Kondjifeni Satana, ndele te mu i onhapo

“Dulikeni . . . kuKalunga, kondjifeni Satana, ndele ye te mu i onhapo.” — JAKOB 4:7.

1, 2. (a) Oikala ya fa yOndiaboli ilipi ya hokololwa muJesaja etukulwa eti-14? (b) Ohatu ka kundafaneni omapulo elipi moshitukulwa eshi?

ONDIABOLI oyo omulinenepeki a shiya ko. Oi na oikala younhwa ngaashi oyo ya li i niwe kohamba oyo ya hokololwa komuprofeti waKalunga, Jesaja. Omido di dule pe 100 fimbo Babilon (Babel) sha li inashi ninga oshinaenghono mounyuni aushe, oshiwana shaJehova okwa li sha popiwa paxunganeko tashi ula “ohamba yaBabel,” tashi ti: “Ove we lidilonga momutima woye, wa tya: Ame onda hala okulonda meulu nohandi lidikile oshipundipangelo shange kombada yeenyofi daKalunga [eehamba domepata lohamba David], . . . ndi lifefe ou wokombadambada.” (Jesaja 14:3, 4, 12-15; Numeri 24:17) “Ohamba yaBabel” oya li i na oikala younhwa ya fa yaSatana, ‘kalunga kounyuni ou.’ (2 Ovakorinto 4:4, OB-1954) Ndele oikala younhwa yaSatana otai ke mu hanaunifa po, ngaashi ashike epata leehamba daBabilon la xulifwa po monghedi ififa ohoni.

² Ndele fimbo Satana ina hanaunwa po, otashi dulika tu lipule omapulo ngaashi aa taa landula: Mbela otu na okutila Satana? Omolwashike ha xwaxwameke ovanhu va hepeke Ovakriste? Notu na okuninga shike opo tuha findwe kOndiaboli?

Mbela otu na okutila Ondiaboli?

3, 4. Omolwashike Ovakriste ovavaekwa nosho yo oovakwao ihava tila Ondiaboli?

³ Ovakriste ovavaekwa ohava pamekwa keendjovo daJesus Kristus odo tadi ti: “Ino tila oyo tai ke ku hepeka. Tala, ondiaboli otai idilile vamwe vomunye modolongo, mu yelekwe, ndele otamu ka monifwa oudjuu omafiku omulongo. Diinina fiyo kefyo, Ame nohandi ku pe oshishani shomwenyo.” (Ehololo 2:10) Ovavaekwa nosho yo oovakwao ovo ve na eteelelo loku ka kala nomwenyo waalushe kombada yedu ihava tila Ondiaboli. Ouladi wavo kaku fi oshinima shopaudalelwa mo, ndele omolwaashi ve na etilofimaneko lokutila Kalunga nohava ‘hondama momudidimbe womavava aye.’ — Epsalme 34:10; 36:8.

⁴ Ovahongwa vaJesus Kristus vonale ovo va li vehe na oumbada ova li ovadiinini fiyo okefyo, nonande opa li omahepeko. Kava li va kwatwa koumbada wokutila osho Satana Ondiaboli a li ta dulu oku va ningila, molwaashi ova li ve shii kutya Jehova iha efa nandenande ovo ve li ovadiinini kuYe. Sha faafana, nokunena Ovakriste ovavaekwa nosho yo oovakwao ovo ve liyapulila Kalunga ova tokola toko okuhaefa po oudiinini wavo kuKalunga, nonande ope na omahepeko a kwata moiti. Ndele nande ongaho, omuyapostoli Paulus okwa ulika kutya Ondiaboli otai dulu oku tu dipaifa. Mbela osho kashi na oku tu ningifa tu kale twa tila?

5. Oshike hatu lihongo mOvaheberi 2:14, 15?

⁵ Paulus okwa ti kutya Jesus okwa li a ninga omunhu ‘wombelela nohonde’ opo “a hanaune po nefyo laye ou a kala e nepangelo lefyo nokutya, oSatana, ye opo a mangulule aveshe ava va li moupika woumbada wefyo mokukalamwenyo kwavo akushe.” (Ovaheberi 2:14, 15) Molwaashi Satana oye “e nepangelo lefyo,” okwa longifa Judas Iskariot nosho yo ovawiliki Ovajuda nOvaroma opo a dipaife Jesus. (Lukas 22:3; Johannes 13:26, 27) Ndelenee okupitila mefyo laye lopayambo, Jesus okwa mangulula ovanhu ovalunde mepangelo laSatana nokwe shi ninga tashi shiiva opo tu kale netimaumbwile lomwenyo waalushe. — Johannes 3:16.

