Natu “kondjifeni Satana” ngaashi Jesus a li a ninga
“Kondjifeni Satana, ndele ye te mu i onhapo.” — JAK. 4:7.
1. Jesus okwa li e shii kutya ota ka hangwa komayeleko elipi kombada yedu, noshidjemo osha li sha tya ngahelipi?
JESUS KRISTUS okwa li e shii kutya Ondiaboli oya li tai ke mu yeleka. Oushili oo ou liwetikile meendjovo odo Kalunga a li a lombwela eyoka, nonande oda li da yukifwa lela koshishitwa shikolokoshi oshinashibofa osho sha li sha popya okupitila meyoka. Kalunga okwa ti: “Ame ohandi ka tula outondanhu pokati koye nomwalikadi [oshitukulwa shehangano laJehova shomeulu] nokoludalo loye nokoludalo laye. Ye [Jesus Kristus] ota ka nyanyaula omutwe woye ndele ove to ke mu twa moshififinwa.” (Gen. 3:14, 15; Eh. 12:9) Okutuwa kwaJesus moshififinwa okwa li taku ka kala ashike kwopakafimbo, eshi a li ta ka dipawa, molwaashi Jehova okwa li te ke mu nyumunina moshinge shomeulu. Ndelenee okunyanyaulwa kwomutwe weyoka otashi ka tya okuxulifwa po filufilu kwOndiaboli. — Lesha Oilonga 2:31, 32; Ovaheberi 2:14.
2. Omolwashike Jehova a li e na elineekelo kutya Jesus ota ka kondjifa Ondiaboli nomupondo?
2 Jehova okwa li e na elineekelo kutya Jesus ota ka pondola okuwanifa po oshinakuwanifwa shaye kombada yedu nota ka kondjifa Ondiaboli. Omolwashike Jehova a li e na elineekelo la tya ngaho? Omolwaashi Jehova okwa li a shitila Jesus meulu omido dihapu da pita, nokwa kala te mu konenene nokwa li e shii kutya “omulongi onghulungu” ‘nomudalwa wotete woishitwa aishe’ oo okwa kala omuduliki nomudiinini. (Omayel. 8:22-31, NW; Kol. 1:15) Onghee hano, eshi Jesus a li e uya kombada yedu, Jehova okwa li a efa Ondiaboli i mu yeleke fiyo omefyo molwaashi okwa li e lineekela kutya Jesus ota ka kala omudiinini. — Joh. 3:16.
Jehova oha amene ovapiya vaye
3. Ondiaboli ohai kala i uditile ngahelipi ovapiya vaJehova?
3 Jesus okwa popya kutya Ondiaboli oi li “omupangeli wounyuni ou” nokwa li a londwela ovahongwa vaYe kutya otava ka hepekwa, ngaashi ashike ye a li a hepekwa. (Joh. 12:31; 15:20) Ounyuni ou u li mepangelo laSatana Ondiaboli ou tonde Ovakriste vashili, molwaashi ohava longele Jehova nove li ovaudifi vouyuki. (Mat. 24:9; 1 Joh. 5:19) Oshixupe shovavaekwa osho tashi ka pangela pamwe naKristus mOuhamba womeulu, osho unene shi li oshishonekwa shOndiaboli. Satana oha ponokele yo Eendombwedi daJehova dihapu odo di na eteelelo loku ka kala nomwenyo fiyo alushe moparadisa kombada yedu. Eendjovo daKalunga otadi tu londwele tadi ti: “Omutondi weni, Satana, ohe mu dingilile ngaashi onghoshi hai kumbu, nota kongo ou te mu xwake po.” — 1 Pet. 5:8.
4. Oshike tashi ulike kutya oshiwana shaKalunga osha kondjifa Ondiaboli nomupondo pefimbo letu?
4 Ohatu pondola okukondjifa Ondiaboli, molwaashi Jehova Kalunga oha yambidida ehangano laye. Pashihopaenenwa, tala komaumbangi aa taa landula: Momido 100 da pita, omapangelo amwe oukanyamukulwa omakwanyanya okwa li a kendabala okuxulifa po Eendombwedi daJehova. Ndele omuvalu wEendombwedi otau twikile okuhapupala, nopaife odi li 7 000 000 lwaapo momaongalo e dule 100 000 mounyuni aushe. Ovapangeli ovakwanyanya ovo va li tava hepeke oshiwana shaJehova kave po vali kunena.
