Ontopolwa 7

Okuvulika otaku vulu oku ku gamena kiiponga

MBELA owa hala okukala wu na emanguluko lyokuninga kehe shimwe shoka wa hala? Mbela opu na omathimbo gamwe ho kala wa hala pu kale kaapu na ngoka te ku lombwele shoka wu na okuninga? Ngashingeyi lombwela ndje oshili kutya oho kala wu uvite ngiini kombinga yaashoka—

Mbela oshike naanaa shi li nawa kungoye? Mbela oshi li ngaa lela pandunge okuninga kehe shoka wa hala? Nenge ohashi kala shi li nawa ngele to vulika kutate nokumeme gwoye?— Kalunga okwa popya kutya owu na okuvulika kaavali yoye, onkee ano opu na etompelo ewanawa molwaashoka wu na oku shi ninga. Natu tale ngele otatu vulu oku li uvako.

Owu na oomvula ngapi?— Owu shi kutya tate gwoye oku na oomvula ngapi?— Meme gwoye nakuku gwoye gwomukulukadhi nenge kuku gwoye gwomusamane oye na oomvula ngapi?— Oya kala ko nale ye ku vule. Shi thike ngaa pokukala ko kwomuntu ethimbo ele opo ngaa pu thike okweenda ti ilongo iinima oyindji. Kehe omvula ohu uvu iinima oyindji, oha mono iinima oyindji noha ningi iinima oyindji. Onkee ano, aagundjuka otaya vulu okwiilonga iinima oyindji kaakuluntu.

Mbela owu na ngono wu shi omushona kungoye moomvula?— Mbela owu shi oshindji wu mu vule? Mbela omolwashike?— Omolwaashono owa kala ko ethimbo ele wu mu vule. Owa li wu na ethimbo olindji okwiilonga iinima wu mu vule.

Olye a kala ko nale e tu vule tse nangoye nenge aantu yalwe?— OJehova Kalunga. Oku shi oshindji e tu vule. Uuna te tu lombwele tu ninge sha, otatu vulu okukala nuushili kutya oshi li mondjila oku shi ninga nonando oshi kale tashi monika sha fa oshidhigu. Mbela owu shi shi kutya nOmulongi Omunene pompito yimwe okwa li e shi mono oshidhigu okuvulika?—

Pompito yimwe Kalunga okwa li a pula Jesus a ninge sha oshidhigu noonkondo. Jesus okwa li a galikana kombinga yaashoka ngaashi tatu shi mono mpaka. Okwa li a galikana ta ti: “Ngele oto shi pitika, oshitenga shika nashi pitilile ndje po.” Mokugalikana ngeyi, Jesus okwa li u ulike kutya kashi li aluhe oshipu okulonga ehalo lyaKalunga. Ihe mbela Jesus okwa li a hulitha egalikano lye ngiini? Mbela owu shi shi?—

Jesus okwa hulitha egalikano lye ta ti: “Hamolwehalo lyandje, ihe olyoye li gwanithwe.” (Lukas 22:41, 42) Eeno, okwa li a hala ehalo lyaKalunga li gwanithwe, ihe halye. Okwa longo shono Kalunga a li a hala a longe pehala lyokulonga shono a li ta dhiladhila kutya osho shi li nawa kuye.

Oshike tatu vulu okwiilonga mwaashika?— Otatu ilongo kutya oshi li aluhe mondjila okulonga shono Kalunga ta ti, nonando otashi vulika shi kale kaashi shi oshipu okuninga. Ihe otatu ilongo mo wo sha shi ili. Mbela owu shi kutya oshike?— Otatu ilongo kutya Kalunga naJesus kaye shi omuntu gumwe, ngaashi aantu yamwe haya ti. Jehova Kalunga oku vule Omwana Jesus noku shi oshindji e mu vule.

Uuna tatu vulika kuKalunga otatu ulike kutya otu mu hole. Ombiimbeli otayi ti: “Ohole yokuhola Kalunga oyo okuvulika kiipango ye.” (1Johannes 5:3) Ngashingeyi owu wete kutya atuheni otwa pumbwa okuvulika kuKalunga. Owa hala okuvulika kuye, hasho mbela?—

Natu kuthe Ombiimbeli yetu tu tale shoka Kalunga ta lombwele aanona ya ninge. Otatu ka lesha shoka Ombiimbeli tayi ti mAaefeso ontopolwa 6, ovelise 1,2 nosho wo 3. Otayi ti: “Aanona vulikeni kaakuluntu yeni. Shika osho oshinakugwanithwa sheni shopakriste, onkee ano osho shu uka, mu shi ninge: ‘Simaneka ho nanyoko.’ Shika osho oshipango shotango, shoka kusho kwa gwedhwa euvaneko: ‘Opo wu kale wu na okukalamwenyo okuwanawa, ngoye wu kale wu na omwenyo ethimbo e le kombanda yevi.’”

Ngashingeyi owu wete kutya oJehova Kalunga mwene te ku lombwele u vulike kutate gwoye nameme gwoye. Mbela osha hala okutya shike oku ya “simaneka”? Osha hala okutya okuungaunga nayo nesimaneko. Kalunga oku uvaneka kutya ngele owa kala ho vulika kaakuluntu yoye oto ka kala “wu na okukalamwenyo okuwanawa.”

