Ontopolwa ontihetatu

‘Ekondjo okukondjitha oombepo dhuuwinayi’

1. Omolwashike tu na ohokwe okutseya oshindji kombinga yiilonga yoombepo dhuuwinayi?

AANTU oyendji ohaya dhini edhiladhilo kutya oku na oombepo dhuuwinayi. Ihe shika kashi shi oshinima shokudhinwa. Kutya nduno aantu oye shi itaala nenge hasho, oombepo dhuuwinayi oko dhi li, notadhi kambadhala okuthininika kehe gumwe. Aalongeli yaJehova nayo ohaya thininikwa kudho. Dhoshili, oyo unene tuu ye li iiyodhekwa. Omuyapostoli Paulus otu ukitha eitulomo lyetu koshili ndjika, ta ti: “Ekondjo lyetu kali shi okukondjitha onyama nombinzi, aawe, otu na okukondjitha aawa [ihaa monika] naanankondo naapangeli yuuyuni womilema ndhika, oombepo dhuuwinayi meyalelo.” (Aaefeso 6:12) Pethimbo lyetu ethininiko ndyoka hali etwa koombepo dhuuwinayi olya adha oshitsa shopombanda inaashi monika nando onale molwashoka Satana oku umbwa mo megulu nokwa geya noonkondo, e shi kutya ethimbo lye oli li ko efupi.—Ehololo 12:12.

2. Oshi li ngiini tashi wapa kutse okusindana mekondjo okukondjitha oombepo dhi na oonkondo dhi vule dhaantu?

² Mbela otashi wapa ngaa okusindana mekondjo okukondjitha oombepo ndhoka dhi na oonkondo dhi vule dhaantu? Eeno, ihe omokupitila owala meinekelo lya kola okwiinekela Jehova. Otu na okupulakena kuye nokuvulika kOohapu dhe. Ngele tatu shi ningi, otatu vulu okuyanda eyonuko enene lyopalutu, lyopamikalo nolyopamadhiladhilo ndyoka lya ningilwa mboka ye li kohi yepangelo lyaSatana.—Jakob 4:7.

Aapangeli yuuyuni meyalelo

3. Oolye taya ka patanekwa nonyanya kuSatana, nongiini?

³ Jehova ote tu hokololele sha yela onkalo yuuyuni ngaashi e yi wete pataloko lye okuza megulu. Okwa pe omuyapostoli Johannes emoniko moka Satana ta popiwa e li “oshikoko oshinene oshitiligane sha fa omulilo.” Okwa li i ilongekidha okuhanagula po ngele tashi wapa Uukwaniilwa waKalunga wopaMessias nziya sho wa valwa megulu mo 1914. Sho Satana inee shi pondola, okwe etitha omapataneko gonyanya ogendji kombanda yaakalelipo yUukwaniilwa mboka yokombanda yevi. (Ehololo 12:3, 4, 13, 17) Ongiini mbela Satana a li ta ka hinga iita mbyoka? Omokupitila maakalelipo ye yopantu.

4. Olye onzo yoonkondo ndhoka omapangelo gopantu ge na, notu shi shi ngiini?

⁴ Johannes okwa li u ulikilwa ishewe oshilikama shi na omitse heyali nooniga omulongo, shoka sha pewa oonkondopangelo “dhokupangela iilongo ayihe niigwana nomalaka naapagani.” Oshilikama shoka otashi thaneke omulandu aguhe gwopapolotika muuyuni auhe. Johannes okwa li a lombwelwa kutya “oshikoko [Satana Ondiaboli] shiyaka oshe shi pa epangelo lyasho noshipangelapundi shasho noonkondo oonene.” (Ehololo 13:1, 2, 7) Dhoshili, Satana oye onzo yoonkondo noonkondopangelo dhomapangelo gopantu. Onkee ano, ngaashi omuyapostoli Paulus a nyola, ‘aapangeli yuuyuni’ yashili oyo “oombepo dhuuwinayi meyalelo,” mboka taya wilike omapangelo gopantu. Ayehe mboka ye na ehalo okulongela Jehova oye na okuuva ko nawa shoka shika tashi ti.—Lukas 4:5, 6.

