Tsikileni okukoka mohole yuumwayinathana

“Okukalamwenyo kweni naku kale taku pangelwa kohole, ngashika Kristus.”—EF. 5:2.

1. Jesus okwa popi shike sha simana shoka tashi ka dhimbululitha aalanduli ye?

OONZAPO dhaJehova odha tseyikila nawa iilonga yokuuvitha onkundana ombwanawa yUukwaniilwa egumbo negumbo. Ihe Jesus Kristus okwa li a hogolola iinima yi ili noyi ili mbyoka tayi dhimbululitha aalongwa ye yashili. Okwa ti: “Oshipango oshipe otandi shi mú pe, mu holathane. Ngashika naanaa [nangame] nda kala ndi mú hole, osho nane wo omu na okuholathana. Ngele omu holathane, nena aantu ayehe otaa ka dhimbulula kutya one aalongwa yandje.”—Joh. 13:34, 35.

2, 3. Ohole yetu yuumwayinathana ohayi nwetha mo ngiini mboka haya kala pokugongala kwopaKriste?

² Kapu na gumwe e na ohole ya fa ndjoka yi li mokati kAakriste yashili. Ngaashi owala engeneta hali nana iitenda, osho wo ohole ohayi hanganitha aapiya yaJehova nokuhila mboka ye na omitima dhu uka ye ye kelongelokalunga lyashili. Pashiholelwa, eho lyaMarcelino Omukamerun olya li lya tsipuka mo pethimbo e li kiilonga. Konima yoshiponga shoka omutoto ogwa taandele kutya eho lye olya zi mo molwaashoka ye omulodhi. Pehala lyoku mu hekeleka, omusita niilyo yilwe yongeleka yawo oye mu kondo mo megongalo. Sho gumwe gwomOonzapo dhaJehova a li e mu hiya kokugongala, Marcelino okwa li ta kakadhala okuya ko. Okwa li e na uumbanda oku ka ningilwa shoka a li a ningilwa kongeleka yawo.

³ Marcelino okwa li a kumwa kwaashoka a mono pOshinyanga shUukwaniilwa. Okwa li a hambelelwa nohamu, nokwa li a hekelekwa kelongo lyOmbiimbeli ndyoka u uvu po. Okwa tameke okukala pomakugongala agehe nokwa humu komeho nokukonakona Ombiimbeli. Okwa li a ninginithwa mo 2006. Ngashingeyi oku li tu uvithile uukwanegumbo we nosho wo yalwe oshili nokwa tameka omakonakonombiimbeli ogendji. Marcelino okwa hala aakonakoni ye ya mone ohole ya fa ndjoka a li u ulukilwa kaapiya yaKalunga.

4. Omolwashike tu na okuvulika kekumagidho lyaPaulus ndyoka tali ti kutya ‘onkalamwenyo yetu nayi kale tayi pangelwa kohole’?

⁴ Ohole ndjoka yuumwayinathana oya dhenga mbanda, notu na okuninga ngaashi tatu vulu tu yi kaleke po. Dhiladhila kaantu taya huhulukwa pomulilo ngoka gwa tema uusiku. Ngele mboka ye li po itaaye gu hohele, nena otagu ka dhima. Sha faathana, ekwatathano lyopahole ndyoka tu na megongalo otali ka talala ngele itatu li kaleke po pauhandimwe tu li Aakriste. Ongiini tatu vulu oku shi ninga? Paulus okwa yamukula a ti: “Okukalamwenyo kweni naku kale taku pangelwa kohole, ngashika Kristus a li e tu hole e ta gandja omwenyo gwe omolwetu, gu ninge eyambo lya nika nawa nolya opalela Kalunga.” (Ef. 5:2) Epulo ndyoka twa hala okutala olyo kutya: Omomikalo dhini onkalamwenyo yandje tayi pangelwa kohole?

“Mbwalangandjeni moomwenyo dheni”

5, 6. Omolwashike Paulus a li a ladhipike Aakriste muKorinto ya ‘mbwalangandjeke’ ohole yawo?

