Ontopolwa ontimilongo mbali
Kaleka esiku lyaJehova momadhiladhilo
1. Sho wi ilongo tango kutya ehupitho okuhupithwa momaupyakadhi gonkalelo ndjika onkulu oli li popepi, owa li u uvite ngiini?
SHIMWE shomiinima mbyoka wi ilongo tango mOmbimbeli osha li kutya elalakano lyaJehova olyo kutya evi alihe li ninge oparadisa. Muuyuni mboka uupe itamu ka kala we iita, omuyonena, oluhepo, omikithi, okumona iihuna neso. Nokuli noonakusa otaya ka yumuka. Kali shi tuu etegameno ekumithi! Okukala popepi kwiinima ayihe mbyoka nokuningwa kwayo otaku tsuwa omuthindo keuliko kutya okukala po kwaKristus ihaaku monika e li Omukwaniilwa ta pangele okwa tameke mo 1914 nonokutya okuza ethimbo ndyoka otwa kala tu li momasiku gahugunina guuyuni mbuka wa kolokosha. Kehulilo lyomasiku ngaka gahugunina, Jehova ota ka hanagula po onkalelo ndjika yiinima yongashingeyi note ke eta uuyuni uupe mboka wu uvanekwa.
2. “Esiku lyaJehova” oshike?
2 Ombimbeli otayi ithana ethimbo lyehanagulo ndika tali ya “esiku lyaJehova.” (2 Petrus 3:10, NW) Olyo “esiku lyondjahi yaJehova” okugeyela uuyuni auhe waSatana. (Sefanja 2:3, NW) Otali ka hula po ‘piita yesiku enene lyaKalunga, omupangeli gwaayihe hali ithanwa omOshiheberi Harmagedon,’ moka ‘aakwaniilwa yuuyuni auhe’ taya ka hanagulwa po. (Ehololo 16:14, 16) Onkalamwenyo yoye mbela otayi ulike kutya owi itaala kutya “esiku lyaJehova” ndyoka oli li popepi?—Sefanja 1:14-18, NW; Jeremia 25:33.
3. (a) Uunake esiku lyaJehova tali ke ya? (b) Omolwashike shi li nawa sho Jehova inaa holola kutya uunake “esiku ndyoka nenge okathimbo nkoka” tali ke ya?
3 Ombimbeli inayi tu pa esiku kutya uunake Jesus Kristus te ke ya e li Omugwanithi gwepangulo lyaJehova okupangula onkalelo yiinima yaSatana. Jesus okwa ti: “Esiku ndyoka nenge okathimbo nkoka kaku na ngoka e ka shi, nonando aayengeli megulu nenge Omwana, oTate oye awike.” (Markus 13:32) Mboka kaaye hole shili Jehova, itaya ka kala ye na ehalo okukaleka esiku lye momadhiladhilo notaya ka lalakanena iinima yuuyuni. Ihe mboka ye hole shili Jehova otaye ke mu longela nomutima aguhe, kutya nduno uunake ehulilo lyonkalelo ndjika yuukolokoshi tali ya.—Epsalmi 37:4; 1 Johannes 5:3.
4. Elondodho lini Jesus a gandja?
4 Jesus ota londodha mboka ye hole Jehova, ta ti: “Kaleni, mwa kotoka, tonateni, . . . oshoka esiku ndyoka kamu li shi uuna tali ya.” (Markus 13:33-37) Ote tu londodha kaatu pitike okulya nokunwa nenge “iimpwiyu yomonkalamwenyo” yi kuthe ko unene eitulomo lyetu e tatu dhimbwa kutya ethimbo ndyoka tu li mulyo olya kwata miiti.—Lukas 21:34-36, NW; Mateus 24:37-42.
5. Ngaashi Petrus a yelitha, esiku lyaJehova otali ke eta shike?
5 Petrus ote tu pe wo omayele tu endelelithe nenge tu kaleke momadhiladhilo “eyo lyesiku lyaKalunga, esiku tuu ndyoka tali lungunitha omagulu notali hengumukitha iitamekatungithi kepupyu.” Omapangelo agehe gopantu—sha hala okutya, “omagulu”—otaga ka hanagulwa po, nosho wo uulipamwe auhe waantu aakolokoshi—sha hala okutya, ‘evi’—‘niitamekatungithi’ yalyo, omadhiladhilo niilonga yuuyuni mbuka uuwinayi, ngaashi iikala yawo yokumanguluka ko kuKalunga nomikalo dhawo omiwinayi nosho wo onkalamweyo yawo yokuhola omaliko. Iinima mbyoka otayi ka pingenwa po ‘komagulu omape [Uukwaniilwa waKalunga womegulu] nevi epe [uulipamwe uupe wokombanda yevi]’ moka tamu ka “kala uuyuuki.” (2 Petrus 3:10-13) Iiningwanima yuuyuni mbyoka iikumithi otayi ka tameka ombadhilila nomesiku nosho wo ethimbo inaali tegelelwa.—Mateus 24:44.