5. Aapangeli yopapolotika otaya gongelwa ngashingeyi ya ninge shike?

⁵ Nonando aapangeli oyendji yopapolotika ohaya ti kutya oye li aalongelikalunga, kapu na shimwe shomiigwana shoka shi igandja kelelo lyaJehova nenge kOmukwaniilwa gwasho ngoka a langeka po, Jesus Kristus. Ayihe otayi kondjo ya mana mo opo yi kaleke po oonkondo dhayo. Ngaashi ehokololo lyomEhololo tali ulike, “oombepo dhoompwidhuli” otadhi hiyi nena aapangeli yuuyuni ya “hinge iita esiku enene lyaKalunga, omupangeli gwaayihe” puHarmagedon.—Ehololo 16:13, 14, 16; 19:17-19.

6. Omolwashike twa pumbwa okukala twa kotoka opo tu yande okuhekwa tu yambidhidhe onkalelo yaSatana?

⁶ Onkalamwenyo yaantu otayi gumwa kehe esiku komaipumomumwe gopapolitika, gopankalathano, gopamahupilo nosho wo gopalongelokalunga ngoka taga topola aantu. Momaipumomumwe ngaka, olundji aantu—pakupopya nenge pailonga—ohaya hogolola ombinga yontumba hoka taya gama yopashigwana, yopamuhoko, ongundu yelaka lyawo, nenge ongundu yopankalathano moka yo ye li. Nokuli nuuna aantu itaaya kutha ombinga shu ukilila meipumomumwe lyontumba, olundji ohaya kala ye hole ombinga yimwe komeho yonkwawo. Ihe kutya nduno otaya yambidhidha lye nenge oshinima shontumba, mbela olye naanaa ngono taya yambidhidha? Ombimbeli otayi popi sha yela tayi ti: “[Uuyuni] auhe ou li mepangelo lyomwiinayi.” (1 Johannes 5:19, KB) Ongiini nduno omuntu to vulu okuyanda okupukithwa pamwe naantu yalwe? Omokuyambidhidha owala shu udha Uukwaniilwa waKalunga nomokudhiginina thiluthilu okwaa na ombinga momaipumomumwe guuyuni.—Johannes 17:15, 16.

Omikalo dhiineya dhOmwiinayi

7. Omakoto gaSatana ogu ulikwa ngiini mokulongitha kwe elongelokalunga lyiifundja?

⁷ Mondjokonona ayihe, Satana okwa kala nokulongitha omahepeko paohapu nopalutu okupilula ko aantu kelongelokalunga lyashili. Okwa longitha wo omikalo dhomakoto—iilonga nosho wo omikalo dhiineya. Okwa kaleke pamakoto aantu oyendji momilema okupitila melongelokalunga lyiifundja note ya dhiladhilitha kutya otaya longele Kalunga. Molwashoka kaye na ontseyo yashili yokutseya Kalunga nohole yokuhola oshili, otaya vulu okufuulwa komalongelokalunga ge na ko nasha nuumpulile notaga pendutha omaiyuvo nenge ya kumithwe kiilonga yoonkondo yago. (2 Aatessalonika 2:9, 10) Ihe otatu londodhwa kutya nokuli noyamwe yomwaamboka ya li nale ye na ombinga melongelokalunga lyashili, “yamwe otayi iteka . . . notaa landula oombepo oohongololi nomalongo goompwidhuli.” (1 Timoteus 4:1) Ongiini mbela shika tashi vulu okuningwa?

