Ontopolwa ontiheyali
Shoka tatu ilongo mokweetha kwaKalunga uukolokoshi u kale po
1, 2. (a) Ando Jehova okwa hanagulile po nziya aanashipotha muEden, shoka mbela ando oshe tu gumu ngiini? (b) Omalongekidho gopahole geni Jehova e tu ningile?
“OMWAALU gwomasiku [gomwenyo] gwandje omafupi nogoluhodhi olwindji,” omukulusamane Jakob osho a ti. (Genesis 47:9) Sha faathana, Job okwa ti kutya omuntu “omunamasiku omafupi nokwa kuta uupyakadhi.” (Job 14:1) Ngaashi yo, oyendji yomutse otwa tsakaneka omaupyakadhi, okwaahenuuyuuki, nokuli niiponga iinene. Ihe okuvalwa kwetu itaku ulike okwaahenuuyuki kwaKalunga. Dhoshili, katu na omadhiladhilo nomalutu ga gwanenena nokatu na egumboparadisa mbyoka Adam naEva ya li ye na petameko. Ihe ongiini ando Jehova okwe ya hanagulile po nziyanziya sho ya tukulutha oshipotha? Nonando ando kapwa li pu na omikithi, oluhodhi, nenge eso, ando aantu nayo inaya kala ko. Ando inatu valwa. Kalunga molwohenda ye okwe etha Adam naEva ya mone aanona, nokuli nonando oya li ya thigulula okwaahagwanenena. Nomokupitila muKristus, Jehova okwa ningi po elongekidho opo tu monunune shoka sha kanithwa kuAdam—omwenyo gwaaluhe moparadisa kombanda yevi.—Johannes 10:10; Aaroma 5:12.
2 Itashi tu ladhipike tuu tu vule okukala netegameno lyomwenyo sigo aluhe muuyuni uupe moonkalo dhOparadisa, moka tatu ka kala twa manguluka komikithi, koluhodhi, kuuwehame nokeso, nosho wo kaakolokoshi! (Omayeletumbulo 2:21, 22; Ehololo 21:4, 5) Ihe nonando ehupitho lyetu olya simana unene kutse nokuJehova, otatu ilongo mwaashoka sha nyolwa mOmbimbeli kutya opu na sha sha kwatelwa mo shoka sha simana noonkondo.
Molwedhina lye enene
3. Oshike sha kwatelwa mokugwanitha elalakano lyaJehova li na ko nasha nevi nosho wo naantu?
3 Edhina lyaKalunga olya kwatelwa mo megwanitho lyelalakano lye li na ko nasha nevi nosho wo naantu. Edhina ndyoka, Jehova, otali ti “Oha ningitha.” Onkee ano edhina lye olya kwatela mo ondondo ye e li Omunamapangelo gweshito alihe, Omugwanithi gwelalakano noku li Kalunga koshili. Omolwondondo yaJehova, ombili nonkalonawa yeshito alihe otayi pula opo edhina lye naashoka lya kwatela mo yi simanekwe nesimano ndyoka ye li gwana nonokutya ayehe ya kale haya vulika kuye.
4. Elalakano lyaJehova li na ko nasha nevi olya li lya kwatela mo shike?
4 Konima sho Jehova a shiti Adam naEva, okwe ya pe iilonga ye yi longe. Okwe shi yelitha kutya elalakano lye kalya li owala ya pangele evi alihe—nokutamununa mo oongamba dhOparadisa—ihe olyo oku li udhitha wo oluvalo lwawo. (Genesis 1:28) Mbela elalakano ndyoka olya li tali ka ponya molwaashoka ya yono? Kasha li tuu tashi ka kala ondhino kedhina lyaJehova Omunankondo adhihe ando ka gwanithile elalakano lye li na ko nasha nevi nosho wo naantu!
5. (a) Uunake aantu yotango ya li ye na okusa ngele taya li komuti gwokutseya uuwanawa nuuwinayi? (b) Ongiini Jehova a gwanitha oohapu dhe ndhoka dhi li muGenesis 2:17 omanga ta dhimbulukwa natango elalakano lye li na ko nasha nevi?
