‘Kaleni oupafi’
‘Exulilo loinima aishe oli li popepi; kaleni oupafi mu shiive okwiindila.’ — 1 PET. 4:7, yelekanifa OB-1986.
1. Oshike sha li enenediladilo laasho Jesus a li a honga?
ESHI Jesus Kristus a li kombada yedu, enenediladilo laasho a li a honga okwa li Ouhamba waKalunga. Jehova ota ka longifa Ouhamba oo opo a yukipalife ounamapangelo waye nokuyapulifa edina laye. Nomolwaasho Jesus a li a honga ovahongwa vaye va ilikane kuKalunga tava ti: “Ouhamba woye nau uye; ehalo loye nali wanifwe kombada yedu yo ngaashi meulu.” (Mat. 4:17; 6:9, 10) Epangelo olo laKalunga otali ka xulifa po mafiku ounyuni waSatana notali ka shilipaleka kutya ehalo laKalunga otali wanifwa kombada yedu alishe. Ngaashi Daniel a li a xunganeka, Ouhamba waKalunga “otau ka nyanyaula notau ka teyaula omauhamba aeshe [oo e li ko kunena] noku a xulifa po, ndelenee owo vene tau ka kala fiyo alushe.” — Dan. 2:44.
2. (a) Ovahongwa vaJesus ova li tava ka shiiva ngahelipi kutya okukala po kwaye meenghono dOuhamba okwa hovela? (b) Edidiliko lokukala po kwaJesus meenghono dOuhamba okwa li tali ka ulika vali shike?
2 Molwaashi okuuya kwOuhamba waKalunga okwa li oshinima sha fimanenena kovahongwa vaJesus, ova li ve mu pula tava ti: ‘Oshike tashi ka kala edidiliko lokukala po kwoye nolefimbo lexulilo longhalelo yoinima?’ (Mat. 24:3, NW) Molwaashi okukala po kwaKristus meenghono dOuhamba kakwa li taku ka monika nomesho kwaavo ve li kombada yedu, okwa li tapa ka kala edidiliko. Omishangwa oda xunganeka kutya edidiliko olo otali ka kala la kwatela mo oiningwanima i lili noku lili. Kungaho, ovashikuli vaJesus ovo va li tava ka kala nomwenyo pefimbo olo okwa li tava ka mona kutya Jesus okwa hovela okupangela meulu. Osho osha li yo tashi ka ulika kutya ‘omafiku axuuninwa’ onghalelo ei yoinima youkolokoshi oo a popiwa mOmbibeli okwa hovela. — 2 Tim. 3:1-5, 13; Mat. 24:7-14.
Natu kaleni oupafi momafiku axuuninwa
3. Omolwashike Ovakriste va pumbwa okukala oupafi?
3 Omuyapostoli Petrus okwa ti: ‘Exulilo loinima aishe oli li popepi; kaleni hano mu nelididimiko nomu li oupafi opo mu shiive okwiindila.’ (1 Pet. 4:7, yelekanifa OB-1986.) Ovashikuli vaJesus ove na okukala oupafi, sha hala okutya, okuyandja elitulemo koiningwanima younyuni oyo tai ulike kutya Jesus okwa hovela okupangela. Ndele ova pumbwa okukala oupafi shi dulife nale eshi onghalelo ei yoinima youkolokoshi i li pokuxula po. Jesus okwa li a lombwela ovahongwa vaye a ti: “Kaleni mwa pashuka, osheshi kamu shi shii onaini omwene weumbo te uya [okuhanauna po ounyuni waSatana.]” — Mark. 13:35, 36.
4. Eyooloko lilipi li li pokati kovanhu ovo ve li oshitukulwa shounyuni waSatana novapiya vaJehova? (Kwatela mo oshimhungu.)
4 Ovanhu vahapu otava pangelwa kuSatana, nokave shii eityo loiningwanima younyuni. Kave shii kutya Kristus okwa hovela okupangela. Ndele ovashikuli vashili vaKristus ove li oupafi, nove shii eityo lashili loiningwanima oyo ya kala tai ningwa mefelemudo la pita. Okudja mo 1925, Eendombwedi daJehova oda li da didilika kutya Oita yotete yOunyuni nosho yo oiningwanima oyo ya ka shikula ko otai yandje oumbangi wa yela kutya Kristus okwa hovela okupangela mo 1914. Onghee hano, okudja tuu opo, omafiku axuuninwa onghalelo ei yoinima youkolokoshi i li koshi yepangelo laSatana okwa hovela. Ovanhu vahapu ovo hava konenene oiningwanima younyuni nonande kave shii eityo layo ova didilika eyooloko linene pokati kefimbo olo la tetekela Oita yotete yOunyuni nosho yo oiningwanima oyo ya ka shikula ko. — Tala oshimhungu, “Ehovelo lomafimbo madjuu.”