5. Jesaja 54:17 ota wanifilwa ngahelipi ovapiya vaKalunga kunena?
5 Eshi Kalunga a li ta popi neongalo laIsrael shonale olo la li onga “omwalikadi” waye, okwa li a udaneka a ti: “Oshilwifo keshe tashi hambulwa shi ku lwife, otashi nyengwa. Nakeshe elaka tali ku hokololifa, oto li tomhele oushima. Eshi efyuululo lovapiya vOmwene, nouyuki wavo womuame.” (Jes. 54:11, 17, yelekanifa NW.) Eudaneko olo ola kala tali wanifilwa oshiwana shaJehova mounyuni aushe ‘momafiku aa axuuninwa.’ (2 Tim. 3:1-5, 13) Ohatu twikile okukondjifa Ondiaboli, noshilwifo keshe osho Ondiaboli tai ka longifa opo i tu hanaune po itashi ka pondola molwaashi Jehova oku li pamwe nafye. — Eps. 118:6, 7.
6. Exunganeko laDaniel otali tu lombwele shike kombinga yonakwiiwa yepangelo lOndiaboli?
6 Pexulilo longhalelo yoinima ei youkolokoshi olo li li poduka, oinima aishe yepangelo laSatana otai ka hanaunwa po. Omuprofeti Daniel okwa li a nwefwa mo kuKalunga a shange exunganeko tali ti: “Pomafiku eehamba dinya [odo di li ko kunena] Kalunga ou komeulu ota ka dika ouhamba [meulu] itau ka teka po fiyo alushe, nepangelo lawo itali ka yandjwa koshiwana shimwe. Ndele owo otau ka nyanyaula notau ka teyaula omauhamba aeshe [oo e li ko kunena] noku a xulifa po, ndelenee owo vene tau ka kala fiyo alushe.” (Dan. 2:44) Ngeenge osho sha ningwa, epangelo laSatana nosho yo omapangelo ovanhu inava wanenena otaa ka xulifwa po. Oinima aishe yonghalelo yOndiaboli otai ka xulifwa po fiyo alushe, ndele Ouhamba waKalunga otau ka pangela edu alishe, nokape na epangelo olo tali ke u pataneka. — Lesha 2 Petrus 3:7, 13.
7. Otu shi shii ngahelipi kutya ovapiya vaJehova otava dulu okukondjifa Ondiaboli nomupondo pauhandimwe?
7 Osha yela kutya Jehova ota ka amena ehangano laye nota ka twikila oku li nangeka noupuna pamhepo. (Lesha Epsalme 125:1, 2.) Ongahelipi mbela shi na sha nafye pauhandimwe? Ombibeli otai tu lombwele kutya ohatu dulu okukondjifa Ondiaboli nomupondo, ngaashi Jesus a li a ninga. Exunganeko olo Kristus a li a yandja komuyapostoli Johannes otali ulike kutya “ongudu inene,” yaavo ve na eteelelo loku ka kala kombada yedu otai ka xupa pexulilo longhalelo ei yoinima nonande ope na omapataneko okudja kuSatana. Omishangwa otadi popi kutya ongudu inene oyo otai ingida tai ti: “Exupifo olaKalunga ketu nolOdjona [Jesus Kristus], ou e li omutumba kolukalwapangelo.” (Eh. 7:9-14) Ovavaekwa nosho yo oovakwao ‘veedi dimwe’ ova popiwa kutya otava kondjifa Satana nomupondo. (Joh. 10:16, OB-1986; Eh. 12:10, 11) Ndele opo tu kondjife Ondiaboli nomupondo, otwa pumbwa okuninga eenghendabala da mana mo nokwiilikana twa mana mo opo tu ‘xupifwe komunawii.’ — Mat. 6:13, NW.
Jesus okwa tula po oshihopaenenwa sha denga mbada mokukondjifa Ondiaboli
8. Eyeleko lotete la shangwa lilipi olo Ondiaboli ya li ya yeleka nalo Kristus mombuwa, na Kristus okwa li e linyenga ngahelipi?