5 Jehova okwa londodha Adam naEva kutya ngele oya kala itaaya vulika e taya li komuti gwokutseya uuwanawa nuuwinayi, otaya ka sa ‘esiku tuu ndyoka’ taya li ko. (Genesis 2:17, KB) Opo Jehova a gwanithe oohapu dhe, okwe ya pangula omolwokuyona kwawo esiku olyo tuu ndyoka nokwe ya tokolele eso. Pataloko lyaKalunga, Adam naEva oya si esiku ndyoka. Ihe opo a gwanithe elalakano lye li na ko nasha nevi, Jehova okwe ye etha ya mone aanona manga inaaya sa palutu. Nonando ongaaka, molwashoka Kalunga ota vulu okutala ko oomvula 1 000 dha fa esiku limwe, Adam okwa si meni ‘lyesiku’ limwe alike, sho onkalamwenyo ye ya hulile moomvula 930. (2 Petrus 3:8; Genesis 5:3-5) Kungeyi, uushili waJehova owa li wa yukipalithwa shi na ko nasha nethimbo ndyoka ya li taya ka geelwa, nelalakano lye li na ko nasha nevi kalya li lya yiwa moshipala keso lyawo. Ihe uule wethimbo lyontumba, aantu inaaya gwanenena, mwa kwatelwa aakolokoshi, oya kala ye ethiwa ya kale nomwenyo.
6, 7. (a) PaEksodus 9:15, 16, omolwashike Jehova he etha aakolokoshi ya tsikile okukala po uule wethimbo? (b) Oonkondo dhaJehova odhu ulikwa ngiini moshinima shaFarao, nongiini edhina Lye lya tseyithwa? (c) Ngele onkalelo yongashingeyi yuukolokoshi ya hulithwa po, oshizemo otashi ka kala shike?
6 Shoka Jehova a lombwele omupangeli gwaEgipiti pethimbo lyaMoses otashi ulike natango kutya molwashike E etha uukolokoshi u tsikile okukala po. Sho Farao i indike oyana yaIsrael yaa ze mo muEgipiti, Jehova ine mu dhipaga po nziyanziya. Oshilongo osha li sha adhika komageyelo omulongo, shoka shu ulike oonkondo dhaJehova momikalo omikumithi. Sho Jehova a tseyitha egeelo etiheyali, okwa li a lombwele Farao kutya Ye okwa li ta vulu oku mu dhima ko nuupu noshigwana she kombanda yevi. Jehova okwa ti: “Ongame sho nde ku [kaleke ko u na omwenyo, OB-1986], opo ndi ku ulukile oonkondo dhandje mpoka dhi thike, nedhina lyandje li simanekelwe nevi alihe.”—Eksodus 9:15, 16.
7 Sho Jehova a mangulula Aaisrael, edhina lye olya tseyika shili apuhe. (Josua 2:1, 9-11) Nena, nonando opwa pita konyala oomvula dhi vulithe 3 500, shoka a li a ningi ethimbo ndyoka inashi dhimbiwa. Hadhina owala lye lyopaumwene Jehova lya tseyithwa ihe noshili wo kombinga yamwene gwedhina ndyoka. Shoka oshu ulike kutya Jehova oye Kalunga ngoka ha gwanitha omauvaneko ge noha katuka oonkatu molwaapiya ye. (Josua 23:14) Oshu ulike kutya kapu na sha tashi vulu okwiimba elalakano lye, molwaashoka ye Omunankondoadhihe. (Jesaja 14:24, 27) Onkee ano otatu vulu okukala neinekelo kutya masiku ota ka katuka onkatu molwaapiya ye aadhiginini mokuhanagula po onkalelo yaSatana ayihe yuukolokoshi. Euliko ndyoka lyoonkondo dhe oonenenene nesimano ndyoka tali ke etela edhina lyaJehova itali ka dhimbiwa nando. Omauwanawa otaga ka kala po sigo aluhe.—Hesekiel 38:23, yelekanitha NW; Ehololo 19:1, 2.
‘Uule wuunongo waKalunga ou thike peni!’
8. Iinima yini Paulus te tu ladhipike tu konakone?
8 Montumwafo ye kAaroma, omuyapostoli Paulus okwa li a pula epulo tali ti: “Otatu ti ando kutya Kalunga ke shi omuyuuki?” Ota yamukula nomuthindo ta ti: “Shivalelwe.” Opo nduno ota tsu omuthindo ohenda yaKalunga notu ulike kwaashoka sha popiwa kuJehova kombinga yokweetha Farao a kale nomwenyo uule wokathimbo. Paulus otu ulike wo kutya tse aantu otwa fa eloya moshikaha shomuumbi gwiiyuma. Opo nduno ota ti: “Ihe ngele Kalunga, nando a hala okumonitha ondjahi ye nokutseyitha oonkondo dhe, okwi idhidhimikila nontalanteni oyindji iiyuma yondjahi, oombyoka yo opala okuyonwa po, nopo a monithile piiyuma yesilohenda owindji weadhimo lye, oombyoka e yi longekidhila nale eadhimo. Naashono okwe tu ithanene wo hamAajuda ayeke, aawe, omaapagani wo.”—Aaroma 9:14-24.
