Ondiyapoli tayi makele Jesus

Sho Jesus a ninginithwa, ombepo ondjapuki oye mu fala mombuga. Okwa ningi omasiku 40 inaa lya nokwa li a sa ondjala noonkondo. Opo nduno Ondiyapoli oye ya kuye yi mu makele tayi ti: ‘Ngele ngoye Omuna gwaKalunga shili, lombwela omamanya ngaka, ga ninge iikwiila.’ Ihe Jesus okwa yamukula ta longitha omanyolo ta ti: ‘Okwa nyolwa kutya omuntu ina pumbwa owala iikulya, opo a kale nomwenyo. Oku na okupulakena kukehe ohapu tayi zi kuKalunga.’

Ondiyapoli oya makele ishewe Jesus tayi ti: ‘Ngele ngoye Omuna gwaKalunga shili, nuka okuza koshihoko shotempeli. Okwa nyolwa kutya Kalunga ote ku tumine aayengeli ye, ye ku hakele.’ Jesus okwa yamukula natango ta longitha omanyolo ta ti: ‘Okwa nyolwa kutya katu na okumakela Jehova.’

Satana oku ulukile Jesus omapangelo agehe gomuuyuni, omauyamba gago nesimano lyago, e ta ti: ‘Omapangelo agehe ngaka nesimano lyago otandi ge ku pe, ngele owa galikana ndje nando olumwe.’ Ihe Jesus okwa yamukula a ti: ‘Za po, Satana! Okwa nyolwa kutya Jehova oye awike tu na okugalikana.’

Opo nduno Ondiyapoli oya thigi po Jesus, naayengeli oye ya e taye mu pe iikulya. Okuza mpono, Jesus okwa kala tu uvitha onkundana ombwanawa yUukwaniilwa. Iilonga mbyono yokuuvitha oyo a li a tumwa a longe kombanda yevi. Aantu oya li ya hokwa shoka te ya longo, noye mu landula shaa mpono a yi.