Ontopolwa ontimulongo nontihamano
“Ohole yeni yokuholathana nayi kale ya kola”
1. Oshike olundji hashi kumitha mboka opo taye ya oshikando shotango kokugongala kwOonzapo dhaJehova?
UUNA aantu taye ya oshikando shotango kokugongala kwOonzapo dhaJehova, olundji ohaya kala ya kuminwa ohole ndjoka hayi ulikwa hoka. Ohaye yi mono mokukundwa hoka haya kundwa nako nosho wo meendathano lyopahole. Aatalelipo piigongi yetu ohaya ndhindhilike wo ohole ndjoka. Omukundaneki gumwe okwa nyola shi na ko nasha noshigongi shimwe a ti: ‘Kaku na gumwe a nwa iingangamithi nenge iikolitha. Kaku na okuyayagana. Kaku na okuundulathana. Kaku na okuthininikathana. Kaku na gumwe ta tukana. Itaku ningwa omashendjo omawinayi nenge ku popiwe elaka lya kaka. Kaku na gumwe ta hili omakaya. Itaku yakwa. Kaku na gumwe te ekelehi uundoha momudhingoloko. Oshinima shika inandi shi mona nando onale.’ Iinima ayihe mbyoka oya li tayi ulike kutya oye na ohole, ndjoka “ihayi holoka nayi, ihayi kongo shayo yene.”—1 Aakorinto 13:4-8.
2. (a) Konima yethimbo, oshike shi na okukala shi iwetikile mokuulika ohole kwetu? (b) Mokuholela Kristus, ohole yoludhi luni twa pumbwa okukala tu na?
2 Ohole yuumwayinathana oyo endhindhiliko tali ndhindhilikitha Aakriste yashili. (Johannes 13:35) Sho tatu koko pambepo, otatu ilongo okuulika ohole pakuudha. Omuyapostoli Paulus okwa galikana opo ohole yAakriste ooyakwawo “yi koke.” (Aafilippi 1:9) Omuyapostoli Johannes oku ulike kutya ohole yetu oyi na okukala yopaiyambo. Okwa nyola ta ti: “Ohole yo yene otwe yi dhimbulula pushika, sho [Omwana gwaKalunga] e tu gandjele omwenyo gwe; ano natse wo otu na okugandjela aamwameme oomwenyo dhetu.” (1 Johannes 3:16; Johannes 15:12, 13) Mbela otatu ka gandjela shili aamwatate oomwenyo dhetu? Nonando olundji inashi pumbiwa tu ya sile, oonkambadhala dhi thike peni mbela hatu ningi ngashingeyi opo tu ya kwathele, nokuli nuuna itaashi tu opalele?
3. (a) Omomukalo guni tatu vulu okuulika ohole yetu pakuudha? (b) Omolwashike sha simanenena okukala tu ninathane ngashingeyi ohole ya kola?
3 Kakele kiilonga yetu mbyoka tayi ulike ombepo yeiyambo, otwa pumbwa okukala tu hole aamwatate nohole yashili ya hwama. Oohapu dhaKalunga otadhi tu ladhipike tadhi ti: “Mokuhola aamwanyoko, silathaneni olukeno.” (Aaroma 12:10) Atuheni osho hatu kala tu uvite ngawo shi na ko nasha naantu yamwe. Ihe itashi vulika mbela tu ilonge okukala tu nine wo yalwe ohole ya tya ngaaka? Sho ehulilo lyonkalelo ndjika onkulu tali hedha popepi, osha simanenena opo tu hedhe natango popepi lela nAakriste ooyakwetu. Ombimbeli otayi ti: “Ehulilo lyiinima ayihe lya thikana . . . ; komeho gaayihe ohole yeni yokuholathana nayi kale ya kola, oshoka ohole ohayi siikile omayonagulo ogendji.”—1 Petrus 4:7, 8.