5. Omolwashike sha fimanenena kufye okutwikila okukala oupafi?
5 Oiningwanima inyanyalifi oyo ya kala tai ningwa mounyuni aushe hanga oule wefelemudo paife, otai ulike kutya otu li momafiku axuuninwa. Oku na ashike okafimbo kanini opo Jehova a yandje elombwelo kuKristus a wilike etangakwaita lovaengeli enaenghono li hanaune po ounyuni waSatana. (Eh. 19:11-21) Ovakriste vashili otava ladipikwa va kale oupafi. Onghee hano, osha fimana okukala oupafi eshi twa teelela ehanauno longhalelo ei yoinima. (Mat. 24:42) Otu na okukala oupafi notu na okuwanifa po oshilonga shonhumba mounyuni aushe, koshi yewiliko laKristus.
Oilonga oyo ina okulongwa mounyuni aushe
6, 7. Exumokomesho lilipi la ningwa shi na sha noilonga yokuudifa Ouhamba momafiku axuuninwa?
6 Oilonga oyo ovapiya vaKalunga ve na okulonga oya li ya xunganekwa i li oshitukulwa shedidiliko olo la kwatela mo oiningwanima i lili noku lili oyo tai ulike kutya otu li momafiku axuuninwa onghalelo ei yoinima youkolokoshi. Jesus okwa li a popya kombinga yoilonga oyo i na okulongwa mounyuni aushe eshi a li a tumbula oinima i lili noku lili oyo tai ka ningwa pefimbo lexulilo. Mexunganeko laye okwa li a kwatela mo eendjovo da fimana tadi ti: “Evangeli eli louhamba otali udifilwa ounyuni aushe li ningile oiwana aishe ondombwedi, opo nee taku uya exulilo.” — Mat. 24:14.
7 Natu ka taleni koumbangi umwe oo wa pamba exunganeko olo laJesus. Eshi omafiku axuuninwa a hovela mo 1914, omuvalu wovaudifi vonghundana iwa owa li munini neenghono, ndele paife omuvalu oo owa hapupala neenghono. Eendombwedi daJehova di dule po 7 000 000 otadi udifa mounyuni aushe, nodi li momaongalo e dule 100 000. Mo 2008, ovanhu 10 000 000 ova li va ongala pamwe nEendombwedi daJehova opo va dane Edimbuluko lefyo laKristus. Omuvalu wovanhu ovo va li pEdimbuluko mo 2008 owa li wa hapupala neenghono u dule oo wa li pEdimbuluko mo 2007.
8. Omolwashike omapataneko itaa dulu okukangheka oilonga yetu yokuudifa?
8 Otaku yandjwa oundombwedi koiwana aishe u na sha nOuhamba fimbo onghalelo ei yoinima inai xula po, kashi na nee mbudi kutya Satana oye ‘kalunga kefimbo lounyuni ou.’ (2 Kor. 4:4) Satana oye ha nwefa mo eengudu dopapolotika, dopalongelokalunga nosho yo dopamalandifilo ounyuni ou, mwa kwatelwa eedjo dado odo ha longifa opo a tandavelife omitotolombo. Ndele mbela oshike hashi ningifa oilonga yokuudifa i tamunuke mo monghedi ikumwifi? Oilonga yokuudifa otai tamunuka mo nawa omolwekwafo laJehova. Nonande Satana ota kendabala okukangheka oilonga yokuudifa Ouhamba, oilonga oyo otai tamunuka mo monghedi ikumwifi.
9. Omolwashike taku dulu okutiwa kutya ehepuluko letu lopamhepo oli li oshikumwifilonga?
9 Okuudifwa kwOuhamba nomupondo nosho yo ekulo nehepuluko lopamhepo loshiwana shaJehova otali dulu okutiwa kutya oli li oshikumwifilonga. Ngeno Kalunga ka li ha yambidida oshiwana shaye noku shi wilika nosho yo oku shi amena, ngeno itashi dulu okuudifa onghundana iwa. (Lesha Mateus 19:26.) Ohatu dulu okukala noushili kutya kekwafo lomhepo iyapuki yaKalunga oyo tai longo momitima dovanhu aveshe ovo ve li oupafi nova hala okulongela Kalunga nehalo liwa, oilonga yokuudifa otai ka longwa nomupondo fiyo ya pwa, “opo nee taku uya exulilo.” Exulilo oli li popepi neenghono.