9. (a) Oolye “iiyuma yondjahi, oombyoka yo opala okuyonwa po”? (b) Omeityo lini Jehova a tala aapataneki ye onteni onene, noshizemo shahugunina otashi ke etela ngiini uuwanawa mboka ye mu hole?
9 Okuza puunashipotha womuEden, ayehe mboka ya pataneke Jehova noompango dhe oya kala “iiyuma yondjahi, oombyoka yo opala okuyonwa po.” Okuza pethimbo ndyoka sigo ongashingeyi, Jehova okwa kala ti idhidhimike. Aakolokoshi oya sheke oondjila dhe, ya hepeke aapiya ye noya dhipaga nokuli Omwana. Jehova oku ulike eipangelo mwene enene sho e etha ethimbo lya gwana opo eshito alihe li vule okumona naanaa iilanduliko ya nika oshiponga omolwokutukuluthila Kalunga oshipotha nosho wo yepangelo lyaantu ya manguluka ko kuye. Ethimbo olyo tuu ndyoka, eso lyaJesus olya gandja shoka okupitila musho aantu aavuliki taya vulu okuhupithwa nosho wo ‘okuhanagula po iilonga yondiaboli.’—1 Johannes 3:8; Aaheberi 2:14, 15.
10. Omolwashike Jehova i idhidhimikile aakolokoshi uule woomvula 1 900 dha piti?
10 Uule woomvula dhi vulithe 1 900 okuza peyumuko lyaJesus, Jehova okwa kala i idhidhimikila natango “iiyuma yondjahi,” a kaleka manga ehanagulo lyayo. Omolwashike? Etompelo limwe, omolwaashoka okwa li ta longekidha manga mboka taya ka kala pamwe naJesus Kristus mUukwaniilwa we womegulu. Mbaka oye li 144 000, noye li ‘iiyuma yesilohenda’ mbyoka ya popiwa komuyapostoli Paulus. Tango, oohandimwe mboka ya za mAajuda oya li ya hiywa ya kale ongundu ndjika yomegulu. Konima yethimbo, Kalunga okwa hiya aantu yomiigwana mbyoka kaayi shi Aajuda. Jehova ina thininika nando ogumwe gwomuyo e mu longele. Ihe okwa pe yamwe yomokati kaamboka yi inyenge nolupandu komasiloshimpwiyu ge gopahole uuthembahenda wokukala ye li aapangeli pamwe nOmwana mUukwaniilwa womegulu. Elongekidho lyongundu ndjika yomegulu oli li pokupwa ngashingeyi.—Lukas 22:29; Ehololo 14:1-4.
11. (a) Ongundu yini tayi mono uuwanawa ngashingeyi montalanteni yaJehova? (b) Oonakusa otaya ka mona mo ngiini uuwanawa?
11 Ihe ongiini kombinga yaamboka taya ka kala kombanda yevi? Ontalanteni yaJehova oye shi ningi wo tashi wapa pu gongelwe “ongundu onene” okuza miigwana ayihe. Ngashingeyi oye li omamiliyona. Jehova oku uvaneke kutya ongundu ndjika yokombanda yevi otayi ka hupa pehulilo lyonkalelo ndjika e tayi kala yi na etegameno lyomwenyo gwaaluhe moparadisa kombanda yevi. (Ehololo 7:9, 10; Epsalmi 37:29, OB-1986; Johannes 10:16) Pethimbo lyaKalunga lyo opala, omangathithi goonakusa otaga ka yumudhwa notaga ka pewa ompito okukala ye li aalelwa yokombanda yevi yUukwaniilwa womegulu. Oohapu dhaKalunga otadhi hunganeke mIilonga 24:15 tadhi ti: “Oku na eyumuko lyaayuuki nolyaalunde.”—Johannes 5:28, 29.