Kaleni mwa tonata shi na ko nasha nendhindhiliko
6. (a) Iinima yini yomeyamukulo lyaJesus kepulo lyaalongwa ye ya gwanithwa kehulilo lyonkalelo yOshijuda? (b) Iitopolwa yini yeyamukulo lyaJesus tayi ukitha eitulomo kiiningwanima nokiikala okuza mo 1914 wu uka komeho?
6 Mokutala kethimbo moka tu li mulyo, otu na okukala twa tseya nawa uuyelele wendhindhiliko ndyoka lya kwatela mo iiningwanima yi ili noyi ili mbyoka tayi ulike omasiku gahugunina—“ehulilo lyonkalelo yiinima.” (NW) Dhimbulukwa kutya sho Jesus a yamukula epulo lyaalongwa ye, lya nyolwa muMateus 24:3, yimwe yomiinima mbyoka a hokolola movelise 4 sigo 22 oya gwanithwa nale kashona monkalelo yOshijuda pokati ko 33 no 70 E.N. Ihe ehunganeko olya li lya gwanithwa unene tuu okuza mo 1914, pethimbo ‘lyokukala po kwaKristus nolyehulilo lyonkalelo yiinima.’ Mateus 24:23-28 ote tu lombwele shoka tashi ka ningwa okuza mo 70 E.N. sigo ethimbo lyokukala po kwaKristus. Iiningwanima mbyoka ya hokololwa muMateus 24:29–25:46 otayi ka ningwa pethimbo lyehulilo.
7. (a) Omolwashike tu na okukala hatu ndhindhilike omukalo moka oonkalo dhongashingeyi tadhi gwanitha endhindhiliko? (b) Yamukula omapulo kehulilo lyokatendo haka, to ulike nkene endhindhiliko lya kala tali gwanithwa okuza mo 1914.
7 Otu na okukala hatu ndhindhilike iiningwanima nosho wo iikala mbyoka tayi gwanitha endhindhiliko. Okukwatakanitha iinima mbyoka kumwe nomahunganeko gOmbimbeli otashi ke tu kwathela okukaleka momadhiladhilo esiku lyaJehova. Otashi ke tu kwathela wo okukala hatu vulu okutompa yalwe yi itaale uuna tatu ya londodha kutya esiku ndyoka oli li popepi. (Jesaja 61:1, 2) Tu na iinima mbyoka momadhiladhilo, natu endululeni omapulo taga landula ngoka taga tsu omuthindo iitopolwa yendhindhiliko, ngaashi ya nyolwa muMateus 24:7 naLukas 21:10, 11.
Omomukalo guni omukumithi ehunganeko kutya “iigwana otayi thikama okukondjithathana, niilongo otayi matukilathana” lya tameke okugwanithwa mo 1914? Oshike sha kala tashi ningwa po shi na ko nasha niita, okuza ethimbo ndyono?
Mo 1918, omalega golukayu geni ga dhipaga aantu oyendji shi vulithe mIita yoTango yUuyuni? Nonando opu na aantu ye na ontseyo yopaunamiti, omikithi dhini tadhi dhipaga aantu omamiliyona natango?
Ompumbwe yiikulya oya li ya guma uuyuni shi thike peni nonando opwa li pu na omahumokomeho gopaunongononi gomethelemumvo lya tetekele?
Oshike she ku itaalitha kutya 2 Timoteus 3:1-5, 13 ita hokolola nkene onkalamwenyo ya kala aluhe, ihe ota hokolola kutya oonkalo oombwinayi odha kala tadhi nayipala sho tatu hedha popepi nehulilo lyomasiku gahugunina?
Okuyoololwa kwaantu
8. (a) Oshike ishewe shoka sha hokololwa muMateus 13:24-30, 36-43, Jesus a kwatakanitha kumwe nehulilo lyonkalelo yiinima? (b) Eudhi lyaJesus otali ti shike?
