Ongahelipi hatu dulu okukondjifa eendemoni?

‘Ovaengeli venya, ava va li inava diinina oulenga wavo, ndele va fiya po omitumba davo vene, Kalunga okwe va idilila momulaulu, momapando aalushe, va diininwe ngaha fiyo okefiku olo linene letokolo.’ — JUDAS 6.

1, 2. Omapulo elipi a holoka po e na sha naSatana Ondiaboli neendemoni?

OMUYAPOSTOLI Petrus okwe tu londwela a ti: “Kaleni mu nelidiliko nomwa pashuka, omutondi weni, Satana, ohe mu dingilile ngaashi onghoshi hai kumbu, nota kongo ou te mu xwake po.” (1 Petrus 5:8) Omuyapostoli Paulus okwa ti: “Inandi hala mu kale mu nekwatafano neendemoni. Itamu dulu okunwa meholo lOmwene nomeholo leendemoni, itamu dulu okulya koshililo shOmwene nokoshililo sheendemoni.” — 1 Ovakorinto 10:20, 21.

² Ndele mbela Satana Ondiaboli neendemoni ovo oolyelye? Ove uya po ngahelipi nonaini? Mbela ova shitwa kuKalunga? Ove na eenghono di fike peni okunwefa mo ovanhu? Ongahelipi hatu dulu okukondjifa enwefemo laSatana neendemoni?

Satana neendemoni ova dja peni?

3. Osha enda ngahelipi opo omweengeli umwe waKalunga a ninge Satana Ondiaboli?

³ Pehovelo londjokonona yovanhu, eshi ovanhu votete va li moshikunino shaEden, omweengeli umwe waKalunga okwa li a ninga omunashibofa. Omolwashike mbela a ningila omunashibofa? Omolwaashi ka li a wanenwa kondodo oyo a li e na moshitukulwa shehangano laJehova shomeulu. Eshi Adam naEva va shitwa, omweengeli oo okwa li a hala va kale tava dulika kuye noku mu ilikana, onghee okwe va heka vaha kale tava dulika kuKalunga kashili novehe mu ilikane. Mokutukululila Jehova oshibofa nomokunwefa mo ovalihomboli votete va kale tava longo oulunde, omweengeli oo okwe lininga ye mwene Satana Ondiaboli. Mokweendela ko kwefimbo, ovaengeli vamwe ova li yo va ninga ovanashibofa ngaashi Satana. Ova li ve shi ulika ngahelipi kutya ova ninga ovanashibofa? — Genesis 3:1-6; Ovaroma 5:12; Ehololo 12:9.

4. Ofimbo Eyelu lopefimbo laNoa inali uya, ovaengeli vamwe ovanashibofa ova ninga shike?

⁴ Omishangwa da nwefwa mo otadi tu lombwele kutya ofimbo Eyelu linene lopefimbo laNoa inali uya, ovaengeli vamwe ova li tava tale ovakainhu vokombada yedu nokahalu. Ombibeli oya ti: “Ovana ovamati vaKalunga [vomeulu] va mona ovana oukadona vovanhu va li vawa, ndele vo ve likufila ovakainhu aveshe ava va hala.” Omolwekwatafano lopamilele novakainhu ovo, ova li va dala ounona veehonde mbali. Oludalo olo ola li hali ifanwa Ovatongolume. (Genesis 6:2-4) Kungaho, oishitwa oyo yopamhepo kaya li ya dulika kuKalunga, noye shi ulika kutya oya li ye liameka kuSatana.

5. Oshike sha li sha ningwa po shi na sha novaengeli ovanashibofa eshi Jehova a li a hanauna po ovanhu nEyelu linene?

⁵ Eshi Jehova a yelula po ounyuni winya nEyelu, Ovatongolume nooina ova li va hanaunwa po. Ovaengeli ovanashibofa ova li va fiya po omalutu avo omakwadu ndele tava lundulukile vali momalutu avo opamhepo. Ndele Kalunga ka li e va pitika va shune vali ‘pomitumba davo’ opo va yambukile. Ponhele yaasho, okwe va idilila ‘momilaulu’ dopamhepo. — Judas 6; 2 Petrus 2:4.