⁵ Paulus okwa nyolele Aakriste muKorinto shonale a ti: “Omakana getu oge mú makukile, one Aakorinto, oomwenyo dhetu odha mbwalangandja. One kamu na oothina mutse, omu na oothina moomwenyo dheni yene. Gandjeni ngaashi mwa pewa—otandi lombwele ngaashi aanona—nane wo mbwalangandjeni moomwenyo dheni.” (2 Kor. 6:11-13, KB) Omolwashike Paulus a li a ladhipike Aakorinto ya mbwalangandjeke ohole yawo?

⁶ Tala nkene egongalo lyAakorinto lya li lya tameke. Paulus okwa li e ya muKorinto pehulilo lyomumvo 50 E.N. Nonando okwa li a patanekwa sho a tameke okuuvithila aantu yamo, ina sa uunye. Meni lyethimbo efupi, aantu oyendji moshilando moka oya li yi itaale onkundana ombwanawa. Paulus okwa li a longo nokukoleka iilyo yegongalo ndyoka epe “omvula yimwe netata.” Osha yela kutya okwa li e hole shili Aakriste muKorinto. (Iil. 18:5, 6, 9-11) Oya li ye na etompelo ewanawa okukala ye mu hole noku mu simaneka. Ihe yamwe megongalo kaya li ye mu hole. Otashi vulika yamwe po ya li inaaya panda omayele ngoka e ya pe. (1 Kor. 5:1-5; 6:1-10) Yalwe otashi vulika ya li haya pulakene koluhoko ‘lwaayapostoli mboka aanene’ aniwa. (2 Kor. 11:5, 6) Paulus okwa li a hala aamwatate naamwameme megongalo ya kale ye mu hole shili. Onkee ano, okwe ya ladhipike ya ‘mbwalangandje’ mokukala popepi naye nonaamwatate yalwe.

7. Ongiini tatu vulu ‘okumbwalangandjeka’ mokuulukilathana ohole yuumwayinathana?

⁷ Ongiini kutse kunena? Ongiini tatu vulu ‘okumbwalangandja’ mokuulikila aamwatate ohole? Otashi vulika shi kale oshipu koohandimwe okuulikila aantu yepipi lyawo nenge yomuhoko gwawo ohole. Aantu mboka ye hole omainyanyudho gwoludhi lwontumba, olundji oye hole okukala pamwe. Ihe otwa pumbwa ‘okumbwalangandjeka’ ohole yetu ngele ekwatathano lyetu nAakriste yalwe otali tu topola ko kuyalwe. Oshi li nawa twi ipule tatu ti: ‘Olungapi mbela handi longo muukalele nenge handi inyanyudha pamwe naamwatate naamwameme mboka kaaye shi ookuume kandje? Mbela ohandi ngambeke ekwatathano lyandje naamboka aape pOshinyanga shUukwaniilwa molwaashoka ondi wete kutya inaya gwana natango okuninga ookuume kandje? Mbela ohandi popitha ngaa aagundjuka nosho wo aakokele pokugongala?’

8, 9. Omayele gaPaulus ngoka ge li mAaroma 15:7 otage tu kwathele ngiini tu popithathane momukalo tagu kokeke ohole yetu yuumwayinathana?

⁸ Oohapu dhaPaulus ndhoka a nyolele Aaroma otadhi tu kwathele tu kale tu na etaloko lyu uka ngele tashi ya pokupopitha ooitaali ooyakwetu. (Lesha Aaroma 15:7.) Oshitya shOshigreka shoka sha tolokwa “taambathaneni” osha kwatela mo ‘okuyakula nombili aayenda mboka yomaputuko gi ili naamboka ye li ookuume koye.’ Pethimbo lyOmbiimbeli uuna omuyenda e ya megumbo lyoye, owu na oku mu tseyithila kutya owa nyanyukwa oku mu mona. Kristus okwe tu taamba ko momukalo gwa fa ngoka, natse otatu ladhipikwa tu mu holele mokukala nooitaali ooyakwetu.