6, 7. Satana oha etifa ngahelipi efyo?

⁶ Ondiaboli ohai etifa ngahelipi efyo? Okudja eshi Satana a ninga omukolokoshi fiyo okunena, oipupulu yaye newiliko laye otai etifa efyo lovanhu. Oipupulu yaSatana oyo ya ningifa Adam a nyone, noshidjemo, Adam okwa tandavelifa oulunde nefyo koludalo laye alishe. (Ovaroma 5:12) Kakele kaasho, ovayambididi vaSatana vokombada yedu ohava hepeke ovalongeli vaJehova, nohave va dipaa nokuli omafimbo amwe, ngaashi ashike va li va dipaa Jesus Kristus.

⁷ Ndele nande ongaho, katu na okudiladila kutya Ondiaboli otai dulu okudipaifa keshe oo ya hala okudipaifa. Kalunga oha amene ovo vaYe noita ka efa nandenande Satana a hanaune po ovalongelikalunga vashili aveshe kombada yedu. (Ovaroma 14:8) Doshili, Jehova oha efa ovapiya vaye aveshe va hepekwe noha efa yo vamwe vomuvo va dipawe omolwomaponokelo Ondiaboli. Ndele nande ongaho, Omishangwa otadi popi kutya ovo va shangwa ‘membo laKalunga lokudimbulukwa’ ove na eteelelo likumwifi lenyumuko, nOndiaboli itai dulu nandenande okuya moshipala enyumuko lavo. — Malakia 3:16; Johannes 5:28, 29; Oilonga 24:15.

Omolwashike Satana ha xwaxwameke ovanhu ve tu hepeke?

8. Omolwashike Ondiaboli hai xwaxwameke ovanhu va hepeke ovapiya vaKalunga?

⁸ Etomheno limwe molwaashi Ondiaboli hai xwaxwameke ovanhu ve tu hepeke tu li ovapiya vaKalunga ovadiinini omolwaashi oya hala oku tu efifa po eitavelo letu. Oya hala okunyona po ekwatafano letu liwa naTate yetu womeulu. Osho kashi na oku tu kumwifa, molwaashi Jehova okwa li a xunganeka moshikunino shaEden kutya opa li tapa ka kala outondwe pokati ‘komwalikadi’ waye wopafaneko ‘neyoka’ nosho yo pokati ‘koludalo’ lomwalikadi noleyoka. (Genesis 3:14, 15) Omishangwa otadi ti kutya Ondiaboli oyo “eyoka likulu” notadi holola yo kutya oi na ehandu linene molwaashi oi na ko okafimbo kaxupi. (Ehololo 12:9, 12) Ofimbo outondwe oo u li pokati ‘komaludalo’ oo avali inau xula po, ovo tava longele Jehova noudiinini ove na okuteelela okuhepekwa. (2 Timoteus 3:12) Mbela ou shii lelalela kutya omolwashike Satana ha xwaxwameke ovanhu ve tu hepeke?

9, 10. Ondiaboli oya etifa po omhata ilipi, nongahelipi oudiinini wovanhu wa pambafana nomhata oyo?

⁹ Ondiaboli oya li ya etifa po omhata i na sha nounamapangelo weshito alishe. Omhata onhivali oyo ya etifwa po kuSatana, ya pambafana naayo younamapangelo, oi na sha noudiinini wovanhu kOmushiti wavo. Satana okwa li a hepeka omulumenhu omuyuki Job. Omolwashike mbela? Omolwaashi Satana okwa li a hala okuteya po oudiinini waJob kuJehova. Pefimbo opo, Ondiaboli oya li ya longifa omukainhu waJob nosho yo ookaume kaye vatatu “ovahekeleki vongaho” okuwanifa po elalakano layo. Ngaashi sha ulikwa membo laJob, Ondiaboli oya li ya shonga Kalunga, ya popya kutya ovanhu itava ka kala ovadiinini kuKalunga ngeenge oya efwa i va yeleke. Ndele Job okwa li a kanyatela oudiinini waye, nokungaha okwa ulika kutya Satana omunaipupulu. (Job 1:8–2:9; 16:2; 27:5; 31:6) Ondiaboli ohai xwaxwameke ovanhu va hepeke Eendombwedi daJehova kunena nelalakano lokuteya po oudiinini wado opo ngeno i shilipaleke epopyo layo.

