Ontopolwa ontimulongo nontimugoyi
Tsikila okupopya oohapu dhaKalunga nuulaadhi
1. (a) Onkundana ombwanawa yini aalongwa yaJesus yu uvitha, ihe yamwe yomAajuda oyi inyenge ngiini? (b) Omapulo geni tatu vulu okupula?
KONYALA oomvula 2 000 dha piti, Omwana gwaKalunga, Jesus Kristus, okwa li a gwayekwa a ninge Omukwaniilwa gwomonakuyiwa kombanda yevi alihe. Jesus okwa li a dhipagwa kaatondi yopalongelokalunga ya tsuwa omaminimini, ihe Jehova okwe mu yumudha kuusi. Okupitila muJesus, omwenyo gwaaluhe ogu li ngashingeyi tagu wapa. Ihe sho aalongwa yaJesus yu uvitha onkundana ombwanawa ndjoka montaneho, omahepeko oga tameke. Yamwe yomuyo oya li ya tulwa mondholongo, noya li nokuli ya dhengwa noyi indikwa okupopya kombinga yaJesus. (Iilonga 4:1-3, 17; 5:17, 18, 40) Oya li ya ningi ngiini? Mbela ando ongoye ando owa ningi ngiini? Mbela ando owa tsikile okugandja uunzapo nuulaadhi?
2. (a) Onkundana onkumithi yini ya pumbwa okuuvithwa methimbo lyetu? (b) Oolye ye na oshinakugwanithwa shokuuvitha onkundana ombwanawa?
2 Mo 1914 Omukwaniilwa gwUukwaniilwa waKalunga, Jesus Kristus, okwa langekwa po megulu a pangele ‘mokati kaaniita naye.’ (Epsalmi 110:2) Nokonima yaashono, Satana noompwidhuli dhe oyu umbilwa kombanda yevi. (Ehololo 12:1-5, 7-12) Omasiku gahugunina gonkalelo yuukolokoshi yongashingeyi oga tameke. Ngele ethimbo ndyoka lya pu ko, Kalunga ota ka nyanyagula po onkalelo ayihe yiinima yaSatana. (Daniel 2:44; Mateus 24:21) Aahupipo otaya ka kala ye na etegameno lyokukala nomwenyo sigo aluhe kombanda yevi ndyoka tali ka ninga oparadisa. Ngele onkundana ombwanawa ndjoka owe yi taamba, oto ka kala wa hala oku yi tseyithila yalwe. (Mateus 24:14) Ihe oto vulu okutegelela yi inyenge ngiini?
3. (a) Aantu ohayi inyenge ngiini ketumwalaka lyUukwaniilwa? (b) Epulo lini tu na okuyamukula?
3 Ngele to uvitha onkundana ombwanawa yUukwaniilwa, aantu yamwe otashi vulika ye yi taambe ko, ihe oyendji otaya ka kala kaaye na ohokwe. (Mateus 24:37-39) Yamwe otashi vulika taye ke ku sheka nenge taye ku pataneke. Jesus okwa londodha kutya omapataneko otaga vulu ga ze nokaapambele yoye. (Lukas 21:16-19) Otaga vulu wo oku ku zila kiilonga yoye nenge kosikola. Miitopolwa yimwe yomuuyuni, Oonzapo dhaJehova odhi indikwa mo nokuli papangelo. Ngele to tsakaneke oonkalo dha tya ngaaka, mbela oto ka tsikila ngaa okupopya oohapu dhaKalunga nuulaadhi wa “kolelela meitaalo”?—1 Aakorinto 16:13.
Inatu inekela moonkondo dhetu yene
4. (a) Opo tu kale aapiya yaKalunga aadhiginini, osha simanenena tu gwanithe po oshitegelelwa shini? (b) Omolwashike okugongala kwopaKriste kwa simana noonkondo?