Uuna omaupyakadhi taga holoka po
4. (a) Omolwashike omaupyakadhi haga vulu okuholoka pokati kaamboka ye li megongalo? (b) Uuwanawa uni tatu vulu okumona ngele tatu tula miilonga omayele gOmbimbeli, nonando haaluhe hatu kala tu na ehalo oku shi ninga?
4 Dhoshili, shampa owala tu li inaatu gwanenena, otapu ka kala omathimbo sho tatu ningi iinima mbyoka tayi yematitha yalwe. Aamwatate otashi vulika nayo haya yono wo kutse momikalo dhi ili nodhi ili. (1 Johannes 1:8) Ou na okuninga shike ngele u li monkalo ya tya ngaaka? Omanyolo otaga gandja ewiliko lya pumbiwa. Ihe shoka taga popi otashi vulika itaashi tsu kumwe naashoka tse tu li aantu inaaya gwanenena tu na ehalo okuninga. (Aaroma 7:21-23) Nonando ongaaka, ngele tatu longitha nuulaadhi omayele ngoka ge li mOmbimbeli otashi ku ulika kutya otwa hala shili okunyanyudha Jehova. Oku shi ninga otaku ka koleka wo ohole yetu yokuhola yalwe.
5. Omolwashike kaatu na okushunithila uuwinayi ngoka e tu ninga nayi?
5 Ngele aantu ya ningwa nayi, omathimbo gamwe ohaya kongo nokuli omikalo dhokushunithila uuwinayi ngoka e ya hinda. Ihe shoka ohashi nayipike owala onkalo. Ngele opwa pumbiwa okushunithila uuwinayi, otu na oku shi ethela Kalunga. (Omayeletumbulo 24:29; Aaroma 12:17-21) Yalwe otashi vulika ya kambadhale okuyanda ekwatathano naangoka e ya yemateka. Ihe shika hasho tu na okuningila aalongelikalunga ooyakwetu, oshoka elongelokalunga lyetu itali ka taambiwa ko ngele katu hole aamwatate. (1 Johannes 4:20) Omolwashono Paulus a nyola a ti: “Idhidhimikilathaneni, kuthilathaneni po oondjo, ngele mwa ningathana nomukweni, ongashika [Jehova, NW] e mú dhimine po, osho nane wo mu ninge.” (Aakolossa 3:13) Mbela oto vulu oku shi ninga?
6. (a) Olungapi tu na okudhimina po omumwatate? (b) Okuuva ko shike taku ke tu kwathela tu ungaunge naashono oshiwinayi twa ningilwa?
6 Ongiini ngele gumwe ohe tu ningi aluhe nayi ihe iha ningi omayono ga nyanyalitha ngoka taga vulu oku mu konditha megongalo? Kombinga yomayono omashona ga tya ngaaka, omuyapostoli Petrus okwa ningi eetopo ga dhiminwe po ‘luheyali.’ Ihe Jesus okwa ti: “Haluheyali, aawe, omilongo heyali luheyali.” Okwa tsu wo omuthindo kutya oongunga dhetu oonene noonkondo kuKalunga moku dhi yelekanitha noongunga ndhoka omuntu kehe ta vulu okukala e tu nine. (Mateus 18:21-35) Ohatu yono esiku kehe kuKalunga momikalo odhindji—omathimbo gamwe omokupitila miilonga yokwiihola, mwaashoka tatu popi nenge tatu dhiladhila, nenge mwaashoka hatu nyengwa okuninga—nopwaahe na nokuli okundhindhilika kutya ohatu yono. (Aaroma 3:23) Ihe Kalunga ota tsikile oku tu sila ohenda. (Epsalmi 103:10-14; 130:3, 4) Okwa tegelela tu kale nayakwetu komukalo gwa faathana. (Mateus 6:14, 15; Aaefeso 4:1-3) Opo nduno otatu ka tula miilonga ohole ndjoka “ihayi dhimbulukwa ealulo lyuuwinayi.”—1 Aakorinto 13:4, 5; 1 Petrus 3:8, 9.