8 Ondiaboli oya li ya kendabala okuteya po oudiinini waJesus. Oya li ya yeleka Jesus lwoikando mombuwa, nelalakano lokuteya po oudiinini waye kuJehova. Ndele nande ongaho, Jesus okwa tula po oshihopaenenwa sha denga mbada mokukondjifa Satana. Jesus otashi dulika a li a fya ondjala nokwa li a halelela okulya konima eshi a kala e lidilika okulya oule womafiku 40. Satana okwa li a lombwela Jesus a ti: ‘Ove ngeenge Omona waKalunga, lombwela hano omamanya aa a shituke omingome.’ Ndele Jesus okwa li a anya okulongifa eenghono odo a pewa kuKalunga omolwouwa waye mwene. Ponhele yaasho, Jesus okwa ti: “Okwa shangwa: Hakomungome auke omunhu ta kala e nomwenyo, ndelenee okondjovo keshe tai di mokanya kaKalunga.” — Mat. 4:1-4; Deut. 8:3.
9. Omolwashike tu na okukondjifa eenghendabala dOndiaboli dokulongifa omahalo etu opaushitwe?
9 Ondiaboli ohai longifa omahalo opaushitwe ovapiya vaJehova kunena. Onghee hano, otu na okukala twa tokola toko tu kondjife omayeleko omahalo omilele inadi koshoka oo e li apeshe mounyuni ou uhe na eenghedi. Eendjovo daKalunga oda popya nomufindo da ti: “Mboli kamu shi shii nokutya, ava ve he fi ovayuki itava fyuulula ouhamba waKalunga? Inamu puka, ovahaeli novakaleli voikalunga novanyoni vohombo nomashenge novahaeli vomashenge . . . itava fyuulula ouhamba waKalunga.” (1 Kor. 6:9, 10) Onghee hano, osha yela kutya ovanhu ovo ve na onghedi yokukalamwenyo ya nyata noinava hala okuninga omalunduluko itava ka ya mo mounyuni mupe waKalunga.
10. PaMateus 4:5, 6, Satana okwa li vali a longifa eyeleko lilipi opo ngeno a teye po oudiinini waJesus?
10 Omishangwa oda popya shi na sha neyeleko limwe olo Ondiaboli ya li ya yeleka nalo Jesus mombuwa, da ti: “Satana e mu twala koshilando shiyapuki ndee te mu londeke koxulo yotembeli ndee ta ti kuye: [Ove] ngenge Omona waKalunga, nukila poshi, osheshi okwa shangwa: Oye ote ku lombwelele ovaengeli vaye, ndee otave ku humbata momaoko avo, u he lipume omhadi yoye kemanya.” (Mat. 4:5, 6) Paulelalela Satana okwa li ta ti kutya ngeenge Jesus okwa ningi ngaho ota ka ulika kutya oye Messias shili. Ngeno Jesus okwe shi ningile, ngeno okwa ulika kutya oku na ounhwa, na Jehova ka li ta ka hokwa onghatu ya tya ngaho noka li te ke mu yambidida. Jesus okwa li a ulika kutya omudiinini kuJehova nokwa li a nyamukula Ondiaboli a tofa omushangwa wonhumba, a ti: “Okwa shangwa yo: Ino shinda Omwene Kalunga koye.” — Mat. 4:7; Deut. 6:16.
11. Satana ota dulu oku tu yeleka ngahelipi, noshidjemo otashi dulika shi ka kale sha tya ngahelipi?
11 Satana ota dulu oku tu yeleka tu konge efimano meenghedi di lili noku lili. Otashi dulika e tu heke tu hopaenene onghedi yokudjala nokuliwapeka younyuni ile tu kufe ombinga momalihafifo taa limbililike. Ndele ngeenge otwe lipwililikile omayele Ombibeli nokuhopaenena ounyuni, mbela ohatu ka teelela ngoo ovaengeli ve tu amene koilanduliko ii yokukatuka onghatu ya tya ngaho? Nonande ohamba David oya li ye livela ombedi omolwenyono olo ya li ya nyona naBatseba, kaya li ya amenwa koilanduliko oyo ya li ye ke i hanga. (2 Sam. 12:9-12) Inatu yeleka nande Jehova meenghedi inadi yuka, tashi dulika nande mokupanga oukaume nounyuni. — Lesha Jakob 4:4; 1 Johannes 2:15-17.