6. Eendemoni ohadi pukifa ovanhu ngahelipi?

⁶ Okudja eshi ovaengeli ovo ovanawii, ile tu tye eendemoni, va kanifa “omitumba davo” moshitukulwa shehangano laJehova shomeulu, ova kala tava longele kumwe naSatana, tava yambidida omalalakano aye mai. Okudja opo, eendemoni kada li vali hadi dulu okulundulukila momalutu omakwadu. Ndele nande ongaho, otadi dulu okuxwaxwameka ovalumenhu novakainhu va ye momilele da nyata. Eendemoni ohadi pukifa yo ovanhu okupitila moumhulile, ngaashi oulodi, oundudu nosho yo okunyanekela. (Deuteronomion 18:10-13; 2 Omafimbo 33:6) Ashike eendemoni nosho yo Ondiaboli ova teelela oku ka hanaunwa po fiyo alushe. (Mateus 25:41; Ehololo 20:10) Lwopokati opo, ofimbo inava hanaunwa po, otwa pumbwa oku va kondjifa twa pama. Onghee hano, oshiwa okukonakona kutya Satana neendemoni ove na eenghono di fike peni, nonokutya ongahelipi hatu dulu oku va kondjifa nomupondo.

Satana oku na eenghono di fike peni?

7. Enwefemo laSatana ola pondola shi fike peni?

⁷ Satana okwa kala ta lundile Jehova okudja nale. (Omayeletumbulo 27:11) Okwa nwefa mo yo ovanhu vahapu. Johannes wotete 5:19 ota ti: ‘Ounyuni aushe ou li mepangelo lomunawii.’ Nomolwaasho Ondiaboli ya li tai heke Jesus, tai ti kutya otai mu pe eenghonopangelo nefimano ‘loilongo aishe yomounyuni’ ngeenge okwe i twile eengolo. (Lukas 4:5-7) Omuyapostoli Paulus okwa ti: “Evangeli letu ngenge la tuvikwa, ola tuvikwa muava tava ka kanifwa, muava ve he neitavelo, eendunge davo da twikifwa kukalunga kefimbo lounyuni eli [Satana], vo itava minikilwa kouyelele wevangeli loshinge shaKristus, Oye ou efano laKalunga.” (2 Ovakorinto 4:3, 4) Satana “omunaipupulu naxe yayo,” ndele ohe lifefa “omwengeli wouyelele.” (Johannes 8:44; 2 Ovakorinto 11:14) Satana oku na eenghono noha longifa eenghedi di lili noku lili opo a pofipaleke ovapangeli vopanhu novapangelwa vavo. Okwa pukifa ovanhu vahapu okupitila momitotolombo nomomahongo omalongelokalunga oipupulu.

8. Ombibeli otai ulike kutya Satana oku na eenghono di fike peni?

⁸ Eenghono daSatana nosho yo enwefemo laye oya li i liwetikile pefimbo lomuprofeti Daniel, omido 2 500 nasha da pita. Eshi Jehova a li a tuma omweengeli wonhumba a ka twe Daniel omukumo, omweengeli oo okwa li a shakeneka ondemoni, “omweengeli omukulunhu woshilongo shaPersia,” oyo ya li tai mu kelele ko. Omweengeli ou omudiinini okwa li a kelelwa oule womafiku 21 fiyo osheshi “Mikael umwe womovaengeli ovakulunhu” e uya oku mu kwafela. Ehokololo olo ola popya yo kombinga yondemoni vali imwe, “omwengeli omukulunhu waGreekland.” (Daniel 10:12, 13, 20) MEhololo13:1, 2, Satana ota popiwa e li “ongadu” oyo ya pa oshilyani “eenghono dayo nolukalwapangelo layo nepangelonghono linene.” Oshilyani osho otashi faneke onghalelo yopapolotika.