7. Oshike tu na okuninga ngele omumwatate oku tu uvitile nayi?
7 Otashi vulika pu kale omathimbo uuna tu wete kutya omumwatate oku tu uvitile nayi nonando tse katu mu nine omadhiladhilo omawinayi. Otatu vulu okutokola tu ‘shi siikile nohole,’ ngaashi 1 Petrus 4:8 ta ti. Nenge otatu vulu okukatuka onkatu okupopya naye nokukambadhala okugalulila po ekwatathano lyombili naye.—Mateus 5:23, 24.
8. Oshike tatu vulu okuninga ngele omwiitaali omukwetu ta ningi sha tashi tu uvitha nayi?
8 Otashi vulika omwiitaali omukweni te ku ningi sha shoka hangoye owala tashi uvitha nayi, ihe nayalwe wo. Mbela itashi ka kala shi li nawa okupopya naye? Otashi wapa. Ngele to mu yelithile uupyakadhi mboka nombili, otashi vulu okweeta iizemo iiwanawa. Ihe tango oto vulu okwiipula ngeyi: ‘Shoka ta ningi mbela oshi li lela kaashi li pamanyolo? Nenge mbela uupyakadhi owe ya po unene tuu molwashono eputuko lyandje nolye ga yoolokathana?’ Kala wa kotoka opo waaha tule po omithikampango dhoye mwene e to mu pangula shi ikolelela kudho. (Jakob 4:11, 12) Jehova oha taamba ko aantu yomomaputuko gomaludhi agehe kee na ontondo nohe yi idhidhimikile manga taya koko pambepo.
9. (a) Oolye hayu ungaunga nomayono ga kwata miiti megongalo? (b) Uunake shi li oshinakugwanithwa shomuntu ngoka a yonenwa oye a katuke onkatu tango, nonelalakano lyashike?
9 Ngele gumwe megongalo ta yono sha kwata miiti, ngaashi okuhondela, oshi na okupewa eitulomo nziya. Okoolye? Okaakuluntugongalo. (Jakob 5:14, 15) Ihe ngele eyono olya ningilwa omuntu pauhandimwe, tashi vulika miinima yi na ko nasha nokungeshefa nenge mokulongitha nayi elaka, opo nduno ngoka a yonenwa oku na tango okukambadhala okupopya paumwene naangoka a yona. (Mateus 18:15) Ngele shoka uupyakadhi inashi u kandula po, opwa pumbwa okukatukwa natango oonkatu dhilwe, ngaashi sha nyolwa muMateus 18:16, 17. Ohole yokuhola omumwatate a yona nosho wo ehalo oku mu ‘likola’ otayi ke tu kwatha oku shi ninga momukalo ngoka tagu kambadhala okwaadha omutima gwe.—Omayeletumbulo 16:23.
10. Oshike tashi ke tu kwathela okutala ko iinima shi li mondjila uuna uupyakadhi tau holoka po?
10 Uuna uupyakadhi tau holoka po, kutya nduno uunene nenge uushona, otashi tu kwathele ngele tatu kambadhala okukala tu uvite ko nkene Jehova e u tala ko. Ye ke na nando eyono a hokwa, nopethimbo lye lyo opala, aantu mboka haya yono omayono ga kwata miiti pwaahe na okwiiyela ombedhi ohaya kuthwa mo mehangano lye. Ihe inatu dhimbwa kutya atuheni ohatu yono nokuli nomiinima iishona notwa pumbwa ontalanteni nohenda ye. Onkee ano Jehova okwa tula po oshiholelwa shoka tu na okulandula uuna yalwe taya yono kutse. Ngele otu na ohenda, otatu holele ohole ye.—Aaefeso 5:1, 2.
