Oshimpungu Shomapulo
◼ Mbela aauvithi oye na okugandja uunzapo unene okupitila mointaneta nenge okukonakona naantu mboka kaaye shi nale ye li kiilongo yilwe?
Aauvithi yamwe ohaya longitha ointaneta okukonakona Ombiimbeli naantu kiilongo hoka iilonga yetu yi indikwa nenge hoka ku na aauvithi aashona. Omathimbo gamwe ohashi eta iizemo iiwanawa. Ihe osha nika oshiponga uuna aauvithi taya longitha ooe-maila okupopya naantu mboka kaaye ya shi ye li kiilongo yilwe. (Tala Uukalele Wetu wUukwaniilwa wOshiingilisa waJuli 2007, ep. 3) Nonando elalakano lyetu olyo okwaadha omitima dhaamboka ye na ohokwe metumwalaka lyUukwaniilwa, oonkundathana dha tya ngaaka otashi vulika dhi fale omumwatate nenge omumwameme meendathano ewinayi, tashi vulika naashunimonima nokuli. (1 Kor. 1:19-25; Kol. 2:8) Shimwe ishewe, miilongo moka iilonga yUukwaniilwa ya ngambekwa nenge yi indikwa, ohashi vulika omapangelo ga kale taga tala ngoka te shi ningi. Shika ohashi vulika shi tule moshiponga aamwatate naamwameme miilongo moka. Onkee ano, aauvithi kaye na okukonga mboka taya vulu okuuvithila onkundana ombwanawa kiilongo yilwe okupitila mointaneta.
Ongiini ngele otwa gandja uunzapo wontukuluka komuntu ngoka e ya owala okutalela po moshilongo shetu? Katu na okukambadhala tu kokeke ohokwe ye uuna a shuna koshilongo shawo. Kakele shila ngele twe shi lombwelwa tu shi ninge koshitayimbelewa shoka tashi tonatele iilonga moshilongo shetu. Ihe oto vulu oku mu ulukila epandja lyetu lyokointaneta, jw.org, opo a mone uuyelele wa gwedhwa po nenge wu mu ulukile nkene e na okukwatathana noshitayimbelewa shokuyo. Otatu vulu wo oku mu ladhipika a ye kokugongala kOshinyanga shUukwaniilwa shoka shi li popepi naye. Oshoshili kutya miilongo yimwe kamu na Iinyanga yUukwaniilwa. Ngele okwa hala a kale ha talelwa po kOonzapo dhokoshilongo shawo, otatu vulu oku mu ulukila nkene okafooloma Request a Free Bible Study haku udhithwa, hoka ke li kepandja lyetu kointaneta, jw.org. Oshitayimbelewa shoka hashi tonatele iilonga moshilongo moka a kala, oshi shi nawa onkalo yamo, notashi ka tala nkene shi na oku mu sila oshimpwiyu pambepo. — Tala Uukalele Wetu wUukwaniilwa waJuni 2014, ep. 7 nosho wo Uukalele Wetu wUukwaniilwa waNovomba 2011, ep. 2.
Ngele omuntu ngoka hatu talele po a tembukile koshilongo shilwe, nenge hatu konakona nomuntu e li koshilongo shilwe ngoka twa tseyathana naye okupitila mointaneta, otu na okulandula omukalo ngoka twa lombwelwa metetekelo. Otatu vulu okutsikila okukokeka ohokwe ye, sigo pwa monika ngoka ta vulu okukonakona naye koshilongo shawo. Ihe ongiini ngele oha kala moshilongo moka iilonga yetu ya ngambekwa nenge yi indikwa? Otu na okukala twa kotoka lela uuna tatu kundathana nomuntu ngoka kombinga yOmbiimbeli okupitila montumwafo, mongodhi nenge miikwaelektronika yilwe. — Mat. 10:16.