9. Ovakriste otava lwifa oolyelye?

⁹ Onghee hano, itashi tu kumwifa eshi omuyapostoli Paulus a shanga a ti: ‘Ekondjo letu kali fi okukondjifa ombelela nohonde, ndelenee otu nokulwifa oovene novanaenghono, novapangeli vounyuni ou womilaulu, neemhepo dowii mevalelwa.’ (Ovaefeso 6:12) Nokuli nokunena eendemoni otadi longo mewiliko laSatana Ondiaboli, tadi nwefa mo ovapangeli vopanhu nosho yo ovanhu mounyuni aushe, tadi va xwaxwameke va longe ominyonena, ngaashi omadipao opamihoko, oukulo nosho yo omadipao makwao oshiningilewina. Paife natu ka konakoneni nghee hatu dulu okukondjifa nomupondo oishitwa oyo yopamhepo inaenghono.

Ongahelipi hatu dulu okukondjifa enwefemo laSatana neendemoni?

10, 11. Ongahelipi hatu dulu okukondjifa Satana novaengeli vaye ovanawii?

¹⁰ Itatu dulu okukondjifa Satana novaengeli vaye ovanawii keenghono detu vene ile hatu longifa eendunge detu vene. Nomolwaasho, Paulus okwe tu ladipika a ti: “Lipamekeni mOmwene nomeenghono domepangelonghono laye.” Otwa pumbwa filufilu eameno laKalunga. Paulus okwa weda ko a ti: “Lidikeni oilwifo aishe yaKalunga, opo mu dule okufikamena omakonda omuyelani; . . . tambuleni oilwifo aishe yaKalunga, mu shiive okulipopila mefiku lii nokukala ofika eshi mwa longa aishe.” — Ovaefeso 6:10, 11, 13.

¹¹ Paulus okwa ladipika Ovakriste vakwao oikando ivali, ve lidike ‘oilwifo aishe yaKalunga.’ Oshitya “aishe” otashi ulike kutya katu na okukwata okahetengi nande oshimwe shomoilwifo yetu yokukondjifa eendemoni, oyo twa pewa kuKalunga. Oilwifo yopamhepo ya fimanenena ilipi Ovakriste va pumbwa okulihomateka nopehe na okwoongaonga opo va dule okukondjifa eendemoni?

Ongahelipi hatu dulu okukala ‘ofika twa pama’?

12. Ongahelipi Ovakriste tava dulu okumanga oiya yavo noshili?

¹² Paulus okwa ti: “Kaleni ofika [mwa pama, NW] mwe limanga oshiya sheni noshili, nye mwa djala ponhulo oipapa yoivela youyuki.” (Ovaefeso 6:14) Apa Paulus okwa li ta popi shi na sha noilwifo ivali: ekwamo nosho yo oshipapa shoshivela shoponhulo. Pefimbo laPaulus, ovakwaita ova li hava djala omakwamo a shila nawa opo va amene oiya yavo (sha hala okutya, eenho davo nosho yo oinena yavo), nopo yo va dule okuhomata omaongamukonda avo. Ngaashi naanaa ovakwaita ovo, nafye otwa pumbwa okulimanga filufilu noshili yOmbibeli, oku shi popya pafaneko, opo tu dule okukala metwokumwe nayo. Onghee hano lipula kutya: Mbela ondi na ngoo elandulafano lokulesha Ombibeli efiku keshe? Mbela oukwaneumbo wetu ohau lesha ngoo Ombibeli pamwe? Mbela ohatu konakona ngoo omushangwa wefiku tu li oukwaneumbo? Mbela ohandi endele ngoo pamwe nouyelele oo u li moishangomwa ‘yomupiya omudiinini nomunaendunge’? (Mateus 24:45) Ngeenge osho hatu ningi ngaho, ohatu dulika kekumaido laPaulus. Otu na yo oukasete veevidio nou-DVD, ovo tave tu pe yo ewiliko lopamhepo. Okukala twa diinina oshili otaku ke tu kwafela tu ninge omatokolo opandunge, tuha ye neendjila da puka.