12. (a) Okwiidhidhimikila uukolokoshi u kale po kwaJehova okwe tu longo shike kombinga ye? (b) Ou uvitile ngiini omukalo moka Jehova u ungaunga niinima mbyoka?
12 Opwa li mbela okwaahenuuyuuki kwasha mwaayihe mbyono? Aawe, molwashoka mokukaleka manga okuhanagula po nziya aakolokoshi nenge “iiyuma yondjahi,” Kalunga oku ulikile yalwe ohenda, metsokumwe nelalakano lye. Shoka otashi ulike nkene e li omunamutimahenda nomunahole. Niishewe, molwashoka otwa li tu na ethimbo okumona nkene elalakano lye tali gwanithwa, otatu ilongo oshindji kombinga yaJehova. Otwa kumithwa koombinga dhi ili nodhi ili dhuukwatya we ndhoka dha hololwa—uuyuuki we, ohenda ye, ontalanteni ye, uunongo we wopendjipendji. Omukalo gwopandunge gwaJehova gwokuungaunga nompata yi na ko nasha nuunamapangelo weshito alihe—uuthemba we wokupangela—otayi ulike sigo aluhe oshili kutya omukalo gwe gwokupangela ogu li gwa dhenga mbanda. Otatu zimine pamwe nomuyapostoli Paulus tatu ti: “Uule mbuka owuuyamba nowoondunge nowuunongo waKalunga u thike peni! Omapangulo ge ohaga konakonwa kulye noondjila dhe olye e dhi tseya!”—Aaroma 11:33.
Ompito yokuulika eigandjo lyetu
13. Ompito yini tu na ngele tatu mono iihuna, noshike tashi ke tu kwatha okwiinyenga pandunge?
13 Oyendji yomaapiya yaKalunga oye li moonkalo moka ye na okwiidhidhimikila okumona iihuna. Okumona iihuna kwawo otaku tsikile molwashoka Kalunga ina hanagula po natango aakolokoshi nokweetela ishewe aantu egwaneneno ngaashi e shi hunganeka. Mbela shoka oshi na oku tu yemateka? Nenge oonkalo dha tya ngaaka otatu vulu oku dhi tala ko dhi li oompito dhokukala tu na ombinga mokuulika kutya Ondiaboli oyo omufundja? Otatu vulu okumona oonkondo dhoku shi ninga ngele tatu kaleke momadhiladhilo eindilo ndika: “Omumwandje, kala u na oondunge, ngu u nyanyudhe omwenyo gwandje, [opo ndi vule okuyamukula ngoka ta lundile ndje, NW].” (Omayeletumbulo 27:11) Satana ngoka ta lundile Jehova, ota ti kutya aantu ngele oya kanitha iiniwe yawo nenge ngele taya mono iihuna palutu otaya ka pa Kalunga uusama notaye ke mu tuka nokuli. (Job 1:9-11; 2:4, 5) Otatu nyanyudha omutima gwaJehova ngele tatu ulike okupitila muudhiginini wetu kuye nonando tu li muudhigu, kutya shoka kashi shi shoshili shi na ko nasha natse.
14. Omauwanawa geni tatu vulu okumona, ngele tatu kala twi inekela Jehova nuuna tatu makelwa?
14 Ngele tatu kala twi inekela Jehova nuuna tatu makelwa, otatu vulu okukala tu na omaukwatya ge na ongushu. Pashiholelwa, Jesus molwuuwehame mboka a mono, okwi “ilongo evuliko” momukalo ngoka inee gu tseya nale. Tse wo otatu vulu okwiilonga sha momamakelo getu molwaashoka otatu vulu okukala tu na ontalanteni, eidhidhimiko nolupandu olunene okupandula oondjila dhaJehova dhuuyuuki.—Aaheberi 5:8, 9; 12:11; Jakob 1:2-4.
15. Ongiini yalwe taya vulu okumona mo uuwanawa ngele tatu idhidhimikile okumona iihuna?
15 Yalwe otaya ka mona shoka tatu ningi. Molwaashoka otatu idhidhimike omolwohole yetu yokuhola uuyuuki, yamwe yomuyo otashi vulika konima yethimbo taya ka mona kutya oolye Aakriste yashili nena. Nongele taya hangana natse mokulongela Kalunga, otaya vulu okumona omalaleko nuuyamba gomwenyo gwaaluhe. (Mateus 25:34-36, 40, 46) Jehova nOmwana oya hala aantu ya kale nompito ndjoka.
