuluntugongalo manga inoo tembuka.
15. Mboka oonkalo dhawo itaadhi ya pitike ya tembukile koshilongo shilwe otaya vulu ngiini okutamununa mo uukalele moshilongo shawo?
15 Uuna itoo vulu okutembuka: Ngele ito vulu okutembukila koshilongo shilwe, ino teka omukumo. Otashi vulika pu na ‘ompito yilwe yokulonga oshilonga oshinene’ ye ku egulukila. (1 Kor. 16:8, 9) Omutonatelishikandjo gweni otashi vulika e shi mpoka pu na ompumbwe yaauvithi moshilongo sheni. Mbela oto vulu okwiilonga elaka lilwe lyomoshilongo sheni nokukwathela megongalo moka hali popiwa, nenge ongundu ndjoka hayi popi elaka ndyoka? Oto vulu wo okukwathela egongalo nenge ongundu yelaka lyokuudhika yopune nosho wo egongalo nenge ongundu yOshichiina, Oshifulaanisa nOshiputu. Oto vulu wo okutamununa mo uukalele woye megongalo lyeni. Kutya nduno onkalo yoye oyi li ngiini, oshinima sha simana osho okulonga muukalele nomutima aguhe. — Kol. 3:23.
16. Otu na okuungaunga ngiini naamboka ya hala okutembukila koshilongo shilwe?
16 Mbela owu shi Omukriste a pyokoka pambepo ngoka a hala oku ka longa koshilongo shilwe? Ngele osho, mu kwathele noku mu ladhipika. Sho Paulus a zi muAntiokia shomuSiria, oshilando shoka sha li oshititatu muunene mUukwaniilwa waRoma (Roma osho sha li shotango e tashi shi landulwa kuAlesandria). Molwaashoka oshitopolwa shoka osha li oshinene, egongalo muAntiokia olya li lya pumbwa lela Paulus e li kwathele nolya li tali ka kala lye mu yuulukwa ngele okwa yi. Ihe Ombiimbeli inayi popya kutya aamwatate mbyoka oya li ta ye mu ladhipike a kale puyo. Pehala lyokudhiladhila owala koshitopolwa shawo, oya li ye shi kutya “epya olyo uuyuni.” — Mat. 13:38.
17. Omolwomatompelo geni tu na ‘okutaagulukila kuMakedonia’?
17 Paulus nosho wo aayendi pamwe naye oya li ya mono omayambeko ogendji, molwaashoka oya li ya taagulukile kuMakedonia ngaashi ya lombwelwa. Manga ya li muFilippi oshilando shi li muMakedonia, oya li ya tsakanene naLidia ngoka ‘Omuwa e egulula omwenyo gwe okutaamba nokwiitaala shoka Paulus a ti.’ (Iil. 16:14) Dhiladhila owala kenyanyu ndyoka Paulus naayendi ooyakwawo ya li ye na sho Lidia nuukwanegumbo we auhe ya li ya ninginithwa. Miilongo oyindji, omu na aantu yomitima omiwanawa ya fa Lidia mboka shivalelwe yu uve etumwalaka lyUukwaniilwa. Ngele owa ‘taagulukile kuMakedonia,’ oto ka mona enyanyu ndyoka hali zi mokukwathela aanamitima omiwanawa.