8. Satana ota vulu ngiini oku tu hilila melongelokalunga lyiifundja nokuli nonando otatu longele Jehova?

⁸ Ondiaboli otayi tu kondjitha niineya mokulongitha omaunkundi getu. Mbela otu na natango uumbanda wokutila aantu? Ngele osho otashi vulika tatu ki igandja kethininiko lyaapambele nenge lyaashiinda tu kuthe ombinga miilonga yi ikolelela komalongelokalunga giifundja. Otu na mbela uuntsa? Ngele osho otashi vulika tu uve nayi uuna tatu pewa omayelepukululo nenge uuna yalwe itaaya taamba ko omadhiladhilo ngoka tatu popile. (Omayeletumbulo 15:10; 29:25; 1 Timoteus 6:3, 4) Pehala lyokulundulula omataloko getu ga kale taga tsu kumwe noshiholelwa shaKristus, otashi vulika tu kale twa hala okupulakena kwaamboka taya ‘nywitha omakutsi getu’ moku tu lombwela kutya okulesha owala Ombimbeli nokukala nonkalamwenyo ombwanawa osha gwana. (2 Timoteus 4:3) Kutya nduno otwa ya melongelokalunga lilwe nenge otatu longele owala Kalunga komukalo ngoka twa hala hasho sha simana kuSatana, ihe oshampa owala itaatu longele Jehova komukalo ngoka a popya okupitila mOohapu dhe nomehangano lye.

9. Satana oha longitha ngiini nomakoto omahalo gokuya momilalo opo a tsakanithe omalalakano ge?

⁹ Satana oha hongolola wo aantu nomakoto ya mbilipaleke omahalo gawo gopaunshitwe momikalo dha puka. Shoka okwe shi ningi shi na ko nasha nehalo lyokuya momilalo. Aantu oyendji muuyuni ohaye ekelehi uuyogoki wopamikalo wOmbimbeli, e taya tala ko omilalo pokati kaantu inaaya hokanathana inaadhi puka nenge dhi li omukalo tagu ulike kutya yo oye li aakuluntu. Ihe oshi li ngiini kombinga yaamboka ya hokana nenge ya hokanwa? Oyendji ohaya yono ondjokana. Nokuli nongele gumwe a ya pondje yondjokana, aantu oyendji ohaya hengathana nenge ya topoke opo ya vule okukala nagumwe i ili. Iineya yaSatana oyo okunwetha mo aantu ya kale tayi inyanyudha ngashingeyi noku ya heka yi ipwililikile iilanduliko mbyoka tayi ke ya adha konima yethimbo ele mbyoka itaayi ya gumu owala oyo ayeke nenge yalwe, ihe otayi gumu unene tuu ekwatathano lyawo naJehova nOmwana.—1 Aakorinto 6:9, 10; Aagalati 6:7, 8.

10. Omokupitila moshike Satana ha kambadhala okuyona po iikala yetu yankene hatu tala ko oluhondelo nosho wo elongithonkondo?

¹⁰ Omahalo galwe gopaunshitwe ogo omainyanyudho. Ngele omawanawa, otaga vulu okutalaleka aantu palutu, pamadhiladhilo nopamaiyuvo. Ihe mbela ohatu inyenge ngiini ngele Satana ta longitha nomakoto oompito dhomainyanyudho okugamuna ko omadhiladhilo getu kwaangono gaKalunga? Pashiholelwa, otu shi kutya Jehova oku tonde oluhondelo nelongithonkondo. Mbela ngele ookino, ooprograma dhokoTV, nenge omauliko momahala gomaudhano tagu ulike iinima mbyoka, ohatu kala owala twa kuutumba twa mwena e tatu tsikile oku yi tala? Dhimbulukwa wo kutya Satana ota ka sa oshimpwiyu opo iinima ya tya ngaaka yi kale iiwinayi noonkondo sho ethimbo lyokuumbilwa kwe molumbogo tali hedha popepi, omolwashoka “aantu aawinayi naakotokeli otaa tsikile ko muuwinayi, aahongololi naahongololwa.” (2 Timoteus 3:13; Ehololo 20:1-3) Onkee ano otwa pumbwa okukala aluhe twa kotokela omakotokelo gaSatana.—Genesis 6:13; Epsalmi 11:5; Aaroma 1:24-32.