4 Shoka sha simanenena okukala aapiya yaJehova aadhiginini osho okwiinekela omasiloshimpwiyu ge. Limwe lyomugo olyo okugongala kwegongalo. Omanyolo otage tu ladhipike kaatu ku ethe po. (Aaheberi 10:23-25) Mboka ya tsikila okukala Oonzapo dhaJehova oondhiginini oya kondja nuudhiginini opo ya kale ihaya faula okukala pokugongala pamwe naalongeli Kalunga ooyakwawo. Ontseyo yetu yokutseya Omanyolo ohayi indjipala ngele tatu kala pokugongala kwa tya ngaaka. Neuvoko lyetu lyokuuva ko ooshili dha tseyika nawa otali koko wo notatu tseya nawa omikalo moka tu na oku dhi longitha. Otatu hedha popepi lela naamwatate Aakriste melongelokalunga lya hangana notatu nkondopalekwa okulonga ehalo lyaKalunga. Ombepo yaJehova otayi gandja ewiliko okupitila megongalo nomokupitila mombepo ndjoka, Jesus oku li mokati ketu.—Mateus 18:20; Ehololo 3:6.
5. Mpoka Oonzapo dhaJehova dhi indikwa okulonga iilonga yadho, okugongala ohaku ningwa ngiini?
5 Mbela oho kala pokugongala akuhe pwaahe na okufaula, noho tula ngaa mbela miilonga shoka ho uvu ko? Mpoka Oonzapo dhaJehova dhi indikwa okulonga iilonga yadho, omathimbo gamwe mpoka sha pumbiwa, okugongala ohadhi ku ningi moongundu oonshona momagumbo gopaumwene. Omahala nomathimbo otashi vulika ga lundululwe notashi vulika haaluhe haga kala tago opalele, omolwashoka okugongala kumwe hashi vulika ku kale haku ningwa kongulohi lela. Ihe nonando pu na omikundu dhopaumwene nenge iiponga, aamwatate naamwameme aadhiginini ohaya ningi oonkambadhala dha mana mo okukala pokugongala kehe.
6. Ohatu ulike ngiini okwiinekela kwetu Jehova, nongiini tashi vulu oku tu kwatha tu tsikile okupopya nuulaadhi?
6 Okwiinekela Jehova ohaku tungwa po okupitila moku mu galikana aluhe tashi zi komutima, tu shi kutya otwa pumbwa ekwatho lye. Mbela osho ho ningi? Jesus okwa galikana lwiikando pethimbo lyuukalele we kombanda yevi. (Lukas 3:21; 6:12, 13; 22:39-44) Nongulohi ya tetekele okwaalelwa kwe komuti, okwa li a ladhipike aalongwa ye a ti: “Tonateni, ne mu galikane, mwaa adhike kemakelo.” (Markus 14:38) Ngele tatu tsakaneke mboka kaaye na ohokwe metumwalaka lyUukwaniilwa, otashi vulika shi tu makele tu tyololoke muukalele wetu. Ngele aantu taye tu sheke nenge taye tu hepeke, otashi vulika tu kale twa hala okweetha okuuvitha opo tu yande omaupyakadhi. Ihe ngele tatu galikana twa mana mo opo ombepo yaKalunga yi tu kwathe tu tsikile okupopya nuulaadhi, otashi ke tu gamena kaatu igandje komamakelo ngoka.—Lukas 11:13; Aaefeso 6:18-20.
Ehokololo lyokugandja uunzapo nuulaadhi
7. (a) Omolwashike ehokololo lyomIilonga yAayapostoli lya simana unene kutse? (b) Yamukula omapulo ga gandjwa kehulilo lyokatendo haka nokutsa omuthindo nkene tatu vulu okumona uuwanawa muuyelele mbuka.
7 Ehokololo li li membo lyIilonga yAayapostoli olya simana unene kutse atuheni. Otali tu hokololele nkene aayapostoli naalongwa yalwe yonale—aantu mboka ya li ye na omaiyuvo ga fa getu—ya sindi omikokolondo noya kala ye li oonzapo dhaJehova aalaadhi naadhiginini. Natu konakoneni oshitopolwa shehokololo ndjoka nekwatho lyomapulo taga landula nosho wo omanyolo ngoka ge li mo. Manga tatu shi ningi, natu tale nkene tatu vulu okumona uuwanawa paumwene mwaashoka tatu lesha.