¹⁰ Molwaashi otu shii kutya Ondiaboli ohai xwaxwameke ovanhu ve tu hepeke nelalakano lokuteya po oudiinini wetu kuKalunga, otashi tu kwafele tu kale twa pama notwa nyatipala. (Deuteronomion 31:6) Kalunga ketu oye Omunamapangelo aeshe note ke tu kwafela tu kanyatele oudiinini wetu. Natu kendabale alushe okuhafifa omutima waye mokukanyatela oudiinini wetu, nokungaha ohatu mu pe omhito a nyamukule omulundili waye munene, Satana Ondiaboli. — Omayeletumbulo 27:11.

“Tu xupifa komunawii”

11. Okwiilikana kutya “ino tu twala momayeleko” osha hala okutya ngahelipi?

¹¹ Kashipu okukala omukanyateli woudiinini; otashi pula okukala hatu ilikana twa mana mo. Eendjovo daJesus domoshihopaenenwa sheilikano odi li ekwafo linene kufye. Oshitukulwa shimwe sheilikano olo otashi ti: “Ino tu twala momayeleko, ndelenee tu xupifa [komunawii, NW].” (Mateus 6:13) Jehova ihe tu yeleke tu nyone. (Jakob 1:13) Ndele omafimbo amwe Omishangwa ohadi mu popi a fa oye ta ningi oinima yonhumba ile a fa oye te i etifa, molwaashi ashike ha efa i ningwe. (Rut 1:20, 21) Onghee hano, mokwiilikana kutya ine tu twala momayeleko, ohatu ilikana ehe tu efe tu liyandje kuo ngeenge hatu yelekwa. Otu na eshilipaleko eli lopamishangwa kutya ite ke tu efa, olo tali ti: “Kalunga Oye omudiinini, ite mu efa mu yelekwe nomayeleko e dule eenghono deni, ndele mumwe neyeleko ota longele yo omhito yokupita mo, opo mu dule oku li humbata.” — 1 Ovakorinto 10:13.

12. Omolwashike tu na okwiilikana hatu ti “tu xupifa komunawii”?

¹² Konima yokutumbula omayeleko moshihopaenenwa sheilikano, Jesus okwa weda ko a ti: “Tu xupifa komunawii.” Omatoloko amwe Eembibeli okwa toloka ediladilo olo taa ti: “Tu xupifa mowii” (Ombibeli yOshikwanyama nEembibeli dOshindonga) ile “Tu amena kowii.” (Contemporary English Version) Ndelenee mOmishangwa outumbulilo “tu xupifa” otau ulike kovanhu, nEvangeli laMateus ola ulika kondadalunde kutya Satana oye “omuhongauli” oo ha yeleke ovanhu. (Mateus 4:3, 11) Onghee hano, osha fimana okwiilikana tu xupifwe “komunawii,” Satana Ondiaboli, molwaashi oha kendabala oku tu ningifa tu nyone koshipala shaKalunga. (1 Ovatessaloniki 3:5) Mokwiindila hatu ti “tu xupifa komunawii,” ohatu pula opo Tate yetu womeulu e tu wilike noku tu kwafele opo tuha findwe kOndiaboli.

Inatu findwa kOndiaboli

13, 14. Omolwashike Ovakriste meongalo lomuKorinto va li va pumbwa okulundulula onghedi omo va li tava ungaunga nomulumenhu wonhumba meongalo oo a li a ya moluhaelo?

¹³ Eshi Paulus a li ta ladipike Ovakriste muKorinto va diminafane po, okwa li e va shangela a ti: “Ndelenee ou tamu mu dimine po sha, naame yo ohandi dimi po; osheshi osho nde shi dima po, ngenge nda li ndi na sha okudima po, onde shi dima po omolweni koshipala shaKristus, opo tu ha findwe kuSatana, osheshi omakoto aye otu a shii.” (2 Ovakorinto 2:10, 11) Ondiaboli otai dulu oku tu finda meenghedi di lili noku lili. Ndele omolwashike Paulus a li a ladipika Ovakriste vakwao vaha findwe kOndiaboli?