Konga oompito ‘dhokumbwalangandja’
11. Omolwashike Paulus a ladhipike Aakorinto ya ‘mbwalangandje’?
11 Paulus okwa longitha oomwedhi dhontumba okutunga egongalo muKorinto, muGreka. Okwa longo nuudhiginini opo a kwathele aamwahe moka nokwa li e ya hole. Ihe yamwe yomuyo kaya li ye mu hole nohole ya hwama. Oya li haye mu tamaneke noonkondo. Okwa li e ya kumagidha ya ‘mbwalangandje’ mokuulika ohole. (2 Aakorinto 6:11-13; 12:15) Oshi li nawa ngele atuheni tatu tala kutya ohole yetu ohatu yi ulikile yalwe ngiini nokukonga oompito dhokumbwalangandja.—1 Johannes 3:14.
12. Ongiini mbela tatu vulu okukokeka ohole yetu yokuhola ayehe megongalo?
12 Mbela ohatu mono oshidhigu okuhedha popepi nayamwe megongalo? Shika otashi vulu oku tu kwathela tu kale nekwatathano ewanawa pokati ketu nayo—ngele tatu ningi oonkambadhala dha gwedhwa po okwaatala komayooloko kehe gopantu—ngaashi naanaa twa hala ye tu ningile. Omaiyuvo getu ge na ko nasha nayo otaga vulu wo okuhwepopala ngele tatu tala komaukwatya gawo ngoka omawanawa e tatu kala tatu dhiladhila unene kombinga yago. Shoka otashi ka kokeka lela ohole yetu yoku ya hola.—Lukas 6:32, 33, 36.
13. Ongiini tatu vulu okumbwalangandja mokuulika ohole kwaamboka yomegongalo lyetu?
13 Dhoshili, otwa ngambekwa mwaashoka tatu vulu okuningila yalwe. Otashi vulika ihaatu vulu okupopitha kehe gumwe pokugongala kehe. Otashi vulika itaashi wapa okukwatela mo kehe gumwe uuna tatu hiya ookuume ye ye ya lye pamwe natse. Ihe mbela itatu vulu okumbwalangandja mokulongitha owala ominute dhontumba okutseyathana nawa nayamwe megongalo lyetu? Omathimbo nomathimbo itashi vulika nando mbela tu hiye gumwe ngoka inaatu tseya nawa a longe pamwe natse miilonga yomomapya?
14. Ongiini tatu vulu okuulikilathana ohole ya kola uuna tu li mokati kAakriste mboka kaatu shi nale?
14 Iigongi yopaKriste ohayi gandja oompito oombwanawa dhokumbwalangandjeka ohole yetu. Otashi vulika pu kale aantu omayuvi. Itatu vulu oku ya popitha ayehe, ihe otatu vulu okwiihumbata momukalo ngoka tagu ulike kutya otwa pititha uuwanawa wawo komeho yuuwanawa wetu yene. Pokati komitumba, otatu vulu okuulika ohokwe kutya otu na ko nasha nayo mokupopitha yamwe mboka ye li popepi natse. Esiku limwe ayehe mboka ye li kombanda yevi onaya ka kale aamwahe naamwayinathana, ya hangana mokulongela Kalunga kashili naHe yaayehe. Itashi ka kala tuu shinyanyudha okukala twa tseyathana! Ohole ya kola otayi ke tu inyengitha tu kale twa hala oku shi ninga. Kashi li mbela nawa u tameke nokuli ngashingeyi?
Oonkundathana dhokweendulula
• Ongiini omaupyakadhi ngoka haga holoka pokati kAakriste ge na okukandulwa po, nomolwashike?
• Sho tatu koko pambepo, omomikalo dhini ohole yetu nayo yi na okukoka?
• Ongiini tashi wapa okuulika ohole ya kola kuyalwe kaashi shi owala kookuume ketu kopothingo?
[Ethano pepandja 148]
Ohole yopaKriste ohayi ulikwa momikalo odhindji, ngaashi pokugongala kwegongalo