Oshimpungu shepulo

◼ Olye e na okuudhitha ofooloma ndjoka hayi kala miifo yetu naandjoka yi li kOintaneta?

Olundji miifo yetu ohamu kala ofooloma ndjoka hayi udhithwa e ta yi tuminwa koshitayimbelewa opo omuntu ngoka e na ohokwe a tuminwe iileshomwa nenge a talelwe po kOonzapo dhaJehova. Kakele komukalo ngoka, omuntu ota vulu wo okuninga eindilo lyekonakonombiimbeli okupitila kondjukithi yetu ndjika yokOintaneta www.watchtower.org. Omikalo ndhika adhihe mbali otadhi kwathele aantu oyendji yi ilonge oshili. Ihe ohapu holoka uupyakadhi sho aauvithi yamwe haya udhitha oofooloma ndhika pehala lyaapambele yawo nenge pehala lyayalwe mboka aauvithi mbaka ya hala ya tuminwe iileshomwa nenge ya talelwe po.

Yamwe mboka ya li ya tuminwa iileshomwa inaaye yi pula okuza koshitayimbelewa oya li ya nyenyeta taya ti kutya ehangano lyetu ohali ya ningile nayi sho ya nyola anuwa omadhina gawo momusholondondo gwaamboka haya tuminwa aluhe iileshomwa. Aauvithi mboka ya li ya lombwelwa ya ye ko kaantu mboka haayo ya li yu udhitha ofooloma opo ya talelwe po oya li yi iyadha monkalo yi sitha ohoni sho aantu mboka ya li ya popi kutya otaya ningilwa nayi molwaashoka inayu udhitha ofooloma ndjoka. Onkee ano, mboka ye na ohokwe oyo yene ye na okuudhitha ofooloma ndjoka, ihe aauvithi hayo ye na oku yi udhitha pehala lyayalwe. Ngele oshitayimbelewa osha dhimbulula kutya oofooloma dhontumba odhu udhithwa pehala lyayalwe, ihashi dhi yamukula.

Ongiini nduno tatu vulu okukwathela aapambele yetu yi ilonge kombinga yOmbiimbeli? Ngele owa hala omupambele gwoye nenge ngoka wu shi a mone iileshomwa, oto vulu oku yi mu tumina omagano. Ngele okwe yi hokwa nokwa hala a talelwe po kOonzapo dhaJehova, ihe ku shi kutya ongiini wu na okukwatathana naakuluntugongalo yomoshitopolwa moka e li, owu na okuudhitha ofooloma yedhina Please Follow Up (S-43) e to yi gandja kuamushanga gwegongalo lyeni ngoka te ke yi tumina koshitayimbelewa. (Egongalo kehe oli na okukala li na oofooloma ndhika dha gwana.) Nonando omuntu ngoka oku li mondholongo, mendiki moka hamu kala mboka ya pikwa kiingangamithi nokiikolitha nota kwathelwa e yi ethe po nenge moshipangelo shepangelo, hangoye wu na okukwatathana noshitayimbelewa pehala lye. Pehala lyaashono oto vulu oku mu ladhipika a kwatathane naamwatate mboka haya talele po ehala moka e li nenge a nyolele koshitayimbelewa.