12. PaMateus 4:8, 9, Omona waKalunga okwa li natango a yelekwa neyeleko lilipi, nokwa li e linyenga ngahelipi?
12 Ondiaboli oya li vali ya yeleka Jesus mombuwa, ya li tai kendabala oku mu pa eenghono dopapolotika. Satana okwa li a ulikila Jesus omauhamba aeshe ounyuni nosho yo efimano lao ndele ta lombwele Jesus ta ti: “Aishe ei ohandi i ku pe, ngenge to twile nge eengolo ndee to linyongamene nge.” (Mat. 4:8, 9) Satana ka li tuu e na omakoto eshi a li a hala Jesus e mu ilikane ponhele yokwiilikana Jehova, naashi a li ta kendabala okuheka Jesus aha kale omudiinini kuJehova! Molwaashi okwa kala a halelela okwiilikanwa, omweengeli oo a li nale omudiinini okwa ka wila moulunde omolwolwisho laye ndele ta ningi omuhongauli wovanhu a shiya ko Satana Ondiaboli. (Jak. 1:14, 15) Ndele mepingafano naasho, Jesus okwa li a tokola toko okukala omudiinini kuXe womeulu, nomolwaasho okwa li a nyamukula Satana a ti: ‘Dja po Satana, osheshi opa shangwa: Omwene Kalunga koye u noku mu twila eengolo, noye aeke u noku mu kalela.’ Kungaho, Jesus okwa li natango a kondjifa Ondiaboli nomupondo. Omona waKalunga ka li a hala okukala oshitukulwa shounyuni waSatana noka li ta ka longela omunawii. — Mat. 4:10; Deut. 6:13; 10:20.
“Kondjifeni Satana, ndele ye te mu i onhapo”
13, 14. (a) Ondiaboli oya li tai pe Jesus shike eshi ya li ye mu ulikila omauhamba aeshe omounyuni? (b) Satana oha kendabala ngahelipi oku tu nwefa mo?
13 Eshi Ondiaboli ya li ya ulikila Jesus omauhamba aeshe omounyuni, oya li tai pe Jesus eenghonopangelo odo da li dihe niwe nande okomunhu umwe pefimbo opo. Satana okwa li ta diladila kutya Jesus ota ka hokwa oinima oyo a li e mu ulikila, nonokutya ote ke mu tomha a itavele kutya ota dulu okuninga omuwiliki wopapolotika omunaenghono elela kombada yedu. Ondiaboli ihai tu yeleke moku tu pa omauhamba kunena, ndele ohai kendabala okunyateka omadiladilo etu okupitila moinima oyo hatu dulu okumona nomesho nosho yo oyo hatu dulu okuuda.
14 Molwaashi Ondiaboli oyo tai pangele ounyuni ou, ohai nwefa mo oikundaneki younyuni ou. Itashi kumwifa eshi oileshomwa ihapu yomounyuni, eeprograma doko-TV, eekombiyuta nosho yo eemusika hai xumifa komesho oinima ya nyika oluhaelo nelongifo leenghono. Omashiivifo oilandifomwa ounyuni ohae tu ningifa tu kale twa hala okulanda oinima oyo inatu pumbwa. Okupitila moinima ya tya ngaho, Ondiaboli ohai longifa oinima yopamaliko oyo tai hokwifa omesho etu, omatwi nosho yo omadiladilo etu. Ndele ngeenge hatu henuka okulesha, okutala nosho yo okupwilikina koinima younyuni oyo ya tokolwa kOmishangwa, ohatu ti paulelalela: “Dja po, Satana.” Kungaho, ohatu hopaenene Jesus mokukala tu na ouladi notwa tokola toko okuhenuka enwefemo lii lounyuni waSatana. Ohashi didilikwa mo noupu kutya fye katu li oshitukulwa shounyuni waSatana eshi hatu lombwele nouladi ovanailonga vakwetu, ovanafikola vakwetu, ovashiinda shetu nosho yo ovapambele vetu kutya fye otu li Eendombwedi daJehova notu li ovashikuli vaKristus. — Lesha Markus 8:38.