‘Oudjuu munene’
10. Jesus okwa ti ngahelipi shi na sha nokuuya kwoudjuu munene?
10 Onghalelo ei yoinima youkolokoshi otai ka xula po pefimbo ‘loudjuu munene.’ (Eh. 7:14, NW) Ombibeli inai popya kutya efimbo olo otali ka kala lile shi fike peni, ndele Jesus okwa ti: “Otapa kala oudjuu [munene], inau kala ko okehovelo lounyuni fiyo opaife, ndele ngaashi itau uya vali.” (Mat. 24:21) Nonande ounyuni owa pita nale moudjuu ngaashi mOita Itivali yOunyuni, omo taku tengenekwa kutya omwa fila ovanhu omamiliyona 50 fiyo 60 lwaapo, oudjuu munene oo tau ke uya otau ka kala wa kwata moiti neenghono. Oudjuu munene otau ka xula noita yaHarmagedon. Pefimbo opo, Jehova ota ka tuma omatangakwaita aye a hanaune po oshinima keshe shonghalelo yaSatana kombada yedu. — Eh. 16:14, 16.
11, 12. Oshiningwanima shilipi tashi ka didilikifa ehovelo loudjuu munene?
11 Omaxunganeko Ombibeli inaa popya efiku lokondadalunde kutya oudjuu munene otau ka hovela nashike, ndelenee otae tu lombwele kombinga yoshiningwanima shimwe shikumwifi osho tashi ka didilikifa ehovelo loudjuu munene. Oshiningwanima osho shikumwifi osho okuhanaunwa po kwomalongelokalunga aeshe oipupulu komapangelo opapolotika. Omaxunganeko Ombibeli oo e li mEhololo etukulwa eti-17 nosho yo eti-18, otaa faafanifa omalongelokalunga oipupulu nombwada oyo tai haele nomapangelo opapolotika kombada yedu. Ehololo 17:16 otali ulike kutya mafiku omapangelo oo opapolotika otaa ‘ka tonda ombwada ndele tae i dula, tai kala hamuhele ndele taa li ombelela yayo, ndele tae i xwike momundilo.’
12 Ngeenge efimbo olo ola fiki, Kalunga ote ke “shi tula momitima davo [dovapangeli vopapolotika], va wanife omhangela yaye” yokuhanauna po omalongelokalunga aeshe oipupulu. (Eh. 17:17) Onghee hano, otaku dulu okutiwa kutya Kalunga oye ta ka hanauna po omalongelokalunga aeshe oipupulu. Ehanauno olo otali ka kala etokolo laKalunga okutokola omalongelokalunga oipupulu, molwaashi okwa kala taa hongo ovanhu omahongo oo ehe li metwokumwe nehalo laye oule wefimbo lile nokwa kala taa hepeke ovapiya vaye. Ovanhu vahapu kave shii ngeenge omalongelokalunga oipupulu otaa ka hanaunwa po, ndele ovapiya vaJehova ovadiinini ove shi shii. Kakele kaasho, ovapiya vaKalunga otava lombwele ovanhu kombinga yaasho momafiku aa axuuninwa.
13. Oshike tashi ulike kutya omalongelokalunga oipupulu otaa ka hanaunwa po moule wefimbo lixupi?
13 Ovanhu otava ka kala va kumwa neenghono eshi omalongelokalunga oipupulu taa ka hanaunwa po. Omaxunganeko Ombibeli otaa ulike kutya nokuli ‘neehamba dimwe dokedu’ otadi ka popya shi na sha nehanauno lomalongelokalunga oipupulu tadi ti: ‘Woo, Woo, etokolo loye ole ku hanga mokafimbo kamwe akeke.’ (Eh. 18:9, 10, 16, 19) Ombibeli oya longifa outumbulilo ‘okafimbo kamwe akeke’ okuulika kutya oshiningwanima osho otashi ka ningwa moule wefimbo lixupi neenghono.
14. Jehova ota ka ninga po shike eshi ovatondi vaye tava ka ponokela ovapiya vaye oshikando shaxuuninwa?
14 Otu shi shii kutya konima yefimbo eshi omalongelokalunga oipupulu a hanaunwa po, ovapiya vaJehova ovo va kala tava udifa etumwalaka laye letokolo otava ka ponokelwa. (Hes. 38:14-16) Ovo tava ka ponokela ovapiya vaJehova otava ka katukilwa onghatu kuJehova, molwaashi okwa udaneka kutya ota ka amena ovapiya vaye ovadiinini. Jehova okwa ti: ‘Ame ohandi popi mehandu lange, momundilo woupyuhandu wange. Ndele vo otava ka shiiva nokutya, Aame Omwene.’ (Lesha Hesekiel 38:18-23.) Eendjovo daye otadi ti: ‘Ou ta kumu [ovapiya vaye ovadiinini], ota kumu ondada yeisho laye.’ (Sak. 2:8) Onghee hano, eshi ovatondi vaJehova tava ka ponokela ovapiya vaye mounyuni aushe, Jehova ota ka katuka eenghatu odo tadi ka xulifa po oudjuu munene poita yaHarmagedon. Etangakwaita lovaengeli enaenghono otali ka wanifa po etokolo laJehova lokuhanauna po ounyuni waSatana, tali wilikwa kuKristus.