Mbela aayapostoli oya li aalumentu ye na elongo lyopombanda? Mbela oya li aantu mboka ihaaya tila paunshitwe, kutya nduno oshike taya ningilwa? (Johannes 18:17, 25-27; 20:19; Iilonga 4:13)
Oshike sha kwathele Petrus a popye nuulaadhi koshipala shompangu yOshijuda ndjoka ya li ya pangula Omwana gwaKalunga? (Mateus 10:19, 20; Iilonga 4:8)
Aayapostoli oya ningi shike pethimbo lyiiwike ya tetekele okufalwa kwawo komeho gOsanhedrin? (Iilonga 1:14; 2:1, 42)
Sho aapangeli ya lombwele aayapostoli ye ethe okuuvitha medhina lyaJesus, Petrus naJohannes oya yamukula ngiini? (Iilonga 4:19, 20)
Aayapostoli oya ka konga ishewe ekwatho kulye konima yokumangululwa kwawo? Mbela oya galikana omahepeko ga hule po nenge ongiini? (Iilonga 4:24-31)
Jehova okwa gandja ngiini ekwatho sho aapataneki ya li taya kambadhala okumweneka iilonga yeuvitho? (Iilonga 5:17-20)
Aayapostoli oyu ulike ngiini kutya oye uvite ko kutya omolwashike ya mangululwa? (Iilonga 5:21, 41, 42)
Aalongwa oya kala nokuninga shike nokuli naashono oyendji yomuyo ya li yi ihanithwa komahepeko? (Iilonga 8:3, 4; 11:19-21)
8. Iizemo yinyanyudha yini ya zi muukalele waalongwa yonale, noshe ende ngiini opo tu kwatelwe mo?
8 Iilonga yeuvitho lyonkundana ombwanawa kaya li yosima. Aalongwa 3 000 lwaampono oya li ya ninginithwa pOpentekoste yomo 33 E.N. “[Mboka] yi itaala Omuwa, oyi indjipala oongundu oonene odhaalumentu nodhaakiintu.” (Iilonga 2:41; 4:4; 5:14) Konima yethimbo, nokuli omuhepeki gwoshigwana shaKalunga omukwanyanya, Saulus gwokuTarso, okwa ningi Omukriste nokwa tameke okugandja uunzapo nuulaadhi kombinga yoshili. Konima yethimbo okwa ka tseyika e li omuyapostoli Paulus. (Aagalati 1:22-24) Iilonga mbyoka ya li ya tameke methelemumvo lyotango natango otayi tsikile. Oyi indjipala neendelelo momasiku ngaka gahugunina notayi longwa miitopolwa ayihe yokombanda yevi. Otu na uuthembahenda wokukutha ombinga muyo, naashono tatu shi ningi, otatu vulu okwiilonga sha moshiholelwa shoka sha tulwa po koonzapo aadhiginini ndhoka dhe tu tetekele.
9. (a) Oompito dhini Paulus a longitha okugandja uunzapo? (b) Omomikalo dhini ho uvithile yalwe etumwalaka lyUukwaniilwa?
9 Paulus okwa ningi shike sho i ilongo oshili kombinga yaJesus Kristus? “[Oku] uvithile nanziya . . . Jesus oye Omuna gwaKalunga.” (Iilonga 9:20) Okwa li a pandula esilohenda lyaKalunga inee li longela ndyoka e mu ulukile, nokwa tseya kutya kehe gumwe okwa pumbwa onkundana ombwanawa ndjoka ye a mono. Paulus okwa li Omujuda, nongaashi sha li omukalondjigilile gwopethimbo ndyoka, okwa yi koshinagoga oku ka gandja uunzapo. Okwa li wo u uvitha egumbo negumbo nokwa popi naantu pomalandelo. Nokwa yile nehalo ewanawa kiitopolwa iipe oku ku uvitha onkundana ombwanawa.—Iilonga 17:17; 20:20; Aaroma 15:23, 24.
10. (a) Paulus oku ulike ngiini kutya nonando okwa li omulaadhi, okwa li wo e na oondunge dhokuyoolola momukalo ngoka a gandja uunzapo? (b) Ongiini tatu vulu okuulika omaukwatya gaPaulus ngele tatu gandja uunzapo kaapambele, kaaniilonga ooyakwetu, nenge kaanasikola ooyakwetu?