⁹ Uuna tatu popitha aamwatate pOshinyanga shUukwaniilwa nopomahala galwe, otu na okugandja eitulomo kwaamboka pwa pita ethimbo inaatu mona nenge inaatu popitha. Ito vulu mbela okupopya nayo ominute dhontumba? Pokugongala taku landula otatu vulu okuninga sha faathana nayalwe. Ngele tatu shi ningi, nena otatu ka popya konyala naamwatate naamwameme ayehe. Inashi pumbiwa tu kale tatu ipula kutya inatu popitha aantu ayehe mesiku limwe. Inatu pumbwa okukala twa geela gumwe ngoka inaa vula oku tu popitha pokugongala.

10. Oompito dhini dhe egulukila ayehe megongalo, nongiini tatu vulu okumona mo uuwanawa mudho?

¹⁰ Okupopitha yamwe oku li onkatu yotango okuulika kutya otwe ya taamba ko. Oku li onkatu ndjoka tayi fala moonkundathana nomuukuume tawu kalelele. Pashiholelwa, uuna mboka ye ya koshigongi shoshikandjo noshoshitopolwa tayi ilombwele omadhina gawo nokutameka taya popi, ohaya kala ya hala okwiimona natango. Aaiyambi yiilonga yokutunga Iinyanga yUukwaniilwa naamboka haya kutha ombinga miilonga yokugandja ekwatho, ohaya panga uukuume wopothingo molwaashoka oye shi omaukwatya omawanawa gayakwawo okupitila miilonga mbyoka taya longo. Mehangano lyaJehova omu na oompito odhindji dhokupanga uukuume tawu kalelele. Ngele otwa ‘mbwalangandjeke’ ohole yetu, nena otashi ka koleka ohole yetu ndjoka hayi tu hanganitha melongelokalunga lyashili.

Konga ethimbo lyokupopya nayalwe

11. Jesus okwa tula po oshiholelwa shini shoka shi li muMarkus 10:13-16?

¹¹ Aakriste ayehe oye na okukambadhala ya ninge ngaashi Jesus, ngoka a li e shi ningi oshipu opo kehe gumwe a vule okupopya naye. Tala nkene Jesus a li i inyenge sho aalongwa ye ya li ya kambadhala okukeelela aavali ye ete aanona kuye. Okwa ti: “Etheni uunona, u ye kungame. Inamu u keelela ko, oshoka Oshilongo shaKalunga oshaamboka ye u fa.” Opo ihe “okwe u papata momaako ge nokwe u tenteke iikaha ye e te u yambeke.” (Mark. 10:13-16) Dhiladhila owala nkene aanona mboka ya li ye uvite sho yu ulukilwa ohole kOmulongi Omunene.

12. Oshike tashi vulu okukala einda twaaha popye nayalwe?

¹² Omukriste kehe oku na okwiipula ta ti: ‘Mbela aantu ohaya mono ngaa ompito okupopya nangame nenge olundji ohandi kala owala ndi ipyakidhila?’ Omathimbo gamwe omikalondjigilile dhimwe ndhoka inaadhi puka, otadhi vulu dhi kale einda kuyamwe ya popye natse. Pashiholelwa, ngele ohatu longitha ongodhi yopeke olundji nenge tu hole okupulakena kuungalo uuna tu li mokati kayalwe, otashi vulika ya dhiladhile kutya inatu ya hala. Ngele yamwe ohaye tu mono unene tatu longitha okompiuta yopeke, otashi vulika yi ipule kutya inatu hala okupopya nayo. Odhoshili kutya opu na “ethimbo lyokumwena nethimbo lyokupopya.” Ihe ngele otu li mokati kaantu, olundji ohashi kala “ethimbo lyokupopya.” (Omuuv. 3:7) Otashi vulika gumwe a tye: “Ondi hole okukala ongame awike” nenge “Kandi hole okupopya ongula onene.” Ihe ngele ohatu popi nayamwe nombili nopethimbo mpoka katu na onkwa nokupopya, otatu ku ulika kutya otu na ohole ndjoka “ihayi kongo shayo yene.”—1 Kor. 13:5.