¹⁴ Paulus okwa li a hanyena eongalo lomuKorinto molwaashi kala li la katukila onghatu omulumenhu wonhumba oo a li a ya moluhaelo. Nopehe na omalimbililo, okuhakatukila onghatu omulumenhu oo okwa li kwa hafifa Satana, molwaashi okwa li taku shekifa eongalo olo omolwokulipwililikila ‘oluhaelo olo ihali monika nomovapaani.’ Hauxuuninwa, omunyoni oo okwa li a kondwa mo meongalo. (1 Ovakorinto 5:1-5, 11-13) Konima yefimbo, omulumenhu oo okwe ke livela ombedi. Ngeno eongalo lomuKorinto ola li la anya oku mu dimina po nokweefa a alukile meongalo, ngeno Ondiaboli oye li finda monghedi imwe vali. Ngahelipi mbela? Ngeno ova ninga ovakwanyanya novehe na onghenda, ngaashi Satana. Ngeno omulumenhu oo e livela ombedi okwa ‘ninginine moluhodi linene,’ ndele ta sholola filufilu, ovakulunhuongalo ngeno ovo unene va kala ve na ondjo koshipala shaJehova Kalunga omunefilonghenda. (2 Ovakorinto 2:7; Jakob 2:13; 3:1) Tu li Ovakriste vashili inatu hopaenena nandenande oikala yaSatana yonyanya noyokuhenonghenda.

Otwa amenwa koilwifo oyo twa pewa kuKalunga

15. Otu li molwoodi la tya ngahelipi, nokufindana kwetu molwoodi olo okwe likolelela kushike?

¹⁵ Ngeenge otwa hala okuxupifwa komunawii, otu na okukondjifa eemhepo dowii molwoodi letu lopamhepo. Okufindana kwetu molwoodi olo okwe likolelela kokudjala kwetu “oilwifo aishe yaKalunga.” (Ovaefeso 6:11-18) Shimwe shomoilwifo oyo osho “oipapa yoivela youyuki.” (Ovaefeso 6:14) Ohamba Saul yaIsrael shonale kaya li ya dulika kuKalunga nomolwaasho Kalunga okwa li e i kufa omhepo yaye iyapuki. (1 Samuel 15:22, 23) Mepingafano naasho, ngeenge otwa kala hatu diinine ouyuki notwa djala oilwifo aishe yopamhepo, Kalunga ota ka twikila oku tu pa omhepo yaye iyapuki noku tu amena kuSatana nokovaengeli vaye ovakolokoshi, eendemoni. — Omayeletumbulo 18:10.

16. Ongahelipi hatu dulu okwaamenwa keemhepo dowii?

¹⁶ Onghedi imwe omo hatu dulu okukala twa amenwa keemhepo dowii okukala hatu lesha Eendjovo daKalunga noku di konakona pandjikilile, hatu longifa nawa oishangomwa oyo hatu pewa okupitila ‘melenga lidiinini.’ (Lukas 12:42) Kungaha, ohatu ka yadifa omadiladilo etu noinima yopamhepo tai tungu, ngaashi Paulus e tu ladipika a ti: “Ovamwatate, ashishe osho shoshili, naasho sha fimana, naasho sha yuka, naasho sha koshoka, naasho shi holike, naasho shi netumbalo liwa, ongenge onghedi iwa ile epandulo, ei aishe i diladileni.” — Ovafilippi 4:8.

17. Oshike tashi ke tu kwafela tu kale ovaudifi vonghundana iwa ovanekeka?

¹⁷ Jehova ohe tu kwafele tu ‘ninge evangeli lombili eenghaku keemhadi detu.’ (Ovaefeso 6:15) Okukufa ombinga mokwoongala kwopaKriste pandjikilile ohaku tu longekida tu ka udife onghundana iwa yOuhamba waKalunga. Ihashi tu hafifa tuu okukwafela vamwe ve lihonge oshili kombinga yaKalunga ndele tava kala va manguluka pamhepo! (Johannes 8:32) Oshilwifo sha fimanenena mokukondjifa omahongo oipupulu ‘nokuhanauna po eenguluhote’ osho ‘eongamukonda lomhepo, sha hala kutya, eendjovo daKalunga.’ (Ovaefeso 6:17; 2 Ovakorinto 10:4, 5) Okulongifa noukeka Eendjovo daKalunga, Ombibeli, ohaku tu kwafele tu honge oshili nohaku tu amene tuha yulwe komakonda Ondiaboli.