Okushiiva kutya exulilo oli li popepi oku na oku tu kuma ngahelipi?
15. Okushiiva kutya exulilo longhalelo ei yoinima ola ehena popepi oku na oku tu kuma ngahelipi?
15 Okushiiva kutya exulilo longhalelo ei yoinima ola ehena popepi neenghono oku na oku tu kuma ngahelipi? Omuyapostoli Petrus okwa ti: “Hano oinima ei aishe ngenge tai hanauka ngaha, [omu na okuhangika mwa tya ngahelipi meengeda diyapuki nomoilonga yometilokalunga, NW].” (2 Pet. 3:11) Eendjovo odo otadi ulike kutya otwa pumbwa okukala oupafi nokushilipaleka kutya elihumbato letu oli li metwokumwe noiteelelwa yaKalunga nonokutya ohatu longo oilonga yometilokalunga, osho tashi ulike kutya otu mu hole. Oilonga oyo oya kwatela mo okuninga ngaashi hatu dulu moilonga yokuudifa onghundana iwa yOuhamba fimbo exulilo inali uya. Petrus okwa ti yo: ‘Exulilo loinima aishe oli li popepi; kaleni oupafi mu shiive okwiindila.’ (1 Pet. 4:7) Ohatu dulu okweehena popepi naJehova nokuulika kutya otu mu hole mokwiilikana alushe kuye e tu wilike okupitila momhepo yaye iyapuki nomeongalo laye lomounyuni aushe.
16. Omolwashike tu na okudulika filufilu komayele aKalunga?
16 Molwaashi efimbo e li tu li mulo ola nyika oshiponga, otwa pumbwa okudulika filufilu komayele aKalunga, oo taa ti: “Litaleni hano nawa nhumbi hamu ende, hangaashi omalai, ndelenee ngaashi ovanaendunge; longifeni nawa efimbo, osheshi omafiku [omai].” (Ef. 5:15, 16) Oukolokoshi owa hapupala neenghono kunena shi dulife nale. Satana oha longifa eenghedi di lili noku lili opo a imbe ovapiya vaJehova va longe ehalo laye. Ndele tu li ovapiya vaKalunga otu shii eenghedi odo Satana ha longifa noinatu hala nande osha shi tu ningife tuha kale ovadiinini kuKalunga. Otu shii kombinga yaasho tashi ka ningwa po mafiku, notwe lineekela muJehova notu shii yo kutya omalalakano aye otaa ka wanifwa. — Lesha Johannes 2:15-17.
17. Hokolola nghee ovaxupipo puHarmagedon tava ka kala ve udite eshi ovanhu tava ka nyumunwa.
17 Eudaneko laKalunga likumwifi li na sha nokunyumuna oonakufya otali ka wanifwa, molwaashi “otaku ka kala enyumuko lovayuki nolovalunde.” (Oil. 24:15) Eudaneko olo tali ti kutya ‘otaku ka kala enyumuko’ oli shii okulineekelwa, molwaashi Jehova oye a udaneka eudaneko olo. Jesaja 26:19 okwa udaneka a ti: ‘Ovafi voye otava ka ninga ovanamwenyo. Dudulukeni, nye mu nyakukwe, onye amushe ava hamu nangala mondwi. Edu otali ka eta mo ovafi.’ Eendjovo odo oda li da wanifilwa tete oshiwana shaKalunga shonale eshi sha li sha alukila kedu lasho, notadi tu pe elineekelo kutya otadi ka wanifwa meityo lolela mounyuni mupe. Itashi ka kala tuu shihafifa eshi ovanyumunwa tava ka hangana vali novaholike vavo! Ounyuni waSatana ou li pokuxula po, na Kalunga ota ka eta po ounyuni waye mupe mafiku, onghee hano, osha fimanenena okukala oupafi.
Oto dimbuluka?
• Oshike sha li enenediladilo laasho Jesus a li a honga?
• Onghundana iwa yOuhamba otai udifwa shi fike peni kunena?