16. Okutala ko kwetu okumona iihuna paumwene oku na ngiini ekwatathano nuukumwe?
16 Kashi shi tuu oshiwanawa ngele tatu tala ko nokuli oonkalo oondhigu dhi li oompito dhokuulika eigandjo lyetu kuJehova nosho wo okulonga ehalo lye! Ngele tatu shi ningi, otashi vulu okuulika kutya otu li shili muukumwe naKalunga naKristus. Jesus okwa galikana Jehova molwAakriste ayehe yashili, ta ti: “Haambaka [aalongwa ye mboka a li ha kala nayo] ayeke tandi ya galikanene, aawe, naamboka wo taa itaalithwa ndje okoohapu dhawo, ayehe opo ya kale yamwe, ngaashi ongoye, Tate, u li mungame nangame ndi li mungoye, noyo wo ya kale mutse.”—Johannes 17:20, 21.
17. Einekelo lini tatu vulu okukala tu na ngele tatu kala aadhiginini kuJehova?
17 Ngele otu li aadhiginini muJehova, ote ke tu pa ondjambi onene. Oohapu dhe otadhi ti: “Kaleni mwi ikolelela, mwaa tenguke, aluhe aalaadhi omoshilonga shOmuwa, mu kale mu shi shi, oshilonga sheni kashi shi osima omOmuwa.” (1 Aakorinto 15:58) Otadhi ti wo: “Kalunga ke shi omugoyokithi, a dhimbwe andola iilonga yeni nohole yeni mokusimanekitha edhina lye.” (Aaheberi 6:10) Jakob 5:11 ota ti: “Tala, ohatu simaneke aanelago oomboka yi idhidhimike; eidhidhimiko lyaJob mwe li uvu, nehulilo e li pewa kOmuwa omwe li mono, oshoka Omuwa oye omunamutimahenda nomunalukeno.” Oshilanduliko shaJob osha li shike? “Okuhugunina [kwaJob] Omuwa kwe ku yambeke, ku vule nkoka kwotango kwe.” (Job 42:10-16) Dhoshili, Jehova ‘mboka taye mu kongo ote ya pe ondjambi.’ (Aaheberi 11:6) Noinatu tegelela tuu ondjambi onene—omwenyo gwaaluhe moparadisa kombanda yevi!
18. Oshike tashi ka ningilwa lwahugunina omadhimbuluko omaehameki ngoka tashi vulika tu na?
18 Epangelo lyUukwaniilwa waKalunga otali ka kutha po uuwinayi auhe mboka wa ningilwa aantu uule woomvula omayuvi dha piti. Pethimbo ndyoka otapu ka kala enyanyu enene noonkondo li vule okumona iihuna kehe tatu mono ngashingeyi. Itatu ka piyaganekwa komadhiladhilo omawinayi gokudhimbulukwa okumona iihuna kwonale. Omadhiladhilo niilonga tayi tungu mbyoka tayi ka kala monkalamwenyo yaantu esiku kehe muuyuni uupe, otayi ka dhima po kashona nakashona omadhimbuluko omaehameki. Jehova ota ti: “Ongame otandi shiti egulu epe [epangelo epe lyUukwaniilwa womegulu tali ka pangela aantu] nevi epe [uulipamwe waantu aayuuki]. Mbiyaka yonale ihayi dhimbulukiwa we, nongaashi kaku na ngoka, te yi idhiladhilile momwenyo gwe, aawe. Otamu ka [ligolela] nokunyanyukilwa aluhe ooshika, tandi ke shi [shita].” Dhoshili, muuyuni uupe waJehova, aayuuki otaya ka vula okutya: “Evi alihe lya fudha tali gondjo, oyo notaa nyanyukwa pombanda.”—Jesaja 14:7; 65:17, 18.
Oonkundathana dhokweendulula
• Jehova oku ulike ngiini momukalo gwe eleka esimaneko enene okusimaneka edhina lye, nonando okwe etha uukolokoshi u kale po?
• Ongiini okwiidhidhimikila kwaKalunga “iiyuma yondjahi” kwe shi ningi nokuli tashi wapa opo tu mone uuwanawa mesilohenda lye?
• Otu na okukambadhala okutala ko ngiini oonkalo ndhoka dhe tu etela okumona iihuna?
[Omathano pepandja 67]
Jehova ‘okuhugunina kwaJob okwe ku yambeke, ku vule nkoka kwotango kwe’