13. Paulus okwa li a ladhipike Timoteus a kale netaloko lya tya ngiini kombinga yaamwatate naamwameme yopaKriste?

¹³ Paulus okwa li a ladhipike omugundjuka Timoteus a simaneke ayehe megongalo. (Lesha 1 Timoteus 5:1, 2.) Tse otu na wo okukala nAakriste aakokele ongo oomeme nootate nosho wo aagundjuka otu na oku ya tala ko ongo twa valwa kuhe nokuyina yimwe. Ngele otu na iikala ya tya ngaaka, itashi ka kala oshidhigu kaamwatate naamwameme aaholike okupopya natse.

14. Uuwanawa washike hawu zi mokupopya hoka taku tungu yalwe?

¹⁴ Uuna tatu popi nayalwe iinima mbyoka tayi tungu, otatu ke ya kwathela pambepo nopamadhiladhilo. Omumwatate gumwe ngoka ha longo moshitayimbelewa shimwe ota dhimbulukwa nkene aamwatate yamwe aakokele Aabetel ya li haya longitha ethimbo lyawo okupopya naye sho opo e ya moBetel. Oohapu dhawo odha li dhe mu ladhipike a kale e uvite kutya ye oshilyo shuukwanegumbo waBetel shili. Ngashingeyi omumwatate ngoka oha ningi sha faathana nAabetel ooyakwawo.

Eifupipiko ohali tu kwathele tu kaleke po ombili

15. Oshike tashi ulike kutya pokati kaalongelikalunga yashili otapu vulu okuholoka oontamanana?

¹⁵ Aamwameme yaali muFilippi shonale, Eudokia naSintike oya li ye na okukandula po uupyakadhi mboka wa holoka pokati kawo. (Fil. 4:2, 3) Aantu oyendji oya li ya tseya kutya pokati kaPaulus naBarnabas opu na oontamanana ndhoka dha li dhe ya ningitha ya topoke uule wokathimbo. (Iil. 15:37-39) Omahokololo ngaka otagu ulike kutya pokati kaalongelikalunga yashili otapu vulu okuholoka oontamanana. Jehova okwe tu pa ekwatho nkene tu na okukandula po omaipumomumwe nokupanga ombili. Ihe okwa tegelela tu ninge sha kombinga yetu.

16, 17. (a) Eifupipiko olya simana ngiini mokukandula po omaipumomumwe? (b) Ongiini ehokololo lyaJakob sho a tsakanene naEsau tali ulike ongushu yeifupipiko?

¹⁶ Natu tye nduno owu li nookuume mosheenditho tamu yi kehala lyontumba. Omanga inaamu ya, tango owu na okuhwameka oshihauto opo shi vule okuza momutumba. Opo oontamanana dhi kandulwe po, opu na wo shoka sha pumbiwa tango. Oshinima shoka sha pumbiwa tango eifupipiko. (Lesha Jakob 4:10.) Oshinima shoka ohashi kwathele mboka ya geelathana ya tule miilonga omakotampango gOmbiimbeli, ngaashi tashi ulikwa mOmanyolo ngoka ge li mokatendo taka landula.

¹⁷ Esau okwa li a hala okudhipaga Jakob omukwanambwiyu omukwawo sho a kutha po uuthemba we wuusheeli. Ihe sho pwa piti omimvo 20 oya li ye na okutsakanena. Sho ya li ye li pokutsakanena, “Jakob okwa haluka e ta kunkwa.” Okwa li ta dhiladhila kutya Esau otashi vulika e mu ponokele natango. Ihe sho ye li pokutsakanena Jakob okwa li i “inyongamene pevi,” oshinima shoka Esau a li inaa tegelela. Oshike sha ningwa po? Ombiimbeli otayi ti: “Esau okwa matuka e mu tsakaneke, okwe mu papatele momaako ge e te mu thipi komilungu. Ayehe yaali oya lili.” Eifupipiko lyaJakob olya kwathele mokusinda uutondwe mboka tashi vulika Esau a li e na. Shika osha keelele olugodhi ndoka lwa li talu vulu okuholoka po.—Gen. 27:41; 32:3-8; 33:3, 4.

18, 19. (a) Omolwashike sha simanenena tu tule omayele gopamanyolo miilonga uuna pwa holoka omaipumomumwe? (b) Omolwashike katu na okusholola ngele oonkambadhala dhetu okupanga ombili inadhi pondola petameko?