8 Opu na iiningwanima iikwawo iindhindhilikwedhi mbyoka Jesus a kwatakanitha kumwe nehulilo lyonkalelo yiinima. Limwe lyomugo olyo okuyoololwa ‘kwaana yuukwaniilwa maana yomwiinayi.’ Jesus shoka okwe shi popi meyele lye kombinga yepya lya kunwa omau komutondi. “Iilya” meudhi lye otayi thaneke Aakriste yashili aagwayekwa. “Omau” oyo mboka tayi iti Aakriste ihe oya kala ye li “aana yomwiinayi” molwashoka oya kala ya kakatela kuuyuni mboka tau pangelwa kOndiaboli. Oya yoololwa ‘maana yuukwaniilwa’ waKalunga noya ndhindhilikilwa ehanagulo. (Mateus 13:24-30, 36-43, yelekanitha KB.) Mbela shoka osha ningwa shili?
9. (a) Eyoololo enene lini lyaayehe mboka yi iti Aakriste lya li lya ningwa konima yIita yoTango yUuyuni? (b) Aakriste aagwayekwa oyu ulike ngiini kutya yo aapiya yashili yUukwaniilwa?
9 Konima yIita yoTango yUuyuni, opwa li eyoololo moka ayehe mboka yi iti kutya Aakriste ya topolwa moongundu mbali: (1) Aawiliki yopambepo yUukwakriste naalanduli yawo, mboka ya popile nuuladhi Oshihampi shIigwana (ngashingeyi Iigwanahangano) omanga ya kakatela natango nuudhiginini omaukwashigwana gawo, na (2) Aakriste yashili yopethimbo ndyoka lya landula iita, oya yambidhidha thiluthilu Uukwaniilwa waKalunga wopaMessias, ihe haigwana yuuyuni mbuka. (Johannes 17:16) Oyu ulike kutya oye li aapiya yashili yUukwaniilwa waKalunga mokulonga iilonga yeuvitho ‘lyevaangeli ndika lyuukwaniilwa’ muuyuni auhe. (Mateus 24:14, KB) Oshizemo osha li shike?
10. Oshizemo shotango shiilonga yeuvitho lyUukwaniilwa osha li shini?
10 Tango, opwa li egongelo lyoshihupe shaamboka ya gwayekwa nombepo kuKalunga noye na etegameno lyoku ka kala pamwe naKristus ye li oshitopolwa shUukwaniilwa womegulu. Nonando aantu ya tya ngaaka oya li yi ihanithilwa miigwana, oya li ye etwa mehangano lyaantu ye na uukumwe. Okundhindhilikwa noshihako kwahugunina kwaagwayekwa mboka oku li pokupwa.—Ehololo 7:3, 4, OB-1986.
11. Iilonga yini yokugongela tayi tsikile okulongwa, nometsokumwe nehunganeko lini?
11 Opo nduno kohi yewiliko lyaKristus, opwa li pwa tamekwa okugongelwa ‘kwongundu onene yomaapagani ayehe noyomiilongo ayihe noyomiigwana ayihe noyomomalaka agehe.’ Mboka oya thikama po ‘moonzi dhilwe’ ndhoka tadhi ka hupa “muudhigu uunene” muuyuni uupe waKalunga. (Ehololo 7:9, 14, yelekanitha NW; Johannes 10:16.) Iilonga mbyoka yokuuvitha Uukwaniilwa waKalunga otayi tsikile sigo ongashingeyi manga ehulilo inaali ya. Ongundu onene yoonzi dhilwe ndjoka ngashingeyi yi thike pomamiliyona otayi kwathele nuudhiginini oshihupe shaagwayekwa okutseyitha etumwalaka lya simanenena lyUukwaniilwa. Etumwalaka ndyoka otali uvika miigwana ayihe.
Oshike tashi ka ningwa monakuyiwa?