18. Ongahelipi hatu dulu “okufikamena omakonda omuyelani”?

¹⁸ Paulus okwa li a hovela eenghundafana daye di na sha noilwifo yetu yopamhepo neendjovo edi tadi ti: “Lipamekeni mOmwene nomeenghono domepangelonghono laye. Lidikeni oilwifo aishe yaKalunga, opo mu dule okufikamena omakonda omuyelani.” (Ovaefeso 6:10, 11) Oshitya shOshigreka osho sha tolokwa “okufikamena” osha pambafana nokufikama kwomukwaita e li molwoodi. Ohatu ka kala twa fikama twa pama moita yetu yopamhepo, nonande Satana oku longife omakonda e lili noku lili meenghendabala daye dokunyona po oukumwe wetu, okunyateka omahongo etu ile okuteya po oudiinini wetu kuKalunga. Omaponokelo Ondiaboli inaa pondola sha fiyo opapa, noitaa ka pondola nandenande.a

Natu kondjifeni Satana, ndele te tu i onhapo

19. Onghedi imwe ilipi omo hatu dulu okukondjifa Satana?

¹⁹ Ohatu dulu okufindana moita yetu yopamhepo yokukondjifa Ondiaboli neemhepo daye dowii. Katu na etomheno lokukala twa tila Satana, molwaashi omuhongwa Jakob okwa shanga a ti: “Dulikeni . . . kuKalunga, kondjifeni Satana, ndele ye te mu i onhapo.” (Jakob 4:7) Onghedi imwe omo hatu dulu okukondjifa Satana neemhepo daye dowii omokuhakufa nandenande ombinga moinima i na sha noumhulile nosho yo mokuhaendafana naavo hava kufa ombinga muo. Omishangwa oda ulika sha yela kutya ovapiya vaJehova kave na okukufa ombinga mokuteya oipo, okuxunganeka mokutala keenyofi ile okukufa ombinga moumhulile ile moundudu. Ngeenge otwa pama pamhepo, inatu pumbwa okukala twa tila okulowa. — Numeri 23:23; Deuteronomion 18:10-12; Jesaja 47:12-15; Oilonga 19:18-20.

20. Ongahelipi hatu dulu okukondjifa Ondiaboli?

²⁰ Ohatu ‘kondjifa Satana’ mokudiinina omifikamhango noshili yOmbibeli. Ounyuni ohau hopaenene oikala yaSatana, molwaashi oye kalunga kao. (2 Ovakorinto 4:4) Onghee hano, otu na okweekelashi oikala younyuni, ngaashi ounhwa, ohole yokulihola mwene, oluhaelo, elongifo leenghono nosho yo ohole yokuhola omaliko. Otu shi shii kutya Ondiaboli okwa li ya ya onhapo eshi Jesus a li e i kondjifa mokutofa mOmishangwa eshi ya li tai mu yeleke mombuwa. (Mateus 4:4, 7, 10, 11) Sha faafana, Satana ote ke ‘tu ya onhapo’ ngeenge otwa kala hatu dulika filufilu kuJehova nongeenge ohatu ilikana kuYe nelineekelo. (Ovaefeso 6:18) Omolwekwafo laJehova Kalunga nOmona waye omuholike, kape na oo ta dulu oku tu etela owii tau kalelele, nokuli nande Ondiaboli. — Epsalme 91:9-11.

[Eshangelo lopedu]

Oto nyamukula ngahelipi?

• Mbela otu na okukala twa tila Satana Ondiaboli?

• Omolwashike Satana ha xwaxwameke ovanhu va hepeke Ovakriste?

• Omolwashike tu na okwiilikana tu xupifwe “komunawii”?

• Ongahelipi hatu dulu okufindana molwoodi letu lopamhepo?

[Efano pepandja 8]

Ovashikuli vaKristus vonale ovo va li vehe na oumbada ova li ovadiinini fiyo okefyo

[Efano pepandja 9]

Ondiaboli itai dulu nandenande okuya moshipala enyumuko laavo ve li medimbuluko laJehova

[Efano pepandja 10]

Mbela oho ilikana u xupifwe “komunawii”?

[Efano pepandja 11]

Mbela owa djala “oilwifo aishe yaKalunga”?