• Omolwashike sha fimanenena okukala oupafi?
• Oshike tashi tu omukumo shi na sha neudaneko olo li li mOilonga 24:15?
[Oshimhungu/Efano pepandja 16]
EHOVELO LOMAFIMBO MADJUU
Alan Greenspan okwa shanga embo ledina: Omafimbo madjuu: Okuya mounyuni mupe (The Age of Turbulence: Adventures in a New World), la nyanyangidwa mo 2007. Greenspan okwa kala ta longo oule womido 20 lwaapo e li omunashipundi wehangano ledina United States Federal Reserve Board, olo hali pashukile eembanga adishe domoshilongo shavo. Greenspan okwa divilika membo laye olo eyooloko lididilikwedi olo la li pokati konghalo yomounyuni oo wa tetekela 1914 nomido odo da ka landula ko, a ti:
“Ondjokonona younyuni otai ulike kutya mounyuni oo wa tetekela 1914, ovanhu ova li ve na onghedi iwa yopanghalafano, ova li tava ningi exumokomesho mounongononi, noiwana oya li tai ende tai putuka. Okulongifwa nai nokulandifwa kwovapika okwa li kwa xula po mefelemudo eti-19. Ominyonena di ngulutila odo hadi longelwa ovanhu oda li tadi monika da fa da li pokuxula po. . . . Exumokomesho lopaunongononi olo la li la ningwa mefelemudo eti-19 ola li la etifa po oinima ngaashi olutenda, eengodi, olusheno, eekino, oihauto nosho yo oilongifo yomomaumbo, okutumbula po ashike imwe yomuyo. Exumokomesho lopaunamiti, okuxwepopaleka kwoitungifi moikulya nosho yo eyandjo lomeva a koshoka oya li ya lelepeka okukalamwenyo kwovanhu . . . Ovanhu mounyuni aushe ova li tava diladila kutya exumokomesho la tya ngaho otali twikile.”
Ndele . . . ”Oita yotete yOunyuni oya li ya nyona po neenghono onghedi iwa yopanghalafano nexumokomesho olo la li la ningwa po i dule kokule Oita Itivali yOunyuni; oita yotete oya li ya nyona po eemhangela dovanhu, ofimbo Oita Itivali yOunyuni ya li ya etifa po oushada neenghono. Itandi dimbwa nande omido odo da tetekela Oita yotete yOunyuni, eshi ovanhu va li tava monika va fa tava ka kala ve na onakwiiwa tai timaumbwilifa nokuninga exumokomesho nopehe na oshiimbi. Kunena, etaleko letu ola yooloka ko filufilu kwaalo la li li niwe kovanhu vomefelemudo la tetekela, molwaashi etaleko letu ola kanghamena konghalo oyo i li po kunena. Mbela oinima ngaashi outile, epupyalo lomhepo mounyuni aushe ile omaudaneko ongaho ovanapolotika otai ka kuma exumokomesho lounyuni wopaife ngaashi Oita yotete yOunyuni ya li ya kuma ounyuni wa tetekela? Kape na naanaa oo ta dulu oku shi koleka.”
Greenspan ota dimbuluka eendjovo odo da popilwe fimbo a li kounivesiti komuprofesor moinima yopamaxupilo, Benjamin M. Anderson (1886-1949), tadi ti: “Ovo tava dimbuluka nove shii nhumbi onghalo ya li mounyuni fimbo Oita yotete yOunyuni inai luwa, ohava kala va djuulukwa neenghono onghalo ya tya ngaho. Pefimbo olo la tetekela Oita yotete yOunyuni, ovanhu ova li hava kala ve udite ve li meameno kuhe na vali.” — Economics and the Public Welfare.
Omushangi wembo A World Undone, G. J. Meyer, olo la nyanyangidwa mo 2006, naye okwa li a fika pexulifodiladilo la faafana naalo la popiwa metetekelo, okwa ti: “Luhapu ohaku tiwa kutya oiningwanima yomondjokonona ohai ‘lundulula keshe shimwe.’ Osho osho lelalela sha li sha ningwa pefimbo lOita Inene [1914-1918]. Oita oyo oya li shili ya lundulula keshe shimwe, oya li ya lundulula eengaba, omapangelo, onakwiiwa yoiwana, noya li ya lundulula etaleko lovanhu li na sha nounyuni nosho yo oikala yavo. Oita yotete yOunyuni oya etifa po ounyuni oo u li po kunena, oo wa yooloka ko filufilu kwaao wa li wa tetekela oita oyo.”
[Efano pepandja 18]
Jehova ota ka tuma etangakwaita laye lovaengeli enaenghono puHarmagedon