12. Iilonga yeuvitho oyi na natango okulongwa shi thike peni manga esiku lyaJehova inaali ya?
12 Ayihe ya tumbulwa metetekelo otayi ulike kutya otu li popepi nehulilo lyomasiku gahugunina nonokutya esiku lyaJehova oli li popepipepi. Ihe mbela opu na omahunganeko ngoka ge na okugwanithwa natango manga esiku ndyoka etilithi inaali tameka? Eeno. Okuyoolola aantu shi na ko nasha nompata yUukwaniilwa inaku pwa natango. Miitopolwa yimwe moka mwa kala omapataneko omadhigu uule woomvula odhindji, ngashingeyi omu na aalongwa aape oyendji. Nokuli miitopolwa moka aantu ya kala ihaaya taamba ko onkundana ombwanawa, ohenda yaJehova oyu ulikwa mokugandja kwetu uunzapo. Onkee ano natu tsikileni nokulonga iilonga mbika! Jesus ote tu shilipaleke kutya ngele iilonga ya pu, ehulilo otali ya.
13. Ngaashi sha nyolwa mAatessalonika yotango 5:2, 3, oshiningwanima oshindhindhilikwedhi shini tashi ka ningwa natango, notashi ka tya shike kutse?
13 Ehunganeko lilwe lyOmbimbeli lya simana noonkondo otali hunganeke tali ti: “Manga taa ti: Ombili [negameno opo nduno ehanagulo lyombadhilila, NW] otali ya akele ngomusimba ta adhika koshitheta, nokaa na mpo taa yi ontuku.” (1 Aatessalonika 5:2, 3) Otu na okutegelela natango opo tu mone nkene eigidho ndyoka “ombili negameno” tali ka ningwa. Ihe itashi ka tya nando kutya aawiliki yuuyuni oyo ya kandula po shili omaupyakadhi gaantu. Mboka haya kaleke esiku lyaJehova momadhiladhilo itaya ka pukithwa keigidho ndyoka. Oye shi kutya nziya konima yaashoka, ehanagulo lyombadhilila otali ke ya.
14. Iiningwanima yini tayi ka ningwa pethimbo lyuudhigu uunene, notayi ka ningwa melandulathano lini?
14 Petameko lyuudhigu uunene, aapangeli otaya ka pilukila Babilon Oshinene, uukwaniilwa wuuyuni womalongelokalunga giifundja notaye ke shi hanagula po. (Mateus 24:21; Ehololo 17:15, 16) Konima yaashoka, iigwana otayi ka ponokela mboka haya yambidhidha uunamapangelo waJehova, naashika otashi ka pendutha ondjahi yaJehova okugeyela omapangelo gopapolotika nosho wo aayambidhidhi yago, naashoka otashi ke etitha okuhanagulwa po thiluthilu kwawo. Shoka otashi ka kala Harmagedon, ngoka ta ka kala ehulilo lyuudhigu uunene. Opo nduno Satana noompwidhuli dhe otaye ku umbilwa molumbogo noitaya ka kala taya vulu we okunwetha mo aantu. Shoka otashi ka kala ehulilo lyesiku lyaJehova sho edhina lye tali ka yapulwa.—Hesekiel 38:18, 22, 23; Ehololo 19:11–20:3.
15. Omolwashike kaashi li pandunge okutompathana kutya esiku lyaJehova oli li natango kokule?
15 Ehulilo lyonkalelo ndjika otali ke ya naanaa pethimbo ndyoka lyu uthwa kuKalunga. Itali kalelele ko. (Habakuk 2:3) Dhimbulukwa kutya ehanagulo lyaJerusalem mo 70 E.N. olyi ile nziya, manga Aajuda ya li inaaye li tegelela, manga ya li taya dhiladhila kutya oshiponga osha pita po. Nongiini kombinga yaBabilon shonale? Osha li oshinankondo, shi na einekelo musho shene nosha li shi na omakuma ga kola nomanene. Ihe osha li sha teka po muusiku umwe. Onkee ano ehanagulo lyombadhilila otali ka adha wo onkalelo yuukolokoshi yongashingeyi. Ngele tali ya, natu adhikeni twa hangana melongelokalunga lyashili, molwashoka otwa kala nokukaleka esiku lyaJehova momadhiladhilo.
Oonkundathana dhokweendulula
• Omolwashike sha simanenena okukaleka esiku lyaJehova momadhiladhilo? Ongiini tatu vulu oku shi ninga?
• Otwa gumwa ngiini kokuyoololwa kwaantu hoka taku ningwa ngashingeyi?
• Oshike tashi ka ningwa natango monakuyiwa manga esiku lyaJehova inaali tameka? Oshike ano tu na okukala tatu ningi paumwene?
[Omathano pepandja 180, 181]
Masiku omasiku gahugunina otaga ka hula po sho onkalelo yaSatana tayi ka hanagulwa po