¹⁸ MOmbiimbeli omu na iiholelwa oyindji ya dhenga mbanda kombinga yokukandula po omaipumomumwe. (Mat. 5:23, 24; 18:15-17; Ef. 4:26, 27)a Ihe ngele itatu tula omayele ngoka miilonga, otashi ka kala oshidhigu okukaleka po ombili. Inashi pumbiwa tu tege omuntu ngoka twa ningathana naye oye a ulike eifupipiko tango, molwaashoka natse otatu vulu oku shi ninga tango.

¹⁹ Katu na okusholola ngele oonkambadhala dhetu dhokupanga ombili inadhi za. Otashi vulika omuntu ngoka mwa ningathana naye a pumbwa ethimbo a ngungile. Aamwahe yaJosef oya li ye mu kengelele. Opwa li pwa piti ethimbo ele inaaye mu mona, ihe sho ya tsakanene, okwa li elenga ekuluntu muEgipiti. Aamwahe yaJosef oya li ya lundulula iikala yawo noye mu pula e ya dhimine po. Josef okwe ya dhimine po noyana yaJakob oya li ya ningi oshigwana shoka shi na uuthembahenda wokuhumbata edhina lyaJehova. (Gen. 50:15-21) Ngele ohatu kaleke ombili pokati kaamwatate naamwameme, nena otatu kaleke po ekwatathano lya kola megongalo.—Lesha Aakolossa 3:12-14.

Ohole yetu nayi kale ‘yashili noyi na iilonga’

20, 21. Oshike tatu ilongo moshiholelwa shaJesus shokuyoga oompadhi dhaayapostoli ye?

²⁰ Jesus okwa lombwele aayapostoli ye manga inaa sa a ti: “Onde mú pe oshiholelwa, opo mu ninge naanaa ngashika nde mú ningile.” (Joh. 13:15) Opo owala a adhika a mana okuyoga oompadhi dhaayapostoli ye 12. Oshinima shoka Jesus ine shi ninga owala omolweputuko lyawo nenge molwaashoka e na ohenda. Omanga Johannes inaa hokolola kombinga yoshinima shokuyoga oompadhi, okwa nyola kombinga yaJesus a ti: “Oye ngaashi a kala e hole mboka ye ya li muuyuni, okwa li e ya hole sigo opehulilo.” (Joh. 13:1) Ohole yokuhola aalongwa ye oyo yi inyengitha Jesus a longe oshilonga shoka sha li hashi longwa kaapiya. Ngashingeyi oya li ye na okuulikilathana ohole. Eeno, ohole yashili yuumwayinathana oyi na oku tu inyengitha tu kale tu na ko nasha nokwiipula naamwatate naamwameme ayehe yopaKriste.

²¹ Omuyapostoli Petrus ngoka oompadhi dhe dha li dha yogwa kuJesus, okwa li u uvu ko eityo lyoshinima shoka. Okwa nyola a ti: “Ngashingeyi sho mwa vulika koshili, omwi iyogo nomu hole ooitaali ooyakweni mwaa na uufudhime. Holathaneni ano lelalela nomwenyo aguhe.” (1 Pet. 1:22) Omuyapostoli Johannes ngoka naye a li a yogwa koompadhi okwa nyola a ti: “Aamwandje! Ohole yetu inayi kala ashike moohapu nomokupopya, aawe, nayi kale ohole yashili, ndjoka tayi iholola yo yene miilonga wo.” (1 Joh. 3:18) Onkee ano, natu kale tu hole aamwatate naamwameme nomitima dhetu adhihe.

[Enyolo lyopevi]

Oto dhimbulukwa?

• Omomikalo dhini tatu vulu ‘okumbwalangandjeka’ ohole yetu yokuholathana?

• Oshike tashi tu kwathele tu konge ethimbo okupopya nayalwe?

• Eifupipiko otali dhana onkandangala yini mokupanga ombili?

• Oshike shi na oku tu inyengitha tu kale tu na ko nasha nooitaali ooyakwetu?

[Ethano pepandja 24]

Kala ho popitha ooitaali ooyakweni nohamu

[Ethano pepandja 26]

Ino etha ompito okukala nayalwe yi ku pitilile po