15. Omolwashike twa pumbwa okukala alushe oupafi opo tu kondjife Satana?
15 Konima eshi Ondiaboli ya li ya kendabala okuteya po oudiinini waJesus kuKalunga oshikando oshititatu ndele inai pondola, ‘oya li ye mu efa.’ (Mat. 4:11) Ndele Satana ka li a efa po filufilu okuyeleka Jesus, molwaashi Ombibeli otai ti: “Omudiaboli eshi a xulifa omahongaulo aye aeshe [mombuwa] okwa dja po puye manga.” (Luk. 4:13) Otu na okukala hatu pandula Jehova ngeenge twa kondjifa Ondiaboli nomupondo. Ndele otu na okukala alushe hatu pula ekwafo kuKalunga, molwaashi Ondiaboli otai ka aluka vali i tu yeleke pefimbo layo la wapala, ndele hapefimbo olo tashi dulika twa teelela i tu yeleke. Onghee hano, otu na okukala alushe oupafi, twe lilongekida okutwikila okulongela Jehova oilonga iyapuki kashi na nee mbudi kutya ohatu ka hangwa komayeleko a tya ngahelipi.
16. Eenghono dilipi Jehova he tu pe, nomolwashike tu na okukala hatu ilikana tu di pewe?
16 Opo tu dule okukondjifa Ondiaboli, otu na okukala hatu indile tu pewe eenghono odo di dule eenghono adishe meshito alishe, omhepo iyapuki yaKalunga. Omhepo iyapuki otai ke tu kwafela tu ninge oinima oyo itatu dulu okuninga keenghono detu vene. Jesus okwa li a shilipaleka ovashikuli vaye kutya otava dulu okupewa omhepo yaKalunga a ti: “Nye [inamu wanenena nokungaha otamu yelekanifwa novai], ngenge omu shii okupa ovana veni oipewa iwa, unene Xo yeni yomeulu ta yandje Omhepo Iyapuki kuava tave mu indile.” (Luk. 11:13) Natu kale alushe hatu ilikana Jehova e tu pe omhepo yaye iyapuki. Ohatu ka kala twa tokola toko nohatu ka pondola okukondjifa Ondiaboli kekwafo leenghono odo dinene. Kakele kokukala hatu ilikana pandjikilile notwa mana mo, otwa pumbwa yo okudjala oilwifo aishe yopamhepo oyo twa pewa kuKalunga opo tu dule “okufikamena omakonda omuyelani.” — Ef. 6:11-18.
17. Ehafo lilipi la li la kwafela Jesus a kondjife Ondiaboli?
17 Ope na yo oshinima shimwe vali osho sha li sha kwafela Jesus a kondjife Ondiaboli, notashi dulu yo oku tu kwafela. Ombibeli otai ti: “[Jesus okwa] li a hepekelwa [komuti womahepeko, NW] omolwehafo e li tulikilwa, nokwa li e he na ko na sha nomasheko, Oye a kala omutumba kolulyo lolukalwapangelo laKalunga.” (Heb. 12:2) Nafye ohatu dulu okukala nehafo la tya ngaho mokuyambidida ounamapangelo waJehova, nokukala hatu fimanekifa edina laye liyapuki nosho yo okukaleka momadiladilo ondjabi yomwenyo waalushe. Ohatu ka kala twa hafa eshi Satana noilonga yaye aishe tai ka hanaunwa po filufilu, naashi ‘ovananheni tava ka fyuulula edu, ndee tava ka hafela ombili inene.’ (Eps. 37:11) Onghee hano, natu twikileni okukondjifa Ondiaboli, ngaashi naanaa Jesus a li a ninga. — Lesha Jakob 4:7, 8.
Oto nyamukula ngahelipi?
• Oumbangi ulipi tau ulike kutya Jehova oha amene oshiwana shaye?
• Jesus okwa tula po oshihopaenenwa shilipi mokukondjifa Satana?
• Omeenghedi dilipi hatu dulu okukondjifa Ondiaboli?
[Efano pepandja 30]
Okukala oukaume nounyuni otaku tu ningifa tu kale ovatondi vaKalunga
[Efano pepandja 32]
Jesus okwa li a anya okutambula ko omauhamba aeshe omounyuni oo Satana a li te mu pe