Nandi ku lombwele ehokololo kombinga yaantu yamwe mboka ya li ya hupitha oomwenyo dhawo molwaashoka oya li haya vulika. Aantu mbaka oya li ko nalenale moshilando oshinene shaJerusalem. Aantu oyendji yomoshilando shoka kaya li ya pulakene kuKalunga, onkee ano Jesus okwa li e ya londodha kutya Kalunga ota ka hanagula po oshilando shawo. Jesus okwa li wo e ya lombwele nkene ya li taya vulu okuya ontuku ngele oya longo shoka shi li mondjila. Okwa ti: ‘Uuna tamu mono Jerusalem sha kondekwa komatanga gaakwiita, tseyeni kutya oshi li popepi nokuhanagulwa po. Ndika olyo ethimbo lyokuthiga po Jerusalem nokutembukila koondundu.’—Lukas 21:20-22.

Ngaashi naanaa Jesus a li a popi, omatanga gaakwiita oga li ge ya okuponokela Jerusalem. Omatanga gaakwiita gaRoma oga li ge shi kondeke. Omolwomatompelo gontumba, aakwiita oye shi thigi po. Aantu oyendji oya li taya dhiladhila kutya kaye li we moshiponga. Onkee ano, oya kala moshilando. Ihe mbela Jesus okwa li e ya lombwele ya ninge shike?— Mbela ando owa li wa kala muJerusalem, andola owa ningi po shike?— Mboka ya li yi itaale lela Jesus oya thigi po omagumbo gawo noya fadhuka po e taya yi koondundu kokule naJerusalem.

Opwa li pwa piti omvula yimwe, ihe Jerusalem kasha li sha hanagulwa po, nomvula ya ka landula ko inapu ningwa sha. Momvula ontitatu natango kapwa li pwa ningwa sha. Aantu yamwe otashi vulika ya li tayi ipula kutya aantu mboka ya thigi po oshilando kaya li ya katuka pandunge. Ihe momvula ontine omatanga gaakwiita gaRoma, oga galuka. Natango oga li ga kondeke Jerusalem. Ngashingeyi ethimbo lyokufadhuka po olya li lya pwa po. Pompito ndjika omatanga gaakwiita oga hanagula po oshilando. Aantu oyendji mboka ya li musho oya si noshihupe osha falwa muupongekwa.

Ihe mbela oshike sha ningilwa mboka ya li ya vulika kuJesus?— Oya li ya gamenwa molwaashoka oya yi kokule naJerusalem. Onkee ano, kaya li ya ningilwa oshiponga shasha. Okuvulika okwa li kwe ya gamene.

Ngele owa kala ho vulika mbela nangoye otaku ke ku gamena?— Aavali otashi vulika ye ku lombwele kutya ino dhanena moshitauwa nenge popepi nomeya. Omolwashike mbela taya tile ngawo?— Omolwaashono otashi vulika wu lyatwe koohauto nenge wu se omeya. Esiku limwe otashi vulika wu dhiladhile kutya ‘itandi vulu okulyatwa kiihauto, molwaashoka kapu na iihauto tayi ende moshitauwa. Aanona ooyakwetu nayo ohandi ya mono taya dhana moshitauwa nenge popepi nomeya, ihe ihaya mono iiponga.

Aantu oyendji yomuJerusalem nayo osho ya li yu uvite ngaaka. Konima sho omatanga gaakwiita gaRoma ga li ga thigi po Jerusalem, aantu yomoshilando oya li yu uvite ya gamenwa. Sho yamwe ya mono kutya yakwawo inaya za mo moshilando nayo wo oya kala mo. Oya li ya londodhwa, ihe inaya pulakena. Oshizemo, oya li yi ikanithile oomwenyo dhawo.

Natu tale koshiholelwa shilwe. Mbela owa dhana nale nokapalwa?— Otashi vulika shi kale tashi monika shihokitha okutala omulilo uuna to foola okapalwa. Ihe okudhana nokapalwa otashi vulika shi kale sha nika oshiponga. Egumbo alihe otali vulu okupya po e to silemo.

Dhimbulukwa kutya ku na owala okukala ho vulika omathimbo gamwe. Ihe ngele owa kala ho vulika aluhe, otashi ke ku gamena. Mbela olye a ti kutya “aanona vulikeni kaakuluntu yeni”?— OKalunga. Dhimbulukwa kutya okwe ku lombwela ngaaka molwaashoka oku ku hole.

Ngashingeyi lesha omanyolo ngaka tagu ulike nkene sha simana okukala omuvuliki: Omayeletumbulo 23:22; Omuuvithi 12:13; Jesaja 48:17, 18 nosho wo Aakolossa 3:20.

[Ethano pepandja 42]

Omolwashike wu na okupulakena kaakuluntu?

[Ethano pepandja 43]

Oshike tatu vulu okwiilonga megalikano lyaJesus?

[Ethano pepandja 45]

Ongiini okuvulika kelondodho lyaJesus kwa li kwa hupitha aantu mbaka?

[Omathano pepandja 46]

Omolwashike wu na okuvulika nuuna kuu wete oshiponga shasha?