11. Omomikalo dhini nokuli omuntu ngoka e shi oshili kombinga yuumpulile tashi vulika a yulwe kuwo ngele ina kotoka?

¹¹ Otu shi wo kutya mboka haya kutha ombinga muumpulile momukalo kehe—okwaanekela, okuloga, nenge okukambadhala okupopya noonakusa—oye li iihuna koshipala shaJehova. (Deuteronomium 18:10-12) Ngele shino tatu kala tatu shi dhimbulukwa, itatu ka dhiladhila nando okupula omayele kaapopi noombepo, noitatu ke ya taamba nando momagumbo getu ya longele mo iilonga yawo yuumpwidhuli. Ihe mbela otatu ka pulakena kuyo ngele taya holoka koTV yetu nenge koInternet? Itatu ka pitika nando okupangwa konganga. Ihe mbela otatu ka manga okangodhi poshikesho shokahanona ketu tatu dhiladhila kutya otake ke ka gamena kuuwinayi? Otu shi kutya Ombimbeli otayi pangula okumanga yalwe niiketi. Ihe mbela otatu ka konga “iihemba” yontumba koonganga?—Aagalati 5:19-21.

12. (a) Omusika ohayi longithwa ngiini yi tu dhiladhilithe shi na ko nasha nomadhiladhilo ngoka tu shi kutya oga puka? (b) Omizalo dhomuntu, omuhingo gwe gwokwiikamula, nenge omukalo gwe gwokupopya ongiini tashi vulika gu ulike kutya okwa hokwa mboka onkalamwenyo yawo inaayi hokiwa kuJehova? (c) Otwa tegelelwa tu ninge shike ngele otwa hala okuyanda okukala iihakanwa yomikalo dhiineya yaSatana?

¹² Ombimbeli otayi ti kutya oluhondelo nonyata kehe kayi na nokuli okutumbulwa (nomainyengotompelo inaaga yela) mokati ketu. (Aaefeso 5:3-5) Ihe ongiini ngele iinima mbyoka otayi tumbulwa momusika ndjoka yi na ongowela yinyanyudha, omungengulilo omwaanawa, nenge omutono tagu faalele? Mbela otatu ka tameka okweendulula oohapu ndhoka tadhi tanga omilalo pondje yondjokana, okulongitha iingangamithi omolwomainyanyudho, nosho wo iilonga yilwe yuulunde? Otu shi kutya katu na okuholela omukalo gwonkalamwenyo yaantu mboka haya kutha ombinga miinima ya tya ngaaka. Ihe mbela ohatu kala twa hala okumonika twe ya fa mokuholela omukalo gwawo gwokuzala, omuhingo gwawo gwokwiikamula, nenge omukalo gwawo gwokupopya? Satana ita longitha tuu omikalo dhomakoto okuheka aantu ya tse kumwe nomukalo gwe gwokudhiladhila gwa yonuka! (2 Aakorinto 4:3, 4) Ngele inatu hala okuninga iihakanwa yomikalo dhe dhiineya, otu na okuyanda okufalwafalwa kuuyuni. Otu na okudhimbulukwa kutya oolye mboka ye li ‘aapangeli yuuyuni womilema ndhika’ nokukondjitha twa mana mo enwethomo lyawo.—Aaefeso 6:12; 1 Petrus 5:8.

Twi ilongekidha okukala aasindani

13. Ongiini tashi wapa opo kehe gumwe gwomutse a sinde uuyuni mboka tau pangelwa kuSatana nonando inatu gwanenena?

¹³ Manga Jesus inaa sa, okwa lombwele aayapostoli ye a ti: “Ikoleleni, ongame nda sindi [uuyuni].” (Johannes 16:33) Yo wo otaya vulu okukala aasindani. Oomvula 60 lwaampono konina yaashono, omuyapostoli Johannes okwa nyolele ta ti: “Olye ngo ta sindi uuyuni, ngele kee shi oye nguka kwi itaale, Jesus oye Omuna gwaKalunga.” (1 Johannes 5:5) Eitaalo lya tya ngaaka ohatu li ulike ngele tatu vulika komalombwelo gaJesus e tatu kala twi inekela Oohapu dhaKalunga, ngaashi Jesus e shi ningi. Oshike mbela ishewe sha pumbiwa? Otu na wo okukala popepi negongalo moka oye e li Omutse. Ngele twa yono, otu na okwiiyela ombedhi lela nokupula edhiminopo kuKalunga kekankameno lyeyambo lyaJesus. Komukalo nguka, nonando inatu gwanenena nohatu ningi omapuko, otatu vulu wo okukala aasindani.—Epsalmi 130:3, 4.