10 Paulus ka li owala omulaadhi, ihe okwa li wo e na oondunge dhokuyoolola, ngaashi natse tu na okukala tu dhi na. Sho a popi nAajuda okwe shi ningi shi ikolelela komauvaneko ngoka Kalunga a ningila ooyinakulululwa. Sho a popi nAagreka okwa popi shi ikolelela kiinima mbyoka ye shi nawa. Omathimbo gamwe mokugandja uunzapo okwa li a longitha oshimoniwa she nkene i ilongo oshili. Okwa ti: “Ayihe otandi yi ningi omolwevaangeli, nangame ndi [li tseyithile yalwe, NW].”—1 Aakorinto 9:20-23; Iilonga 22:3-21.
11. (a) Paulus okwa ningi shike opo a yande okwiipuma aluhe mumwe naapataneki? (b) Uunake tatu vulu okuholela noondunge oshiholelwa shaPaulus, nongiini? (c) Openi hapu zi oonkondo dhokutsikila okupopya nuulaadhi?
11 Sho Paulus a li e wete kutya oshi li hwepo e ku uvithe moshitopolwa shilwe uule wethimbo omolwomapataneko, okwa li e shi ningi pehala lyokukala ti ipumu mumwe aluhe naapataneki ye. (Iilonga 14:5-7; 18:5-7; Aaroma 12:18) Ihe ka li nando a si ohoni onkundana ombwanawa. (Aaroma 1:16) Nonando Paulus okwa li inaa hokwa ondhino, nokuli nelongitho lyoonkondo ndyoka a li ta ningilwa kaapataneki ye, okwa li e na “uufule muKalunga ketu” okutsikila okuuvitha. Okwa ti: “Omuwa a popile ndje nokwa koleke ndje, euvitho lyevaangeli opo li tsakanithwe kungame.” (1 Aatessalonika 2:2; 2 Timoteus 4:17) Omutse gwegongalo lyopaKriste, Jesus, otagu tsikile natango oku tu pa oonkondo ndhoka twa pumbwa opo tu longe iilonga mbyoka a hunganeke tayi ka longwa pethimbo lyetu.—Markus 13:10.
12. Oshike tashi ulike kutya otu na uulaadhi wopaKriste, nowa kankamena kushike?
12 Otu na omatompelo ogendji okutsikila okupopya oohapu dhaKalunga nuulaadhi, ngaashi naanaa Jesus naapiya yalwe yaKalunga aadhiginini ya ningi methelemumvo lyotango. Shika itashi ti kutya otu na okukala ihaatu yawala nenge hatu kambadhala okuthindila etumwalaka maantu mboka inaaye li hala. Ihe itatu tyololoka molwashoka aantu kaaye na ohokwe, noitatu pitika wo epataneko li tu mweneke. Ngaashi Jesus, otatu ulikile aantu kutya Uukwaniilwa waKalunga owo epangelo li na uuthemba wokupangela evi alihe. Ohatu popi neinekelo molwashoka otu lile po Jehova, Omunamapangelo agehe nomolwashoka etumwalaka ndyoka tatu uvitha inali za kutse ihe okuye. Ohole yetu yokuhola Jehova oyi na okukala oyo tayi tu inyengitha unene opo tu mu hambelele.—Aafilippi 1:27, 28; 1 Aatessalonika 2:13.
Oonkundathana dhokweendulula
• Omolwashike sha simana okutseyithila kehe gumwe etumwalaka lyUukwaniilwa uuna tashi wapa, ihe omainyengo geni tatu vulu okukala twa tegelela?
• Ongiini tatu vulu okuulika kutya inatu inekela moonkondo dhetu yene mokulongela Jehova kwetu?
• Iiyilongomwa yini yi na oshilonga tatu ilongo membo lyIilonga yAayapostoli?
[Omathano pepandja 173]
Ngaashi methimbo lyonale, aapiya yaJehova yonena ohaya popi oohapu dhaKalunga nuulaadhi