Ontopolwa 9

Otu na okukondjitha omamakelo

MBELA opu na ngoka e ku pulile wu ninge sha sha puka?— Mbela okwa li e ku thininike wu shi ninge? Nenge okwa li e ku lombwele kutya otashi ka kala shihokitha ngele owe shi ningi nonokutya itashi ka kala sha puka lela oku shi ninga?— Ngele gumwe te tu lombwele tu ninge ngawo, nena ota kambadhala oku tu makela.

Mbela otu na okuninga shike ngele tatu makelwa? Mbela otu na okwiiyethela memakelo nokuninga shoka sha puka?— Shoka itashi ka nyanyudha Jehova Kalunga. Ihe mbela owu shi kutya olye ta ka kala a nyanyukwa?— Eeno, oSatana Ondiaboli.

Satana omutondi gwaKalunga noku li wo omutondi gwetu. Ihatu vulu oku mu mona molwaashoka oye omuntu gwopambepo. Ihe oha vulu oku tu mona. Esiku limwe Ondiaboli oya li ya popi naJesus, Omulongi Omunene noya li ya kambadhala oku mu makela. Natu tale shoka Jesus a li a ningi po, opo natse tu ka kale tu shi shoka shi li mondjila okuninga ngele tatu makelwa.

Jesus okwa kala aluhe a hala okulonga ehalo lyaKalunga. Shika okwa li e shi ulike montaneho sho a ninginithwa momulonga gwaJordan. Satana okwa li a kambadhala okumakela Jesus, konima owala yokuninginithwa kwe. Ombiimbeli otayi ti kutya ‘egulu olya li lye egulukile’ Jesus. (Mateus 3:16) Shika osha li tashi ti kutya Jesus okwa tameke okudhimbulukwa ayihe yi na ko nasha nonkalamwenyo ye yonale megulu sho a li pamwe naKalunga.

Jesus konima yokuninginithwa kwe okwa li a yi mombuga a ka tedhatedhe kombinga yiinima mbyoka a li ta dhimbulukwa. Okwa kala mo uule womasiku 40. Ethimbo alihe ndyoka Jesus ka li a lya sha, onkee ano, okwa li a sa ondjala noonkondo. Ndika olyo ethimbo ndyoka Satana a li a kambadhala oku mu makela.

Ondiaboli oya ti: “Ngele ngoye Omuna gwaKalunga, lombwela omamanya ngaka, ga shituke iikwiila.” Iikwiila kaya li tuu tayi ka kala ando iitoye kuye molwaashoka okwa li a sa ondjala! Ihe mbela Jesus okwa li ngaa ta vulu okushitukitha omamanya ga ninge iikwiila?— Eeno, okwa li te shi vulu. Omolwashike mbela? Omolwaashoka Jesus, Omwana gwaKalunga oku na oonkondo dhi ikalekelwa.

Mbela ando ongoye wa pulilwe kOndiaboli wu shitukithe omamanya iikwiilwa, ando owe shi ningi?— Jesus okwa li a sa ondjala. Onkee ano, mbela kasha li tashi ka kala shi li nawa oku shi ninga nokuli nando lumwe aluke?— Jesus okwa li e shi shi kutya osha puka okulongitha oonkondo dhe momukalo ngoka. Jehova okwe mu pa oonkondo ndhoka, opo a hilile nadho aantu kuKalunga, ihe hakuye mwene.

Onkee ano, pehala lyaashono okwa li a lombwele Satana shoka sha nyolwa mOmbiimbeli a ti: “Omuntu ita kala e na omwenyo koshikwiila ashike, ihe okukehe ohapu tayi zi mokana kaKalunga.” Jesus oku shi shi kutya okulonga shoka tashi nyanyudha Jehova osho sha simana shi vulithe okulya iikulya.

Ihe Ondiaboli oya li ya kambadhala natango oku mu makela. Oye mu fala kuJerusalem noye mu londeke koshihoko shotempeli. Opo nduno Satana okwa ti: ‘Ngele ngoye Omuna gwaKalunga, iyumbila pevi, oshoka okwa nyolwa: Aayengeli yaKalunga otaye ke ku gamena waa iyehameke.’

Omolwashike Satana a tile ngawo?— Okwe shi popi opo a makele Jesus a ninge oshinima shoka kaashi li pandunge. Ihe natango Jesus ka li a pulakene kuSatana. Okwa lombwele Satana a ti: “Okwa nyolwa: ‘Ino makela OMUWA Kalunga koye.’” Jesus oku shi shi kutya osha puka okumakela Jehova mokutula omwenyo gwe moshiponga.

Satana natango ka li a sholola. Okwa li a fala ishewe Jesus kondundu ondeendeka. Okwa li e mu ulukile omaukwaniilwa agehe nenge omapangelo gomuuyuni nomasimano gago. Opo nduno Satana okwa lombwele Jesus a ti: “Ayihe mbika otandi yi ku pe, ngele to tsile ndje oongolo e to galikana ndje.”