14. Lesha Aaefeso 6:13-17, e to longitha omapulo nomanyolo ngoka ga gandjwa mokatendo haka shi li ekankameno lyokukundathana omauwanawa ngoka haga zi moshikondjitho kehe shopambepo.

¹⁴ Opo tu shi pondole, otu na okuzala “iikondjitho ayihe yaKalunga,” twaa ethe po nando oshimwe shomuyo. Yanuna Ombimbeli yoye kAaefeso 6:13-17, e to lesha okutongomona kwayo iikondjitho mbyoka. Opo nduno, yamukula omapulo ngoka taga landula e to dhiladhila nkene to vulu okumona uuwanawa megameno ndyoka hali gandjwa koludhi kehe lwoshikondjitho.

“Mwi imangeleka oshili moombwetelo”

Nonando otu shi oshili, ongiini ekonakono ihaali faula, okutedhatedha oshili yOmbimbeli nokukala pokugongala tayi tu gamene? (1 Aakorinto 10:12, 13; 2 Aakorinto 13:5; Aafilippi 4:8, 9)

“Iipakosolwa yiiyela yuuyuuki poontulo”

Omithikampango dhuuyuuki odhalye? (Ehololo 15:3)

Yelitha nkene tashi etele omuntu oshiponga pambepo ngele ita landula oondjila dhaJehova dhuuyuuki. (Deuteronomium 7:3, 4; 1 Samuel 15:22, 23)

“Neilongekeko tali zi mevaangeli lyombili, li ninge oongaku koompadhi dheni”

Ongiini tashi tu gamene ngele tatu longitha oompadhi dhetu okuya tu ka popye naantu kombinga yomasiloshimpwiyu gaKalunga ge na ko nasha nombili? (Epsalmi 73:2, 3; Aaroma 10:15; 1 Timoteus 5:13)

“Ehuyanza lyeitaalo”

Ngele otu na eitaalo ndyoka lya kola lela, otatu ki inyenga ngiini ngele tatu tsakaneke oonkambadhala ndhoka tadhi tu ningitha tu kale nomalimbililo nenge twa tila? (2 Aakwaniilwa 6:15-17; 2 Timoteus 1:12)

‘Egala lyosheela olyehupitho’

Etegameno lyehupitho otali kwathele ngiini omuntu opo kaa yulwe komaipulo ga pitilila ge na ko nasha niiniwe yopamaliko? (1 Timoteus 6:7-10, 19)

‘Egongamwele lyombepo’

Okushike tu na aluhe okwiinekela uuna tatu kondjitha omaponokelo ngoka taga ponokele uupambepo wetu nenge wayalwe? (Epsalmi 119:98; Omayeletumbulo 3:5, 6; Mateus 4:3, 4)

Oshike ishewe sha pumbiwa opo tu shi pondole miita yetu yopambepo? Oshi na okuningwa lungapi? Oshi na okuningilwa oolye? (Aaefeso 6:18, 19)

15. Ongiini tatu vulu okukatuka oonkatu dha mana mo molugodhi lwopambepo?

¹⁵ Tu li aakwiita yaKristus, otu li oshitopolwa shetangakwiita enene ndyoka tali kondjo iita yopambepo. Ngele tatu kala twa tonata nokulongitha nawa iikondjitho ayihe yaKalunga, itatu ka monithwa oshiponga miita mbika. Pehala lyaashono, otatu ka kala ekwatho tali koleke aapiya ooyakwetu yaKalunga. Otatu ka kala twi ilongekidha notu na ehalo okukatuka oonkatu dha mana mo, mokutaandelitha onkundana ombwanawa yUukwaniilwa waKalunga wopaMessias, epangelo lyomegulu ndyoka Satana ta pataneke nonyanya.

Oonkundathana dhokweendulula

• Omolwashike aalongeli yaJehova haya kala kaaye na nando ombinga yasha momaipumomumwe guuyuni?

• Omikalo dhiineya dhimwe dhini Satana ha longitha okuhanagula po uupambepo wAakriste?

• Ongiini iikondjitho yopambepo mbyoka ya gandjwa kuKalunga tayi tu gamene miita yetu yopambepo?

[Omathano pepandja 76]

Iigwana tayi gongelelwa Harmagedon