13. Ongahelipi hatu dulu okwaamena omitima detu dopafaneko?

¹³ Oshipapa shoshivela shoponhulo osha li hashi amene onhulo yomukwaita, omutima waye nosho yo oinhimbu ikwao yomeni ya fimana. Omukriste ota dulu okwaamena omutima waye wopafaneko, ounhu waye womeni, mokukulika ohole yokuhola ouyuki waKalunga nokukala metwokumwe nomifikamhango daYe douyuki. Oshipapa shoshivela shoponhulo shopafaneko otashi ke tu kwafela tuha hekule Eendjovo daKalunga. Ngeenge otu ‘tonde eshi shii, nokuhola eshi shiwa,’ ohatu ka kelela eemhadi detu ‘diha lyate nande melila loulunde.’ — Amos 5:15; Epsalme 119:101.

14. Outumbulilo ‘elilongekeko tali di mevangeli lombili li ningeni eenghaku keemhadi deni’ owa hala okutya shike?

¹⁴ Ovakwaita Ovaroma ova li hava djala eenghaku dokwakola opo va dule okukala tava tavakana mouhamba waRoma, tava ende eekilometa omafele kolupadi. Outumbulilo ‘elilongekeko tali di mevangeli lombili li ningeni eenghaku keemhadi deni’ otau ti shike kOvakriste? (Ovaefeso 6:15) Otau ti kutya otu na okukala twe lilongekida okuudifa onghundana iwa yOuhamba waKalunga pomhito keshe tai wapalele. (Ovaroma 10:13-15) Okukala twe lipyakidila moukalele wetu wopaKriste ohaku tu kwafele tuha kokwe kuSatana ‘nomakonda’ aye. — Ovaefeso 6:11.

15. (a) Oshike tashi ulike kutya oshikelelifo sheitavelo osha fimanenena? (b) ‘Oikuti ya xwama omundilo’ ilipi tai dulu okunghundipaleka eitavelo letu?

¹⁵ Paulus okwa twikila ko a ti: “Muaishe kwateni oshikelelifo sheitavelo, mu dule okudima po nasho oikuti yomunawii ya xwama omundilo.” (Ovaefeso 6:16) Omhumbwe yokukala tu na oshikelelifo sheitavelo oya divilikwa koutumbulilo “muaishe,” osho tashi ulike kutya oshilwifo osho osha fimanenena. Otu na okukala neitavelo la kola. Ngaashi ashike oshikelelifo shinene sha li hashi amene omukwaita, eitavelo ohali tu amene ‘koikuti yaSatana ya xwama omundilo.’ Oikuti oyo otai ulike kushike kunena? Otai dulu okukala omalaka a honga, oipupulu nosho yo oshili inai lixwapo oyo hai tandavelifwa kovatondi nokovashunimonima ovo tava kendabala okunghundipaleka eitavelo letu. “Oikuti” oyo otai dulu yo okukala eyeleko lokukala twa hala omaliko, osho tashi tu ningifa tu kale twa pwila mokulanda oinima ihapu oyo tai ndulukwa, ile tu ninge efiyafanepo naavo ve na oikala yokulimonikifa kutya ove na sha. Ovo ve na oikala ya tya ngaho otashi dulika ve na omaumbo manenenene neehauto dondilo ile va kale tave liulike mokukala hava djala omalyenge ondilo noikutu ashike oyo i li momoode. Kashi na nee mbudi kutya vamwe otava ningi shike, otu na okukala neitavelo la kola opo li dule oku tu amena ‘koikuti ya xwama omundilo’ ya tya ngaho. Oshike tashi ke tu kwafela tu kale neitavelo la kola? — 1 Petrus 3:3-5; 1 Johannes 2:15-17.

16. Oshike tashi ke tu kwafela tu kale neitavelo la kola?

¹⁶ Ohatu dulu okweehena popepi naKalunga mokukala hatu konakona Ombibeli pandjikilile nokwiilikana twa mana mo. Otu na okwiindila Jehova a pameke eitavelo letu, fye hatu katuka nee metwokumwe nomailikano etu. Pashihopaenenwa, mbela ohatu lilongekidile nawa ekonakono lOshungonangelo loshivike keshe, opo tu dule oku ka kufa ombinga mokunyamukula pokwoongala? Eitavelo letu otali ka kala la kola ngeenge ohatu konakona Ombibeli nosho yo oishangomwa oyo ya kanghamena kOmbibeli. — Ovaheberi 10:38, 39; 11:6.