Dhiladhila kwaashoka Ondiaboli ya li tayi pe Jesus. Mbela omaukwaniilwa agehe ngoka nenge omapangelo gaantu, oga li shili gaSatana?— Jesus ka li e shi tindi kutya kage shi gaSatana. Ando oga li kaage shi gaSatana, ando Jesus okwe ga taamba ko. Eeno, Satana oye lela omupangeli gwiigwana ayihe yomuuyuni. Ombiimbeli otayi mu ithana nokuli “omupangeli gwuuyuni mbuka.”—Johannes 12:31.

Mbela oto ka ninga po shike ngele Ondiaboli oye ku uvanekele oku ku pa sha ngele we yi galikana?— Jesus okwa kala e shi kutya otashi ka kala sha puka okugalikana Ondiaboli kutya nduno otayi mu pe shike. Onkee ano, Jesus okwa ti: ‘Za po Satana, molwaashoka Ombiimbeli otayi ti kutya OMUWA Kalunga koye oye awike u na oku mu galikana noye awike u na oku mu longela.’—Mateus 4:1-10; Lukas 4:1-13.

Natse ohatu adhika komamakelo. Mbela owa tseya gamwe gomugo?— Natu tale koshiholelwa shika. Natu tye nduno meme gwoye okwa teleke onyama e te ku lombwele kutya ino lya mo mombiga, tegelela owala ethimbo lyokulya li thike. Ihe otashi vulika wa sa ondjala noonkondo, nokungawo, otashi vulika wu makelwe wu kale wa hala okulya mo. Mbela oto ka vulika ngaa kumeme gwoye?— Satana okwa hala waaha vulike kumeme gwoye.

Dhimbulukwa kutya Jesus naye okwa li a sa ondjala noonkondo, ihe okwa li e shi shi kutya okunyanyudha Kalunga oko kwa simana ku vule okulya. Ngele to ningi shoka to lombwelwa kumeme gwoye oto ulike kutya oto holele Jesus.

Otashi vulika aanona yalwe ye ku pe iingangamithi. Otashi vulika ye ku lombwele kutya otashi ka kala shi li nawa ngele owe yi longitha. Ihe iingangamithi mbyoka otayi vulu yi ku ehameke nenge yi ku dhipage nokuli. Nenge tashi vulika gumwe e ku pe okasekeleta hoka ka longwa miingangamithi e te ku kondjitha u ka hile. Mbela oto ka ninga po shike?—

Dhimbulukwa kutya Satana okwa kambadhalele okuningitha Jesus a tule omwenyo gwe moshiponga sho e mu lombwele a nuke kotempeli. Ihe Jesus ka li e shi ningi. Oto ka ninga po shike ngele gumwe ote ku kondjitha wu ninge sha sha nika oshiponga?— Jesus ka li a pulakene kuSatana. Ano nangoye ku na okupulakena nando okugumwe ngoka ta kambadhala oku ku ningitha wu ninge iinima mbyoka ya puka.

Siku limwe otashi vulika wu pulwe wu galikane oshiyelekela, oshinima shoka Ombiimbeli tayi ti kutya katu na okuninga. (Eksodus 20:4,5) Otashi vulika wu pulwe wu shi ninge nando okosikola omolwoshiningwanima shi ikalekelwa. Otashi vulika wu lombwelwe kutya ino ya ko we kosikola ngele owa tindi oku shi ninga. Mbela oto ka ninga po shike?—

Oshipu okuninga shoka shi li mondjila uuna kehe gumwe te shi ningi. Ihe okuninga shoka shi li mondjila otaku vulu okukala okudhigu noonkondo ngele yalwe otaya kambadhala oku tu ningitha shoka sha puka. Otashi vulika ya tye kutya shoka taya ningi inashi puka lela. Mbela Kalunga ota ti shike kombinga yaashono? Oye e shi shoka oshiwanawa kutse.

Onkee ano kutya nduno yalwe otaya ti ngiini, katu na nando okuninga iinima mbyoka Kalunga ta ti kutya oya puka. Komukalo nguka otatu ka nyanyudha aluhe Kalunga noitatu ka nyanyudha nando Ondiaboli.

Uuyelele wa gwedhwa po wu na ko nasha nankene tatu vulu okukondjitha omamakelo otawu adhika mEpisalomi 1:1,2; Omayeletumbulo 1:10, 11; Mateus 26:41 nosho wo 2 Timoteus 2:22.

[Ethano pepandja 52]

Jesus okwa tameke okudhimbulukwa shike konima yokuninginithwa kwe?

[Ethano pepandja 53]

Ongiini Ondiaboli ya li ya longitha omamanya mokumakela Jesus?

[Ethano pepandja 55]

Omolwashike Satana a li ta vulu okugandja po omaukwaniilwa agehe ngaka kuJesus?

[Omathano pepandja 55]

Oto ka ninga po shike ngele to makelwa?

[Ethano pepandja 56]

Omolwashike sha puka okulongitha iiyelekela mokugalikana?