17. Ongahelipi hatu dulu ‘okutambula ko embale loshivela lexupifo’?

¹⁷ Lwopexulilo leenghundafana daye di na sha noilwifo yopamhepo, Paulus okwa yandja omayele aa taa ti: ‘Embale loshivela lexupifo li tambuleni, neongamukonda lomhepo, nokutya, eendjovo daKalunga.’ (Ovaefeso 6:17) Embale loshivela ola li hali amene omutwe nouluvi womukwaita, oyo i li ondingandinga yokuninga omatokolo. Sha faafana, eteelelo letu lopaKriste ohali amene omadiladilo etu. (1 Ovatessaloniki 5:8) Ponhele yokukala hatu lipulapula nomalalakano omounyuni nosho yo omaliko, natu kalekeni eteelelo letu lOuhamba momadiladilo ngaashi Jesus a li a ninga. — Ovaheberi 12:2.

18. Omolwashike tu na okukala hatu lesha Ombibeli pandjikilile?

¹⁸ Oshilwifo shimwe vali osho tashi dulu oku tu amena kenwefemo laSatana neendemoni daye osho Eendjovo daKalunga, Ombibeli. Onghee hano, opo tu liamene noshilwifo osho shopafaneko, otu na okukala hatu lesha Ombibeli pandjikilile. Eshiivo lEendjovo daKalunga le lixwa po otali ke tu amena tuha shololifwe koipupulu nokomitotolombo daSatana neendemoni daye nosho yo komasheko ovashunimonima.

‘Ilikaneni alushe’

19, 20. (a) Oshike tashi ka ningilwa Satana neendemoni daye? (b) Oshike tashi ke tu pameka pamhepo?

¹⁹ Mafiku Satana neendemoni daye otava ka idililwa mombwili, ofimbo ounyuni ou woukolokoshi tau ka hanaunwa po. Satana oku shii kutya oku ‘na ko okafimbo kaxupi kongaho.’ Nomolwaasho, okwa handuka neenghono nota lwifa “ava hava diinine oipango yaKalunga ndee ve na ehepaululo laJesus.” (Ehololo 12:12, 17) Onghee hano, otwa pumbwa lela okukondjifa Satana neendemoni daye twa mana mo.

²⁰ Inatu hafa tuu eshi twa ladipikwa tu lidikeni oilwifo aishe yaKalunga! Paulus okwa xulifa eenghundafana daye di na sha noilwifo yopamhepo nekumaido tali ti: “Eshi shi ningeni nomailikano nomaindilo aeshe nokwiilikana alushe mOmhepo ndele [molwaasho] kaleni mwa pashuka moudiinini aushe nokwiilikanena ovayapuki aveshe.” (Ovaefeso 6:18) Eilikano otali dulu oku tu pameka pamhepo notali tu kwafele tu kale oupafi. Hano, natu dulikeni kekumaido laPaulus nokwiilikana alushe, opo tu dule okukondjifa nomupondo Satana neendemoni daye.

Owe li honga shike?

• Satana neendemoni daye ova dja peni?

• Ondiaboli oi na eenghono di fike peni?

• Ongahelipi hatu dulu okukondjifa Satana neendemoni daye?

• Ongahelipi hatu dulu okulidika oilwifo aishe yaKalunga?

[Omafano pepandja 17]

“Ovana ovamati vaKalunga va mona ovana oukadona vovanhu”

[Efano pepandja 19]

Mbela oto dimbuluka oilwifo yetu yopamhepo ihamano?

[Omafano pepandja 21]

Ongahelipi okukonakona Ombibeli, okwiilikana, okwoongala nosho yo oilonga yokuudifa tai dulu oku tu kwafela tu kondjife Satana neendemoni daye?